søndag, august 01, 2021

Dagbok 2021: 1.august.

Klokka er no 17.40, temperaturen er + 16 grader, det er lettskya og sol.- Ja, så er vi komne til august og ferietida nærmar seg slutten for mange. Som eg har sagt før, i min barndom starta skulen 1.september og det var ei mykje betre ordning etter min forstand. Men det er så mykje som er annleis no at det å forlenge skuleferien hadde blitt problem for mange.Så nærmar det seg altså skulestart for elevar og lærarar. Og dei vaksne barnebarna skal starte opp att på studiar, mens andre begynner i jobb. Av barnebarna her på Sunnmøre er det berre Erlend som er skule-elev, alle Solveig sine er i jobb, Ingeborg til Margrete startar i jobb i år, mens Eirik og Amanda studerer vidare i Trondheim. Eivind på Kongsberg skal til Tromsø og studere, mens dei to andre held fram skulegangen heime. Eg var bra sliten i går kveld -orka ikkje å strikke eingong, men i dag var eg i fin form igjen. Etter at eg var ferdig med frokosten tok eg fram støvsugaren og støvsuga stova og gangen-det var eit visst behov. Så sette eg meg til å høyre radio og strikke. Eg gjekk ut på altanen og då slo den imot meg-angen av granbar! Eg gjekk ut og plukka eit par liter rips, som eg renska etter kvart og skyte då eg kom inn. Det skal bli mange gode dessertar når vi kan begynne å vere meir sosiale igjen. Dei fire som bur i nr.8 rett over gata,testa seg i går, dei hadde vore i eit bursdagsselskap der det var ein smitta til stades. Hadde Marit testa positivt, hadde eg måtta testa meg også, for eg hadde vore i lag med henne.Vi var litt spente i dag før resultatet kon; heldigvis var ingen av dei fire smitta. Eg har ikkje laga middag i dag - så langt, men eg åt vaflar til lunsj. Hadde frose ned nokre som vi løyvde då Margrete og barn var her. Eg tina og skjerpa dei i brødristaren og då vart dei skikkeleg gode.Det er no gale å kaste god mat. Etter det måltidet vart eg så trøtt at eg gjekk ut og la meg på solsenga. Eg veit ikkje om eg sovna, men eg var i alle fall ikkje trøtt lenger då eg stod opp. Eg gjekk ut og plukka meg nokre bær som eg åt. Reiv opp to reddikar for å sjå kor langt dei var komne, det er ikkje så lenge sidan eg sådde dei.Eg er nøgd med resultatet, så langt.
Plommegreinene heng som store drueklasar, skal bli rart å sjå kor mange av plommene som modnar.
Tysdag 3.august startar treninga opp att, og fredag 6.august skal Marit og eg til Ulsteinvik for å få høyreapparat, så no blir det slutt på "ferien" vår også. Vi får taxi til og frå Ulsteinvik-det er no ein kjekk liten tur.

lørdag, juli 31, 2021

Dagbok 2021: 31.juli

Denne dungen er no i sekker. Klokka er no 18.40, temperaturen ute er + 15 grader. Det er lettskya, men opplett.Ei stund såg det ut som det kunne komme regn, men så lyste det opp att. I dag har eg gjort berre to "ting". Det første var at eg køyrde ned på Kiwi og handla matvarer, det var relativt tidleg på føremiddagen. Der trefte ev ein venn som spurde om det var Olaug-vi gjekk begge med masker. Marit har testa seg i dag, viss testen er positiv må eg også teste meg, for vi har vore i lag-i bilen t.d. Då eg kom heim var det på med arbeidsantrekket og så begynte "Jobben". Sidan det var liv i den gamle kompostkverna slo eg frå meg å kjøpe ny akkurat no i alle fall. Eg KAN denne gamle. Skiftenøkkelen leitte eg fram, for eg veit at etter ei stund er det stopp, særleg når det er vått lauv eller bar med i programmet. Eg måtte skrue opp nokså mange gonger i dag. Klokka 15 gjekk eg inn og tok meg mat, og 15.30 var eg ute igjen. Eg trudde eg skulle bli ferdig til klokka 18, men den blei 18 .30. Det eg har gjort er at eg har mele opp/kverna alt baret frå granene som Øystein snaua på torsdag. No er det 6 svarte sekker som må på VØR om ingen treng dei. Eg har så mykje kompost at eg kan ikkje samle i hop meir. Eg raka plenen der eg hadde halde til,hadde tenkt å fare over med plenklipperen, men batteriet var inne till opplading så eg orka ikkje å hente det. Eg er nokså sliten og det var kompostkverna også, den la seg over på sida då eg sette den frå meg. Men det er kjekt å få fullføre ein jobb. Det som no står att er å sage opp dei tjukke greinene-det blir neste prosjekt.

fredag, juli 30, 2021

Dagbok 2021: 30.juli

Klokka er no 17.50, sola slin frå nesten skyfri himmel, det blæs ein liten bris som kjøler oss ned, for varmt er det, til tross for at gradestokken står på 20. Eg kom nettopp att frå ein liten runde på Vernet.I dag visste eg at Einar skulle komme og at vi to skulle på SKEIDAR.Han skulle komme 11.30-og det gjorde han. Eg laga i stand middagen før han kom, skrelte poteter og gulrøter og bruna saus.Kjøttkaker hadde eg i frysaren, så det var no greitt. Då vi kom bort og skulle svinge av hovudvegen, såg vi ei evindeleg lang rekke med bilar som stod i kø for å bli testa. Ja, ikkje bilane då, men folka inni. Det var mange til stades på My Kitchen laurdags kvelden -og mange vart smitta. Margrete og co. var der dagen etter, så vi håper at dei hadde vaska godt etter utbrotet.Ingen i Margrete sitt følge er smitta det vi veit om, somme har hurtigtesta seg med negativt resultat. Einar skulle ha seg ny kontorstol og eg hadde funne ein i ei tilbodsavis. Han fekk sjå og prøve stolen, og den fall i smak. Både Einar og eg hadde masker på oss, men ikkje alle ekspeditørane. Det same var det på ALTI , der vi var etterpå. Eg kjøpte nye batteri til brannvaslingssystemet mitt, og Einar sette dei på plass. Så no er det slutt på pipinga. Potetene kokte mens han jobba og så kunne vi ete ein relativt tidleg middag, med kaffi etterpå. Marit og eg hadde tenkt oss på gravplasseni går, med då vart det ikkje. I dag tok vi turen, sjekka og vatna. Rosebuska som eg hadde planta var ikkje heilt som ho skulle, men kanskje ho kjem seg etter å ha fått vatn.Då vi kom heim att fekk eg lyst å gå ein tur på Vernet, for det var så frisk vind at eg slapp å sveitte.Så det gjorde eg. Eg har skrytt av at knea mine har vore heilt bra i det siste, men i dag trøbla det høge seg. Ofte har det blitt betre etter ein tur på Vernet, så det håper eg det vart i dag også. Kompostkverna mi har ikkje vore i bruk på to år, så no trudde eg den var heilt ubrukeleg. Eg kobla til ledningen og jammen gjekk den. Om den vil male opp alt granbaret mitt står att å sjå. Det kan vel hende eg kjøper ei ny.
Hestane beitar mellom blåbærtuene. Eg ønsker alle ei fin og koronafri helg.

torsdag, juli 29, 2021

Dagbok 2021: 29.juli :Olsok

Klokka er no 15.25, temperaturen er + 27 grader og det er lettskya. Det kan visst komme torden og regn etter kvart, men enno er det opplett. Eg har ikkje gjort mykje "husarbeid" i det siste, så i dag ville eg ta ein tørn. Eg tok av det brukte sengetøyet, hengde dyna ut- alle lause golvteppe gjekk samme vegen. Så vaska eg golva og styrtee på ei heil stund, så sveitten rann. Eg fann ut at eg måtte i dusjen, så då låste etg ytterdøra. Ikkje før hadde eg gjort det, så ringde det på. Det var Solveig og Øystein som kom på besøk- for å jobbe. Øystein mala utetrappa mi først. Så gjekk han laus på nokre graner nedst i hagen. Dei var noko "skamklipte-skamsaga" frå før-av meg sjølv. Eg har saga greider med hand, og det gjorde Øystein også . Men vi får kanskje ta dei att seinare og bruke motorsaga på dei tjukke stammane. No har eg ein diger haug med granbar-greiner og kvistar, så eg vert ikkje arbeidslaus med det første. Så snart som Øystein var ferdig med jobben, reiste dei ut att, men fekk no tid til ein kaffikoppfør dei for. Solveig hjelpte meg med å klippe vekk ei stripe på det nye golvteppet som eg har på datarommet mitt.I morgon kjem Einar ein tur, då skal han og eg på butikk etc. Eg utnyttar alle som kjem innom ein tur-eg har alltid noko eg treng hjelp til. Elles har vel dei fleste fått med seg at vi har fått mykje koronasmitte i Ørsta/Volda-det meste vi har harr under heile epidemien. Så no blir det vel munnbind igjen, spritvask har det no vore heile tida.No skal eg sjå om der er liv i den gamle kompostkverna, så eg kan male opp granbar og kvistar. Den har ikkje vore i bruk verken i fjor eller i år, så det kjem an på. I morgon må eg ha meg ein tur på Clas-eg får skrive liste i dag så eg ikkje gløymer noko.No har eg sete og skive blogg, og sveittar av anstrengelsen.
Granene før og etter.

onsdag, juli 28, 2021

Dagbok 2021: 28.juli

Klokka er 16.50, temperaturen ute +25 grader og det er skya-med litt sol av og til. Eg har ikkje vore så flittig i dag, har ikkje gjort så mykje ute-og så å seie ingenting inne. Husarbeidet får vere til det blir innevêr. Planen min i dag var å plukke rips, helst alt. Men så viste det seg at ripsen ikkje var så moden som eg trudde. Det vart til at eg plukka og reinska i same operasjonen, så var det berre å skylle bæra og fryse dei. I dag vart det tre gode porsjonar med "dessertbær"til frysaren. Eg hadde gløymt å sette ut bosset i dag, og det var to dunkar som skulle tømmast. Nokre som eg kjenner gjekk akkurat forbi og ropte til meg, såpass eg fekk tømt restavfallet, og det var det viktigaste. Etter Marit og mi si meining blir den dunken tømt altfor sjeldan. Men det går no bra no når eg ikkje har leigebuarar. Eg fann ut at eg like godt kunne mosjonere på føremiddagen, så eg gjekk utover Starevegen. Der kom min venn rørleggaren med "bilen" sin. Han påstod at eg gjekk som ein tenåring. Det var vel å overdrive litt, men eg har vore god i føtene no i sommar. Neste veke begynner treninga igjen, så då spørs det korleis det virkar. Eg gjekk opp på Vernet, men i staden for å gå rundt, tok eg vegen opp Åsmundmarka og vidare råsa opp til Raudhyttevegen, altså motsett veg som sist eg var til skogs.
Eg gjekk innover Raudhyttevegen, den er nokså flat og lite krevjande, men sveitten sila og rann av ansiktet heile tida. Så gjekk eg ned til bommen og innpå Vallabø-vegsystemet.I området rett innafor bommen var det snauhogt for nokre år sidan-det var der ikkje no.
Då eg kom heim att varte det ikkje så lenge før eg laga meg middag, det vart Taco i dag også, og kanskje i morgon med. Etter at eg hadde ete og drukke litt kaffi vart eg så trøtt at eg gjekk ut på altanen og la meg på solsenga og slappa av. Og der vart eg liggande. Eg har ikkje så mykje å gjere i hagen akkurat no. Eg ser fram til at grana skal fellast, då får eg arbeid med kvisting etc. Sjølve fellinga tek eg ikkje på meg. Eg har ikkje bestemt meg om eg skal kverne kvistane eller ikkje -viss ikkje får eg eit bra lass å reise på VØR med-men det er OK. I dag såg eg noko som eg ikkje har sett på mange Herrens år, ei marihøne, eller gullsmed som vi sa på Eid i gamle dagar. Den sat på ei grein ved sidan av leet til Åsmundmarka.

tirsdag, juli 27, 2021

Dagbok 2021: 27.juli

Klokka er 17.25, temperaturen ute er + 26 grader. Sola har ikkje vore mykje framme i dag, likevel sveittar eg så det renn. Men så kom eg på at vi er no midt i hundedagane, så det kan vere ei forklaring. I dag er det 59 år sidan Nils og eg gifta oss i Bergen, dersom vi begge hadde vore i live, kunne vi ha feira diamantbryllaup neste år. Fleire av dei eg kjenner har diamantbryllaup i år.På denne datoen var det at Olaug (Marie) Orten Trovåg vart døypt på Hareid i 1997. I dag har eg ikkje utretta så mykje. Marit hadde ærend nedover i dag og eg vart med ned på SPAR. Eg fann litt å kjøpe i dag også. Då vi kom heinm tok eg trimrunda mi på Vernet mens eg hadde skikkelege klede på meg. Dermed vart det snart tid for å lage middag. I dag skeia eg heilt ut og laga Taco til meg åleine. Då får eg litt anna i tillegg til grønsakene mine. Det var kjempegodt og eg åt altfor mykje. Eg vart så mett at eg måtte ta ein pause før eg gjekk ut. I pausen felte eg av ein lest. No har eg vore ute og styrt i hagen ein 2-3 timar. Fekk ikkje gjort allverda i dag heller. Eg har mykje solbær på den eldste buska, men det er litt for tidleg å plukke. Solbær er blitt sjeldnare enn før, meir eksklusivt liksom, det ser ein på prisen på kjøpesylta.Rosa som eg kjøpte den 22. juli i år blomstrar fint-eg har ikkje sett denne sorten før, den heiter "Rosa Mundi"
Eg likar å stelle hagen og er glad for kvar dag det er opplett. Ista då eg var ute kjende eg regndropar, men no skin det visst opp ute. Eg har begynt å gjere klar for felling av den store grana, har klipt og saga greiner lengst nede.

mandag, juli 26, 2021

Dagbok 2021: 26.juli

Klokka er 18.45, temperaturen på trappa er + 27 grader, det er lettskya, sol og varmt.Her eg sit og skal skrive er det ei fluge som ikkje held fred. Eg kom nettopp ned att frå nr.8 der eg har sete og prata og drukke kaffi i lag med Marit eit par timar. I dag skulle eg klippe plen ,men det var vått i graset, derfor venta eg litt på å begynne. I mellomtida klipte eg av dei nedste greinene på den store grana. Så vart det plenklipping etter kvart. Då eg var ferdig å klippe og hadde vaska klipparen stod eg på altanen og såg utover verket mitt. Då såg eg eit uklipt område, og dermed gjekk eg ut og klipte ei stund til. Etter kvart fekk eg ete litt og dusja før eg for opp til Marit. Det er heitt og eg sveittar, men eg beklager meg ikkje.Eg set veldig pris på varmt sommarver og det er ikkje skadeleg å sveitte. I går kveld , seint, kom det litt torevêr og regn. Regnet gjorde sikkert godt. Det er like før eg må begynne å plukke hagebæra mine-bringebæra et eg opp etter kvart, men eg skal sylte solbær og stikkelsbær, trur eg. No skal eg sette på TV-en og få med meg kva som skjer i verda.

Dagbok 2021: 1.august.

Klokka er no 17.40, temperaturen er + 16 grader, det er lettskya og sol.- Ja, så er vi komne til august og ferietida nærmar seg slutten fo...