Dagbok 2018: 31.juli

Klokka er 18.20, temperaturen er + 20 grader C  og vi fekk endeleg regn. Det var behov for vatning, men håper å sjå sla att SNART ! Eg har mykje eg kan gjere inne, men likar meg best ute.
I dag er vi komne til siste dagen i jule, og det er alltid litt vemodig, heldigvis slepp eg å begynne på jobb igjen, som så mange andre.
Sist natt sov eg godt å lenge, slik ein ofte gjer etter fysisk arbeid, og i går var eg skikkeleg sliten. I dag hadde eg planar om brødbakst, og så skin sola som aldri før. Sette no i gang med baksten likevel sidan eg skulle bruke opp "gammal" melk. Det vart seks gode, grove brød. Berre dei no ikkje smuldrar opp, slik brøda gjorde sist eg bakte og hadde for mykje grovt i. Sidan eg sjeldan lagar vanleg middag blir det ganske mykje brød som går med, men når eg snart skal ta opp potetene mine, må eg vel venje meg til å ete poteter igjen.....?
Var ute og vatna litt med slangen sjølv om eg trudde regnet kom. Prata litt med ein nabo, fleire har eg ikkje sett i dag.
Seinare var eg ute og rydda under dei to bærbuskane mine, tok vekk plengras som eg hadde lagt bortunder og la på fin fersk kjøpemold, ein prydbusk fekk også litt svart jord på føtene. Det såg fint ut. Stikkelsbæra held på å modne så no har eg dei å ete på. Ev. plukke. Eg finn alltid noko å styre med ute.Og eg planlegg stadig nye prosjekt.
Då eg kom inn att la eg meg på senga her på "datarommet" med ei lydbok som ikkje fenger i det heile tatt, og dei andre får eg ikkje til å rippe. Må visst lese litt på papir i staden.
Strikka ferdig eit lestepar i går kveld, så eg kan ev. begynne på eit par til. Garn har eg, men eg strikkar berre når eg ser TV.
Dette vart mykje prat om ingen ting, men det er ikkje alle dagar det skjer så mykje. I går kveld fekk eg besøk av Birte og Håkon etter at eg hadde skrive blogg.

Dagbok 2018: 30.juli

Klokka er 18.50, temperaturen er +22 grader C, tidlegare i dag har den lagt jamt på 30 grader, no kjennest det nesten litt kjøleg ut.
Marit sende melding om at ho skulle handle og eg kunne få vere med. Vi for nedover litt før 11. Ho skulle på apoteket, så i dag handla eg mat på Bunnpris sidan vi var på Amfi.
Då vi kom opp att begynte eg å klippe skråninga, måtte ha ein drikkepause innimellom før eg gjorde meg ferdig. 
Eg måtte ha meg litt mat, og etter at eg hadde ete gjekk eg ut att og klipte opp mot gata før eg tok fram kompostkverna og mol opp ripsgreinene frå i går. Til slutt klipte eg rundt huset. Det går meg mykje drikke slike dagar, men klipparen treng ikkje så mykje bensin at DET gjer noko. Kom inn att og låg på dagsenga ei stund-men då kom krampen i beina. Måtte ligge ei stund før eg orka å dusje, men no er det også gjort.
På Amfi i dag trefte vi ei av venninnene til Marit, ei som bur på Ose. Der borte hadde det regna, men ikkje ein drope her i dag. Same kor sveitt og tørst eg blir slike dagar så nyt eg å vere ute. Det blir tidsnok haust, vinter og innevêr. Det har forresten ikkje vore så mykje sol i dag.

Dagbok 2018: 29.juli. Olsok

Denne blomsten fekk eg av Anne Elise, den er veldig fin der den står på trappa vår.

Denne blomsten fekk eg av ein nabo då Nils døde. Etter at den hadde blomstra frå seg ikkje, sette eg den ut, og no har den blomstra for andre gong. Har slike blomster frå før, som har kome att gong på gong.

Eg har tre sortar Klematis. I fjor vart den eine (mørk lilleblå) sjuk, så eg klipte alle tre heilt ned til rota, no har dei vakse opp att  og to av dei blomstrar-så langt.

Eg greidde ikkje å halde fingrane av fatet i dag heller, eg gjekk ut og plukka rips, på samme tid som eg stussa buska. No har eg jobba med den buska i to dagar, så i morgon skal eg berre kverne opp greinene og finklippe så buska ser litt meir symmetrisk ut. Ripsen skal Solveig få til saft. Før brukte eg å klippe bærbuskane kvart år, men eg trur ikkje det vart i fjor.

Klokka er no 18.00, temperaturen er ca. + 27 grader C, så det har ikkje vore så varmt som i går. Heldigvis hadde det regna godt i natt, så det vart friskt og fint i dag. + 27 grader er heilt OK for meg, men i går då termometeret bikka + 36 var det for varmt for dei fleste. Eg sat borte på altanen til Solveig og Gudmund til klokka var ca. 1.00. Det er sjeldan ein kan sitte ute om kveldane om sommaren her på desse kantar utan å fryse.

I dag før middag var det litt skya, så då fekk eg vaska golva. Elles har eg lege på solsenga og lese lydbok, men har så vanskeleg for å konsentrere med at eg les om att og om att det same. No har eg lese tre bøker på papir, og det er enklare. Fann fram ei papirbok som eg begynte på, men kom ikkje så langt. Eg er for rastlaus til å lese heile dagen, derfor måtte eg ut i hagen og jobbe litt. Ser lite til naboane i dag, dei er vel ute på turar, dei fleste, men eg klarer meg godt her heime åleine.

No skal eg snart lege meg middag; i dag blir det wienerpølser i Taco-lefse. Det er ein rett som eg har funne på sjølv.

Dagbok 2018: 28.juli

Klokka er no 19.30. det er lettskya og + 31 grader C. I dag er alle varmerekordar i Ørsta slått. Den offisielle varmerekorden for Ørsta var tidlegare + 32 grader C, no er den nye rekorden, målt på Velle 33,1 grader. Men det er på Velle. Både eg og mange andre har i dag målt temperaturar opp i + 36 grader i dag. Og det er heitt.
På føremiddagen sat Marit og eg ei stund i skuggen ovafor huset vårt og prata.
Då det leid på dag og det vart varmare, var eg inne på tanken å leige Taxi ut på Rjåneset, men fann ut at det vart for ekstravagant, så eg begynte å plukke rips i staden. Sat på ein stol attmed den einaste ripsbuska mi. Plukka først litt dessertrips og så ein balje med safterips til Solveig. Eg har alltid brukt å klippe ganske mange greiner av buska når eg plukkar. Vi brukte å legge greinene på hagebordet å plukke bæra der. No har eg ikkje hagebord! Eg har ikkje plukka halvparten av bæra enno, men heldt no på i to-tre timar. Etterpå mol eg greinene på kompostkverna og rydda opp med grasklipparen. Då var klokka 16.30 og eg måtte ha mat- og drikke. No har eg lege og halvsove på dagsenga på datarommet ei heil stund. Har høyrt på ei lydbok, men trur eg må ha ein repetisjon. Har dessverre fått vondt i hofta igjen, den var bra før eg jobba, så eg håper eg kjem meg til att. Det som er irriterande er at det er vondt å sitte. Kneet er bra berre eg er i ro.
På føremiddagen var vi ganske mødde av varmen, men Nils sa alltid at det var verst før ein fekk "løyse sveitten"- og det er noko i det. Ser at mange hageplantar er tørste og lengtar etter vatn, så ei skikkeleg toreflo hadde gjort seg.
Det er så lite skilnad på helg og yrke når ein ikkje er i jobb, så også denne veka gløymde eg å ønske alle GOD HELG. Håper det ikkje er for seint.

Dagbok 2018: 27.juli

Klokka er no 19.45 og gradestokken har pitla seg ned att på 30-talet, tidlegare var temperaturen på trappa vår +34 grader, og der er det skygge heile dagen.
Det er ikkje ofte eg er plaga av varme, men i dag måtte eg gå inn ei stund, og ei stund sat eg ute i lag med Marit-i skyggen. Eg rigga meg til med solseng på altanen, fann fram den gamle vifta vår, som vi kalla "Utrøna" (vinden som kjem på ettermiddagen). Vi kjøpte den ein gong for mange år sidan då Nils og eg likte å ligge å sole oss på altanen. Seinare vart den brukt til å halde flugene borte når det hang fisk i garasjen. No stod den nedestøva i tilbygget, så eg måtte vaske den før bruk. Men eg greidde ikkje å ligge der likevel, då det var på det varmaste. Blikk stilt og +34 grader trur eg ikkje eg har opplevd før her på Vallabøen. I gamle dagar brukte vi å køyre ut på Rjåneset og badet når det var så heitt, men jammen er det lenge sidan det har vore så varmt som i dag. Eg kom på no når det leid mot kveld at eg kunne prøvd å gå inn i "Kulpen" og kjølt meg av, men der er vel ikkje vatn?
Eg vatna litt i hage før middag og luka litt, resten av dagen har eg ikkje gjort noko. Anna enn å lese ut ei bok.

Bok nr.24 - 2018: Paradisbakken

Det er nesten 25 år siden Camilla Carlsen ble funnet drept ved stien i det lille skogsområdet midt i Paradisbakken. Saken ble aldri oppklart. Nå gjør Drammens-politiet en ny gjennomgang i håp om at de med nye øyne og nye metoder skal finne en løsning på saken. Camillas beste venninner har alle vært inne til avhør på nytt; nå møtes de på et utested for å diskutere opplevelsen og minnene fra den gang.
Ved baren står en mann og kaster lange blikk mot May, en av venninnene. May går ut for å ta en røyk, mannen følger etter. Morgenen etter blir hun funnet drept i et utstillingsvindu. Måten liket er plassert på forteller at drapspersonen vil sende en beskjed. Politietterforskerne Bitte Røed og Verner Jacobsen må forfølge både fortidens spøkelser og nåtidens ferskere spor. .
…………………………………………………………………………………………………
No har eg lese ut den siste av dei tre krimbøkene av Marit Reiersgård, og eg likte alle tre, sjølv om denne siste vart litt i lengste laget for meg, med sine 400 sider. Men sidan det ikkje var stort anna eg kunne gjere i dag, tok eg meg på tak og las den ferdig. Veldig kjekt å lese bøkene fortløpande i rette rekkefølga. Forfattaren har fått god kritikk for alle bøkene, så det kjem sikkert fleire i samme seiren.

Dagbok 2018: 26.juli

Klokka er 21.45, temperaturen er + 19 grader. Vi har ikkje sola no lenger-i kveld-men ho har vore på himmelen i heile dag. Det har vore varmt og fint.
I dag har eg ikkje vore så aktiv, rydda og styrte litt ute tidleg på dag, men var ikkje heilt i form; var dårleg i magen og kvalm. No er eg heilt bra igjen, så det var nok det litt spesielle kosthaldet mitt i går som får ta skulda.
Solveig kom innom, ho hadde køyrt Olaug på flyet , ho skulle til Bergen. Ho skal flytte til ein annan hybel i byen.
Solveig og Øystein skal ein tur til Italia, så då blir der ikkje att mange heime på Hareid. Birte og Håkon har vore i Gdansk på ferie. Solveig fekk melding frå Audun om at han kjem heim ein tur. 
Ja, eg får bryne hjernecellene på å halde greie på kvar alle er.
Solveig hadde med seg heimebakte bollar og heimelaga syltetøy. I byte fekk ho ein sekk med kverna  kvistar som ho skal ha i komposten sin! Og nokre tomme sylteglas.
Ho hadde vore på biblio og lånt bøker til meg, men dei nyaste bøkene får eg ikkje rippa utan å legge til program på maskina. Akkurat slike ting likar eg ikkje å gjere, er redd for å gjere noko som blir feil, slik at eg får trøbbel. Eg held på med den tredje papirboka på kort tid, men den er tjukkare enn dei andre to, denne er på 400 sider, så det er ikkje gjort på ein dag. Kva som eventuelt skjer i morgon veit eg ikkje, men eg må i alle fall sette ut bossdunken i kveld, og den er full. Det blir mykje boss no framover, for eg har diverse eg skal kvitte meg med. Vi har boss-henting annakvar veke-så det er godt fredagane kjem så ofte som dei gjer.

Dagbok 2018: 25.juli

Mai-brud 

Klokka er 19.05, temperaturen +19 grader C, det er lettskya og opphaldsvêr. Fint arbeidsvêr. Eg kom nettopp inn etter ei økt i hagen. Skulle stusse perlebusken litt, den eg kallar brura, men eg har ein lei vane når eg skal beskjere busker og tre, at det meste går med. Slik vart det i dag også-ikkje mykje att av brudestasen. Trur eg må kjøpe ein ny busk-det gjer vel ikkje noko om ein har to?
I dag starta eg dagen med å vaske og rydde det høge skapet på kjøkkenet. Rasmus og eg var på Clas og kjøpte ei ny gardintrapp då dei var her, den gamle har vore brukt ute, så den vil eg ikkje ha i hus. Med ny trapp rakk eg opp på øvste hylla og fekk litt orden på sakene.
Margrete sende melding om at ho var i nærleiken og ville komme oppom, og det gjorde ho. Det blei ein kaffikopp og ikkje så mykje anna. 
I det ho skulle fare kom Helge, det var avtalt at han skulle komme og ordne med TV-tilgangen i kjellaren. Han fekk stort sett styre på i fred, mens eg dreiv med hagearbeid. Eg fekk endeleg jamna ut i skråninga og sått grasfrø, så får vi håpe dei spirer. Etter at eg hadde klipt buska, var det fram med kompostkverna, og etter det for eg over med klipparen og samla rusk. så vart det ein slags arbeidsdag i dag. Helge vart ikkje heilt ferdig, så han kjem att ein annan dag.
Når eg held på å jobbe anten det er ute eller inne, kjenner eg ingen ting i hofta, det er å sitte som er vondt-ganske irriterande, men ikkje verdens undergang. Sist natt var det såpass vondt at eg ikkje fekk sove, før eg stod opp i 3-tida og tok smertestillande. Etterpå sov eg godt heilt til klokka var 9. Eg åt litt ista, men må visst ha litt meir mat i kveld. Eg blir svolten av utearbeid. Og eg likar alt-med unntak av å plukke bær.

Dagbok 2018: 24.juli

Klokka er 20.00, temperaturen ute er + 20 grader C. No skin sola meir og mindre, men i dag har det regna.Og det er bra, Håper både gras og blomster har fått det dei treng denne gongen, slik at vi kan sleppe sola fram igjen.
I dag kan eg ikkje skryte av å ha gjort noko som helst, i dag har eg hatt ferie! Og stort sett berre lata meg.    
Før middag var Marit og eg nedover og handla på AMFI og på Spar. Då vi kom heim vart vi sittande i bilen og prate til klokka var 14.30. Så var eg svolten og måtte ha meg litt mat. Hadde kjøpt med meg diverse som vart eit godt måltid til slutt. Eg får kalle det ein slags salat.
Så prøvde eg å legge meg på sofaen og lese. Eg er ikkje trøtt om morgonen og ikkje om kvelden, men midt på dagen har eg lett for å dette ut. Så det vart ikkje mykje lese.
Så var eg opp til Marit og fekk nysteikte vaflar -og same kor mykje vi pratar går vi visst aldri tomme for stoff. Ho har også vore åleine nokre dagar, men no kom Stian heim att, så då har ho litt selskap.
Eg har tusen ting eg skal gjere innadørs, men det freistar ikkje, eg vil helst vere ute, men i dag vart ingen ting gjort. Viss det blir opplett i morgon får eg kanskje sådd til den nakne flekken, molda må no ha sige litt i hop no etter regnet.

Dagbok 2018: 23.juli.

Klokka er 20.10, temperaturen er + 19 grader og det kom nokre få regndropar då Marit og eg kom heim frå "tur"- vi gjekk ut Starevegen, sat ei stund på benken og så gjekk vi heim att. Begge gjekk vi med stav. Ja, vi er ikkje så unge som vi var ein gong, men vi har det kjekt i lag. Akkurat no er vi heime åleine begge to, men det skulle eg kanskje ikkje skrive på bloggen.

I dag hadde eg planlagt å klippe plenane sidan det er meldt regn i morgon, så programmet for føremiddagen var lagt. Eg fekk klipt heile tomta. Etterpå åt eg grauten som var att frå i går. Sidan eg har litt problem med å sitte så lenge om gongen, la eg meg inn på datarommet med ei bok. Og der sovna eg sjølvsagt og sov både vel og lenge. 

Etterpå gjekk eg ut og gjorde meir hagearbeid. I dag tok eg i bruk kompostkverna for første gong i år. Fjerna nesten all krypmistelen rundt  rododendronane og mol opp. Så neste gong Solveig kjem, kan ho få mat til komposten sin. Eg må kjøpe nokre sekker med bark og pynte opp med. Ja, har ein hus og hage blir ein aldri arbeidslaus, og det vil eg heller ikkje bli. Det verste med hagearbeidet er at eg blir så svolten.

I morgon har Marit og eg tenkt oss til Vik og handle litt. Eg er heldig som har venninne med bil. 

Dagbok 2018: 22.juli- Rosedagen

 Klokka er no 19.30.Temperaturen ute eg + 21 grader C. Det var fint frå morgonen av og eit stykke ut på dagen, men så skya det over. Regn har vi ikkje hatt.

Søndag er ikkje den kjekkaste dagen når ein er heime åleine. Då får eg ikkje gruffe på ute. Derfor vaska eg og rydda kjøleskapet i dag-det var eit skrikande behov, og så shina eg opp resten av kjøkkenet også. Og badet. Elles så sat eg oppe på platten med Marit og prata ei stund, ho var også heime åleine, men så for sola.

Eg har lese ut papirboka som eg heldt på med, det tok si tid, sidan det var ei fluge som eg ikkje fekk tatt knekken på- ho plaga meg heile tida. 

I dag laga eg middag til meg sjølv-eller middag? Eg kokte rømmegraut. Eg hadde eit halvt beger med seterrømme og ein skvett kremfløte. Eg åt meg godt mett, og har mat i morgon også. Eg likar ikkje å kaste mat, så eg prøver å bruke opp det eg har fått i hus, men det er ikkje alltid like lett.

Eg har høyrt rykte om at der har regna i Ulsteinvik, så eg tenkte vi kunne få ein skvett vi også. Eg har ikkje vore så mykje ute i hagen i dag, men i morgon må eg vel slå. Det ser eg fram til.

Har lagt opp eit lestebrot så eg har litt å strikke på viss eg ser TV. Men det har ikkje vore så mykje av interesse for meg i seinare tid, så då har eg heller lese bok. Skal begynne på den tredje papirboka i kveld.

Bok nr. 23 - 2018: Jenta uten hjerte

To mysterier, onde intriger og skjebnesvangre fortielser. Politietterforsker Verner Jacobsen ligger søvnløs.- dagen etter skal han begrave sitt eneste barn, en sønn død av kreft. Telefonen ringer, 14-årige Idunn Olsen er funnet drept i snøen ved den store obelisken ved steinbruddet i Lier. Mens Verner er på åstedet, får han melding om at bårebilen med sønnens kiste er stjålet og på vidvanke. Og snart begynner de første avhørene. Idunn hadde vært på vei fra en ungdomsfest dit politiet var innkalt. Ungdommene er merkelig tause om det som skjedde. Men blålysene går også i en annen retning denne tidlige vintermorgenen. Et hus like i nærheten av åstedet er nedbrent, og en eldre dame er omkommet. To mysterier, onde intriger og intense følelser i konflikt, en sak der etterforskerne Verner Jacobsen og Bitte Røed vil trenge all sin dristighet og dype innsikt i menneskesinnets irrganger. 
…………………………………………………………………………………………….
Då har eg lese ferdig nr.2 av tre papirbøker av samme forfattar. Veldig kjekt å lese bøkene kronologisk sidan det alltid er ei historie ved sidan av mordgåtene-nemleg privatlivet til etterforskarane. Eg likte denne boka enda betre enn den første. Boka er  "i tida" den viser korleis mobbing blant ungdom kan utarte, blant anna, og ikkje minst kor viktig det er for dei som veks opp å ha ein trygg og god heim. Meir kan eg ikkje røpe. Marit har no fått låne nr.1 og eg skal til på nr.3, og når vi begge har lese alle tre har vi samtalegrunnlag ganske lenge. Trur eg.

Dagbok 2018: 21.juli

Klokka er no 20.40. Temperaturen er + 23 grader og det har vore enda ein fin dag, med sol, litt skyer og litt vind på ettermiddagen. Akkurat slik ein sommardag skal vere. Ser at mange av dei eg kjenner reiser på turar eller går på fjelltoppar rundt omkring. Eg kjem meg ikkje så langt for eiga maskin, men kosar meg heime i hus og hage. Eg har det veldig bra.

I dag har eg ikkje gjort så veldig mykje akkurat. Litt rydding, klesvask etc. blir det alltid, men det er ikkje så mykje når ein bur åleine. 

Solveig og Øystein kom innover og henta bilen min, Audun skal låne den nokre veker. Eg laga røre og steikte sveler til dei kom. Så det vart "sveler til middag"-som han sa Ingar når eg spurde kva vi skulle ha. Øystein reiste ut att med min bil, Solveig vart att, så vi tok ein liten tur på nærbutikken og på grava. Blomstrane som Margrete og eg hadde pynta med var fullt brukbare enno, så vi kjøpte ikkje noko nytt. 

Eg vart ståande ei stund å prate med Marit, og så vart det ei lang stund på solsenga med papirbok -og litt søvn innimellom. Når eg får ein liten blund på dagtid, kan eg vere oppe så lenge eg vil !

Klokka 19.30 gjekk eg ut i hagen og jobba ein times tid.; vatna, hadde utover ein sekk mold (Solveig kom med tre sekker) tok vekk sen frå jordbæråkeren etc. etc. Eg likar å styre på ute, men det er ein ting eg ikkje likar og det er å plukke rips. Ikkje har eg hatt not over den einaste buska mi heller, så det blir vel fuglane som fer med det meste. Det spørs i morgon...….viss eg skal ha litt stillferdig arbeid på søndag?

Eg får ønske alle fortsatt god helg sidan eg gløymde det i går.

Margrete & Co har vore på Malakoff-festivalen to kveldar, veit ikkje om dei er ferdige no. Det har no vakse seg til eit enormt arrangement etter kvart. Men for gamle damer som nærmar seg 80? - det toget er gått. 

Marit og eg snakkar ofte om den tida vi gjekk i samme klasse på Eid gymnas, då var det stort sett berre kino som var noko "å gå på" på Eid. Vi hamna på kva si side av gata her i Ørsta etter mange utan kontakt. Det rare er at vi har vore naboar før også, første året på gymnas budde Marit hos Sørum, rett over vegen frå der vi budde, men så flytta ho ned i Alleen til Anna Os, som var enke etter broren til bestefar, og det var ikkje langt frå besteforeldra mine.

Dagbok 2018: 20.juli

Klokka er 22.50, temperaturen er + 17 grader og vi har hatt enda ein fin dag.
I dag kan eg ikkje skryte av å ha gjort så mykje. Har vatna litt i hagen, klipt litt kantar etc.og så låg eg og las og sov på altanen ei stund.
Måtte ladde opp til kvelden og den store filmpremieren med  "Mama mia-here we go again". Marit hadde ordna med billettar og ho køyrde. Vi trefte mange andre venninner på vår eigen alder, og vi konkluderte med at over 90 % av publikum var kvinner i alle aldrar, med hovudvekt på dei eldste og dei yngste. Eg har sett den første ABBA-filmen på TV og var sånn måtelig begeistra, så forventningane mine var ikkje skyhøge. Dessutan plagar den høge lyden meg kvar gong eg er på kino.
Men eg trur alle kosa seg i kinosalen i kveld. Filmen inneheldt ikkje så mange kleine historier, hovudvekta var på musikk, dans og show. Det var full rulle heile tida. Vi fekk sjå att dei tre fedrane som ikkje hadde tapt seg så mykje, og så kom bestemor Cher og song til /om Fernando. Jau, dette var fest, fart og humør. (Det ligg mange "trailarar" på nettet for di som vil sjå.) Mange av songane hadde eg ikkje høyrt før, men der var også mange av dei mest kjende. Heile filmen var eigentleg eit show-til å bli i godt humør av.
No skal eg finne meg litt mat, og så treng eg ikkje legge meg på lenge enno. No har eg sove skikkeleg i to netter+ at eg har sove på altanen, så det står ikkje på.

Dagbok 2018: 19.juli

Klokka er 20.10, temperaturen ute er + 20 grader C , det har vore sol og fint vêr i heile dag. Regnet som kom i går gjorde godt, men vætte ikkje langt ned i jorda.
I dag kan eg ikkje skryte av å ha gjort så mykje verken i hus eller hage.
Det første eg gjorde var faktisk å reinske opp i omnen og ta ut oska. Det har blitt brent litt rusk og rask der siste tida, så det trongst ein rens. Så var eg ute og fekk graset som låg fritt, opp i den nye "beholderen"-der det skal vere berre gras og ikkje anna rusk. Så har eg litt gjødsel til neste år, om eg treng det då. Prata litt med ei venninne i telefonen og gjekk her og rusla til Audun melde at han skulle komme i 14-tida. Då kledde eg meg om og venta på han.
Eg hadde lagt planar. Først skulle vi fylle bensin på bilen MIN og så skulle vi i Furene og handle etc. Eg tenkte vi kunne ete kinamat i Volda, men med det same vi skulle gå inn fekk eg eit flash back: Kinesarane har sommarferie ! Og det stemte. Det samme skjedde ein gong Nils og eg hadde gledd oss til kinamat.
Men eg skulle handle på Coop i Furene, og der er det også kafé. Men, som eg sa til Audun,: I Ørsta er torsdag ballj-dag. Og det var det. Og om torsdagane går dei gamle i Ørsta på kafé, og det stemte også.
Vi kunne fått anna mat om vi ville, men Audun ville ha ballj-så det blei det. Det var liten skilnad i pris på liten og stor porsjon, så eg bestilte like godt to store. No kan eg ete utruleg mykje viss det røyner på, men dette vart altså nok. To ballar høyrest ikkje så mykje ut for meg, men det var storleiken på dei som var utslagsgivande. Men maten var i alle fall, betre enn eg hadde frykta. Vi fekk melk til, og kunne fått kaffi etterpå, men kaffien fekk vente til vi kom heim. Eg handla på Coop-bunkra opp med brus og syltetøy. Så var vi innom AMFI og apoteket på heimvegen.
Etter at Audun hadde reist la eg meg ut på altanen med bok og pledd og sovna. Så no kan det hende eg greier å halde meg vaken utover kvelden. Eg fekk sjokk då eg såg at klokka var 8, men eg såg ikkje på klokka då Audun for, så eg veit ikkje kor lenge eg var ute. I alle fall vart det etter kvart kald vind.
I morgon skal Marit og eg på kino. Margrete, Svein og Erlend er på Malakoff. Det var i Malakoff vi leika den tida eg budde på Sandplassen på Eid. Og no er området blitt festivalområde-eller kva eg skal kalle det. Litt rart å tenke på.

Øvst oppe ser de Olaug Marie d.e. Her er Olaug Marie d.y. i ny genser som mora har strikka. Solveig strikkar den eine genseren føre og den andre etter. Eg forstår ikkje korleis ho får tid til det. Bildet er tatt på Flø.

Bok nr. 22-2018: Stolpesnø.

Det er 25. januar, det snør tett. Brøytebilen dundrer langs de smale veiene i Lier utenfor Drammen. Fem år gamle Oda tar på seg den rosa parkdressen og går ut for å ake. Hun kommer ikke inn igjen til middag, hun er sporløst borte. I nabohuset tyvlåner unggutten Raimo morens bil for å kjøre til den kvinnelige tegnelæreren sin. Han finner henne kvalt, og tilsynelatende voldtatt. Likevel velger Raimo å holde munn om det han ser.Hvilke hemmeligheter er det som skjuler seg i vintermørket?Politietterforskerne Bitte Røed og Verner Jacobsen begynner det vanskelige arbeidet med å avhøre mennesker på et lite tettsted. Alle kjenner hverandre, alle vet noe. Og alle ønsker noe mer for livene sine.
…………………………………………………………………………
Denne boka har eg lese på papir, det var gjort på to dagar. Med andre ord så les ein fortare på papir enn på lydbok. Aberet er berre at ein får ikkje gjort noko anna på samme tid, som t.d. å strikke og så blir augo trøytte etter kvart. Hadde ikkje tenkt å stresse, men då det nærma seg slutten kunne eg ikkje legge boka bort. Det var Margrete som kom med tre bøker av denne forfattaren, og no skal eg lese dei fortløpande. Det er ein fordel, så slepp eg å sette meg inn i eit heilt nytt persongalleri for kvar bok. Boka var god, ikkje typisk krim med heltar og skurkar, men vanlege menneske som feilar.
Viss ein likar bøkene til Karin Fossum så er desse i samme sjangeren. Boka har fått terningkast 5 og det fortener den.

Dagbok 2018: 18.juli

Leonardo da Vinci trivst her hos oss.

Klokka er 17.30, temperaturen er + 19 grader C. Tidleg på dag var det fint og varmt, men så kom det er tirebye og friska opp. Regna gjorde det også, men ikkje så mykje at det vart særleg vått i jorda. Men litt er betre enn ingenting.
I dag begynte eg arbeidsdagen med å bryte sund ein del isoporplater og ha dei i sekker. Tre fulle bossekker vart det. Brukte saga også-ikkje motor-men handsag. Det vart LITT ryddigare under altanen, men sidan nesten alle reiskapane står der, er der alltid litt rot.
Etterpå gjekk eg laus på bakken der granrota hadde stått og vidare nedover. Tok vekk ugras og spadde opp stauderøtene som stod der. Skal fylle på meir jord, trakke i hop molda og så grasfrø. Tok vare på plastloket til kompostkassen, det skal eg ha og trakke på. I gamle dagar hadde vi eit par små plast-ski som vi brukte når vi trakka ny plen. 
Så vart det pause med litt mat og drikke før eg skulle ut att. Eg las litt i papirboka som eg fekk av Margrete i går, men eg blir så søvnig når eg sit i ro utan å strikke. Når eg les lydbøker kan eg multitaske.
 Eg hadde sett frå meg gummistøvlane på trappa så dei var fylt med regnvatn. Derfor måtte eg gjere litt tørt arbeid. Eg klipte vekk alle visne roser frå New Dawn-rosetreet og reinska litt i bedet, før eg tok grasklipparen og samla opp rusket med den. Den arbeidsøkta vart litt kort, så eg tok fram strykebrettet då eg kom inn att. Når eg er heime åleine blir eg rastlaus viss eg ikkje har noko å gjere. Heldigvis har eg mange jobbar på vent. Men eg har bestemt meg for å vere mest muleg ute når det er bra vêr. Får tidsnok vere inne når hausten og vinteren kjem.
I morgon trur eg Audun kjem innover, då skal vi fylle bensin på bilen min, kjøpe mold etc. Trur eg.
Den gledelege meldinga vi fekk i går var at Eirik har kome inn på musikkstudiet i Trondheim, det som han ønska mest av alt.

Det eg likar minst av hagearbeid er å plukke rips etc. Derfor har eg kvitta ripsbuskene, har berre ei att.

Dagbok 2018: 17.juli

Klokka er 18.30, så det er enno tidleg dag, men sidan eg var innpå bloggen likevel skriv eg no. Temperaturen er no +24  grader C, tidlegare i dag var det varmare. Sola har vor framme, men ikkje heile tida. Eg er berre så glad i varmen, blir sjeldan for varmt for meg.
I dag starta eg med plenklipping, først opp mot gata, så rundt huset. Hadde ei lita pause før eg starta ned i bakken. Då skrudde eg ned klipparen og snauklipte, der var brunflekka i alle fall, så det kunne ikkje bli så mykje styggare. Eg sveitta som ein sil, men det er berre lekkert.
Då eg var ferdig med klippinga tok eg ein lang dusj, noko som kjølte godt ned. Ein liter brus har det vel også gått med.
Så sette eg meg til å ete, og før eg var ferdig ringde Amanda, for ho og Margrete var på handletur. Dei ville kome oppom ein tur, og eg bad dei kjøpe med kaffimat og brus. Eg har nok diverse i frysarane enno, men orka ikkje å begynne å grave fram restar i dag.
Vi hadde ei koseleg pratestund, og ein liten tur i hagen. Margrete hadde med seg fleire papirbøker til meg, så eg får sjå om eg greier å få lese litt på gamlemåten. Mens dei var her kom det eit lite torevêr forbi og vi fekk nokre få regndropar. Håper det kjem meir i morgon. I morgon skal Amanda til Oslo på Guns N´Roses-konsert. Dei må no vere begynt å bli gamle no, dei karane.
Etter at dei hadde reist la eg meg på sofaen for å lese ut lydboka mi, men etter nokre få minutt ringde det på døra. Det var Helge. Han trudde Rasmus var her, men vi fekk no planlagt utan hjelp at Helge skal komme og fikse TV-tilgangen i kjellaren før Silje kjem tilbake. Han visste kva som skulle til og kva det ville koste, så det er greitt. Eg erfarer etter kvart at Nils har ordna med mange ting som eg ikkje har brydd meg med. Men det er greitt for meg å bli nøydd å skjerpe meg litt.
No skal eg ut og sette i hop den nye kompostkassen min. Den skal eg ha berre til gras. Synest det er tull å køyre graset på VØR når ein kan bruke det til "gjødsel" her heime.

No er Rasmus og familien heime i Kongsberg. Det vart ei stopp her!

(Trampolinepark)

Bok nr.21 - 2018: Begynnelser

Miljøvernaren Terje ligg på sjukehuset etter å ha tatt sitt eige liv . Vi følger han bakover i tid, først som vaksen, deretter som ungdom og til slutt som barn. Gradvis blir vi kjente med ei sår familiehistorie, Terjes glødande kjærleik til naturen og alle vala han tok eller ikkje tok. Kvifor blir eigentleg livet som det blir, og kva er samanhengen mellom enkeltmennesket og det store kretsløpet vi alle er ein del av? "Begynnelser" er ein vakker og svært aktuell roman om den komplekse menneskenaturen og naturen vi held på å øydelegge. "Først da sommarfuglen letta frå raudkløveren og eg prøvde å følge han med blikket mens han flaksa med rykkvise sikksakkbevegelsar innover i skogen, merka eg at auga mine var fylte opp av tårer. Vi menneske burde utvide nestekjærleiksbodet, tenkte eg, vi burde leve slik at dei andre artane saknar oss den dagen vår art er borte frå kloden." 
…………………………………………………………………………...
Margrete har lese og skrive om denne boka før, så eg få berre legge til litt av mine synspunkt.
For det første er boka god; men den er litt krevjande å lese sidan den liksom er "baklengs". Terje ligg for døden  (Eller er han alt død?) og minnest livet sitt lenger og lenger tilbake. Eit liv som ikkje har vore berre godt. Problemet mitt er at no då eg endeleg har fått lese ferdig boka får lyst til å begynne på begynnelsen igjen -(Kanskje det er på grunn av tittelen)-og det gjer eg kanskje. Boka er veldig god, som dei andre bøkene eg har lese av denne forfattaren. Anbefalt.
Språket og opplesinga er eit kapittel for seg, og der har eg ein del sterke meiningar. Forfattaren er trønder, og han skriv på nynorsk, så langt er alt greitt. Men han brukar ein heil del bokmålsord i teksten, og det er eg ikkje så begeistra for. Når han som les er frå "Bokmålsland" så skurrar det i øyrene mine, han uttalar ikkje orda rett alltid. Hadde ein trønder lese boka ville det vore annleis. Eg har lese mange bøker  skrive på bokmål frå Nord-Norge, men opplesarane har vore nordlendingar. Det blir veldig autentisk. 

Dagbok 2018: 16.juli

Klokka er snart 20.00. Temperaturen er no + 25 grader, men det har vore varmare før i dag. Stilt og heitt har det vore-noko som er heilt nydeleg. Eg har sveitta og styrt på. Det er berre herleg. Skulle gjerne hatt det slik heile året- ja, med små regnbyer om natta hadde det vore heilt perfekt, for no er det litt for tørt. Likevel står rosene så fine-dei likar ikkje regn.

Rasmus og familien hadde bestemt seg for å reise i dag, og hadde bestilt rom på hotell på Hamar. Vi stod opp tidleg etter vår målestokk, og i 10.30 tida for dei. Rasmus hadde med seg takboks denne gongen, og tok gjerne imot mykje som eg gjerne ville bli kvitt. Det er litt merkeleg, for Rasmus er ikkje så lik Nils, men alle kleda til faren kan han bruke. Eg synest det er bra, for har ikkje lyst å kaste alt i innsamlingsboksar. Så er også Eivind etter kvart like høg som faren, men ganske mykje spinklare.

Det blir stilt i huset når fem personar reiser-eller kanskje ikkje. For her får husarbeidet kvile mens eg har gjestar, så i dag vart det å sette i gang med klesvask, oppvask, støvsuging, vasking etc.etc. så direkte stille har det ikkje vore. Det er godt å ha noko å styre med når ein blir åleine igjen. Denne årstida er det ikkje så dramatisk å bli åleine, for det er folk overalt og nok å gjere både ute og inne. I morgon blir det ute-jobbe-dag før regnet som er meldt kjem. Viss det kjem-vi treng det

Har vore litt ute på altanen i dag. Sov nesten ikkje sist natt, så eg var trøytt. Sovna ei lita stund på solsenga.

Det var ikkje så trist då dei for i går, for eg veit at eg kan ta ein tur til Kongsber når det lid på, men eg reiser ingen stad med det første. Har mykje å styre med her først.No skal eg finne fram og lese Møre-Nytt frå fredag, og sjå om der er noko å sjå på TV.

Dagbok 2018: 15.juli

Klokka er snart 20.00, temperaturen på trappa er +26 grader C, skodda og skyene er nesten borte og sola er så vidt framme.
Wenche og Rasmus driv og pakkar bilen full, dei skal reise i morgon, og overnatte på Hamar, før dei reiser heilt heim. Dei hadde visst ei ærend på Ikea, det er det eine, og så er det ikkje alle som likar like godt å køyre bil. Dei har hjelpt meg med mykje mens dei har vore her, og så har dei nye oppgåver som ventar heime. Der har dei oppussing på gang.
I dag hadde Rasmus og eg eit ærend på Plantasjen, og så var vi innom Bunnpris for eit par småting.
Vi nytta også høvet til litt lærekøyring. Eg har knapt no køyrt bil etter at eg vart pensjonist, så eg var i tvil om eg i det heile tatt greidde det. Eg kan ikkje seie at køyrelæraren var imponert, men heller ikkje heilt avvisande. Eg køyrde frå flyplassen, bort Torvmyrvegen først, snudde, køyrde forbi bilbutikken, opp til Tussa, Biltilsynet, ned att og inn på hovudvegen, tok av opp Anders Hovden gata, men så kom vi på at vi skulle på Bunnpris, så eg køyrde opp til Ungdomsskulen,stoppa og let Rasmus overta.
Seinare fekk eg eit par timar med gode råd om kva slags bil eg skal kjøpe meg/bytte til. Rasmus er veldig FOR el-bilar, men dei er det så stor etterspørsel etter her i Ørsta at dei er vanskeleg å skaffe. Og bror min er IMOT el-bilar. Det er ikkje godt å vite kven ein skal høyre mest på. Eg seier at eg vil sjå det litt an, for Krumsvik lova å ringe meg om dei fekk inn små bilar med automatgir. Ein ting er sikkert : Søndag føremiddag er ei fin tid for lærekøyring.
Så lage vi middag og åt før fotballkampen, som ingen gadd å sjå, men vi fekk med oss resultatet. Middagen i dag var hamburgarar. Eg let Rasmus bestemme , slik at gutane får det dei et og vil ha.
Is og kaffi etterpå. Eg har blitt kvitt mange restar mens eg har hatt besøk- men fått nye restar å gnage på i staden. Det vir tomt når dei reiser, men kan vere greitt å få orden på eit "bomba" hus. Og eg har lova å komme til Kongsberg til hausten. Det er Ingar som har fått rommet "vårt" no, men han har lova at eg skal få låne det.
No vart det veldig fint ute!

Dagbok 2018: 14.juli

Klokka er alt eit kome eit kvarter inn i den nye dagen. Her i huset startar vi dagen seint, og sluttar enda seinare. Temperaturen ute er + 16 grader C, og det har vore finare vêr i går. Sola var framme ei stund og då var det varmt. 

I dag har vi ikkje gjort så mykje, men det var heller ikkje planen. Rasmus har fått saga sund det meste av ROTA, han har lært meg å file motorsaga og kjøpt olje som eg skal fylle på Wenche og eg sette i hop att den gamle kompostkassa, og så er planen å kjøpe ei i tillegg, til å ha gras i. Vi jobba ei stund ute, men så tok dei med seg gutane på handel av diverse, mens eg vart att heime. Eg begynte så smått å gjere klar til Taco før dei kom heim, tømte oppvaskmaskin, brette ein klesvask og plukka bær. På føremiddagen steikte eg sveler, noko som fall i god jord, særleg hos minstemann som meinte vi kunne ha sveler til middag også. Vi er i grunnen ikkje så produktive, brukar det meste av tida til å lagemat, ete og prate. Litt TV innimellom. Men vi kosar oss i lag. Gutane er veldig fredelige, det går mykje i data. Wenche strikkar og eg ryddar litt innimellom. Det er FERIE. Det einaste vi har planlagt for morgondagen, er middagen.

I dag er det bryllaupsdagen til Wenche og Rasmus, det er 18 år sidan dei gifta seg på Mauritius. 

Det er mamma sin fødselsdag-ho vart fødd i 1904.

Og så er det Frankrikes nasjonaldag: Allons enfants de la Patrie. Le jour de gloire est arrivé !  (Må berre briefe litt med at eg kan Marseillaisen utanåt- men berre første verset)

Dagbok 2018: 13.juli

Klokka er 1.30 natt til laurdag,. Temperaturen er +12 grader og skodda har lagt sid i dag også. Litt irriterande at finevêret skulle forsvinne når gjestane våre kom. I dag har vi vor mykje inne. Og ikkje har vi gjort noko storarbeid heller. Wenche og Rasmus var nedover og handla, eg eg drive med litt oppvask og klesvask, men mest har vi ete, drukke kaffi og prata.
Margrete og alle dei tre heimeverande barna kom på besøk og hadde til Ingar si store glede med seg hunden Charlie.
Menyen var det stort sett Rasmus som hadde komponert: Spekemat, potetsalat, loff m.m. + vaflar. Vaflane var det eg som hadde ansvaret for, og så hadde eg litt kake frå frysaren. Vi tek det relativt lettvint. Vi hadde det i alle fall kjekt, og så var det no kjekt for Kongsberg-gutane å få selskap av litt yngre folk. No har alle lagt seg, så no skal eg også finne senga.

Bildet har eg rappa frå Margrete sin blogg. Her er Rasmus sine tre gutar+ Erlend og Amanda. Eirik var på jobb, men kom litt seinare.

Dagbok 2018: 12.juli

Klokka er 21.20, temperaturen er +15 grader C. I dag har det vore sid skodde heile dagen - og ikkje sol i det heile tatt. Eg vakna tidleg, det gjorde ikkje dei andre.
Rasmus ville at vi skalle fare bort på bilbutikken tidleg på dag. Vi ville vite kva bilen min var verd og om det var råd å få seg ein mindre bil, helst med automatgir til ein rimeleg pris. Bruktbilar som svarte til forventningane hadde dei ikkje, og den Nissanmodellen som er mindre enn vår, var 4 cm smalare og berre nokre få cm kortare. Og kosta dobbelt så mykje som det vi ville fått for vår bil. Bilforhandlaren rådde meg til å behalde bilen eg har , så lenge, men viss han fekk inn ein bruktbil som svarte til krava mine, skulle han ringe. Vi får sjå kva det blir til.
Så var vi inn på Amfi og kjøpte ei gardintrapp og ei sag på Clas. Mat handla vi på Bunnpris i dag.
Ikkje lenge etter at vi var komne heim att kom Solveig og Øystein i kvar sin bil, den eine var min, så no er den heime att. Nokon køyretur har det ikkje blitt i dag...….
Etter at vi hadde drukke kaffi i lag med Solveig og Øystein, vart det action. Wenche sette i gang å grave opp den granrota mi som stod att frå i fjor. Rasmus hjelpte til med spett og spade, og jammen fekk den opp på relativt kort tid. Draumen min var å få tømt den gamle komposten i den raude kassa ned i holet, og det greidde dei også. Men mi velsigning saga og slo Rasmus sund hagemøblane og kompostkassa, Wenche og eg rydda opp det grøvste, men noko må vente litt, for eg skal levere det som boss, litt etter litt.
Til slutt starta eg klipparen og for over plenen og tok opp rusk og rask, men først raka vi.
Så vart det middag med ovnsteikt kylling og ris. Rimeleg lettvint.
Det har vore ein veldig aktiv dag, men Wenche og Rasmus får gjort veldig mykje på kort tid. Eg er veldig fornøgd kvar gong noko "kjem på plass". Men hadde dette blitt gjort i vår, kunne eg ha sett poteter i "hola. No skal eg jamne til og så gras, slik at eg får litt meir å klippe på.

Dagbok 2018: 11.juli

Klokka er 22.30, temperaturen ute er + 16 grader. Det har vore ein fin dag, men ikkje så veldig mykje sol, mest mot kveld.
Rasmus og familien kom i 20.30 -tida i går kveld. Vi åt og prata til langt over midnatt.
I dag tak Rasmus og Wenche alle dei 17 sekkane med hageboss og køyrde dei bort på VØR, så no er eg kvitt dei ! 
Gutane og eg var heime. Seinare var Rasmus og eg ein tur ned på Spar og handla matvarer.
Eg plar alltid lage lasagne til Rasmus og dei kjem, denne gongen hadde eg ikkje gjort det, så i dag meinte Vebjørn at vi kunne ha lasagne til middag. Eg tenkte kanskje dei var lei av å få det samme støtt, men det er visst blitt ein tradisjon.
Det blei sein middag, men det er dei vande med. eg brukar ikkje å lage middag, så no et eg vel for mykje.
Det er Rasmus som planlegg og ordnar ut med det meste. I morgon har han visst tenkt at vi skal kvitte bilen. Eg er ikkje så veldig gira på det, men veit at det må gjerast noko.
Eg har eit snev av eit gammalt problem i v. hofta,  så eg er redd det er noko på gang. Er det noko eg ikkje vil ha att, så er det akkurat det problemet. Håper det beste.
Vi har det bra, og eg blir kvitt litt av fryselageret mitt, har putta litt av kvart i frysaren i seinare tid. No er gulrotkaka vekk- og takk for det.
rasmus og gutane var ute og "trimma" mens eg laga middag. Kva eg skal finne på til mat i morgon veit eg ikkje. Får høyre med Vebjørn, han er den som seier ifrå.
Margrete kjem hit på fredag, då skal ho visst hente seg ei kompostkvern, motorsag har ho alt skaffa seg.

Dagbok 2018: 10.juli

Klokka er no 19.40. Temperaturen er + 23 grader C, og i dag har det vore varmare enn på lenge synest eg. Sola har stråla frå skyfri himmel og det har knapt vore eit vindpust.
Eg begynte å vente på Rasmus med det samme eg stod opp, enda han hadde sagt han skulle komme utpå kvelden. Slik er eg støtt når nokon skal komme. Eg fekk melding i 19.30-tida, då var dei i Stryn, der Ingar var komen opp på ein rosa traktor. Eg forstår det slik at dei har køyrt Flya i dag.
Eg har tatt det veldig med ro i dag, var redd eg skulle få trøbbel med hofta, men det ser ut til å gå bra. Eg har styrt litt inne, vatna litt ute, lege  på solsenga etc. Men no i kveldinga heldt eg ikkje ut lenger, eg berre MÅTTE slå plen. Klipte rundt huset og opp mot gata, skråninga får stå. Eg vart rimeleg sveitt, så no går det i Cola light her.
Tenkte eg like godt kunne skrive blogg no mens eg er her åleine. Seinare blir det ikkje så mykje tid til det.
Rips og bringebær begynner å modne, og eg plukkar litt jordbær kvar dag, men trur skjora får sitt.
Kvar dag gløymer er 19-nyheitene, for eg forstår ikkje at det er kveld. Ein slik sommar kan eg knapt hugse-det må i så fall vere i barndommen, for då var vel alle somrar slik-var dei ikkje? Men i avisa skriv dei om U-år, og det er det kanskje for bøndene - og det er trist- når vi som berre har ein liten hage kan kose oss og nyte finevêret.
Eg kan hugse nokre fine somrar 1963-då Solveig vart fødd, 1965- då ungane og eg budde på Eid og Nils jobba i Høyanger, 1968-då Margrete vart fødd, og 1997 då Eirik og Olaug var fødde. Eg ser at viss ein har noko å knytte det til, så hugsar ein betre.
No må eg stad og hente opp NYHETSKANALEN.

Dagbok 2018: 9.juli

Klokka er 20.10, temperaturen ca. 18 grader C, og sola skin! I dag vakna eg opp til ein ny fin dag. Trur det må ha vore lenge sidan sist vi hadde ein slik sommar. Måtte det vare-og vare. Regnet som kom i går og i natt kom vel med, men det treng ikkje regne i  vekesvis.
På føremiddagen i dag måtte eg ta litt husarbeid. Det er mykje som blir forsømt ikkje når vêret er slik, men det kjem vel dagar då ein MÅ vere inne også, så eg prioriterer uteliv.
Det er berre ein ting som irriterer meg, og det er at eg var litt for voldsom på laurdag, jobba så ryggen var nesten av-og så set det seg i venstre hofta, den som eg ha vore plaga med i mange, mange år. Høgre kneet er heller ikkje godt, så no haltar eeg til begge sider. OK, det får gå som det går. MEN-det er litt surt etter at eg i to somrar har vore heilt "frisk".
I dag kom både Audun og Håkon for å male. Håkon begynte på altanrekkverket utvendig. Det viste seg å vere ein heller tung jobb. Det rekkverket laga Nils og eg for nokre år sidan, og det har vore beisa berre ein gong. Derfor trengst det mykje maling, og det er tungt å male. 
Audun og eg var ein tur bort på Koppen trelast og oppretta ein "konto" på meg. Slik at snikkaren frå Hareid skal kunne hente ut dei materialane han treng, på min konto. Men det blir ikkje før i august.
Eg fekk også handla litt på Coop ekstra mens vi likevel var der borte. 
Audun mala andre strøk på eine garasjeveggen, blant anna. Og Håkon mala ferdig på hjørnet, der som Einar ikkje hadde rukke bort. Det går framover, men Rom vart ikkje bygt på ein dag. Ingen skal stresse men ta det i sitt tempo har eg sagt. 
Eg laga mat. I dag vart det " HEIMELAGA" pizza Grandiosa til hovudrett, is og hermetiske pærer + kaffi til dessert. 
Etter at eg hadde sett i gang oppvaskmaskina og sett på enda ei maskin med klede, gjekk eg ut og la meg på solsenga ei stund og høyrde lydbok. 
Kom på at eg ikkje har høyrt nyheiter sidan  i dag morgon, så no lyt eg sjekke korleis det går med gutane i hola. Eg synest det er ei tragisk hending, men håper sjølvsagt at dei må overleve.
I morgon kveld kjem Rasmus og familien, det ser eg fram til.

Denne klatrerosa har vi hatt i mange år, men det har aldri vore noko fart i den. I år blomstrar den i alle fall.