onsdag, august 31, 2022

Dagbok 2022: 31.august





 Klokka er no 19.17, temperaturen er + 17  grader og det har vore ein strålande dag på alle måtar. Då vekkerklokka ringde klokka 6.30 var eg vaken for lengst. Eg likar å ha god tid når det er noko eg skal, og eg fekk enda tid til å sjå ein episode av serien "MIN". Klokka 9.15 starta pensjonistturen frå haldeplassen i Ørsta med 49 pensjonistar om bord. 

Lufta var så klår som den finaste haustdag, ikkje ei sky på himmelen, berre ei strålande sol. Finaste dagen hittil i år. Sjåføren var ein gammal kjenning som har køyrt oss før- Målet for turen var Nordøyane, dei som ganske nyst har fått vegsamband. Vi køyrde til  Festøya og tok ferja over, einaste ferjestrekninga på heile turen. 

Vi køyrde til Digerneset og tok av til Tennfjord, så køyrde vi forbi Slygstad og utover heile Grytastranda. Eg fekk sjå huset der Marit budde før ho flytta hit. Vi køyrde eit stuykke til, og så kom vi til Lepsøya, Haramsøya, Flemsøya, Fjørtofta og Harøya. Nokre stader var det bruer, andre stader undersjøiske tunellar, den eine er no den djupaste i Norge, så no er Eiksundtunnelen nummer 2. Vi køyrde litt fram og tilbake på øyane og såg oss om. Det var sjåføren som valde vegane. 

Vi stoppa og såg på vindmøllene på Haramsøya, dei var store, men ikkje så nær husa- det vi kunne sjå. På Haramsøya var det vi fekk middag. Dei asiatiske damene som dreiv kafeen hadde laga det til slik at vi forsynte oss sjølve, og det gjekk fort og radig. Vi fekk sosakjøt med poteter, gulrot og grønerterstuing, og til dessert var det riskrem med jordbærsaus + kakestykke til kaffien.

Det blir sikker mange som kjem til å ta ein liknande tur og det vil eg anbefale, sjølv om det ikkje blir heilt billeg. Det som imponerte meg mest når det gjeld naturen ute på øyane, var dei store ,flate, veldyrka gardane, heilt annleis enn t.d. Solund der det er mest berre stein og fjell. Det var vanskeleg å ta bilde på grunn av at ein fekk sola i augene og såg ingen ting. Marit og eg sat i lag i bussen, og var ute av bussen berre to gonger, så i dag har vi verkeleg fått køyrt oss. Heimturen gjekk via Brattvågen.

Eg kan ikkje greie å forklare så godt kvar som var bruer og kvar som var tunellar, og kartet som eg har er ikkje heilt oppdatert.

                       Den eldste av dei som var med på turen er 94 år.

Då eg kom heim såg eg at Brubakk ikkje hadde fått på det som skal vere utanpå skorsteinen, han spurde i dag om eg visste nokon som kunne hjelpe han, men eg hadde ingen på hand. I postkassa fann eg ei ny rekning frå Koppen som eg skal betale med ein gong, så det ikkje vert gløymt. Så får eg sjå om eg finn ein hjelpar i morgon. 

I dag er det den 31.august, fødselsdatoen til pappa og besta, med 20 år i mellom.
Og alle åra eg gjekk på skulen på Eid, var det siste feriedagen,  skulen begynte alltid 1.september, viss det ikkje var på ein sundag,

tirsdag, august 30, 2022

Dagbok 2022: 30.august


 Klokka er no16.15, temperaturen ute er + 19 grader og det er nydeleg ver. Spla var litt sløv ei stund, men no er ho tilbake med full styrke.

I dag var eg veldig aktiv på føremiddagen. Først på trening , så på VØR med 4 sekker hageavfall, ein sekk med emballasjeplast ein sekk med bitar av takpapp og ei spann med metall. Greitt å få rydde litt etter kvart. I dag driv Brubakk og legg på takplater, eg skal gå opp til Grytten og ta bilde litt seinare.

Då eg hadde køyrt opp Mosmarkvegen 2 gonger, og tenkt på gravene som skulle ha vore stelte, henta eg ei saks og køyrde beine vegen bort til Askjelhaugen og klipte graset ved både Nils og Robert sine gravsteinar. Det blir så høgt gras fordi mosen er så våt og omfangsrik og "løfter" graset opp. Eg sat ei stund og prata med Marit på benken då eg kom heim, og så fann eg meg litt mat.

Eg tekjer på turen i morgon. Eg har ikkje vore alle stadane før, så eg leitte opp kart på datamaskina. Så kom eg på at eg har ei plastkorg med alle slags kart etc. frå turane vi hadde for nokså mange år sidan. Mest kart var der frå Sverige, men også eit kart som eg kjøpte ein gong i Tyskland. Då eg spurde etter kart frå "Ganz Deutschland" .-og dama såg rart på meg. Dette var før muren fall.

Men det som vekte mest interesse av det eg fann var ein bunke med prospektkort, dei fleste var frå meg til mamma, der eg har sendt helsing frå turane våre. Men der var også kort til Nils og meg frå barn og andre venner. Det tok litt tid å gå gjennom alle. Der var også kort som eg hadde kjøpt men ikkje brukt. Dermed har klokka gått litt fort etter middag, men det gjer ikkje noko, for det einaste som no står att på dagsplanen min er å plante rosebuska som eg kjøpte sist laurdag.

Det er vanskeleg å vite kva ein skal ha på seg i morgon, det eg hadde tenkt å ha blir nok for varmt, men eg vil no ikkje fryse heller.Eg får sjå vermeldinga i kveld, og så går det an å ha med seg litt "byte" for vi skal vel ha samme bussen heile tida.

Bildet over var på eit kort eg fann, det var heilt glatt og fint, så eg kunna ha hatt ramme på det om eg hadde hatt, Eg går ut frå at dei fleste i familien kjenner seg att.

Det var ikkje så lett å ta bilde av taket, for eg fekk sola rett imot.

                                                Marit luftar Arja.

mandag, august 29, 2022

Bok nr.29 2022: De syv søstre

 

Lucinda Rileys imponerende fortellertalent kommer til sin fulle rett i dette som er første bok i en serie på syv bøker, basert på legendene om stjernebildet De syv søstre.


Fremtiden deres står skrevet i stjernene …

Maia D'Apliése og fem av hennes søstre er samlet i barndomshjemmet Atlantis, et vakkert og tilbaketrukket slott ved Genèvesjøen. De har akkurat fått vite at deres elskede far, den sky mangemillionæren som de bare kaller Pa Salt, er død. 

Maia og søstrene hennes ble alle adoptert av Pa Salt som spedbarn, og nå har han etterlatt et spor til hver av dem som skal lede dem tilbake til deres opprinnelige opphav. Maias ledetråd fører henne til den andre siden av kloden, til et forfallent herskapshus i Rio de Janeiro i Brasil. 

I Rio i 1927, i byens storhetstid, har Izabela Bonifacios far ambisjoner om at datteren skal giftes inn i aristokratiet. Samtidig er arkitekten Heitor da Silva Costa i gang med det som skal bli den berømte Kristusstatuen, og han skal snart reise til Paris for å finne den rette skulptøren til å fullføre hans store visjon. Den lidenskapelige Izabela lengter etter å se verden, og hun klarer å overbevise faren om å la henne få lov til å følge med arkitekten og hans familie til Europa før hun gifter seg. 

I Paris, i Paul Ladowskis atelier og i de livlige kafeene på Montparnasse, møter hun den unge og ambisiøse skulptøren Laurent Brouilly. Dermed vet hun også at livet aldri kommer til å bli det samme igjen. 
........................................................................................................................
Eg plar alltid unngå bøker der vi ser ei dame med ryggen til på  framsida,
No har eg likevel lese ei slik bok, og sidan den er den første i ein serie kan det hende at eg prøver ei bok til. Men sikker er eg ikkje, for dette er ikkje slike bøker som eg likar noko særleg.

Dagbok 2022: 30.august.

Klokka er no 18.00, temperaturen ute er + 18 grader og sola har skine i heile dag. Dei som har undersøkt det kan fortelje at det var nokså kaldt sist natt, og det var ikkje varmt då morgonen kom heller. Eg orka ikkje å gå ut med det samme, men fann ein jobb inne. Eg vaska alle glasa som vi nesten aldri brukar og rydda i glasskapet på stova. Så gjekk eg ut og begynte å rydde i hagen, det går ikkje fort for seg, for ryggen er ikkje god, så eg må sitte i ein stol og kvile innimellom. Men eg fekk no klipt heilt ned New Dawn - rosa og rensa rota for gras og rusk, så få vi håpe at den får eit nytt liv til våren. Vi har hatt den lenge. Så flytta eg meg inn på austsida av huset, Der var det ei stor, lang raud rose. I år var den det finaste den har vore utan at det seier så mykje. Eg klipte den heilt ned, det har eg gjort kvart år, og så håper eg den får eit nytt liv neste sommar. At eg klipte den ned var for at vi skal få ny bordkledning på den veggen og då treng der ikkje å vekse så mykje. Der var forferdeleg mykje skvallerkål akkurat der også, så den vart fjerna. Då fekk eg plutseleg besøk av Einar som hadde hatt eit ærend i Volda. Han fekk kaffi og is, og det gjorde eg også. Då leid det langt på dag og etter at Einar hadde fare sette eg i gang med grasklipping. Smått om senn fekk eg klipt heile tomta, men eg hadde ein pause så eg fekk meg litt mat. Det vart tre sekker med gras, sjølv om eg hadde mykje av graset på bringebæråkeren-eller kva eg skal kalle den. Eg har nok boss til å køyre på VØR i morgon, for det blir litt btgningsavfall også, t.d. plast og diverse metall og restar av takpapp.  Det er no litt kjekt å fare på VØR også. Elles å er det no trening i morgon og onsdag er det den store pensjonistturdagen. Då skal vi ut på kysten og køyre dei nye vegane og tunnelane.

Eg trur ikkje eg treng meir trim i dag.


Når steinane ser raude ut på bilgdet er det fordi der ligg restar av dei raude rosene.
 

søndag, august 28, 2022

Dagbok 2022: 28.august


 Klokka er no 17.50, temperaturen ute er + 17 grader, det har stort sett vore overskya med skodde i fjellsidene i dag også, men typisk nok kjem sola fram litt no når det går mot kveld.

Det har ikkje hendt så mykje i dag, eg har vore her åleine og har ikkje bevega meg ut om tomta . Det første eg gjorde etter at eg var ferdig med morgonritualet var å farge håret mitt, Eg fargar det med fargen BLOND, og då blir det nesten svart, men det lysnar no  litt etter kvart.

Eg har  styrt med litt av kvart ute i dag, sjølv om det er søndag. Eg har ikkje brukt maskiner så det har gått stilt for seg. Blant anna har eg hatt ein sekk med kugjøselkompost ut over rosebeddet. Det skulle sjølvsagt ha vore gjort for lenge sidan, men eg kom så seint i gang med hagestell i år, så eg har ikkje nådd over alt. Eg har klipt med saks her og der, men skulle ha gjort meir av det.

Ein liten klesvask vart det også, eg måtte vaske jakka som eg skal ha på meg når vi fer ut i øyane på onsdag. Til middag i dag fekk eg det nestbeste eg veit, nemleg salat av rå grønsaker med Apetinaost i olje..

Etter middag vart eg sittande å høyre bok, men eg synest den boka eg les no er litt kjedelig. Likevel kjem eg til å lese den ferdig, trur eg. No har eg vore ute i hagen og klipt meir gras for hand. Eg kjøpte meg ein ny kantklippar, men den kan eg ikkje bruke over alt, i alle fall ikkje på søndagar. Det er snart tid for plenklipping igjen, eg plar klippe ein gong i veka, og eg har snart eit nytt lass på fare på VØR med. No skal eg plukke meg litt rips i ei skål og ete den som dessert.



lørdag, august 27, 2022

Dagbok 2022: 27.august

Klokka er no 18.38,temperaturen ute er + 14 grader, skodda ligg langt nedetter fjellsidene, og rett som det er regnar det. Eg ventar framleis på indianarsommaren, håper vêret blir betre på onsdag som kjem, for då skal vi gamle på tur ut i øyane.

I dag var eg bestemt på å finne på noko sjølv, og ikkje berre vime rundt her heime. Klokka var ikkje meir enn 10, då var eg komen på Plantasjen. Eg såg etter noko å plante der grana hadde stått,  eg hadde vanskeleg for å finne noko som passa, men eg kjøpte no ei lita rosebuske, det er ikkje sikkert at eg plantar den der, men roser er no aldri heilt feil. Eg kjøpte berre ein sekk med ku-kompost, må no lære meg å bruke den jorda eg sjølv har kompostert også. Og så unnte eg meg ein orkidé. Det plar eg gjere av og til, såpass eg har EIN som blomstrar. Stueplantane blir ikkje så viktige om sommaren.

Coop ligg nesten vegg i vegg med Plantasjen, så i dag handla eg matvarene der. Eg fall for freistinga å kjøpe med spekesild med krydder, dei har samme sorten som på SPAR. Eg såg at dei no har fått apotek ved sidan av Coop,der det var kafé før. Eg ville no heller at kafeen skulle ha vore der. Men apotek er vel greitt å ha der også.

Neste stopp var ALTI. Sidan vi skal på tur følte eg behov for å fornye meg litt i klesvegen, men i dag vart det berre sko. Eg har nokre sko som ikkje er så gamle, men dei er veldig mykje brukt. Eg fann nokre som likna litt, men der var høgare hæl og sole, såpass eg kan legge eit par cm til høgda mi. Dei var ikkje så veldig dyre heller, sjeldan ein finn gode sko til under 1000 kr.

Klede vart ikkje kjøpt i dag, og det kan hende eg greier meg med dei eg har.

Då eg var heime igjen var eg opp til Marit og ordna med noko som vi har på gang, vart sittane å prate minst ein time.

Takmannen har vore her i dag, men han reiste heim att før klokka 16.Eg har ikkje snakka med han i dag, så eg veit ikkje om han hadde det kjekt å matfestivalen i Ålesund i går.

Eg laga meg verdens beste middag, med sild, kålstuing, poteter, rødbetar og tyttebær. Det er det beste mat eg veit.

Elles tok eg inn ein klesvask som var tørr og så fyrte eg i omnen. Det var litt hustre og eg brukar ikkje straum på oppvarming når eg har så mange plankebitar å fyre med. Eg tok meg ein kaffikokpp, sette på TV og så sat eg og blada i "Familien" som Solveig hadde med til meg i går. Det går mykje i strikk og matoppskrifter. 

Eg hadde tenkt eg skulle få gjort litt ute i hagen i dag, men eg orka ikkje når det er både vått og kaldt. Det kjem vel betre dagar etter desse.



fredag, august 26, 2022

Dagbok 2022: 26.august

 


Klokka er no ca. 20,30, temperaturen er + 15 grader og det har vore ei og anna regnbye i dag. I dag har eg ikkje hatt "takmannen" her, han kjem i morgon i staden..

Eg tok fredagsvasken tidleg på dag, og etterpå greidde eg å komme i land med SUDOKUEN som eg måtte gi opp i går kveld. Hadde ikkje noko meir på programmet i dag, så då var det veldig kjekt at Solveig sende melding om at ho ville ta seg ein tur innover. Ho kom kl.18, og reiste nettopp no.

Det har vore såpass vått i dag at det frista ikkje å gjere hagearbeid sjølv om eg har mykje som står på vent. Det er mykje som er forseinka i år, somme roser er ikkje komne i gang med bløminga enno, og den mørkeblå klematisen er berre så vidt i gang .

Ja, det har vore ein rar sommar-kan nesten ikkje hugse at det har vore så våte somrar før.

I morgon må er ta ein handlerunde, trur eg, viss eg kjem meg i gang. Tenkte at eg kanskje skulle ta ein tur bort i Furene, på Plantasjen og Coop.

Det er komande onsdag vi skal på pensjonisttur, så kanskje eg må kjøpe noko nytt og ha på meg? Eg veit ikkje, eg er litt sein i avtrekket når det gjeld å kjøpe klede og sko t.d.

Det er fredags kveld og eg vil ønske alle ei fin helg.


torsdag, august 25, 2022

Dagbok 2022: 25. august

 


Klokka er no 16.20, temperaturen ute er +20 grader C, det er skya, men mest opplett. Det er meldt regnbyger og det slår vel til.

I dag morgon vakna eg klokka 5, og fekk ikkje sove meir fordi foten var så låk. Eg stod ikkje opp før 7, og så var vi på trening frå 10-11 og ein tur på apoteket m.m. etterpå. Foten var enda verre etter trening, så etter at eg hadde laga og ete eit par tallerkar med blomkålsuppe sette eg meg i godstolen og såg TV. Etter ei god stund var foten heilt bra. Verken fysioterapeuten eller eg forstår kva det er som feiler, men i dag var vi to i alle fall på samme diagnosen. Eg gjer ikkje meir med foten før eg har snakka med legen, har legetime den 15.september. 

No skin sola plutseleg inn glaset. Eg ha tenkt meg ut og rydde litt etter at "takmannen" har reist. Eg veit ikkje kor langt han er komen i arbeidet, det er vanskeleg å følgje med det som skjer på taket. Eg irriterer meg litt over at eg sette att ei stor plastbøtte med metall-rusk som skulle vore på VØR i går, men det blir fleire turar. Eg skal no snart til på haustklippen i hagen, men ikkje alt er forbi enno. Til dømes er det rosetre som står i knupp framleis. Det heng enno att litt bær på trea. Men mykje kan eg rydde opp i alt no, med tanke på haust og vinter. Eg ventar framleis på ein "Indian summer".

Pensjonistturen er neste onsdag, og så skal vi til med opplæring i data og telefon i laget. Eg stiller som elev denne gongen. kan altfor lite, særleg med telefonen.

Eg fekk melding frå Bodil i dag, Svein er på sjukehuset i Førde til undersøking - De kan lese meir på sida vår.

Det er ikkje sikkert Brubakk kjem i morgon, men viss han ikkje kjem i morgon så kjem han laurdag.

onsdag, august 24, 2022

Dagbok 2022: : 24.august.




Klokka er no17.37, temperaturen er + 24 grader C, og det er delvis skya. I dag tidleg var det tydeleg at det hadde regna. Eg ser nettopp på kalenderen og registrerer at det er 4 mnd. til julafta.

Eg hadde ingen plan for dagen, men eg begynte å rense ugras i bringebæråkeren. Målet er å få der såpass at eg kan dekke molda med plengras.Det er ein trasig jobb, men eit kvart må eg no gjere. Eg bestemte meg for å ta ein tur på VØR med hageboss og bygnings-rot. Eg hadde fem sekker med gras, ein sekk med plast og ein med takpapp i små bitar. Sveitten rann mens eg heldt på å laste inn,  eg trudde det var arbeidet som fekk sveitten fram. Det var det ikkje , for då eg kom heim att frå VØR var det + 24 grader på trappa. Eg var litt spent på om eg fekk levere takpappen, men det fekk eg, så no har eg plukka opp i ein sekk til. Eg har også pakka ein heil sekk med plast, men eg skal ikkje bort att før det har gått ei stund. Eg har ei heil plastikkspann med metall, den gløymde eg å ta med i dag.Eg prøver å rydde litt etter kvart, så eg slepp å drukne i rot.

I dag var det bosstømming og eg såg fram til å bli kvitt makrellen. Dunken var så full av stivfrosen makrell at det var så vidt loket gjekk på, men i dag var ikkje dunken halvfull ein gong, og eg såg berre kor det rann då dei tømde.  Men då eg kom heim att frå VØR, tok eg og spyla begge dunkane godt slik at dei vart litt meir appetittlege.

Eg var som sagt heilt gåen, men det kom seg når eg fekk kjølt meg ned. Marit skulle steike pannekaker i dag, og då gjorde eg det også. Mett og trøtt sette eg meg inn til TV-en og slappa av ei god stund. Så gjekk eg ut og rydda på tunet, etter at Brubakk hadde fare. Og så fekk eg sette på vaskemaskina når stikkontakten blei ledig. No høyrer eg kor det surrar i fleire plenklipperar ute -Men eg klipte i går.



tirsdag, august 23, 2022

Dagbok 2022: 23.august

 


Klokka er no17.10, temperaturen ute på trappa er + 23 grader C. Det er lettskya og sol. Brubakk har ikkje gitt seg for dagen, han vil vel utnytte finevêret.

Marit og eg var på trening i dag, og så handla vi litt mat på heimvegen. Eg var skikkeleg låk i venstrefoten i natt og i dag tidleg. Eg skal ha ekstra "time" med fysioterapeuten den 1.september. Ho er nesten sikker på at det er hofta. Eg har no tenkt tanken , men er lite lysta på å ta hofteoperasjon. Ikkje på grunn av operasjonen, men det at eg må sikkert vere ei stund på Ørstaheimen etterpå, og det vil eg ikkje. Ei av naboane tok ein slik operasjon for ei stund sidan, ho var 2 dagar på Ørstaheimen og så reiste ho heim att til seg sjølv. Men ho har ein mann som ho bur i lag med.

Etter at eg kom heim har eg klipt plenar, først rundt huset, så opp mot vegen og til slutt tok eg skråninga, og det resulterte i at foten er nesten heilt bra. Dette skjer kvar gong eg klipper plen, eller jobbar  med noko anna,

Startbatteriet måtte laddast to gonger under klippinga, den andre gongen nytta eg høvet til å ete middag (suppe frå i går) og kvile meg litt. Det er kjekt å klippe på denne årstida, for når eg blir tørr i munnen og tørst, tek eg meg berre litt bær, her er enno noko att på trea, og har ikkje eg, så har naboen. Det er så nydelig med denne sola, varmar godt gjer den også. I går kveld var det surt og kaldt, så eg kveikte i omnen for å sleppe å bruke for mykje straum.

No ser vi fram til at vi snart skal på pensjonisttur, det er den 31.august. Vi har betalt turen på førehand, 800 kroner, då er alt medrekna. Vi skal no ete middag ein eller annan stad. Eg veit lite om reiseruta, men det dreier seg visst om dei nye vegane etc, på Nordøyane.

No skal eg prøve å få til eit bilde av taket, då må eg gå over gata -trur eg.





mandag, august 22, 2022

Dagbok 2022: 22.august

 




Klokka er no 18.20, temperaturen ute er +  16 grader C, og no er det lettskya og fint , med litt sol. Slik var det ikkje før i dag, då var det surt og kaldt og det regna. Eg måtte legge planane om plenslått på hylla, det var ikkje å tenkje på.

Men litt til nytte kunne eg gjere, eg valde å støvsuge teppegolva grundig -det er aldri feil. Elles så laga eg meg ei god grønnsaksuppe med kjøttbitar til middag, det var godt med noko varmt i dag når veret var så hustre og straumen så dyr.

Sidan eg ikkje fekk jobbe ute i dag, tok eg like godt og las ferdig boka mi. Og no må eg passe på å ikkje finne fleire slike fengslande bøker så eg blir sittande pal. I dag sat eg på datarommet, for det er lett å varme opp, men då eg kom inn att i stova , så hadde eg sett på varmepumpa likevel. Det var ikkje meininga. Og no skulle eg til å fyre opp i ovnen, eg synest ikkje eg kan fyre når eg har ein mann på taket. I dag har eg faktisk ikkje snakka med han, og ikkje med nokon andre heller. Men i morgon er det trening så då får vi no skravle litt der. No sit eg og diskuterer med meg sjølv om eg skal gå ein tur eller ikkje. Det gjer godt for den låke foten å gå litt. Eg må i alle fall ut og ta nokre bilde.


Bilda er tatt kl.19.40

Bok nr. 28 -2022:Morgenstjernen




 Når Karl Ove Knausgård no har skrive den første store romanen etter «Min kamp» (2009-2011), har han ikkje spart på noko. Uttrykket «more is more» har sjeldan passa betre enn her.

Sjølv om ein garva Knausgård-lesar vil nikke attkjennande til mangt, ber «Morgenstjernen» likevel bod om noko nytt.

Og det nye er godt, sjølv om det ikkje dermed er godt nytt:

Den uroa som har lege under det detaljrike kvardagsprosjektet, særleg i «Min kamp», er denne gongen blitt til noko tjukkare og meir framandt. Vi snakkar ikkje om indre uro og potensielt kaos i familien, eller ikkje berre det.

No er det naturen som er ute av lage. Klimakrise, javel, men det er som om krisa også har eit element av rå, primitiv vondskap ved seg. Kaoskreftene er i sving.

..............................................................................................................................

Då eg begynte på denne boka, let eg vere å lese om den på førehand, fordi eg ville lese med eit ope sinn som ikkje var påverka av nokon andre. Både i går og i dag har eg sete pal og høyrt lydbokversjonen- eg greidde ikkje å la vere. Det er mange stemmer i boka, mange som les-kvar si rolle. Dei gjer ein kjempefin innsats.  Når det lid mot midten og særleg mot slutten av boka kjenner eg forfattaren att frå siste boka i serien om MIN KAMP. Det er heilt umuleg for meg å seie så mykje om boka, så dei som vil vite meir får lese på nettet- eller helst lese boka sjølv.Anbefalt.

søndag, august 21, 2022

Dagbok 2022-21.august.


                                            Queen Elizabeth i dag

Klokka er no 18.04, temperaturen er + 15 grader. Det har regna ganske mykje i løpet av dagen, men no ser det ut til at det lettar opp.

Dette er den lataste dagen eg har hatt dette året, trur eg. Eg var oppe ca halv åtte, men la meg inn att på senga og sov til halv10.

Etter det vanlege morgonstellet m.m. sette eg meg til med lydbok og kabal, og der blei eg sittande. Det er ikkje ofte no for tida at eg blir så oppslukt av bøker som det eg kunne bli før. Men no skjedde det med "Morgenstjernen" av Karl Ove Knausgård. Det er nokre dagar sidan eg begynte på den, men som regel har eg anna å gjere også. I dag var eg ikkje opptatt av noko eg MÅTTE gjere.

Eg sat og las heilt til det var på høg tid å lage middag. Som regel om sundagane blir det steikt ørret og det vart det i dag også-med poteter og mykje grønsaker.

Etter at eg hadde ete tenkte eg på å gå ein tur, men så vart det så mykje regn - så det vart til at eg las vidare. Eg har enda ein del att av boka, men no skin sola , så eg må sjå til å komme meg ut. Eg hadde håpa at det skulle bli tørt i morgon, såpass eg fekk klippe plenane, eller i alle fall noke av dei, men vi får no sjå.

Slik ser huset ut i denne enden no. Eg tenkjer på at det kunne vore godt å få malt huset øvst oppe mens stillaset er der, men veit ikkje om det kan la seg gjere.


I dag gjekk eg "feil" veg rundt på Vernet. Då starta eg her og gjekk motsøles.


                         "Pynten" på Vernet har tolt veret i sommar.

lørdag, august 20, 2022

Dagbok 2022: 20. august


 Klokka er no 18.18, temperaturen ute er +19 grader C. Det er nokså overskya, men opplett. På føremiddagen hadde vi fin sol.

I dag kledde eg på meg skikkelege klede då eg stod opp, det skjer ikkje så ofte, som regel startar eg dagen i arbeidsantrekk. Eg hadde tenkt meg på butikken i dag, men viss eg ikkje fekk besøk så trong eg ikkje å kjøpe noko-her er nok mat til meg. Så då sparte eg den turen. Å fare til Vik åleine er ikkje så kjekt, og Marit skulle ikkje nedover i dag.

Eg prøvde no å gjere litt nytte for meg, eg strauk dei kleda som var tørre nok av dei eg hengde ut i går kveld. Så rydda eg og kosta i garasjen, blant anna, og så fann eg ut at eg kunne sylte litt plommer frå i fjor for å få tømt garasjefrysaren, for den skal eg klare meg utan. Og så gjekk den føremiddagen. Til middag blei det kokte poteter og spekemat. Så sette eg meg i godstolen og skulle slappe av litt, og eg må ha vore veldig slapp for klokka gjekk fort. Då fann eg ut at eg skulle gå ein runde på Vernet, sidan eg ikkje hadde hatt særleg mykje trim i dag. Så no har eg vore på tur. Føtene mine er ikkje heilt gode, men dei blir ikkje verre om eg går.

Eg har snakka med mange naboar i dag, dei fleste om lag på min alder, og alle har sine problem og skavankar. Det er vel ikkje til å unngå. For morgondagen har eg ingen planar enno.

fredag, august 19, 2022

Dagbok 2022: 19.august



 
 

Klokka er no17.12, temperaturen ute er + 23 grader C, det er lettskya og sol, og så blæs det. Eg er så glad i vind, når den ikkje er for sterk eller kald.

I dag har eg vore heime heile dagen, Eg har tatt fredagsvasken, blant anna, og no på ettermiddagen var eg ute og raka heile Skråninga, og fekk vekk det visne graset.

Elles har eg no styrt med noko heile tida, men kan ikkje komme på alt no. Eg tenkte at eg skulle få plass i storefrysaren til alt i garasjefrysaren, så eg begynte å om-møblere, men det gjekk ikkje. Eg skulle ønske nokon kunne ta imot noko av det som er der, og er det nokon som vil ha ein garasjefrysar, så er det berre å ta den. Det er ingen ting som feiler den, det einaste er at loket er litt oppskrapa. Elles driv eg og finn fram diverse tilbehør til ball, det blir ikkje ballgove denne laurdagen-men kanskje neste ? No begynte eg å tenke på rabbe/kålrabi, eg såg at den er var 30 kr kiloen på butikken no. Det året Nils og eg gifta oss kjøpte vi ein sekk poteter og ein sekk rabbe. Potetene kosta 40 øre kiloen, rabba 35 øre. Pussig at ein kan hugse slikt.

No har Brubakk tatt helg. Han spurde så pent om han kunne få plukke seg litt rips, for den var så nauta god. Og det fekk han sjølvsagt lov til. Eg kan ikkje gjere greie for kor langt han er komen i arbeidsprosessen, for han held no på -på taket. Her er ein del metall-boss som vi kan levere gratis på VØR. Det blir ein del rot rundt dørene men no har han pakka inn materialen så den ikkje skal bli våtare , og eg spylte trappa til helga.

Det er nydeleg ute no, og eg vil no gjerne vere ute- men ikkje jobbe meir no. Eg blir så fort trøtt i føtene, utan eg veit kva det kjem av. Men no fekk eg veldig lys på kaffi, og det er det no råd med. Ønsker alle ei god helg!



Det er berre i helga at bilen min får stå på tunet.

torsdag, august 18, 2022

Dagbok 2022--18.august


                      No er blomsten eg fekk av Solveig på sitt aller finaste

Klokka er no 17.15, temperaturen ute er + 18 grader og det har vore fint vêr i dag, opplett -og sol innimellom, men ikkje heilt den store sommartemperaturen.

I dag var det trening og Marit sin tur å køyre, vi trena som vanleg og handla litt på heimvegen. Eg trong gulrot, poteter og kaffi, og prøvde å ikkje handle noko meir. Det gjekk bra.

Eg skal innrømme at eg var litt stressa i dag. Eg var slett ikkje sikker på at eg hadde betalt rekninga til KOPPEN i går og lurte veldig på kva eg hadde gjort feil. Eg kunne fare ned i banken og ordna det, men eg vil no ikkje fare å mase på dei støtt. Så hadde eg bestemt meg for å fare ein tur på VØR i dag, og så skulle eg kjøpe bensin på bilen og på kanna. Og når eg har ein plan, då skal alt gå fort, og så blir det deretter.

Eg fylte bilen med sekker frå hagen, busker, greiner, gras etc. Og eit par ting frå garasjen.Så henta eg bensinkanna og køyrde ned på SHELL. Eg fekk fylt opp tanken og kanna, og skulle inn og betale. Men kvar var veska, med lommebok og sertifikat. Den var ikkje å finne. Men det var ein hyggeleg mann som ekspederte.

(utlending) Eg spurde om han stolte på at eg kom att og betalte om ei lita stund, og det sa han at han gjorde. Så køyrde eg heim att, og veska låg der eg trudde, nede i tilbygget, der eg hadde slått siste bensindropane på klipparen. Så var det på an igjen, betalte bensinen før eg køyrde bort på VØR. Der var det kjempefullt med hageavfall frå før, men eg fekk no tømt sekkane mine. På heimvegen var eg fram på gravplassen og såg etter om det såg bra ut på gravene til Nils og Robert, og dei raude begoniane hadde tålt regnet godt.

Gjennom heile føremiddagen hadde eg lurt på kva som var gale med betalinga til Koppen, og no var eg sikker i mi sak, så det var berre å gå inn på nettet og betale, ganske enkelt.

Til middag åt eg restar frå i går, og då eg var ferdig å ete, la eg meg rett ned på dagsenga og slappa av. Denne veka har eg ikkje vaska, for eg ville tilbake til fredagsvask.

Her er mykje å rydde både inne og ute, men det kjem seg vel etter kvar som "takmannen blir ferdig. Men det er mykje jobb for ein mann åleine.


Dette er garasjen, eg kjem ikkje til å mangle verken kveikje eller opptenningsved til vinteren. Eg skal rydde litt rundt omkring etter arbeidstid i morgon.Det er veldig mykje emballasje på det vi har kjøpt.


                                Metall får ein levere gratis på VØR

"Einar-rosa" blomstrar fint enno, men dei store blomstrane blir tunge når det er vått

                     Denne gravrosa frå i fjor har blomstra fint og lenge.

Slik ser det ut når ein klipper utan oppsamlar. Eg må nok ut og rake , men ventar til det tørkar litt meir.

onsdag, august 17, 2022

Dagbok 2022: 17. august


Klokka er no 19.20, temperaturen ute er + 15 grader C. No er det lettskya og litt vind, det er opplett no, men før i dag regna det litt.

Dette har vore ein litt annleis dag, på godt og vondt. Eg hadde ikkje planer for dagen, men fekk brått innskytelse til å vaske, av-ise og rydde "storefrysaren " i vaskekjellaren. Det gjekk for så vidt greitt, men det eg ikkje visste var at der var to pappkasser med makrell som var tenkt til agn. No ligg dei i matbosset førebels, men om dei kan ligge der til neste veke, veit eg ikkje. Eg lurte på om der var ein lur plass der eg kunne hive dei på sjøen, så kunne dei bli mat til andre sjødyr. Men det er vel ikkje lov?

Eg veit i grunnen ikkje kva eg har gjort heile dagen, men eg har no vore i sving. Snikkaren har vore her, men no driv han og styrer på oppe på taket, så eg har ikkje oversikt.

Eg venta Einar i dag, så eg laga klar til middag, dermed fekk eg brukt kjøttkakene som var i frysaren, Dei var ikkje gamle. Men eg fann diverse mat som eg forer kråke og skjor med - på altanen.

 Eg er fornøgd med det eg har gjort i dag. Det var uvisst kva tid Einar kom, for han hadde ikkje fått klokkeslett for timen hos fysioterapeuten. Men Einar fann ut at han kunne komme hit og vente her så då fekk vi ete middag i lag.

Einar såg på papira eg hadde fått frå Koppen og han las dei små tala og bokstavane. Det gjorde eg også då eg tok fram forstørrelsesglaset etter at Einar hadde fare. Dermed kunne eg betale rekninga til Koppen. Eg gjekk inn att på maskina ei stund etterpå og ville sjå om betalinga var i orden. Der fann eg ingen ting av det som eg hadde gjort, men eg trur likevel alt er i orden, for dette er no noko som eg har gjort mange, mange gonger. Eg skal no sjekke igjen i morgon, det kan hende at det tok litt tid å sende over så mykje pengar.

Så hadde eg tatt eit par bilde som eg skulle ha her på bloggen, men då vart det krøll igjen. Bilda ligg på telefonen, men eg får dei ikkje inn på datamaskina. Eg blir fryktelig lei når maskinene mine ikkje oppfører seg, for eg er ikkje så flink å reparere.

Ein ting er positivt, i dag har foten vore bra-det kjem av at eg har vore relativt aktiv .


tirsdag, august 16, 2022

Dagbok 2022: 16.august


 Klokka er no 16.45, temperaturen ute er +18 grader, det er skodde og litt regn, eit bedrøveleg vêr . Men innimellom er det opplett og litt lysare. 

Eg starta dagen klokka 5.30 i dag, då var eg så låk i foten at eg måtte opp og gå, det er det einaste som hjelper, la meg på senga ein time til, så måtte eg opp og gå -Det var ikkje før etter den tredje oppstandelsen at eg var oppe for godt. Marit og eg var som vanleg på trening 10-11 og handla litt etterpå. 

Då eg kom heim att var eg trøtt og sette meg til å sjå tV ei stund  før eg åt eit måltid og gjekk ut i hagen. Eg var ikkje så ivrig i dag på grunn av den låke foten, men litt fekk eg gjort. Eg fekk no fylt ein sekk med kvistar og greiner før eg fann ut at eg ville koke ripsgelé og plukka 2,4 kg med rips-

No har eg kokt bæra og sett dei på siling, eg har ikkje saftkokar lenger, den kvitta eg for mange år sidan.

Snikkaren har vore her i dag også, og no har han lagt ny bordkledning øvst på veggen. Det er bra, for det var fare for at det kom vatn inn der. Taket derimot toler ein det vatn. Eg var bort til naboen med posten deira og så tok eg eit bilde av huset mitt frå tunet deira. Eg ser fram til at alt skal komme i orden. I morgon har eg ingen planar , men Einar kjem kanskje innom ein tur.




mandag, august 15, 2022

Dagbok 2022: 15.august

 

Dronning Elizabeth er ein "late bloomer," først no blomstrar ho. Ho har kome med to fine roser, men der er mange knoppar.

Klokka er no 17.00 , temperaturen er + 24 grader, det er lettskya og litt sol av og til. Eg var oppe i 6 -tida i dag og då trur eg det regna litt.Eg la meg nedpå eit par timar til.Eg var spent på om det vart såpass vêr at eg kunne klippe plen.

Ein annan ting eg var spent på, var om snikkaren kom, eg hadde ikkje høyrt frå han sidan førre måndag. Då klokka var 9 og han ikkje var komen trudde eg ikkje han kom, men akkurat då var han her og jobba flittig til klokka var 17 ca. Han var ikkje heilt bra men han har no styrt på heile dagen.

Eg fann ut at eg kunne klippe Skråninga utan oppsamlar, for graset var langt. Men først måtte eg kjøpe bensen. Eg gjorde meg klar til å fare ,men då eg såg at det var ein god slump bensin att i kanna, begynte eg helle å klippe. Det gjekk ikkje heilt greitt, for det våte graset kleima seg fast både her og der, så eg måtte stoppe og "gjere reint" fleire gonger. På plenen nedanfor huset slo eg med oppsamlar. Der låg att mykje gras frå laurdag då eg også klipte med oppsamlar der. Det som står att no er plenstykka opp mot gata, ovafor garasjen klipte naboen førre veka. Eg fekk no spylt og gjort rein klipparen i dag, det hadde eg ikkje gjort laurdag. Eg var litt gåen etter jobben, så det vart ikkje gjort meir der og då. Eg gjekk inn og kokte poteter og så hadde eg spekemat, som eg fekk av Margrete, til middag. Rips med fløtemelk og sukker til dessert. 

Eg sette meg i godstolen og fann eit avslappande program på TV, så eg fekk kvilt meg godt ut. Då er stod opp att hadde eg ein klesvask å henge opp m.m. Eg føler på at eg burde ha plukka ripsen som er att på treet og ev, andre bær- men eg er litt utbrukt i dag-det kjem ein dag i morgon også. Då skal vi på trening, men sikkert ikkje så mykje anna.

Den venstrefoten min er litt rar, no når eg har dreive og klipt og styrt på då er han nesten heilt bra. Men så spørs det i morgon.

Eg har foresten begynt på ei ny bok av Karl Ove Knausgaard, "Morgenstjernen" heiter den.




søndag, august 14, 2022

Dagbok 2022: 14.august

 

No er klokka ca 18.00, temperaturen ute er + 23 grader, men det var varmare tidlegare i dag. Det var no bra at dei som skal begynne på jobb i morgon fekk i alle fall denne dagen. I min barndom og ungdom starta alltid skuleåret den 1. september , slik at vi fekk nyte det seom eg meiner er den beste månaden i året, nemleg august. No når eg har heilårsferie, tek eg imot fineveret når det kjem uansett.

Sist natt sov eg veldig godt, kanskje på grunn av dei to Paracet-tablettane eg tok. Men eg har vore plaga med foten i heile dag og eg veit kvifor; eg har vore for mykje i ro! På førmiddagen rydda eg aldri så lite i hagen, men etter middag låg eg på solsenga med lydbok og eg er ikkje sikker på om eg var vaken heile tida.

Eg laga meg god middag i dag, steikt ørret med poteter og rå grønsaker. Eg lurte på å gå ein tur no i kveldinga, men veit ikkje om det blir. Reknar med at eg får nok mosjon i morgon når eg skal klippe graset på heile tomta; og her er mykje anna også som skulle ha vore gjort. No tenkjer eg først og fremst på hagen.

Men det var i alle fall nydeleg å få denne dagen. Ein gong måtte no sommaren kome.

No er eg spent på om snikkaren kjem i morgon og om han er i stand til å gjere noko.

                             


Bok nr.27- 2022: Lene seg mot vinden



 "Lene seg mot vinden" er ein frittståande oppfølgar til Havet Syng.

Vi er tilbake på Sunnmøre på midten av 1800-talet, og Kristiane lever saman med Lars og dei to borna hennar. Eldsteguten Anders veit at mora ønsker at han skal bli los, men han har store musikalske evner og mange planer som ikkje stemmer overeins med mora sine.

Kristiane søkjer til havet når ho treng å tenkje. Ein dag gjer ho ei skremmande
oppdaging nede ved den store steinen på stranda. Hendinga får store konsekvensar i bygda.

Dette er andre boka om Kristiane.

..............................................................................................................................................

I seinare tid har eg lese fleire bøker som er "sanne"- og eg har begynt å like å tenkje på at det eg les der har større "verdi" enn det som er dikta.. Men om ikkje det som eg les i denne boka har hendt i røynda, kan det hende at liknande hendingar har funne stad. Kven veit?

Etter at Trude Teige har gått over til å skrive på nynorsk når ho skildrar livet i fiskarmiljø på Sunnmøre har eg fått meir sansen for bøkene hennar. Om ein god del at det som står i boka  er "pjatt" så er her eit slags mysterium som skal avdekkast. Trude Teige har jo skrive fleire kriminalromanar-  så det kan ho. Eg gir henne også poeng for skildringa av fiskarmiljøet i "gamle dagar".

lørdag, august 13, 2022

 

Denne blomsten fekk eg av Solveig sist mandag. Den pyntar opp innimellom stillasfjølene. Den er fantastisk fin.

Klokka er no19.33, temperaturen ute er + 17 grader. Det kom litt regn i dag også, og skodda ligg langt ned i fjellsidene, men akkurat no er det opplett.

Eg trudde eg skulle fått klipt plenen i dag også, men det måtte eg berre gløyme. Sist natt verkte eg i foten så eg sov dårleg. Eg hadde ikkje Paracet som eg kunne ta heller. Eg kom meg fort då eg stod opp.  Etter kvart tok eg turen på butikken og kjøpte det eg trudde eg trong. Men då eg kom heim att var der melding frå Margrete om at ho og Amanda og Martin ville komme på besøk. Eg hadde ei gulrotkake i frysen og så slo eg i hop ei vaffelrøre. Eg prøvde å ikkje lage for mykje, slik at eg måtte leve på vaflar i mange dagar.

Etter kvart fekk eg melding om at Erlend og Ingrid også ville kome, så då vart det ikkje for mykje av noko. Margrete hadde  kjøpt med seg noko- men "gløymde" å ta det med seg att. Vi gløymde også det andre ho skulle ha med herifrå. Heile neste veke skal dei ha planlegging på skulen- utan elevar. Så no er ferien over for denne gong. For lærarane.

Charlie, hunden , var også med. Det kan hende at katten til Marit, Lollo, oppdaga det, for ho ville ikkje komme ned då eg ropte på henne. Ho har vore her før i dag og ete frokost.

Det var kjekt for meg å få besøk i dag, sidan Marit og andre naboar er bortreist vart eg litt åleine.

Eg er spent på korleis det går med snikkaren min, eg håper inderlig at han blir bra så han kan fullføre. Det håper han sikkert sjølv også.

fredag, august 12, 2022

Dagbok 2022: 12.august

 


Klokka er no 17.05, temperaturen ute er + 18 grader , det er lettskya og litt sol, så det kanne minne om sommar. 

Eg hadde ikkje planlagt noko for dagen, så eg for her berre og surra litt på føremiddagen. Marit var ein tur ned med kattamat sidan eg skal passe Lollo.Etter at ho hadde gått opp att, sette eg meg ut og klipte stikkelsbærbuska og plukka bær. Så gjekk inn att og rensa bæra, dvs. klipte dei i begge endar, mens eg høyrde lydbok. Då eg såg på klokka var den nesten 14.30, eg fekk nesten sjokk. Men eg forstod no det at eg måtte ta meg litt mat. 

Så gjekk eg ut og klipte plenen rundt huset, det var 14 dagar sidan sist eg klipte, og elles plar eg klippe kvar veke. Så graset var langt og vått og tungt å klippe, og eg ser ikkje bort frå at eg må fare over ein gong til. Men det minka på bensinen min, så eg får vente til i morgon, då kan eg fare på bensinstasjonen først best. Eg har to 5-liters-kanner som eg fyller opp. Eg plar seie at eg brukar meir bensin på klipparen enn på bilen.

Splveig nabo var også ute og jobba, så eg fekk no prate litt med henne. Eg har ikkje vore på butikk i dag, men eg får handle i same rennet når eg kjøper bensin. Som de ser har eg planen klar. Eg kunne ha gått ein tur i dag, men eg blir fortare trøtt enn før-det er vel alderen som tyngjer.

No vonar eg at vi får nokre fine dagar, for det treng vi. Eg ønsker alle ei god helg!



Bok nr.26 - 2022: FRED


 Eg har aldri lese noko særleg av Arne Garborg. Synest å hugse at vi var borte i "Bondestudentar" på gymnas. Eg var 16 år då, og altfor ung til å bli interessert i dei gamle forfattarane. Songane/dikta frå Haugrussa kjenner eg sjølvsagt.

Sist vår kåserte både Eli og Terje Kjøde om denne diktaren- på pensjonistmøte, og då Margrete skulle på tur til Jæren m.a. fann eg fram ein artikkel som eg hadde lese i "Familien"- om Arne Garborg - og gav henne.

Etter turen skreiv ho så fint om boka "FRED" at eg måtte lese den på Storytel, og akkurat no slutta eg av.

Det er ei fabelaktig bok, ikkje mindre enn det. 

Og så er det opplesaren- eg har ikkje ord! Han er heilt unik- Han les på dialekt på ein måte, men uttaler alle ord etter den gamle skrivemåten. Og syng når det er aktuelt. Mange ord er sikkert ukjende for yngre folk- men ikkje for meg. Dette er det mest gripande eg har lese på år og dag. ANBEFALT !!!!!!!!!!!!!!!!!!!

torsdag, august 11, 2022

Dagbok 2022: 11.august

Klokka er no16.05, temperaturen ute er + 16 grader C, og det regnar, ikkje byger i dag -  berre REGN. Men akkurat no ser det ut til at det kan bli litt lysare, det plar lette litt mot kveld. Eg ser på TV at på austlandet kan dei både bade og sole seg, då blir eg litt sur, for her har vi knapt sett sola på heile sommaren og i alle fall ikkje i det siste. Her har rett og slett ikkje vore sommar. Det einaste plasteret på såret er at vi har hatt billeg straum, ca. 2 øre pr.KWH.

I dag var vi på trening 10-11 og så handla vi på Spar. I dag var der bær til sals. Ein liten neve med små rips t.d. kosta over 40 kr. Eg tippar at dei ikkje får selt bæra. Dei snakkar om  på TV at matprisane stig, og det trur eg. Eg sjekka bankkontoen min i går, og såg at mesteparten av utgiftene mine er mat. Men då reknar eg ikkje med dei faste utgiftene til straum, telefon etc- for det har eg på avtalegiro. I dag hamstra eg kjøttdeig, som var ca 40 kr. pr 400 gram på Spar.

Etter at ag kom heim har eg berre sløva og ete og sett TV. Og så har eg lese litt i diktboka som eg kjøpte i går.

Det var ei artig stund på Kunsthuset. Først fekk vi eit glas med alkoholfri vin, og etter at Ottar hadde lese og fortalt fekk ein kjøpe bøker og så fekk vi ete noko som eg vil kalle fingermat, dvs små brødstykke med mykje pålegg. Der stod ein pinne i kvar, så vi kunne ete ståande. Det var ASKO som hadde levert.

Eg kjøpte ikkje siste boka til Ottar, men ei som har har skrive før, der dikta var omsett til Engelsk slik at utflytta nordmenn i Amerika skulle kunne lese dei. Ja dikta stod sjølvsagt på norsk også. Og så var der fine fotografiske bilde.

Viss nokon lurer på kven Ottar er, så er han altså mannen til venninna mi, Ragnhild.  Namnet Ottar Løvoll er godt kjent på Eid. Men dette handlar om søskenbarnet hans. Ottar, son til presten Løvoll på Eid, døde for nokre år sidan, då budde han i Ålesund.

Det som var det aller kjekkaste på Kunsthuset var eg eg trefte så mange kjende som eg ikkje har sett på lenge. Mange frå Velle skule var der, slike som eg arbeidde i lag med i mange år. Alle er sjølvsagt gamle no, men held seg bra.

Det som plaga oss alle litt var at vi ikkje høyrde så godt. Eg høyrde no litt etter at eg hadde fått på meg begge høyreapparata. Men vi var samde om at Ottar skulle hatt ein mikrofon.

I morgon er det fredag og så er denne veka snart slutt. Det som er det trasigaste akkurat no , er at huset står og ventar på nytt tak. Eg er spent på korleis dette skal gå. Om han som skal legge taket kjem seg til såpass han greier det. Det er ikkje greitt å ta ned alle stillasa heller. Han har hatt mykje arbeid med å sette dei opp. Og det er vel ikkje nokon som kan steppe inn og gjere jobben. Eg håper på at det går i orden på ein eller annan måte.

Marit reiser på hytta i morgon, så då får eg vel passe Lollo. Eg forstår liksom ikkje kvar denne veka har blitt av. Og det skjer meg i hjartet at eg ikkje får slå plen- eller gjere noko anna i hagen; det er mykje som står på vent.

 


Dagbok 2024: 28.mars. I dag fyller eg 84 år.

Klokka err no17.03, temperaturen ute er+ 10 grader, det er lettskya og fint  I dag har eg fått mange gratulasjonar på nettet -og elles. Eg s...