lørdag, oktober 01, 2022

Dagbok 2022: 1.oktober

 

Klokka er no 16.10, temperaturen ute er +17 grader. Eg har vore frostig i dag, for det har vore overskya, men typisk nok skin sola inn glaset no. 

Brubakk jobbar enno, men han kan kvile seg ut i morgon, meinte eg, men då skal han sjå til honningbiene sine. Ja, berre skuldra held ut ei veke til no, så er taket ferdig, trur eg.

Eg hadde ingen planar for i dag, anna enn at eg skulle handle litt matvarer. Det var no fort gjort , så eg tok ein runde på Vernet etterpå. Der var ikkje så stor trafikk, men i trappa kom ein heil familie nedover då eg skulle opp. Det var nokre litt mørkhuda folk, mor og far og tvillingar, ein gut og ei jente. Eg snakka litt med faren. Tvillingane var så nydelege ,mørke i huda og svart hår, dei kunne kanskje vere i 3 årsalderen , pluss minus.

Då eg kom heim att laga eg meg grønsakmiddag og åt- før eg tok telefonen med meg på datarommet og høyrde bok. Eg har ein liten vifteomn her som varmar fort opp heile rommet. Når det blir slutt på takarbeidet skal er kveike i omnen på stova. Eg har diverse problem med TV-en, men eg får no sett det er vil-nesten. Det er ikkje noko som er øydelagt, men det er noko eg ikkje får til.

Eg kunne sikkert ha gjort noko ute i dag, men eg hadde ikkje planlagt noko. Når takarbeidet er slutt for dagen, kan eg vaske klede viss eg vil. Snikkaren og eg deler ein stikkontakt i kjellaren. No angrar eg litt på alt eg ikkje har gjort i dag. Hadde eg hatt ein sagkrakk kunne eg ha saga ved, for eksempel.

Måndag skal Marit og eg på kino og sjå "Krigsseileren" på dagtid. Marit er alltid orientert om filmar og etc. sidan Janne er sjef på kulturhuset. Tysdag blir det trening og onsdag er det pensjonistmøte, litt spesielt fordi det er "Den internasjonale eldredagen". Felespelaren frå Hareid/Volda skal komme denne gongen også og spele i lag med Marie Austrheim Riise; det ser vi fram til. Vi får ikkje ha spanskkurs denne veke fordi rommet vårt på Bakk-Ola var opptatt. Eg gjekk  igjennom leksa på torsdag, men må vel ta den att ein gong til. Både eg og dei andre i gruppa strevar med dei spanske tala.

Eg strikkar på andre lesten, på andre paret no, så eg er snart arbeidslaus igjen. Eg må no finne meg eit arbeid igjen, maktar ikkje å sitte med hendene i fanget og sjå TV. Eg vurderer å gå ut i hagen og klippe busker og tre, men det er kanskje litt seint på dag ?

Solveig var opptatt i dag, og Margrete har fått Corona, så ho må også halde seg heime. Men snart blir det vel haustferie, og då risikerer eg å få besøk. Det er ikkje komande veke, men veka etterpå. Trur eg.

PS: Sudokuen som eg ikkje trudde eg skulle greie å løyse, løyste eg fort og greitt ved frokostbordet i dag. Dei små grå er enno i aktivitet.

Bok nr. 32 - 2022: Perlesøsteren

 

Om Perlesøsteren

Perlesøsteren er bok nummer fire i Lucinda Rileys fascinerende og spennende serie De syv søstre. CeCe har alltid følt at hun ikke passer inn. Etter at søstrenes far - den mystiske Pa Salt - er død, og søsteren Star har funnet den store kjærligheten, kjenner hun seg ekstra ensom. Hun slutter på kunstutdanningen for å finne sitt biologiske opphav. Det eneste sporet hun har er et gammelt fotografi og navnet på en kvinnelig pioner som bodde i Australia for over hundre år siden. Hundre år tidligere får Kitty McBride, en prestedatter fra Edinburgh, muligheten til å reise til Australia som ledsagerske. Her møter hun sin skjebne i form av tvillingbrødrene Drummond og Andrew - den ene vilter og ustyrlig, den andre ambisiøs arving til en formue basert på perlefiske. Når CeCe kommer til Australia, er det noe dypt inne i henne som påvirkes av energien i området og den gamle aboriginkulturen. Kreativiteten våkner og med hjelp fra dem hun møter på reisen, begynner hun å tro at dette enorme kontinentet kan tilby henne noe hun ikke trodde var mulig: en følelse av å høre til.

................................................................................................................................................................

No har eg endeleg kome igjennom enda ei bok i serien, men eg er ikkje hekta enno.Det er litt vanskeleg å henge med når ein les lydbok, det er for mykje flakking rundt i tid og rom, for mange personar etc. etc. I det heite tatt TOO MUCH av alt . Det som står over her tok eg frå nettet. Der kan ein lese om litt av det  boka handlar, og  hadde det vore berre dette, kunne det vore nok.

Eg veit ikkje om eg les fleire av bøkene-men har ikkje noko anna på vent, så kven veit.

fredag, september 30, 2022

dagbok 2022: 30.september


 Klokka er no 17.00, temperaturen ute er no + 15 grader, det har vore mykje varmare tidlegare i dag. I dag var "Takmannen" komen før eg stod opp og no har han nettopp slutta for dagen. Men han vil kome i morgon også viss veret er bra. Han  har begynt å legge plater på andre sida av taket no. Viss veret blir bra blir han ferdig med taket neste veke, seier han.

Eg har ikkje vore så flittig i dag. Først måtte eg ta for meg eit varsel frå Koppen, det var purring på to beløp som eg ikkje hadde betalt. Eg diskuterte med Brubakk, men han forstod det ikkje heller. Eg var sikker på at eg hadde betalt alt som det var kome rekning på. Eg har betalt med det samme, og så har Brubakk sett over om  han har fått det han skal.

Eg belaga meg på å køyre bort til Koppen og snakke med dei. Men først sjekka eg innbetalingane på datamaskina. og etter kvart fann eg feilen. Eg hadde rett nok "betalt" rekningane, men på ein eller annan måte har det ikkje virka. Rekningane var ikkje betalte- men no er dei det.

Eg tok ein liten "fredagsvask" i dag, det er ikkje så lettvint å vaske soverom og datarom når det er så mange teppe som skal ut, men der er no ikkje så skite heller. Etter vaskinga tok eg ein tur på Vernet og det var så varmt og fint at det var godt med ein liten bris-som alltid er der oppe.

Då eg kom heim att sat eg i lag med Marit på benken hennar i solveggen.

Eg har også vore bort til naboane i vest, dei deiv og saga greiner av epletreet sitt, så no veit eg korleis det skal gjerast. Eg skal ta eit bilde.Eg klipte litt meir av det vesle plommetreet mit, men skal ta det att og finpusse.

Eg gad ikkje å lage middag då eg kom heim, men tok ei brødskive-så får eg sjå kva eg gjer seinare. No har seg  site aldri så lenge og kava med sudokuen i Møre-Nytt. Eg trur eg må gi opp-det blir i så fall første gongen eg melder pass.

Eg har ikkje så mange planar for morgondagen, men eg har nok av ting som eg skulle ha gjort.

Eg ønsker alle ei god helg, vi får nyte fineveret når vi har det. Den siste dagen i september var ein av dei finaste dagane denne "sommaren".


torsdag, september 29, 2022

Dagbok 2022: 29.september

 

Klokka er no19.20 ,temperaturen er + 12 grader, det er delvis skya, men det har vore ein fin dag.

Det var i dag at MaritG og eg skulle få vere med Marit U til Stryn, ho skulle besøke ein slektning på sjukeheimen. Vi skulle fare klokka 13.30, men eg fekk ikkje gjort så mykje før den tid, det vart berre vanleg morgonstell,TV l,itt strikking og lydbok på data etc. før eg kledde meg om. 

Det var overskya ,men opplett då vi for frå Ørsta og vi hadde ein nydelig biltur. -Då vi kom ut av tunnelen på Grodås skein sola. Vi stoppa ei stund der og var inne på ein butikk med dameklede (og litt for menn også.) Marit G og eg kjøpte oss kvar vårt klesplagg. Mitt var ei t-skjorte i indisk bomull. Då vi kom til Stryn var vi inne på ein annan butikk der vi ikkje kjøpte noko, men såg på mykje.

Mens Marit U var på besøk med slektningen sin, gjekk vi andre to på kafé og åt middag. I dag vart det lasagne. Vi syntest den var bra, men vi lagar mykje betre sjølve. Då vi sat med kaffien, kom Marit U tilbake (Ho hadde ete middag før vi reiste). Så fekk vi ein sight-seeing fram gjennom dalen. Far til Marit U var frå Stryn og vi fekk sjå kvar garden var. Det var så nydeleg alle stader og fin sol heile tida. Vi køyrde fram til kyrkja før vi snudde.

Sidan eg ikkje tek ut på langtur sjølv, så er eg veldig glad når eg får vere med andre -og sjå meg rundt i verda. 

Før eg reiste hadde eg opna posten min. Det var ei rekning frå Koppen, og den er det berre å betale. Men så kom der nytt krav på den legetimen (øre-nese-hals) som eg ikkje møtte opp til, fordi eg hadde fått ein annan time før- Den timen betaler eg ikkje for same kva dei seier. Eg har dessutan skrive til dei og forklart saka.

Det er berre ca 400 kr, og eg har frikort, men det er prinsippet!!!!

No skal eg ha meg litt mat og kaffi. I morgon er det fredag igjen, rg synest fredagane kjem ofte. Brubakk var her før kl.8 i dag også,og så vil han jobbe laurdag og, sa han. Han vil utnytte det fine veret-så lenge det varer.

onsdag, september 28, 2022

Dagbok 2022: 28.september


 Klokka er no16.20, temperaturen ute er + 19 grader C, og det er stålande sol - og varmt. "Takmannen" kom før klokka var 8 i dag, men eg var no oppe og sat med frokosten.

I dag var det første gongen i haust med Spansk-kurs. Neste veke blir det ikkje kurs fordi huset er opptatt, men eg trur det er den dagen vi skal "feire"eldredagen på kulturhuset. I morgon er treninga avlyst, men Marit G. og eg har fått tilbod om å vere med Marit U. til Stryn, ho skal besøke ein slektning, men vi andre skal no finne på eit kvart, t.d. gå i butikkar og på kafé. Godt å komme seg ut litt.

Då eg kom heim att frå spansken i dag,litt før halv 1, var takmannen borte og bilen var vekk, så no lurer eg på kva som har hendt. Eg går heile tida med frykt for at han skal få låkt i skuldra igjen slik at han ikkje kan jobbe. I går jobba han frå 8.30 til 17.30, det vart kanskje litt for mykje.

Etter at eg kom heim att snakka eg litt med Marit og Marit før eg tok ein tur på Vernet, det var varmt i dag, og då blir eg sånn litt trøtt i beina, men det var  ein fin tur.

Til middag i dag hadde eg tenkt å ha ferdiggrilla kyllinglår med ris til, Eg hadde begge deler i frysaren, men mangla saus, Då fann eg ut at eg kunne ta ein halv pose med "Tikka Masala" frå Toro  til saus, og det vart veldig bra. Eg har både kylling, saus og ris i frysaren til eit måltid til. Det er ikkje alltid like lett og enkelt å lage skikkeleg mat til eitt mennestke, men eg lagar no middag om ikkje det blir kvar dag.

Det er så fint ute no, og eg skulle vel ha gjort litt arbeid i hagen, men akkurat no er det stillstand før eg begynner på haust-onna. Der er ikkje ein gong bær å ete lenger. Og kvelden kjem tidlegare for kvar dag.

tirsdag, september 27, 2022

Dagbok 2022: 27.september


 Klokka er no 18 og det er + 14 grader ute, vêret er fint og lettskya. Brubakk ville jobbe til kl.17.30 sidan har ikkje fekk gjort noko i går. Eg ser ikkje kva han styrer med oppe på taket, men han sa at han  held på med lektene enno, det er mykje å spikre og skrue igjennom fordi der ligg  to lag med shingel på taket frå før.

Det har vore ein fin dag,  eg har ikkje vore så mykje ute, men det er no mi eiga skuld. Vi var på trening 10-11 ,men klokka var over 13 då vi kom heim, for vi hadde vore både på Alti og på Spar. Eg kjøpte ikkje så mykje, for eg handla i går.


I dag hadde eg lova meg sjølv at eg skulle få skikkeleg middag, så då blei det spekesild/kryddersild. Det er  det beste eg veit. I dag laga eg ikkje kålstuing men rabbestappe med gulrot i staden . Det var veldig godt og eg vart veldig mett så eg sette meg inn  i stova og såg serien min. Det var like før eg sovna.

Etterpå strauk eg nokre klede før dei var heilt tørre, då er det litt enklare. Eg har enno ikkje fått tørketrommelen. Og så hadde eg ikkje løyst sudokuen i går kveld, i dag gjekk det lett. 

Så kom eg meg endeleg ut og rydda litt i alle plastsekkene som eg brukar til hageavfall, og i samme slengen spylte eg kjøkkenvindua og trappa. Då tenkte eg å gå tur, men så hadde eg sett på oppvaskmaskina i dag og den måtte tømmast. Med andre ord: Eg fann på mykje anna å gjere, slik at eg slapp å gå tur i dag. Eg har no vore på trening.

I morgon startar vi opp med spanskkurs igjen, det ser eg fram til, kjekt å treffe att dei andre på kurset, det sosiale er kanskje det viktigaste. Vi skal vere på Bakk-Ola no også, og der kan eg bruke småpengane mine i kaféen. Eg får sortere i kveld, så eg stiller med gangbar mynt.

Denne rosa har nettopp begynt å bløme, dei andre er stort sett ferdige, så etter at eg tok bildet, klipte eg vekk alle visne roser i beddet. Hausten er komen no, og skog og tre har fått haustfargar. Eg kan like hausten på mange måtar , men ser ikkje fram til å få vinter og snø.


mandag, september 26, 2022

Dagbok 2022: 26.september


Klokka er no17.25. temperaturen ute er +11 grader. Det har regna meir og mindre i heile dag, men no står det nedst på skjermen: "Regnet slutter "- og det får vi no håpe. Eg hadde tenkt å gå ein tur, men går ikkje om det silregnar.

I dag morgon kom ikkje "takmannen" til vanleg tid, og eg tenkte med det samme at no var skuldra låk igjen. Men så gale var det ikkje. Klokka 11ca kom han ; då hadde han vore til Volda og kjøpt ny kjellardør til meg. Men han ville ikkje legge tak i dag for det var gode vermeldingar heile resten av veka. Han og eg greidde å bere døra inn i kjellaren enda den var ganske tung (for meg).

Eg hadde tenkt meg ein lite tur på VØR i dag, hadde berre tre sekker med hageavfall, men så hadde eg litt "tak-avfall" også, så eg tok turen. Og i dag hugsa eg å ta med den ubrukelege paraplyen min.Er har nokre sko som er så lette og gode, nesten som hanskar på føtene, dei ville eg ha i dag, men fann ikkje skoskeia og den er eg avhengig av. Eg såg rundt meg om det var noko anna eg kunne bruke, og då såg eg den heilt nye plantespaden- den var suveren-og eg fekk på meg skorne i ein fart. Dette skriv eg for at andre kan få bruk for det ein gong.(Men kor ofte har ein heilt reine plantespadar i metall?)

Eg hadde mange ærend på ALTI i dag, men det første eg gjorde då eg kom dit var å finne toaletta så eg fekk vaska hendene mine.Eg hadde ikkje hanskar med meg til VØR i dag. Eitt av ærenda var å kjøpe garn til eit lestepar der er mangla garn til fellinga av andre lesten. Eg gjekk inn på -nille for det var der eg hadde kjøpt garnet, men dei hadde ikkje meir av den sorten, og ikkje fekk dei meir heller, for dei skulle slutte å selje garn.

Eg hadde andre ærend på ALTI også, men då eg var ferdig der, bestemte eg meg for å handle matvarene på Spar-for eg hadde ein plan. Der sel dei også garn nemlig, og eg fann garn som var veldig likt det eg hadde-men ikkje heilt. Eg rekte opp tåfellinga på den ferdige lesten, og sørga for at begge lestane vart like. Eg greidde ikkje å vente, men sette meg til med spøtet etter at eg hadde ete litt etc.

 Elles så har eg fyrt i omnen, men brukar straum til fleire klesvaskar i dag. når det er eg som kan bruke stikkontakten. Men det er litt problem med tørkinga no når altanen også er i bruk til anna- og full av rot. Eg tørkar det meste i kjellaren, men i dag har eg vaska sengklede, så no har eg vel laga meg eit problem igjen. No får eg sjå om eg geier å ta den vesle turen eg tenkte på.





Dagbok 2022: 1.oktober

  Klokka er no 16.10, temperaturen ute er +17 grader. Eg har vore frostig i dag, for det har vore overskya, men typisk nok skin sola inn gla...