Dagbok 2014: 8.desember

                        Brasiliansk fruktkake.

Bland saman:
                       2 dl kveitemjøl
                       1,5 dl sukker
                       1 ts bakepulver
                       1 ts vaniljesukker


                        1/2 kilo dadlar og rosiner
                        (kan også bruke anna tørka frukt)
                        1/2 liter nøttekjernar, mest heile paranøtter


                        3 store egg som du har vispa lett saman


Bland frukta i det tørre, slå egga over. Bland.
Steik i rund form 26 cm i diameter -150 grader i 1 1/4 time
..............................................................
Denne oppskrifta har eg fått av ei veninne, og eg lagar kaka kvar jul. Den er verdens mest lettvinte, og verken frukt eller nøtter skal hakkast på førehand. Når ein serverer kaka skjer ein den opp i tynne skiver med kvass kniv. Eg plar pakke den ferdige kaka inn i al-folie og la den modne nokre dagar før eg ev. frys den.
Som sagt plar eg lage denne kaka kvart år, og det går alltid bra. Men så skjer altså ulykka. I DAG.
Eg hadde laga alt klart, berre egga stod att. Eg fann ut at eg like godt kunne vispe dei i miksaren, sidan den likevel stod framme. Eg har ei slik uttrekkbar hylle til miksaren, og eg føler meg aldri trygg når miksaren står der, så eg plar passe på. I dag fann eg på å smørje forma mens miksaren gjekk. Og pang! Der låg den i golvet, i lag med ei stor søyle av vispa egg.
Eg var heilt åleine inne, og det var bra! Det kom nokre ufine gloser...... Så tørka eg opp det grøvste før eg ropte på Nils. Vi sjekka at miksaren var i orden, etter eit lite inngrep, og så tok Nils teppet ut for å vaske det. Det skulle vaskast til jul i alle fall. Og eg har fått vaska golvet. Men først måtte eg piske nye egg og lage ferdig kaka. Eg har nok gjort ein liten feil der også, for eg la ikkje merke til at det stod 1/2 kilo frukt, men 1/2 liter nøtter. Eg las kilo på begge. Elles har det ikkje skjedd så mykje anna under julebaksten. I går sleppte eg taket i ein kopp smelta margarin, så då vart i alle fall eine hjørnet av kjøkkenet grundig "smørvaska". Eg stressar ikkje med julebakst, for eg veit at det blir ikkje ete så mykje kaker. (No tok eg ut kaka som ser heilt fin ut).
Elles sluddar det ute, det ligg litt kvitt på marka, så det er fint vêr å vere inne i.Temperaturen ligg på ca +2 grader. Nils er glad for alt som smeltar, så han slepp å mòke.
I morgon tysdag skal Erlend spele på Spinneriet midt på dag. Torsdag kveld er det førjulsfest på Folkestad skule og sundag førstkomande er det ballettshow i Ørsta, midt på dag. Ja, og så får vi besøk av Margrete og Ingeborg på onsdag, då skal dei til Ørsta på julehandel. Mykje som skjer denne veka altså. Kjekt det.
No skal vi snart ete tidleg middag, det blir restar frå i går.

Dagbok 2014: 10.november

Klokka er snart halv sju. Temperaturen ute er + 9 grader, det regnar, og det har det gjort heile dagen. Men det skal visst bli betre vêr igjen.
I dag måtte vi nedover og handle litt, hadde ikkje vore på butikk sidan torsdag. Og då gjekk heile føremiddagen.
På Amfi trefte eg ein tidlegare kollega som eg prata lenge med. Nils var på apoteket, og så handla vi på Coop. Brukte alle rabattlappane. Men melk hadde dei ikkje, så eg måtte innom Bunnpris og få det.
Eg er veldig nøgd med Doro-telefonen min, og Nils ville gjerne ha ein samme sorten, derfor måtte vi bort på Lefdal. Dei hadde ikkje den telefonen inne, men fleire nye var på veg, så dei rekna med å ha den i butikken i morgon. Dei skulle sende melding til meg-på mobil.
Sidan vi likevel var der borte, kunne vi stikke innom plantasjen for å få tulipanløkar i hus. Der trefte vi ei dame som vi kjenner og vart ståande og prate med henne. Ho er også pensjonist, så då har alle tid til ein prat.Men tulipanløkar fekk vi ikkje. Utselde var dei der.
På tilbakevegen var vi inn på Rema 100-butikken på Ose og handla litt der også.
Ja, og så var eg ein liten tur innom strikkebutikken etter meir garn. Driv og strikkar lester av restegarn, men må ha litt å fylle på med.
Nils er så glad i fiskegrateng, men eg synest det er mykje styr, derfor lagar eg det sjeldan. I dag fann eg ein lur måte, heilt utan styr, og veldig fort gjort.
Hadde ein ganske stor rest med makaroni i frysaren, som eg tinte. Nils tok ein fiskefilet frå frysaren, tinte den litt, skar den i terningar og kokte den på ei tallerk i mikroen. Eg smurde ei form, fordelte makaronien utover botnen, så fisken, og så laga eg ein kvit saus, piska egg og hadde i, og tømte utover. Strøkavring frå pose på toppen. Det var fort gjort, det vart lite rot og fiskegratengen vart god. Eg hadde sjølvsagt sett på steikomnen før eg begynte. Vi brukar ikkje poteter attåt når der er så mykje makaroni i, men eg finraspa rikelig gulrot (med hand) og hadde attåt. Dette skal eg gjere oftare. Dessverre åt vi så mykje at der er ikkje nok til eit måltid til.
No har vi kvilt middag og drukke kaffi, så blir det vel strikketøy, bok og TV resten av kvelden. Håper det blir ute-vêr i morgon.
I morgon kjem gartnaren "vår"og skal klippe plommetre, og onsdag skal Nils og Matias ut og fiske.

Dagbok 2014: 30.oktober

Klokka er ca 18.00, temperaturen ute er + 5 grader C. Det er bekmørkt, så eg ser ikkje kva slags vêr det er, men stort sett har det vore bra før i dag. Trur til og med sola var framme så vidt ei stund før middag.Eg likar ikkje at vi stilte klokka tilbake til normaltid, ville gjerne hatt sommartid enno ei stund.

Nils var vekke då eg vakna i dag, han hadde reist på sjøen for å fiske sei.(Eg er som kjent ingen morgonfugl). Eg hadde også ein jobb å gjere i dag, skulle skrive eit lite innlegg til avisa om pensjonistmøtet komande onsdag. Eg var ferdig med det i 11-tida, eller litt før, og då kom Nils heim.Vi åt litt lunsj ei stund etterpå, og så måtte Nils få kvile seg litt. Eg nytta høvet til å lese i boka mi mens her var stilt og fredelig.

Har ikkje gjort mykje til nytte i dag, berre det heilt nødvendige pluss klesvask og bretting.

Til middag i dag hadde ingen av oss lyst på fisk, så eg laga ei "rydde i kjøleskap/frysaren-suppe". Eg var litt skeptisk ei stund, men då suppa var ferdig, gjekk den ned til siste drope. Kika litt i "Smalhans"-boka til Gunda, men dikta det meste sjølv.

Fann ein pose med ferdigbløytte kikerter som eg har fått av Solveig, ein liten pose med skvåsj, ein løk og eit par båtar med kviløk. Dette kokte eg til alt var møyrt, og så jamna eg det med stavmiksar. Tykte ikkje det smaka noko særlig, men heldt fram med å tilsette rotselleri, kålrabi og gulrot i terningar, smaka til med bulliong-terningar etc. Og frå Gunda si bok tok eg tipset med å ha i ei spiseskei kvitvinseddik og krydre med timian.Til slutt hadde eg i ein rest av kokt sommarskinke, som eg skar i terningar. Det vart skikkelig god spikersuppe, og eg vil påstå at den vesle skvetten med kvitvinseddik gjorde susen. Det beste av alt var likevel at eg fekk kvitta nokre restar.

Eg er så ivrig å lese i "Innsirkling 2" at eg grip alle sjansar. Kan ikkje hugse at eg var så begeistra første gongen eg las den-og hugsar absolutt ingen ting av handlinga.

Orkideen på bildet kjøpte eg på Coop i går for ein rimelig penge. Sidan det snart er advent, kjøpte eg lilla.

Dagbok 2013: 18.februar

Klokka er 13.30, temperaturen ute er + 3grader C; det er skodde og regn. Vêret fristar ikkje til uteliv akkurat, med slapsete og isa vegar.
Eg har halde meg inne heile føremiddagen, har vaska og rydda rundt på kjøkkenet, samt tatt nokre skuffer. Det er slutt på den tida alt blei rydda og vaska på ein og same dag. I dag var eg litt uvanlig ivrig, sidan eg hadde ein ferdigstrikka genser liggane, der ørten trådar skulle festast. Men jammen fekk eg gjort det også. Då er det greitt å sitte framfor datamaskina og høyre lydbok.No skal eg strikke eit par ermar, så har eg ein genser til.
Vi har bilen til Einar ståande her, mens han er i Tyrkia, og Nils nytta høvet til å vaske den i dag; men med dei vegane vi har no, er den vel nesten like skiten når dei har køyrt den til Hareid.
Middagen i dag blir rett og slett ein oppvarma rest frå i går. Nokre spør etter oppskrift på erter, kjøt og flesk. Leitte på nettet og fann eit par, men det er eigentlig ein rett der ein tek det ein har i hus, det ein likar  etc.
Vi brukar å bløyte gule erter og fryse i porsjonar, elles må ein hugse å legge ertene i vatn kvelden før. Salt kjøt og flesk legg ein også i vatn på førehand. I går hadde vi pinnekjøt og salta svineribbe. I tillegg skal det vere løk og gulrot i suppa+ skiver av kålrabi og heile poteter. Ein har ingrediensane i etter kvart, først det som skal ha lengst koketid, sjølvsagt. Ved servering legg ein kjøt, flesk, kålrabi og poteter på fat og et det på flate tallerkar. Suppa et ein ved sidan av. Vi tek litt suppe til saus over potetene. I staden for pinnekjøt og flesk, kan ein bruke salta knokar, salta oksekjøt, pølser,; det ein har og det ein likar. Her kan ein prøve seg fram. Det er alltid kjekt å eksperimentere litt. Viss ein vil, kan ein også ha klubb/ ball attåt, då kan ein ev. kutte ut potetene. Bon apetit.

Havremakronar.

Å bake småkaker er langt frå det kjekkaste eg veit, men det høyrer liksom jula til. I dag har eg funne fram mamma si oppskrift på havremakronar; dei kakene laga eg alltid før, men no er det ei stund sidan sist. Dei er veldig enkle å lage. Oppskrifta er ganske "stor" så det blir mange kaker, men det går an å halvere.

Rør kvitt:
           500 gram smør/margarin
           500gram sukker.

Rør inn 3 egg

Ha i  400 gram store havregryn
         400 gram kveitemjøl
         4ts. bakepulver
Set med teskei på plata og steik på middels varme til dei er gulbrune.

Enklare kan det ikkje bli.

Vêrmelding 7.nov. - 2012

Klokka er no 14.15. Temperaturen ute er knapt 2 grader C og det slapsar ned litt heile tida. Som der ser ligg her att ein del snø ovafor garasjen og langs vegen der plogen har gått. 
Det blei tidlig middag i dag, og no blir det ein liten pause før kaffi. Til middag i dag laga eg ein kinesisk- inspirert gryterett med ris til.Det er slike rettar eg likar å lage, då snokar eg i skuffer og skap og tek det eg finn. Det blir alltid godt. På den nye Asia-butikken i gågata kjøpte eg ei flaske som eg trudde var mangochutny-det er det ikkje, og no veit eg ikkje kva eg skal bruke innhaldet til Nokon som har eit tips.Sjå på bildet.
Før den tid hadde eg ei ryddestund på kjøkkenet-det er alltid eit skap eller to som treng ein omgang også. Og så har eg skrive eit avisinnlegg, ein omtale for å lokke pensjonistar på møtet vi skal ha neste onsdag. Mange av dei faste medlemmene våre er i Spania så eg håper på at nokre nye kjem til,så det ikkje blir stusslig.

Smør til jul

Det er ikkje smørkrise i heimen. For det første bakar eg ikkje noko som eg treng å ha smør i, og for det andre så HAR eg smør-ekte Tine smør, kjøpt heilt lovlig på Coop. Det einaste eg mangla var litt usalta smør til ein sjokoladeglasur. Men så var det slik at eg hadde ein lite pakke fløyte som var utgått på dato, og då blei freistinga for stor. No skal det seiast at eg har ei viss erfaring med kinning av smør frå den tida eg budde på ein gard i Sunnfjord og kinna kvar mandag. Det vanlige når ein lagar "bondesmør" er å kinne av sur fløyte dvs seterrømme.Rømmen bør stå i romtemperatur. Det smøret blir utrulig godt. Det som overraska meg då eg kinna med handmiksaren i dag, var at det blei så mykje smør.Eg vog smøret, det var 130 gram av 1/3 liter fløyte Har  smakt på det og det smakte heilt normalt.
Elles ser de at når eg tek bilde inne i lampelys, blir bilda ofte veldig gule. Har nokon eit godt råd for å unngå det?

Vermelding 4.desember - 2011

Klokka er snart 13.30, temperaturen ute er + 2 grader C; det er litt snø og det blæs, noko som er relativt sjeldan her. Ein ting er positivt med dette veret; det blir lysare både ute og inne og vi slepp å føle at det er mørkt døgnet rundt.

Eg har brukt føremiddagen til å steike krumkaker, den einaste årvisse juletradisjonen min. Eg steiker både til meg og Margrete, det går for det samme. Eg skal ikkje ha så mykje. I fjor løyvde eg nesten ein heil boks, som eg utpå sommaren knuste og hadde ned i brøddeigar. Likar ikkje å kaste mat.

Det finst eit utal av oppskrifter på krumkaker, men eg hugsar at mamma brukte ei oppskrift med potetmjøl.Brukar ein litt potetmjøl i tillegg til kveitemjølet blir kakene sterkare og toler transport betre.

Eg har funne ein forholdsvis liten porsjon, som eg dobla i dag.Desse kakene blir litt hardare enn vanlige krumkaker, derfor kan denne røra egne seg godt om ein vil lage "skåler".

                                                                Krumkaker.

3 egg 

1dl sukker

100 gram smelta margarin

2 dl kveitemjøl

1 dl potetmjøl

1 ts vaniljesukker

3-4 ss vatn

Pisk eggedosis av sukker og egg.

Ha i smelta margarin, vaniljesukker og vatn.

I dag brukte eg ekte vanilesukker. (I mange oppskrifter brukar ein kardemomme. Det gjer ein sjølvsagt som ein vil med). Eg synest steikinga går lettare om eg let røra stå 15-20 min. før eg begynner å steike.

Av denne porsjonen blir det ca 30 kaker.

No skal vi snart ete middag. På menyen i dag står resten av suppa frå i går. Til dessert blir det mislykka krumkaker og kaffi.Håper at alle har høve til litt kos i adventstida.

Alltid vellykka sukkerbrød.

Eg kom i skade for å skrive på bloggen at eg alltid er heldig med sukkerbrøda mine, og no er det nokon som vil ha oppskrifta. Eg har brukt ei oppskrift som eg har i hovudet i alle år, men så fann eg ei på nettet som var nesten heilt lik, så no brukar eg den. Den passar til ei form på 24-26 cm i diameter.
4 egg
1,5 dl sukker
1,5 dl kveitemjøl
1 dl potetmjøl
1,5 ts bakepulver.
Pisk stiv eggedosis, ha i mjøl og bakepulver, rør godt rundt. Ver ikkje redd å røre saman med miksarkraft - men ikkje for fort.
Fyll røra i forma, som skal ha bakepapir i botnen-men for all del:Smør ikkje kantane på forma!
Set forma i heilt kald omn, skru på omnen og set termostaten på 160 grader. Då skal kaka stå i omnen 50-60 minutt.(Dette har eg ikkje soge or mitt eige bryst, det stod i ei kakebok som eg hadde då eg var heilt ung. Har inga aning om kvar ho har blitt av).
Eg frys kakebotnane i forma med det same dei er kalde. Dei er lettare å skjere laus frå forma og dele opp når dei er frosne.
(I går laga eg to botnar; den som eg sette i heilt kald omn vart 2-3 cm høgare enn den som eg sette i forvarma omn.)

Sylta makrell/ sild

Sidan Nils kom heim med så mykje makrell i kveld, fekk eg koke ferdig middagen til i morgon. Då skal vi nemlig ha kald, kokt makrell med rømme og agurksalat. Eg kokar makrellen etter oppskrift frå boka "Fjordamat"-og det blir kjempegodt. 

Ein kan også lage til "fjordsild" på same måten, det er nesten enda betre, men sjeldnare å få tak i. 

Oppskrifta er med koppemål, noko som er ein uting, men koppen som eg brukar tek akkurat 2 dl, så det var lett å rekne om. Kor mykje lake ein må lage til, kjem sjølvsagt an på kor mykje fisk ein kokar; i kveld måtte eg gange oppskrifta med 4. Fisken står seg fleire dagar i laken om ein set den kaldt- men server fisken romtemperert.

                                                              

 Oppskrift

4 sild/makrell

1/2 liter vatn

1 dl eddik (7 %)

1 ss sukker

3/4 ss salt

1ts heil pepar

2 laurbærblad

I oppskrifta som stod i boka var fisken kokt i filetar, derfor er det berekna så lite kokevatn. Men det vanlege er å skjere fisken i stykke, slik ein plar gjere.

Vermelding 19.august - 2011

No er klokka ca 13.45 og vi har ete ein tidlig middag, sidan vi var tidlig oppe i dag. Ute er det lettskya, litt sol av og til og ca +18 grader C. Fint ver egentlig.

I dag har eg styrt litt med matlaging. Laga opp ein stor porsjon kjøttkaker, sette på ei gryte med bruning til heimelaga saus, den får stå og godgjere seg i timesvis. Så steikte eg kveite til middag og laga remuladesaus til. 

Det har blitt nokre kveitemiddagar i løpet av sommaren, og vi synest det er godt med remulade til. Den vi får kjøpt ferdig er veldig feit, og ikkje spesielt spennande på smak. Det er ikkje så ofte eg har laga slikt i seinare år, så eg sjekka diverse oppskrifter på nettet, og kom fram til ei tilnærma sjølvkomponert som vi likar godt. 

For at det ikkje skal bli for mykje feitt, blandar eg majonesen med lettrømme i forholdet "lite majones og mykje rømme".

Så finhakkar eg sylteagurk av den litt søte typen.

Har i litt Dijonsennep og finhakka kapers.

Smakar til med frisk sitronsaft, litt salt og litt sukker.

Dette er ikkje ei "oppskrift". Synest berre det er kjekt å dele erfaringa med at det ikkje er ein heksekunst å lage slikt sjølv. Ein får jo kjøpt alt mulig i butikkane, og mykje er godt. Feilen er berre at det smakar heilt likt kvar gong.Når ein lagar maten sjølv frå grunnen av, kan ein smake den til etter si eiga tunge (og forhåpentlig andre si også). dessutan tek det ikkje så lang tid.

Bildet.I morgon skal politikarane stå på stand i Ørsta, og Per var her og henta utstyret til SV-standen. Dei måtte prøvemontere den, sidan Nils er den mest rutinerte på det.

Det er viktig at flest mulig er med å stemmer, og så må vi hugse at det er lokale politikar vi stemmer på, ikkje dei som sit på Stortinget.  Eg håper også  at dei som blir valde inn, røystar etter sitt eige program når sakene kjem opp i kommunestyret. Vi har dessverre sett fleire døme på at ikkje alle har gjort det.

Utan særlig mål og meining.

Sidan det var nokså bra ver i dag, men ikkje alt for fint, fekk eg lyst å reke litt. Vi var først til Volda, der eg tenkte å sjå etter garn på den nye butikken som eg hadde lese om i avisa. Men den var ikkje opna. På Nettstrikk var det dårlig utval, så eg kjøpte ikkje noko. Så var vi ein tur innom Spinneriet, der eg fann ei tynn og sommarleg joggebukse til ein rimelig pris. Då var vi alt begynt å bli svoltne, så vi fann ut at vi ville ete tyrkisk i Ørsta. Men først var eg innom garnbutikken og kjøpte litt til å strikke lestar av. Etter at vi hadde ete ein god kebabrett, hadde eg mest av alt lyst å gå på "Fru Svendsen" og drikke kaffi-men det er no grenser for å vere lettsindig. 

I staden gikk vi inn på "Stil og stemning" i gågata. "Til bords" er flytta inn i samme lokalet, så det var mykje kjekt å sjå på der. Og det beste av alt: Gratis kaffi og marsipankake i samband med opninga! Kjøpte berre noko lite, for skams skuld.Men trefte ei dame som vi vart ståande og prate med lenge. 

Tok mange bilde inne i butikken, men etter dei to-tre første, vart bilda gule, noko som ofte skjer når eg fotograferer med blitz inne. Eg treng ikkje så mykje pynt og stas, men synest det er artig å sjå kva som er trenden. 

Sjekk bildet øvst og legg merke til kor blank fjorden er i dag. Vi lurte på om det kom av alt ferskvatnet.

Firestjernes middag ?

Som før nemnt er både Nils og eg ivrige tilskoderar når "fire kjente fjes" skal lage middag til kvarandre på TV. Noko eg har lært av dette programmet, er at det meste bør lagast frå grunnen av-halvfabrikata er forbode, eller i alle fall nesten.

Sist onsdag viste kokken oss kor lett det er å lage sin eigen majones. Eg har i minne korleis mamma sat og rørte og rørte i timesvis når ho ein sjeldan gong laga majones. Eg var på apoteket og kjøpte olivenolje, for slikt var ikkje å få kjøpt i butikkane. (No er det ein heil vegg med diverse oljar på Coop her).

Eg fikk lyst å prøve om det var så lett som kokken sa, og det var det! Det gjeld å ha ein stavmiksar og ein beholdar som passar til. Resten går av seg sjølv. Eg fann oppskrift på nettet. EIN feil gjorde eg, eg tok for mykje sennep i, det er betre å ta for lite og ev.fylle på med meir.

Så stod eg att med to eggekvitar, og av dei laga eg marengsbotn som eg kan bruke til Pavlovakake eller til "desserten min". Alt saman var gjort på ei lita stund. Eg hadde eggekvitane i eit litermål og brukte handmiksar, så det vart ikkje mykje oppvask heller.

Tidlegare i veka laga eg is av eggedosis og krem.Fann ei skulekjøkkenoppskrift. Heilt perfekt og fort gjort. Hadde fløyte som gikk ut på dato, så eg måtte bruke den.Poenget mitt er at det å lage ting frå grunnen av slett ikkje er så vanskelig eller tidkrevjande som ein skulle tru.
http://ordentligmat.no/2009/11/hjemmelaget-majones-pa-to-minutter/

Vermelding 27.februar - 2011

Klokka er 14.45. Temperaturen ute er +4 grader C, det er overskya og opphaldsver. Snøen og isen smeltar så smått, men det er mykje som kjem fram når snøen forsvinner. Då den første snøen kom 20 oktober i fjor, stod plommetrea med fullt lauv og ingen ting var rydda i hagen, så eg tippar det ser fælt ut under snøen,ja.
No har vi nettopp ete middag, i dag blei det spaghetti og kjøttsaus. Kjøttsausen laga eg heilt frå botnen av, og den blei veldig god. Eg brukar aldri oppskrift, men tek det eg har tilgjengelig. Blant anna synest eg soltørka tomatar er eit must. I dag opna eg ein ny pakke, og måtte sjølvsagt maule litt. Då viste det seg at tomatane smaka søtt, ikkje salt. Eg hadde ikkje lagt merke til at det stod "Sweet tomatoes" på pakken. Men dei var altså eventyrlig gode, både åleine og i kjøttsausen. Elles hadde eg i:  Sjalottløk, kvitløk, paprika, sopp og tomatpuré. Ja også kjøttdeig naturligvis og diverse krydder.Og så brukar vi sjølvsagt grov spaghetti, litt fornuft må det vere.
Vi er ikkje så strenge på kva som er kvardagsmat og kva vi et på søndagar. Vi kan gjerne ha "søndagsmiddag" midt i veka.
Fjernsynet står på, og Nils ser sport innimellom. Eg les i boka mi, og synest det er greitt nok å få vite kven som tek medaljane.

Kjøpt på Coop.

Vermelding 26.februar - 2011

Klokka er no 14.00. Temperaturen ute er + 8 grader, det er opplett og litt vind. Nils og Hassan er på veg ut for å fiske, men viss det blæs der ute, legg dei ikkje utpå. Det er ikkje alltid same veret på Rjåneset som her.Eg saknar sjølvsagt kulden og sparkføret,men det må no ein gong bli vår også.Sidan vi har vore mykje på rek siste veka, bestemte eg meg for å vere heime i dag. Eg er ikkje spesielt glad i å bake, og ikkje flink i kunsten, men i dag bestemte eg meg for å lage VM-bollane som Solveig har på bloggen sin. Laga like godt dobbel porsjon, og hadde i alle ingrediensane. Bollane vart gode, men litt "kleimete". Det kan komme av at vi åt dei for ferske. Elles skulle eg laga dei litt mindre, trur eg, men var oppteken av å få plass på to brett.
Lurer på kvifor eg alltid stressar når eg bakar? Trur det skriv seg frå tida på skulekjøkkenet då vi sette gjærdeig, trilla ut, heva og steikte ----alt i løpet av 2 skuletimar. Ja, vi måtte no ha litt tid til eting også.Elles er vel gjærbakst det ein kan "tene" litt på å lage sjølv. Etter eg hadde baka, vaska eg golv. No skal eg ha meg ei stund med den flunkande nye boka eg lånte i går. Har mistanke om at det er ein såkalla "bestseller"- men eg googlar ikkje bøkene før etter at eg har lese dei. 
Prata litt med bibliotekaren i går, ho hadde vore på kurs og fått informasjon om diverse bøker, også lydbøker. Der vart det sagt at ein god opplesar kan "løfte" ei bok, slik at den fortonar seg som betre enn den eigentlig er. Det er så sant som det er sagt. Mange av bøkene eg les, hadde eg neppe orka å lese på papir.

Sidan eg ikkje sa GOD HELG i går, gjer eg det i dag!

Vermelding 23.januar 2011

Klokka er snart 13.00, temperaturen er + 2,5 grader C, det regnar og smeltar og renn etter vegane. Livsfarlig glatt mange stader. Ein har det tryggast inne.
Hadde tenkt å døype om vermeldingsinnlegga mine til "Dagbok" eller noko liknande etter nyttår, men det vart til at eg heldt fram som før. Reknar med at alle som les bloggen veit at vermeldingane mine handlar om meir enn ver.På bildet ser de Nils som passar nabohunden, Rambo, mens eigarane er på sundagstur.
Nils driv og fileterer fisk i dag også, og eg vart inspirert til å lage litt mat, både til i dag og seinare dagar. Blandaball er ein rett som eg trur er typisk for Møre og Romsdal fylke, særlig i Kristiansund. Eg skal innrømme mange ting:
1. Eg har ikkje laga denne retten særlig ofte.
2. Eg har aldri smakt blandaball som andre har laga.
3. Ikkje alle er begeistra for denne delikatessen, men vi likar den

Oppskrifta har eg frå eit ferjeblad, slikt vi fekk om bord i Rjånesferja før i tida.
Eg halverer oppskrifta, og lagar røra i Foodprosessor i to omgangar. Nils mol fisken ein gong på handkvern, då får han bort beina. Hadde litt problem med første røra, men andre gongen køyrde eg løk og poteter først, det gikk betre. Produktet er ein mellomting mellom fiskebollar og ball (klubb) og smakar godt med steikt flesk/bacon, poteter og kålrabi (og gulrøter) til. Ein halv porsjon er meir enn rikelig til oss to.

                               

                               Oppskrift.

Bruk lyr, hyse, sei eller torsk.

1 kilo fisk

1 liter oppskorne poteter

2 små ss salt

2 store løk

3 ss potetmjøl

1 ss kveitemjøl

1 dl melk

Koketid ca 45 minutt.

Har du litt fiskekraft eller fleskesvor i vatnet, er det godt, elles treng du 1/2 ts salt pr. liter vatn.

Mal fisken ein gong saman med poteter og løk. Spe med litt melk om gongen,  ha i mjølet og arbeid deigen godt.Form deigen til bollar og ha ein fleskebit i kvar bolle.
Bon appetit!

Vermelding 1.januar 2011

Godt nytt år til alle!

Klokka er ca 14.30. Temperaturen er + 3 grader C og trea i hagen står "nakne" for første gong på svært lenge. Då snøen kom 20.oktober hadde dei enno ikkje felt lauvet. Eg må innrømme at eg synest det er deilig med mildare ver, på same tid som eg saknar "julekort"-landskapet ute.Det har både snøa, sludda og regna, men no ser eg nesten tilløp til sol ute. Nils har moka og moka, og no har han vore ut og sett til huset han passar, og trulig moka litt der også. HAN slepp å legge på seg i jula. Sjølv somna eg ikkje før det leid mot morgon-men så sov eg til langt på dag, så eg er litt desorientert i verda i dag. Har ingen planar, men etter kvart må eg vel tenke på å finne noko til middag? Den ferdig krydra svineribba vi hadde i går var grei nok, men eg synest at den vi saltar og krydrar sjølve er betre. Byggrynskremen var eg heller ikkje fornøgd med. Skulle ha bløytt gryna meir enn natta over, og kokt dei mindre.

Trur eg tek ris neste gong. I dag skal vi drikke kaffi hos nokre naboar klokka 18.

Nyttårsbarnet på Eid fyller 16 år i dag, om eg ikkje tek feil, og vi gratulerer så mykje!

                               

                      Lutefisk eller lutafisk?

I dag skulle eg koke lutafisk til middag, og sant å seie er det mange år sidan sist, sidan det stort sett berre er eg som er særlig begeistra for denne dissande delikatessen. Hadde ei svak erindring om at sist eg prøvde meg, vart resultatet mykje vatn og lite fisk, og eg var ikkje dummare enn at eg forstod kva eg hadde gjort gale. Derfor konsulterte eg i dag mi mest brukte kokebok Kvasir (ev. Google) og sjekka opp koketid m.m.Resultatet vart perfekt, og fisken var så god at eg fekk hjlp med å ete opp alt.

Søt gjærdeig.

No har eg ein bolledeig ståande til heving. Skal bake bollar med og utan rosiner i dag. Eg har funne ei oppskrift på nettet som eg er veldig fornøgd med. Brukar den til bollar, skillingsbollar, skulebrød, prinsessekake m.m. Som de ser er den ganske søt, så der kan ein regulere etter eigen smak. Eg lagar sjeldan søt gjærbakst, men til jul gjer eg eit unntak.

1 liter melk
250 gram smelta smør
3 dl sukker
2 egg
100 gram gjær for søte deigar
3 ts kardemomme
2,1 kg kveitmjøl (Ha ikkje alt i på ein gong, men gøym noko til utbaking.)

Skriv ikkje noko om framgangsmåten, då eg reknar med at dei fleste kan lage ein gjærdeig.

Vermelding 29.oktober 2010

 

Klokka er14.45. Temperaturen ute er + 8 - 9 grader C og det regnar.Stort meir er det ikkje å seie om den saken.

Vi har nettopp ete middag. For ei tid sidan laga eg nokre porsjonar med gammaldagse kjøttkaker og fraus. Eg venta å finne att gode og saftige heimelaga kjøttkaker slik som ein fekk i gamle dagar. I staden fann eg nokre som var både små og faste. Eg lurer på om andre er ute for det same, nemlig at kjøttkakene minkar under steiking fordi dei gir ifrå seg væske, anten feitt eller vatn.Kan aldri vite kva dei puttar i maten no for tida. Eg nektar å tru at det er meg det er noko i vegen med, har tross alt ei viss erfaring med å lage kjøttkaker, dessutan brukar eg oppskrift - for sikkerheits skuld. "Men gjort er gjort og spist er spist", som han sa reven.

I dag har eg gjort to ting: vore til frisør og på butikken. Det var herlig å få shina opp håret både på eine og hin måten.Var lei av å ha så mykje hår hengande fram i ansiktet. Har tenkt oss ein tur til Kongsberg neste veke, men må tilbake til den 9.nov. for då er det tannlege igjen.

I kveld er det full pakke på TV-skjermen-så då er programmet lagt.

God helg til alle blogglesarane!

Vermelding 23.oktober 2010

Klokka er el 11, temperaturen + 2 grader C. Det har regna ned i snøen, men borte er han ikkje. Ikkje enno! No held sola på å bryte fram mellom skyene, og då blir det straks betre.

I dag skal vi til Hareid, og då er det skikk og bruk at eg tek med meg noko "godt". Veldig ofte blir det denne desserten, som eg kallar Oddrun- dessert, fordi det var hos ei veninne med det namnet eg smakte den første gong. Om det skulle vere nokon som ikkje har laga denne, kan de få oppskrifta her. Det er verdens enklaste: Ein pakke fløyte(eller helst litt meir), ein pakke vaniljekrem, ein pose marengs+frosne bær. Eg brukar ofte berre rips, men i dag hadde eg 50-50 rips og bringebær. Visp fløyte og legg lagvis i skåla:krem,vaniljekrem, bær, knust marengs osv. Krem og heile marengs på toppen. Heile desserten er laga på 5 minutt og den fell i smak hos dei aller fleste. Dei frosne bæra held alt kaldt, noko som er ein fordel når den skal fraktast. Har laga to porsjonar i dag!