torsdag, juni 24, 2021

Dagbok 2021: 24.juni

Klokka er no15.45, temperaturen ute er +20 grader akkurat no. Det har vore skya i dag, men det ser ut til å klarne opp-håper det!I dag vakna eg tidleg, men greidde å ligge i ro til 7.30. Eg hadde ein del å gjere så eg kom relativt fort i gang. Eg støvsuga teppegolva og vaska dei andre, spylte trappa, ordna klesvasken etc.etc. Så vart det Serie-pause. Eg var litt låk i ryggen , så eg måtte kvile litt. Eg skulle ned til fysioterapeuten med frikortet mitt, så eg bestemte meg for å kjøpe ny koffert med det samme. den kjøpte eg på ALTI. Eg var litt redd for at den var for stor. Viss alle kjem med like store koffertar kan det bli plassmangel sjølv om vi har to bilar. Men den gamle kofferten var like stor.......Eg hadde tatt med ei saks i veska, så eg køyrde bort til gravplassen og klipte graset rundt steinen. Og så vatna eg. Trudde ikkje der var så tørt sidan vi fekk regn i går kveld. Tok eit bilde, som vanleg, og då viser både føtene mine og vatnekanna på speilbildet i gravsteinen.
Då eg kom heim att var klokka ikkje 14 ein gong, så det vart ein dryg føremiddag. Eg laga meg grønsak-salat i dag også, hadde kjøpt inn litt for mykje med tanke på at vi reiser i morgon.Eg er ikkje ferdig å pakke, men det er no fort gjort når ein veit kva som skal med. Før i tida hadde eg god trening i å pakke, men no er det lenge sidan sist. Eg syntest eg hadde det så fint i hagen i går, sidan det kom og regna oppå kugjødselkomposten. I dag såg eg manglar i eitt av bedda, men er valde å oversjå det. Kan vere greitt å vere rein under neglene når ein skal besøke folk.Marit reiste på tur i dag, men kjem att sundag. Vi skal vere vekke ei veke viss alt går etter planen. I fjor då Margrete og gutane+ Rasmus med fam. var der ute var det fantastisk fint og varmt vêr, vi forventar ikkje at det skal bli slik i år.

onsdag, juni 23, 2021

Dagbok 2021: 23.juni

Klokka er 15.05, temperaturen ute er + 17 grader, men eg synest det er litt kaldt. Det er litt tidleg å skrive blogg, men eg hadde pause no så det passa slik. Får heller føye til noko om det blir aktuelt. Planen for dagen var først og fremst å slå plenane. Det har eg gjort, var ferdig til klokka var 12. Så spylte eg klipparen både vel og lenge, såpass eg var rimeleg våt sjølv også. Eg gjekk inn og sette meg til å sjå TV i dei våte kleda. Det var då eg fekk frosten i meg. Men eg gjekk i dusjen og fekk varmen att + at eg vart rein. Førre veka dreiv eg og handklipte rundt buskar og tre etter at eg hadde klipt plen, og sidan har eg halde på med "handklipp" kvar dag, så eg har på ein måte kome "rundt" , men graset veks heile tida, så eg kunne godt ha tatt ein runde til no-men det gjer eg ikkje. Middagen i dag vart som i går, men litt is og kaffi til dessert. Eg har vore inne på sida mi på Helsenorge og fått printa ut både Koronasertifikat og Frikort. Eg er så glad for at Helge fekk printeren til å virke igjen , for eg treng den eigentleg. Det er alt begynt å bli nokså tørt ute i bedda og elles, så eg vil no vatne godt før eg fer herifrå. Men viss det blir veldig varmt og sol mens eg er vekke, håper eg at nokon frå Hareid kan berge plantane mine. Eg har særleg omsorg for dei to bærbuskane øvst i rekka, ein solbær-og ein blåbærbusk.
Hageslangen ligg ute, der er ein hendel på veggen for av og på, men ein må inn i kjellaren for å opne stoppekranen. (Den må også stengast etter bruk, for den lek.) Eg skal gøyme husnøklane på ein plass som eg skal orientere Solveig om, kan ikkje skrive det her. Så kan de låse dokker innn om det er noko anna også. Kjellerdøra er ikkje så god å låse, men eg prøver. Det er første gong eg reiser frå huset etter at eg vart åleine. Før var det alltid Nils som passa på at alt var i orden. Marit reiser til Oddrun i morgon, men kjem att søndag, så ho har lova å ta inn posten og sette bosset opp til vegen neste onsdag. Ho skal også få vite gøymestaden til nøklane ifall nokon må ta seg inn. Eg har mykje å tenke på når eg skal vekk nokre dagar. Men Margrete tenkjer på alt det andre som angår reisa, eg syter berre for meg sjølv. No skal eg ut og plante rosa som eg fekk av Einar til bursdagen min, og så blir det vel gjort litt anna også, men eg ville ikkje skitne meg ut meir i dag. Skal begynne å vaske klede etter kvart. I morgon skal eg shine huset innvendig og pakke kofferten.

tirsdag, juni 22, 2021

Dagbok 2021: 22.juni

Klokka er no 18.35, temperaturen ute er + 17 grader, sola skin og vinden blæs. Eg kom nettopp inn frå hagen der eg har jobba eit par timar med å klippe gras med saks. Begynte handklippinga etter at eg hadde klipt plenane førre veka. Klipte først rundt busker og tre, og seinare begynte eg å reinske opp rundt steinane i gangvegen osb.Eg er på langt nær ferdig, men i morgon har eg tenkt å klippe plen, så får eg ta det derifrå. Torsdagen gåg med til pakking av koffert og rydding av hus. Vi skal ta laus tidleg fredag morgon.I dag har eg ikkje utretta så mykje ;vi var på trening og så handla vi litt etterpå. Har ikkje vore på matbutikk på ei stund, men i dag fekk eg handla inn grønsaker etc. såpass eg fekk laga yndlingsretten min, friske grønsaker med Apetinaost. Eg er nesten vegetarianar, men Solveig advarer mot å slutt å ete kjøtt. Eg trur ikkje ho skal frykte det.
Eg har avbestilt treninga komande torsdag, Marit reiser også vekk ein tur no. Neste veke blir eg vekke og så skal fysioterapeuten ha ferie i 4 veker. Så no må eg syte for å få mosjon og trening på eiga hand. Eg har no hagen som gir meg mykje mosjon og så går det an å gå turar her og der. No har eg ikkje undersøkt kva tid vi får nyheiter i dag, eg har ikkje sett ei skikkeleg dagsnyttsending på lenge. Den fotballen skiplar alt. Apropos fotball så har Øystein fødselsdag i dag, i morgon er det jonsokaftan og torsdag har Einar fødselsdag. Vi kunne ha feira heile veka, men når Solveig har fylt år 3. juli, blir det lang stopp, vi plar ha EI feiring på sommaren der alle bursdagsbarna blir heidra. I år kan vi også feire at mange i familien har fått vaksine-men ikkje alle enno.Men det går framover.

mandag, juni 21, 2021

Dagbok 2021: 21. juni.

Klokka er no 18.15 og temperaturen ute er + 17 grader.Her er både litt skodde og andre skyer og litt regn har det også kome. I dag kom Solveig innover ein tur og skulle vere med meg på litt shopping i Volda og Ørsta.Første stopp var Møbelringen, men der fann eg ikkje det eg ville ha.Så for vi til Volda der vi var på Møre konfeksjon og kjøpte ein genser og ein litt "fin" overdel, begge til halv pris.Det vart ein liten runde på Spinneriet utan at vi kjøpte noko der, mange av butikkane som var der før, var der ikkje lenger no. Vi drakk så kaffi på Geiranger bakeri før vi var innom garnbutikken. På heimvegen stoppa vi på Skeidar der eg fann eit golvteppe til datarommet mitt. Eg var klar over at det var litt for breidt, så no må eg anten ha noko bort under senga eller så må eg klippe. Får sjå kva det blir til. Då Solveig reiste ut att vart eg sittande å strikke og sjå "serien min", så i dag har eg ikkje gjort mykje til gagns. Eg var ikkje heilt ferdig med jobben nedanfor huset i går, men eg går ikkje ut og klipper gras i regnver. Resten av veka går vel med til trening, plenklipping og koffertpakking. Margrete ordnar ut med det meste, for vi må ha med både sengklede og handdukar, Der er vaskemaskin i "leilegheita så vi treng ikkje å ha med all verda. Margrette og Ingeborg skal ordne med innkjøp av mat etc. så eg slepp lett unna og - bra er det. Det skal bli kjekt å sjå att alle eg kjenner der ute,og å treffe slekta. No kjenner eg salthungeren, har ikkje ete anna i dag enn kaker etc.Eg får sjå kva eg kan finne.Eg veit at eg har spekesild i frysaren, men trur eg sparer den til ein annan dag. Mens eg heldt på å kave med golvteppet, kom det ein ung mann og ville ha meg til å støtte norsk flyambulanse. Eg gjekk inn på ein avtale om å betale 100 kr. pr. månad-fast trekk i banken. Eg trur det skal gå bra. Var inne på kontoen min i dag og der hadde eg fått både pensjon og tilbakebetalt skatt(5500kr.) "Intet kommer i en lukket hånd" brukte mamma å seie.

søndag, juni 20, 2021

Dagbok 2021: 20.juni

Klokka er no 19.12, temperaturen ute er + 18 grader C og det har vore ein fin dag, sjølv om sola forsvann etterkvart. Eg var ute på føremiddagen og jobba vidare med klipping av gras for hand etc.Heilt stilt arbeid. Hadde avtale med Margrete at ho skulle hente meg, og eg var ikkje før komen i hus så var ho på veg, men eg fekk no dusja og kledd meg om før dei var her. Ho hadde med seg Erlend og Ingrid; i Volda venta Amanda, Eirk og Ingeborg + Svein N. Feiringa av Margrete sin 53årsdag vart spesiell, men veldig kjekk. Vi starta med gåtur i Elvadalen etter at bilane var parkerte på Årneset. Eg har ofte hatt lyst å gå den turen, men det blir ikkje til at ein reiser til Volda for å gå tur åleine. Vi gjekk på grusveg, og det var mykje å sjå på langs vegen, med ein journalist og ein voldapolitikar som som var godt orienterte. Ikkje visste eg at eit slikt eldorado låg så nær Volda sentrum.Vi såg også den fine aktivitetsparken som vi kom over på turen. Det er vel noko liknande vi skal få her i Ørsta også-anten den blir heitane Tussa-eller Hamne-parken.
Då vi kom tilbake til Volda gjekk vi på "My Kitchen" for å ete sushi som er Margrete sin yndlingsrett. Det vart ei god stund å vente på maten så vi fekk no prata mykje med kvarande.Og så drakk vi fleire muggar med vatn.Men maten var verdt å vente på,og kvar ein smule gjekk med.
Etter sushien fekk vi kaffi og kake/dessert. Det vart ei annleis og veldig kjekk feiring i dag. På fredag møter eg dei fleste att for då skal vi til Solund. Det er noko eg ser fram til. Eg får ei litt travel veke med å få alt her heime i stand før eg fer, eg er ikkje så reisevand lenger.Og ikkje vant til å reise "åleine". Takk for ein fin dag, Margrete!

lørdag, juni 19, 2021

Dagbok 2021: 19.juni

KLokka er no 18.25, temperaturen ute er + 19 grader C og sola skin. På føremiddagen var det skodde og ikkje så varmt, men det kom seg. I dag har eg vore heime åleine heile dagen. Eg hadde tenkt meg på butikkar,men slo det frå meg. Eg har stort sett det eg treng i hus.Eg ville bruke dagen til å få betre orden i hagen, det vart lite gjort denne siste veka då det regna stort sett kvar dag. I dag har eg klipt og klipt -med saks. Ja, eg har to kantklipparar, så det står ikkje på. Den eine får eg ikkje til å bruke, den andre går på batteri, og eg klarer ikkje å få laus batteriet og sette det på lading. Eg kan alltids få nokon til å hjelpe meg, men så virkar det ca 15 minutt, så må det ladast igjen. DERFOR brukar eg saks. Problemet er berre det at eg må stå tvekroka heile tida -og det likar ikkje ryggen.Eg blir også fort trøtt i knea. Litt problem må ein rekne med i min alder, men eg har fått gjort ein heil del likevel. Eg har klipt rundt tre og busker og mellom steinhellene som dannar "veg" nedanfor huset. Før i tida brukte eg å ta opp ei og ei helle og røske vekk graset-ikkje kvart år, men kanskje annakvart. Eg har rekna ut at det er sjette sommaren eg steller hagen åleine. Og sjølv om eg klagar på det eine og det andre, så er det det eg vil. Eg har fleire venninner på same alder som har flytta i leilegheit, men dei er så spreke at dei går tur både i skog og fjell, og så badar dei i sjøen heile året- somme av dei. Eg hadde lang middagspause, for etter at eg hadde ete, la eg meg strak ut på solsenga og kvilte meg, før eg tok siste tørnen ute. Det kan godt hende eg gjer litt i morgon også, for komande fredag reiser eg i lag med Margrete og dei fire barna til Solund. Eg har ikkje vore der ute sidan vi var i 80-årrsdagen til Anne Marie for 6 år sidan, og då var vi berre på Hardbakke. Det er enda mykje lenger sidan eg var i Trovågen. Margrete har vore der to gonger etter at Nils døde. Vi skal bu i Vågane, der er hytter og hus å leige. Eg ser fram til turen, men synest det er rart å reise frå hus og heim og vere borte ei heil veke. Vi skal fare med to bilar. I morgon fyller Margrete 53 år og då skal eg vere med henne og barna på kafé.Veit ikkje om det blir i Volda eller Ørsta. I kveld blir det vel å sitt framfor TV-en med strikketøy, eg måtte berre kjøpe littlestegarn for å ha noko på hendene. Naboane nedanfor har eit prosjekt på gang- litt spent på korleis det blir.
Då vil eg ønske alle ei fin helg. Skulle vel ha gjort det i går, men då gjekk det i gløymeboka.

Bok nr. 23 -2021: Bli snill gjen

Det er ikkje så mykje eg les for tida, det blir helst til at eg ser "Seriar" på TV og strikkar. Men på senga har eg alltid ei papirbok som eg les nokre sider i kvar kveld. Det seier seg sjølv at dette blir nokså overfladisk lesing, så eg vil ikkje vurdere bøkene så mykje - når eg ikkje engasjerer meg så sterkt. Denne boka likte eg godt til å begynne med-men eg synest den tapte seg etter kvart. Eg las siste sidene no i dag mens eg ventar på at sola skal kome fram så det blir litt varmare ute.

fredag, juni 18, 2021

Dagbok 2021: !8.juni

Klokka er no 18.40, temperaturen ute er +16 grader C, det er opplett, lettskya og litt sol innimellom. I dag tok eg fredagsvasken på fredag, for eg tenkte eg måtte bruke morgondagen på plenklipp. Etter at eg hadde vaska etc. sette eg meg til å sjå serie + strikke. Margrete sende melding om at ho ville komme hit ein tur mens ho venta på Ingeborg som skulle komme med flyet frå Oslo. Dei hadde hatt avslutning på jobben, så det vart ikkje alktuelt med bevertning. Men vi fekk no prata om diverse, blant anna turen til Solund. Margrete +4 barn skal reise med to bilar og eg har tilbod om å vere med. Dei har leigd ei leilegheit på same staden som i fjor og der er plass til meg også. Det ser ut som eg kan komme meg på tur i år, har ikkje vore på overnattingstur sidan vi var på Hardbakke i Anne Marie sin 80-årsdag. Det var i 2015. På Kongsberg har eg ikkje vore sidan Rasmus fylte 50 år i 2014. Så det er kanskje på tide at eg kjem meg ut dørene, men eg er veldig glad i å vere heime altså, særleg om sommaren. Nok om det. Etter at Margrete var vekk laga eg meg litt middag av restar frå i går, og etterpå kokte eg graut av risen som var att, den skal eg ha anten i kveld eller i morgon eller begge deler. Eg slappa av litt etter middag, men så høyrde eg at plenklipparane surra i alle retningar, og då greidde eg ikkje å halde meg i ro, men gjekk ut og klipte heile tomta non stop. Det kan godt hende eg må fare litt over i morgon med rive eller klippar, for når ein klipper så vått gras er det tendens til at klipparen spyttar ut litt. Marit reiste på hytta til Kjartan i dag, så eg skal passe Lollo. Berre ho ikkje stikk av slik som sist. Eg veit ikkje kva eg skal gjere i morgon, men eg må i alle fall handle litt mat om ikkje anna. No ser det ut til at det kan skine opp, men eg går ikkje tur på Vernet i dag. Eg har hatt nok mosjon.

torsdag, juni 17, 2021

Dagbok 2021: 17.juni

Klokka er no 18.35, temperaturen ute er + 13 grader og det har regna litt i dag også. I går kveld fekk vi melding frå fysioterapeuten at ho ikkje kunne kome i dag fordi einet barnet hennar var sjuk. Det blei altså fridag på Marit og meg. Eg sende melding til henne rett etter frokost i dag og spurde om ho ville vere med på ALTI og det ville ho. Vi skulle ikkje fare før klokka 12 så eg fekk gjort nokre småjobbar her heime først. Blant anna tok eg inn rabarbra som eg reinska og fraus. Eg skulle hente ut alle medisinane mine i dag, men det var ein eg ikkje fekk fordi dei ikkje hadde den, men eg har så mykje att at eg held ut til dei får den inn igjen. Sidan vi hadde god tid i dag såg vi oss om både oppe og nede på senteret og såg på alt det fine som er å få kjøpt, berre synd at vi ikkje har så mykje bruk for noko. Det einaste eg kjøpte meg var ei ny treningsbukse, det kan vere bra å ha to. Og så kjøpte eg ein bunt garn på -nille, som eg skal strikke tynne lestar av. Det blir litt sløvt å sitte med hendene i fanget og sjå TV heile kveldane. Mat kjøpte vi på KIWI på heimvegen. Marit anbefalt nokre ferdig krydra kyllingspyd som eg kjøpte og steikte til middag, kokte ris til og laga salat, så det vart både sunt godt og mettande. Etterpå såg eg to seriar som eg følgjer, den eina slutta i dag. Men så har eg ein annan som eg ventar på fortsettelse av (Hvide Sande).Eigentleg skulle eg ha klipt plen i dag, men eg må nok vente til det tørkar opp igjen. På bildet eg har lagt inn i dag kan de sjå plommene mine, der heng att nokre visne resta at dei eg hadde i fjor også. Blir alle modne og gode, kjem vi til å ha rikeleg. Det var masse plommer i fjor også, men mykje rotna og vart øydelgt fordi dei hang for tett. Eg kjem meg kanskje ikkje opp i trea for å tynne ut i år heller. ?

onsdag, juni 16, 2021

Dagbok 2021: 16.juni

Klokka er no 18.20, temperaturen ute er ca +14 grader og det regnar litt av og til. Ergo er det både varmare og tørrare enn i går. Rhododendronen på bildet kjøpte vi for mange år sidan, først ein, og så ein annan etterpå. Det var ikkje meininga å ha to heilt like, men slik vart det, og no ser det ut som ein. Når dei blomstrar av, har eg tenkt å klippe dei ned litt, slik at dei blir tettare.Det er mange fine rhododendron å sjå rundt om i hagane, eg har no fleire gonger tenkt at eg skulle kjøpe nokre til, så eg får sjå kva det blir til. I dag har eg gått her heime åleine og surra, men har no fått gjort litt til nytte også. Det er ei veke sidan eg klipte plen, men eg må nok vente litt lenger med neste klipp. I dag hadde eg bestemt meg for å vaske og rydde kjøleskapet, så då vart i alle fall det gjort. Så tok eg oska ut or omnen og pussa ruta, så no ser det litt betre ut. Elles sette eg på vaskemaskin og oppvask.I dag var det ein slik dag som egna seg for saging av greiner. Dei tjukkaste greinene som Audun saga ned i vår låg så lange dei var under altanen. Eg tok fram saga mi, kjøpt for 80 kr. på Clas, og med ein defekt plast hagestol som sagkrakk, fekk eg saga opp greinene, det vart ca. 1 sekk ved ut av det. Eg var også inne i leilegheita og sette på varme i badgolvet slik at det ikkje blir vått og fælt på veggene. Dei som budde der har vaska og rydda veldig fint etter seg.Den nye leigebuaren har flytta litt av sine ting inn. Eg steikte meg Gilde karbonader til middag og etterpå vart eg sittande å sjå seriar. Men då klokka var vel 17 tok eg på meg og gjekk ut. Det vart ein tur på Vernet i dag også, i dag møtte eg Anne Marie Øyehaug og vi vart ståande midt i trappa og prate ei god stund. Ho er eitt år eldre enn eg, og i fin form.I morgon er det trening igjen og så skal eg på apoteket og hente medisinane mine.
Starevegen sett frå Fonnvernet.

tirsdag, juni 15, 2021

Dagbok 2021: 15.juni

Klokka er no 17.15,og temperaturen ute er + 10 gtader C. Ikkje mykje å varme seg på. Eg held meg inne i nærleiken av varmepumpa for det meste. No er eg på datarommet og frå vinduet her ser eg ut i plommetrea. Eg ser at plommekarta er der i store mengdet, trur det må vere ein million små plommer tillaga, kor mange som veks seg store og modnar står att å sjå. Eg burde vel tynna ut, men det får eventuelt bli seinare. I dag har eg ikkje gjort eit skapte grann til nytte-ikkje enno i alle fall. Føremiddagen gjekk stort sett med til å førebu treningsøkta, og etter trening var Marit og eg på ALTI -eg skulle ha kalktablettar og Marit anna medisin. Eg stakk innom Mariann og kjøpte sjampo og balsam, alltid kjekt å slå av ein prat med henne. Ho gjekk i samme klasse som Margrete på barneskulen, seinare vart eg lærar til eldste sonen hennar.Marit villa handle på Spar og då vart det slik. Eg skulle ikkje ha så mykje , men fekk i alle fall fylt opp is-lageret mitt. Akkurat no går det ikkje så mykje is, men det blir vel meir sommar etter kvart. I går prøvde eg gong etter gong å ringe legesenteret,men telefonen virka ikkje. Det kom opp ein liten logo med "blokkert". I dag ringde eg til Marit og då virka telefonen. Marit hadde ein avtale på legesenteret i dag og då blei eg med dit. Det viste seg at det var der telefon-feilen var.Så eg leverte berre ein lapp, og så skulle ho eg snakka med orientere fastlegen min om at ho må fornye reseptane mine.Klokka var over 14 før eg kom meg i hus igjen. Eg laga meg pannekaker til middag i dag, det var fort og lettvint. Etterpå skulle eg kose meg med seriane mine. På den eine var det berre ein ny episode, og den såg eg meir og mindre to gonger fordi eg halvsov innimellom. Då eg skulle sjå den andre, stod der at det ikkje kjem ny episode før fredag. Så no lurer eg på om eg må ha enda ein serie for å få nok. Grunnen til all serie-sjåinga er fotballen, som eg bryr meg lite om. No ser veret ikkje så verst ut, så eg skal kanskje gå ein liten tur, det hjelper både for frosten og humøret.Det blir vel ein tur på Vernet-det er lettvint og avgrensa.

mandag, juni 14, 2021

Dagbok 2021: 14.juni

I dag er eg i litt dårleg humør, det regnar heile tida og det er surt og kaldt, sjølv om temperaturen ikkje er verre enn + 12 grader.Eg gjekk ut på trappa og tok eit bilde i kvar retning, og då eg såg bilda måtte eg berre glede meg over kor fint og grønt her er. Hadde det vore sol heile tida, hadde vi ikkje hatt det slik. Det vart ei lita trøst i ein elles nokså kjedeleg dag. Eg trudde det skulle lette opp ut på ettermiddagen så eg fekk gå ein tur, men det har ikkje skjedd- enno i alle fall. I dag hadde eg berre ein post på programmet mitt og det var at eg skulle bake brød, for å få brukt opp melk som eg har kjøpt. Eg brukar sjeldan oppskrift når eg lagar brød, eg tek fram alle mjølsortane eg har + diverse frø og så hiv eg opp i deigen litt av kvart. Det blir som regel bra, og så blir det ulike brød kvar gong. Då eg hadde laga deigen i dag, ville eg pusse ruta på omnen og slutte å fyre ei stund. Men omnen var så full av sot at eg måtte brenne den rein. Derfor henta eg eit par skier og fyrte opp. Så fekk eg ein lys idè, eg kunne brenne opp plommetrekvistar. Då Audun beskar plommetrea sist vår, rydda eg opp etterpå eg hadde dei tynnaste kvistane i ein sekk og dei som var tjukke nok til å vere ved i ein annan. Dei tynnaste kvistane hadde eg tenkt å ta med på VØR, men i dag tok eg like godt og brende heile greia i omnen, så blei her godt og varmt og det blir ein sekk mindre å fare på VØR med. Elles så lurer eg med til å sjå litt Seriar innimellom. "Love Child" kjem med ein ny episode kvar dag utanom helga. Derfor begynte eg å sjå Vite Sande også, men då eg hadde sett ein episode i dag, var det stopp der også, neste episode kjem i morgon. Eg har prøvd å ringe legesenteret fleire gonger, for eg må få oppdatert reseptane mine, men eg får ikkje til å ringe. Der kjem opp ei melding om at det er blokkert. Eg forstår ingen ting. Eg reknar med at Solveig og Øystein er på heimveg etter å ha vore på avslutning av studiet til Olaug. Seremonien var i Grieghallen. Dei får legge ut bilde sjølve, eg tek meg ikkje den friheita.No ser det ut til at det kan bli ei lita stund med opplett, såpass eg får lufta meg litt. I morgon skal vi på trening og på Alti-Marit og eg.

søndag, juni 13, 2021

Dagbok 2021: 13.juni

Klokka er no 16.30, temperaturen ute er + 13 grader, og det er kald vind. Inne må eg ha på varmeomnar/ varmepumpe.Det er liksom ikkje sommar lenger, men eg håper varmen kjem att. Dagen i dag har vore litt slapp. Så snart eg var ferdig med frokosten gjekk eg i gang med å farge håret mitt, det var blitt nokså fargelaust dei siste dagane. Førre gongen eg farga vart det altfor møkt, nesten svart, så denne gongen hadde eg kjøpt ein farge som heiter "mørk blond"-men like mørkt vart det. Det er vel snart på tide å slutte å farge og la håret vere grått som det eigentleg er. Men det er noko som held meg att. Eg hadde ikkje lagt planar for dagen , men eg hadde fått melding frå Ingrid om at ho og faren ville komme ein tur og sette inn nokre ting i leilegheita, så eg ville no vere heime. Til middag i dag steikte eg den andre halvdelen av ørretpakken- den første tok eg for ei veke sidan. Det var like godt i dag og eg vart veldig mett. Elles brukte eg litt av føremiddagen på å fylle ut "husleige-papir". Ingrid og faren kom ei stund etter at eg var ferdig med middagen, dei bar inn noko og så for dei, eg trur kanskje dei skulle hente meir. Ja, eg snakka no sjølvsagt med dei, men dei ville komme att ein gong til og då skulle mora også få vere med, så då kunne vi ta papirarbeidet også. Eg kunne gått ein tur, men heldt meg heime i tilfelle dei kom att med eit nytt lass. Det vil no fort vise seg. Eg saknar sola og varmen-eg likar ikkje så godt å vere ute når det er kaldt. Eg likar også mykje betre å jobbe ute enn inne -når temperaturen er god. Men alt som veks set pris på regnet som kom. For morgondagen har eg ingen planar-men det dukkar vel opp eit kvart. Eg har alltid noko som er ugjort å gripe tak i. Ingrid og faren kom att med lass nummer to, og då var mora med. Vi prata litt på trappa, men utsette papirarbeid etc. til seinare. Veldig hyggelege folk.Då dei hadde fare, gjekk eg på Vernet ein tur.

lørdag, juni 12, 2021

Dagbok 2021: 12.juni

Klokka er no 20.15. Temperaturen ute er + 10 grader, og vi har hatt mange voldsomme regnbyger i løpet av dagen. I dag har det vore sundag i hovudet mitt, og eg strevar enno med å forstå at det berre er laurdag. Eg vakna tidleg i dag, men låg til ca 7.30. Eg hadde utsett fredagsvasken, men den vart eg tidleg ferdig med. Hadde så smått tenkt meg ned på ALTI i dag, men det vart ikkje noko av. I staden gjekk eg tur på Vernet på føremiddagen. Middagsmaten i dag vart det samme som i går, og etterpå sette eg meg til med kaffikopp og serie. Etter ei stund ringde det på døra-det var Helge som kom for å gjere ein jobb i kjellaren. Men det første han gjorde var å opne varmepumpa og ta ut "støvfangarane" og eg fekk beskjed om å støvsuge. Trur ikkje dei har vore støvsuga på mange år. Etter at han var ferdig i kjellaren, fekk eg han til å sjå på printeren. Han bala ei stund, men jammen fekk han den til å virke igjen. Det er eg glad for, for eg treng den verkeleg. Etter at Helge forsvann, gjekk eg opp til Marit, som planlagt, ho er heime åleine denne helga. Vi drakk kaffi og prata, eg skulle ned igjen til 19-nyheitene, men der var noko heilt anna. Heldigvis er det liv i fotballspelaren. Det blæs og regnar litt ute no, og temperaturen er ikkje så behageleg lenger, eg må ha på varmepumpa i stova. Eg fekk melding frå Ingrid som skal bu her til hausten om at dei kjem innom i morgon ettermiddag/kveld. Vi skal fylle ut skjema for utleigar/leigetakar. Solveig har printa ut skjema, men no kan eg fylle ut på data, om eg vil. Det blir viss meir fotball i løpet av kvelden, dei skal visst ta att alt dei har forsømt dei to siste åre. Men eg har ein SERIE......

fredag, juni 11, 2021

Dagbok 2021: 11.juni

Slangens kviledag! Klokka er no 17.08, temperaturen ute er + 15 grader C og det regnar. Akkurat då eg gjekk ut og skulle ta bildet av slangen vart det ein voldsomt regnskur, så eg vart våt til skinnet på ei lita stund. Men det tørkar vel opp att. I dag begynte det tidleg å regne, noko som førte til ein kviledag for meg. Eg shina opp kjøkkenet, bytte på senga og sette på vaskemaskina blant anna.Las ganske mykje i avisa også. Men så vart eg sittande ved PC-en og prate med Mimi, Bodil og Marit ei god stund før eg køyrde på butikken og handla. I dag hadde eg med meg panteflasker for 95 kr, så eg sparte litt betaling . Då eg kom heim laga eg yndlingsretten min til middag, eg har fått heilt dilla på salatar. I dag fekk salaten ein ny ingrediens, det var dei svarte olivenane.
Etter at eg hadde ete vart det kaffi og TV, eg harr to seriar som eg ser no, den eine kjem ikkje med ny episode før mandag. Når eg sit og ser TV saknar eg å ha eit "spøt", men så snart Solveig har kome godt i gang med genseren min er det meininga at eg skal overta. Det vart litt for vanskeleg for meg å begynne-forstod ikkje oppskrifta skikkeleg.Og då må dei flinke døtrene hjelpe den gamle mora si. Eg har ikkje tatt fredagsvasken i dag, den tek eg fort i morgon føre middag. Kva som elles skjer i morgon, veit eg ikkje, men søndag får eg besøk av den nye leigebuaren min. Trefte min "personlege elektrikar" på butikken i dag. Vi har avtalt at han skal komme og rydde opp i det elektriske. No kom Marit ein tur ned, så då må eg henge på kaffien.

torsdag, juni 10, 2021

dagbok 2021: 10.juni

Klokka er no 17.00. Temperaturen ute er + 21 grader, det er overskya men varmt og sommarleg. Fint arbeidsvêr for dei som har arbeidslyst. Eg er ikkje plaga med det i dag. Sidan vi ikkje begynner på treninga før klokka 12.30 om torsdagane, prøver eg å få gjort noko heime før eg fer. I dag støvsuga eg alle teppegolva mellom anna, før eg dusja og vaska håret. Det var litt tungt å trene i dag, for der var varmt til tross for opne vindu og dører. Vi skulle eigentleg handle opå Kiwi på heimvegen, men eg hadde gløymt å ta med meg handveska, så eg var utan pengar og sertifikat. Eg kunne ha køyrt heimom og henta , men utsette handlinga til i morgon. Marit handla mens eg sat i bilen. Då eg kom heim fann eg meg litt mat før eg sette meg til å sjå ein episode av "Love Child". Eg visste ikkje om eg skulle jobbe ute i dag så eg strauk nokre klede før eg bestemte meg for å renske ugras i bedet ved garasjen. I går jobba eg mykje, men i dag var eg ikkje så opplagt.Kanskje blei eg trøtt fordi sol-lyset mangla. I dag fekk eg melding frå Ingrid som skal bu her til hausten, ho og mora(?) ville komme innover og få utfylt husleigekontrakten på søndag. Det passar bra, for der er også andre ting vi må snakke om. Her er t.d. ikkje gardiner. Margrete har hatt Ingrid som elev, men så ville ho gå ei anna linje som er her i Ørsta, derfor flytta ho.Kva eg skal gjere i morgon er eg ikkje sikker på, men eg skulle ha vore og handla litt både her og der. Solveig og Øystein reiser til Bergen i helga, det er avslutning for studiet til Olaug. Eg forstår liksom ikkje at det er sommar, enda så fint vi har hatt det. Men dagane går og går utan at det er så store endringar. Eg ser fram til at alle kan bli vaksinerte slik at vi kan begynne å leve meir slik som før. Eg har lyst å gå ein tur på Vernet, eg skal sjå om eg har litt energi igjen til det.Eg trur eg går.
Det blei tur på Vernet. Mykje fint å sjå i naturen no, og lupinen har funne seg ein stad å vere.

onsdag, juni 09, 2021

Dagbok 2021: 9.juni

Klokka er no 16.50, temperaturen er + 25 graderC, det er lettskya og fint. Eg kom relativt tidleg i gang med plenklippinga i dag. Hadde tenkt å sette av Skråninga til i morgon, men fann ut at det var like greitt å gjere seg ferdig.Så er det ei veke til neste gong. Eg likar å klippe plen, sjølv om det kan vere litt plundrete her og der i mellom busker og tre.Eg var rimeleg sveitt då eg var ferdig. Då tok eg ein pause og såg TV før eg laga meg middag. Lettvint og godt i dag, Gilde karbonader - og jordbær med fløte til dessert. Eg vart trøtt etter å ha ete og la meg ut på altanen på solsenga, hadde med ei bok, som ikkje vart lesen. Då eg skulle stå opp att fekk eg så mykje lårkrampe at det tok si tid og komme på beina. I mellomtida var naboen komen i gang med plenslåtten sin, og hans plen er mykje finare enn min-det får eg berre finne meg i. Eg hadde tenkt å klippe litt kantar, men det er eit trasig arbeid når ein berre har ei handsaks å hjelpe seg med, men eg får vel ta meg ein tørn. Eg klipte no alle kantar førre veka så kanskje eg ikkje treng å ta det så nøye.I morgon er det trening igjen, og då kjem eg ikkje til å få gjere så mykje ute. Ja, hadde eg ikkje hatt hagen no sommars tid-hadde det blitt bra kjedelig.
Graset er alltid grønare på hi sida av "gjerdet".

tirsdag, juni 08, 2021

Dagbok 2021: 8.juni

Klokka er no 17.35. Temperaturen på trappa er +20 grader, men det er litt vind. Det gjer berre godt når ein jobbar. Eg gjorde ikkje anna før eg for på trening i dag enn å dusje, vaske håret og sette på ei vaskemaskin. Etter at vi hadde trena, handla vi på Spar. Eg skulle ikkje ha noko eigentleg, men enda opp med å handle for over 500 kroner. Det er meg vel unt. Eg har fått dilla på grønsaksalat, frukt og bær-det kostar å ete sunt! Då eg kom heim åt eg litt , så betalte eg rørleggarrekninga som eg fekk på e-post (Det har eg ikkje vore ute for før, men eg sjekka fodi har bad om e-postadressa mi. Smart å sleppe porto på brev) Så ville eg ut i hagen og jobbe. Tok først ein liten reprise på bedet nedanfor garasjen, det var fort gjort. Den andre jobben var tyngre og varte lenger. Eg gav meg til å ordne kanten mellom plenen og singelen nede under altanen. Ordna opp frå tilbygget til inngangen, det som er lenger inne har eg pusla litt med før. Det var eit trøttande arbeid, men etterpå skrudde eg på vatnet og vatna alle bed og plantar. Armane mine er heilt i orden i år, men knea er ikkje det, så eg blir fort trøtt i føtene, sjølv om det er hendene som "jobbar". I morgon er det "heimedag" så eg håper det blir fint vêr då også; viss ikkje så har eg nok å gjere inne også. Det er sjeldan eg kjeder meg for det er alltid noko ugjort.

mandag, juni 07, 2021

Dagbok 2021: 7.juni

Klokka er no 20.25, temperaturen på trappa er + 20 grader og vi har enno sol her hos oss, men ikkje så mykje etter klokka 9, trur eg. Eg var nettopp ut på trappa og tok bilde av det fine vêret, kjekt at sola kom att etter eit par dagars fråver. I dag stod eg ikkje opp så tidleg, men meir til vanleg tid. Eg hadde tenkt ut diverse jobbar som eg skulle gjere i dag. Det føste var å vaske stuevindua på utsida, skylle dei og spyle altangolvet. Det var ikkje så lenge gjort, eg er så glad i den lange slangen etter at eg i fleire år har slite med ein som var for kort. Men eg har ikkje vatna hagen i dag, sjølv om det såg rimeleg tørt ut. Etter at eg hadde ete noko som likna på middag sette eg i gang å rydde i tilbygget, der er altfor mykje ting og tang som eg ikkje treng-og mykje som eg MÅ ha der. Eg gjorde meg ikkje heilt ferdig i dag, for eg ville no vere litt ute også. Eg sette meg ut på altanen med ei bok, men det varte ikkje så lenge før eg fekk besøk. Det var Solveig og Øystein. Øystein hadde ærend til Volda, men Solveig vart att her. Det vart enda eit måltid med is og kaffi, det går mykje på det for tida. I morgon er det trening igjen, men eg håper å få styrt litt ute her også. Har ein hus og hage blir ein aldri arbeidslaus. Det er så kjekt å vere ute og "jobbe" og ikkje minst prate med naboane.

søndag, juni 06, 2021

Dagbok 2021: 6. juni

Klokka er no ca.15.30, det er + 17 grader ute og det har regna. Franmleis ligg skodda nedetter fjellsidene. I dag fyller barnebarnet Olaug 24 år,og då må ein leite i gamle album etter barnebilde. Eg har ein heil hyllemeter eller kanskje to med album frå tida før data-alderen. Åra har godt fort, og det verste er at til eldre ein blir, til fortare går tida. Olaug bur no i Bergen, ho og sambuaren har kjøpt leilegheit på Troldhaugen. Olaug er ferdig med tannlegestudiet sitt og har fått jobb i Bergensområdet. Men eg reknar no med at ho kjem "heim" i løpet av sommaren. Eirik (tvillingfetteren) er komen heim frå Trondheim, men Ingeborg er framleis i Oslo. Også ho er ferdig med studiane sine i år og har fått lærarjobb på Nordstrand i Oslo. I dag vakna eg tidleg, og begynte å vente på at dei skulle flytte ut i kjellaren. Eg har hatt to kjekke ungdommar buande her til og frå i to år. Dei studerte i Volda, men det vart mange avbrekk i Korona-tida. Dei hadde rydda og vaska fint etter seg. Foreldra til Linda kom i går og heile familien har vore sysselsett med å tømme leilegheita og lesse inn i bilane.Linda vart lei seg då dei skulle til å fare-for då måtte ho ta farvel med nabokatten, som har vore på besøk hos dei titt og ofte. Eg var ned og såg over leilegheita i lag med Linda,og det var bra for ho hadde gløymt å ta med seg gardinene på soverommet. Leilegheita ser bra ut, men eg skal no fare over og leite etter feil. Helge skulle komme att og reparere skikkeleg det elektriske, han laga det berre til så dei kunne bruke det dei siste par dagane. Eg kjem til å sakne leigebuarane mine, men no om sommaren er det greitt å vere her åleine slik at eg kan styre på som eg vil både ute og inne.I dag har eg ikkje gjort det skapte grann anna enn å lage meg middag. Den var god: Steikt ørret(vakuumpakka og frosen)+ grønsaker og potet. Eg kjøper den ørreten som har skinn, og steiker på skinnsida først. Då blir fisken saftig og fin. No skal eg anten koke meg kaffi eller gå ein tur - eller begge deler.

Bok nr. 22- 2021:Kobrahjerte

No har eg lese enda ei papirbok. Det går ikkje fort unna når ein berre les nokre få sider kvar kveld.Forfattaren Toril Brekke har skrive mange bøker og eg har lese nokre av dei. Eg er alltid berre sånn passeleg begeistra. Ho flettar alltid noko av "Historia" inn i teksten-her er det Vietnam-krigen som er ein del av bakteppet. Eg veit ikkje heilt kva som gjer det, men eg blir aldri heilt oppslukt av bøkene til denne forfattaren. Teksten er alltid litt "slapp". No får eg rydde litt i bokhylla og finne meg meir litteratur. Eg kan ikkje lese Storytel på senga, for då sovnar eg med boka på øyret.

lørdag, juni 05, 2021

Dagbok 2021: 5. juni

Klokka er no 15.55, temperaturen ute er + 22 grader C, det vart varmare no på ettermiddagen enn det var tidlegare i dag. Det har vore ein relativt aktiv dag. Først på dagen tok eg "fredagsvasken"-blant anna vaska eg dusjkabinettet med bilsjampo og svamp-det synest eg er litt kjekkare enn slik eg har gjort det før. Etterpå skulle eg ned på KIWI og handle litt, og Marit vart med. Så fann eg ut at vi kunne ta ein tur på gravplassen med det samme og vatne. Og det gjorde vi. Då vi kom heim att var klokka berre litt over 13.Så eg tok meg litt lunsj og etterpå gjekk eg ein tur på Vernet. Der var fint og ikkje så mykje folk akkurat då.
I dag sat eg på nesten alle benkane, ikkje fordi eg var sliten, men fordi det var så fint å sitte og sjå utover. Når eg sit på denne benken ser eg rett bort på Melle og den raude løa "vår". Lufta var ikkje heilt klar i dag, men litt disig. Eg trefte ingen å prate med på turen min, og Starevegen var også folketom.
Då eg kom heim hadde faren til Linda parkert bil og hengar på tunet. Det var avtalt på førehand, og ein av grunnane til at eg handla tidleg på dag. Eg snakka med faren for han kjenner eg frå før, det var han som var her då Linda flytta inn.
Eg synest det er trist når leigebuarane mine fer, men på den andre sida kan eg styre på som eg vil når eg er "heime åleine". Håper alle i familien (og eventuelt andre) har det bra. Marit har sjekka langtidsvarselet og 18-19 juni er det meldt SNØ!

fredag, juni 04, 2021

Dagbok 2021: 4.juni

Klokka er no 18.20, temperaturen ute er + 20 grader og det er overskya. Dette har vore ein innhaldsrik dag. Eg starta dagen klokka 5, som vanleg, men la meg att og greidde å ligge til ca. 7.30. Då stod eg opp og åt frokost før eg shina opp kjøkkenet. Fredagsvasken er utsett til laurdag denne veka også. Før eg begynte å klippe plen, vatna eg heile hagen, sidan eg ikkje hadde gjort det i går.Så begynte eg å klippe skråninga og ikkje berre den, men gras og ugras her og der klipte eg for hand, med saks. Då eg var nesten ferdig kom leigebuarane og fortalde at der ikkje var varmevatn på tanken deira-det var noko spom var gale. Foreldra til Linda kjem i morgon og då kan det vere godt å ha varmevatn og ei oppvaskmaskin som fungerer. Eg diskuterte med naboen, om eg skulle ringe rørleggar eller elektrikar, og vi fann ut at det kanskje var best å ta rørleggaren først. Dermed ringde eg "Vinjevoll rør " og vel ein time seinare kom rørleggaren. Han fann fort ut at det var eit elektrisk problem, men han fekk ordna det slik at det funka.Men han råda til å få tak i elektrikar. Og som kjent har eg ein "personleg elektrikar" som kom med det same eg sende melding til han. Han ordna det slik at både varmtvasstanken og oppvaskmaskina funka, men han skal kome igjen og gjere det litt skikkelegare. Eg føler meg litt hjelpelaus når slike problem oppstår, men det gjekk bra. I mellomtida kom Margrete og Amanda på besøk og dei skulle berrre ha is og kaffi og då fekk dei det. Erlend og Ingrid kom litt seinare, og så skulle dei heim til Margrete alle og ta imot Eirik som skulle komme heim i dag. Eg åt litt mat som minte om middag før eg gjekk ut og gjorde meg ferdig i hagen, spyla klipparen og sette den på stall. No føler eg at det er helg, men vi er no berre på fredag. I morgon må eg vel ha meg ei lita handlerunde etter at eg har tatt helgavasken. Litt rart at sola ikkje skin, men det er no deilig ver likevel. Ønsker alle ei god helg.

torsdag, juni 03, 2021

Dagbok 2021: 3.juni

Klokka er no 19.50, temperaturen ute er + 25 grader C, for ei stund siden stod gradestokken på + 27 grader C, varmaste hittil i år.Sist natt vakna eg av at eg var silande sveitt, det har aldri hendt før. Sidan treninga ikkje starta før 12.30 i dag, måtte eg finne på noko før den tid. Det vart til at eg rydda bedet nedom garasjen og klipte kanten rundt med saks. Etterpå vart det å dusje og vaske hår.Det var eg som køyrde i dag også, for Marit hadde falle i går og skada venstre handa si. Etter treninga handla vi litt på Spar.Eg kjøpte mest grønsaker,pluss eit glas med Apetina-ost i olje. Dermed kunne eg lage meg ein herleg salat til middag, godt med kald mat i varmen. Desserten vart enda kaldare, nemleg is-med varm kaffi til. Etter middagen skulle eg prøve å sole meg på altanen, men det vart fryktelig varmt. Vart hengande over rekkverket å snakke med naboar og leigebuarar. Linda og Erik fortalde at dei kjem til å reise alt no laurdag/sundag. Det er foreldra til Linda som kjem og hentar pikk og pakk i ein varebil. Eg kjem til å sakne desse to. I morgon er det dagen for plenklipp, men eg tjuvstarta litt i dag. Eg tok plenlappane opp mot vegen, og så klipte eg rundt huset. Eg stilte klipparen eit hakk høgare opp enn eg plar, så det vart ikkje så stygt denne gongen. Plenen kjem seg etter kvart. Eg kom inn att til 19-nyheitene, for dei må eg få med meg. Eg var heilt dyvåt av sveitte, men det er berre lekkert. I morgon blir det å klippe Skråninga + diverse kantar. Det kom ein mann forbi då eg heldt på oppe med vegen, han skrytte og syntest eg var veldig flink. Flink og flink, eg likar å halde på ute no når det er så herleg vêr.Vêret varer ikkje evig, snart kjem regnet, men då slepp eg å vatne.

Dagbok 2024: 28.mars. I dag fyller eg 84 år.

Klokka err no17.03, temperaturen ute er+ 10 grader, det er lettskya og fint  I dag har eg fått mange gratulasjonar på nettet -og elles. Eg s...