onsdag, mai 31, 2023

Dagbok 2023: 31.mai

                                    Starevegen sett frå Vernet

Klokka er no 19.40, temperaturen ute er + 11grader C, det har vore overskya men opplett i dag-trur eg.

I dag skulle eg på pensjonistmøte, så eg tok ein tur på Vernet før middag for å få litt mosjon.Elles har eg ikkje gjort det skapte grann anna enn å vaske håret etc. til vi skulle på møte. Eg kjørte og Marit sat på med meg i dag. Møtet var på Kulturhuset, og det var eit innhaldsrikt møte med informasjon og musikk. To damer var der å snakka om eldre som vil bu heime eller vil kjøpe seg noko anna. Det var snakk om kva hjelp ein kunne få, og mykje anna.

Så kom Børre Lødemel med gitar og anna utstyrt og song og spelte alt mulig frå norske viser til Tina Turner og Vassendgutane. Det er alltid kjekt når Børre kjem.

Han er no ikkje heilt ung lenger, han heller, men eg hugsar han godt frå tida på Velle. Forresten var det mange nye på møtet i dag, menge someg ikkje kjenner. Men Brita var der og hadde tatt av plass til Marit og meg.

Vi fekk god mat, karbonadesmørbrød + is og kaffi. Det var eit kjekt møte, og eg kan nyte alt utan å tenkje på at eg skal skrive referat.

Forresten var det utlodding og Marit vann kaffi+Twist.

I morgon skal vi på trening igjen-og så blir det fredag etterpå.Og i morgon kan vi blade om til Juni på kalenderen.



 

tirsdag, mai 30, 2023

Dagbok 2023: 30.mai

Klokka er 17.40, temperaturen ute er +10 grader. Det har vore overskya og opplett i dag, men no er det nesten som sola vil kome fram.

Eg hadde ingen planar for dagen, sidan det ikkje vart trening i dag. Så då måtte eg bestemme meg for kva eg skulle bruken tida til. Etter kvart gjekk eg ut i hagen og begynte å ta opp løvetannrøter, etterpå klipte eg ei buske som sikkert skulle ha vore klipt sist haust. Eg hadde resten av kugjødselkomposten ned på den rotete jordbæråkeren etc.etc.

Eg gjekk inn og skulle ete middag , eg hadde suppe igjen frå i går. Og då såg eg at naboen hadde begynt å klippe plen. Han klipte ovafor garasjen min også. Då visste eg kva eg skulle bruke resten av arbeidsdagen til. Så no har eg klipt alt som eg kan klippe av plen. Plenen er bra fin og jamn , men nokre "bøter"  er der sjølvsagt.

I morgon blir det vel ikkje så mykje gjort, då er de møte i pensjonistlaget på Kulturhuset klokka 16. Eg er ikkje flink å bruke hanskar ute, så det går vel ein halv dag til å bli rein igjen og til å få orden på håret. Eg er heldigvis heilt frisk att etter forkjølinga. 14 dagar varte den.

Eg likar å halde på ute, men eg kjem ikkje over så mykje som eg gjerne ville og eg har enno ikkje få kjøpt inn blomster til kjøkkenkassane. Det einaste eg har som blomstrar fint no er dei gule stemors som eg kjøpte til påske. Dei har vart merkeleg lenge.
 

Det einaste syrintreet mitt står fullt av blomsterklasar som held på å sprette ut.

mandag, mai 29, 2023

Dagbok 2023: 29.mai


 Klokka er no 18.00 Temperaturen ute er ca+ 11 grader C og det har regna det meste av dagen. Då eg stod opp i dag, tenkte eg at eg ville gå tur når det leid på og veret vart betre.

Etter morgonstell og frokost, sette eg på vaskemaskina  og så vart det ikkje gjort noko meir -anna enn å sjå TV og strikke litt langsmed. Apropos TV så kjem eg ikkje inn på Netflix lenger-ikkje utan å logge meg inn etc. Klok av skade prøver eg ikkje å gjere det sjølv. Eg greier meg no utan Netflix.

Eg har passa katten til Marit i helga og for ein gongs skuld har ho ete opp maten sin.Ho har kome ned heilt av seg sjølv fleire gonger og fått mat.

Det såg ikkje ut til at det skulle skine opp i dag, skodda ligg framleis heilt ned på jorda, men eg venta med turen. Til middag i dag laga eg grønnsaksuppe med pølseterningar og til dessert hadde eg jordbær med fløte. Eg hadde no kjøpt inn litt godt til helga.

Klokka vart 17 før eg kom meg ut på tur, det regna framleis, men ikkje så mykje . Så det heldt med regnjakke og Hoka-sko i dag også.

No er det slutt på ferien min også, i morgon er det trening og onsdag er det møte i pensjonistlaget.

Dette er Amanda, den yngste av jentene til Margrete. (Mor mi heitte Amanda Margrete)

Amanda fyller 23 år i dag. Alle fire søskena heiter Bjørneset til etternamn. Derfor strikkar Margrete bjørnegenserar til alle. Ho har begynt på den 4. og siste no.

Amanda har tatt lærarutdanning i Trondheim til til no-men no flyttar ho heim til Volda og tek dei to siste åra der.

GRATULERER MED DAGEN, AMANDA

søndag, mai 28, 2023

Dagbok 2023: 28.mai

Klokka er no 16.40, temperaturen ute er + 12 grader , det er opplett og litt sol av og til. Då eg stod opp i dag var ikkje veret såpass, då var det kaldt og nysnø i fjella og ingenting som minte om sol og sommar. Det var så kaldt og hustre at eg måtte fyre opp i omnen for å få det varmt. Eg sat mykje og strikka og såg TV på føremiddagen, men då klokka nærma seg 13, kledde eg meg etter veret og gjekk tur på Vernet med Hoka-sko og regnjakke. Men det regna ikkje så mykje i dag som i går, så eg vart ikkje våt i dag. Oppe på Vernet er det nesten alltid vind og i dag var den kald.

Eg gledde meg til god middag i dag, for eg hadde ein rikeleg stor porsjon att frå i går som eg varma opp. Maten går ned på høgkant -eg har ikkje blitt mindre glad i mat med åra, eg er svolten som ein ungdom i mitt 84.år. 

Det vart meir TV etter middagen, vart mellom anna sittande å sjå ein heil Ole Paus-konsert og likte den.

Lollo kom då eg ropte på henne til frokost, og no kom ho og fekk middag også. Ho held til oppe med huset til Marit, men kjem springande når eg ropar på henne.

No skin sola inn glaset til meg, så det ar no eg skulle ha gått tur, men no er eg for mett. Og eg er ikkje heilt gira på hagearbeid-det er framleis for kaldt og vått ute.

I morgon fyller Amanda 23 år. Lett å hugse aldren på henne som vart fødd i året 2000. 

 

lørdag, mai 27, 2023

Dagbok 2023: 27.mai


Det hadde begynt å minke på vatnet i elva, men no har den fått ny forsyning.

Klokka er no 18.15, temperaturen ute er + 10 grader og det silregnar Eg kom nettopp att frå ein tur på Vernet så eg veit kva eg snakkar om, eg vart våt til skinnet, men har fått på meg tørre klede no.

I dag vakna eg til vanleg tid, men bestemte meg for å ligge og slappe av ei stund sidan eg ikkje hadde så mykje på programmet i dag. Men eg måtte handle litt til helga, det var det einaste. Einar ville komme på besøk i dag, så då skulle eg lage middag til to. Det vart ikkje så spennande mat , men kjøttkaker i god saus med godt tilbehør- det likar både Einar og eg. Så eg fann ikkje på noko meir spennande i dag heller-

Eg reiste ned på butikken og hadde sjølvsagt lagt att hugselista heime, men eg hugsa alt utan ein ting.

Det er kjekt å lage mat til fleire og alt var klart då Einar kom, presis på minuttet, som vanleg. Vi åt godt begge to og så hadde mykje å prate om mens vi åt is og drakk kaffi.

Etter at Einar hadde fare og eg hadde rydda opp litt, tok eg ein tur på Vernet. Det regna, men eg trudde ikkje det vart så mykje, så eg hadde ikkje regnjakke på meg men gjekk i vanleg jakke. Det regna meir og meir og eg vart våtare og våtare. Eg prøvde å gå litt fort, men vart likevel gjennomvåt, så det første eg gjorde då eg kom heim att var å ta på meg gode varme, tørre klede. Eg er ikkje heilt bra av forkjølinga enno, men eg plar no vere passeleg hardbalen til å tole ei bløyte. Det var i alle fall godt å komme seg ut litt i dag også. 

Då eg gjekk utover gata ringde kyrkjeklokkene pinsehelga inn. Då kom eg til å tenkje på ei anna pinseaftan for mange år sidan. Den dagen gjekk eg tur åleine i skogen og sat på ei tue og høyrde klokkene-og eg hugsa kva eg tenkte-den gongen.

I kveld blir det vel strikketøy og TV-som vanleg. Marit er bortreist, så eg passar katten hennar og gir den mat. Ho kjem når eg ropar på henne. Men ho vil aldri komme inn, berre opp på trappa.

Det er i alle fall friskt og grønt i skog og mark, og på Vernet er det eit utal av vekstar av alle slag, det blir meir å sjå etter kvart.


 

fredag, mai 26, 2023

Dagbok 2023: 26.mai


 Klokka er no 20.23 og temperaturen ute er + 10 grader . Det har nyss vore ei regnbyge, så no er det vått ute. I dag tidleg vakna eg opp til sol og klår himmel, men det varte ikkje dagen ut.

På føremiddagen i dag tok eg fredagsvasken, og etter middag vart det hagearbeid. Eg gjekk ut og skulle har kugjødselkompost på beddet ved garasjen, men det var for gjort, så eg sette i gang eit anna prosjekt, nemleg å rydde beddet mot Urke-garasjen. Der veks det mykje som eg ikkje vil ha der, til dømes ramsløk. Men i nedste enden har eg hatt  ei buske, eg hugsar ikkje namnet, men den plar ha lyslilla blomster. Greitt nok, men når skvallerkålen blandar seg inn meir enn normalt, må eg gjere noko drastisk, og det gjorde eg i dag. Eg klipte heilt ned buska+ skvallerkålen og skal prøve å få orden på det. Det blir ikkje enkelt for eg har prøvd det samme før- utan å lykkast.

Eg gjekk inn og skulle hente telefonen og ta bilde, og der var det melding frå Solveig om at ho ville komme innom ein tur. Det var veldig kjekt å få besøk, for no har eg vore lenge åleine. Eg hadde ikkje mykje å by på, for eg har ikkje handla inn til helga enno. Det skal eg gjere i morgon. 

Eg passar katten til Marit i helga - og ho(katten) kjem med det samme eg ropar på henne. Ho får mat ute på trappa mi, for ho vil ikkje komme inn.

De ser sikkert ein grøn plaststol på bildet, den er der for at eg kan sette meg ned litt når ryggen min ikkje er heilt god. Eg likar hagearbeidet, og i dag er eg nøgd med plenen som eg gjødsla i går. Det vart rikeleg med vatning.

Og no er det fredagskveld og langhelg. Eg vil ønske alle ei GOD pinse!

              Her har eg tenkt å plante noko. Kanskje ein rhododendron ?

torsdag, mai 25, 2023

Dagbok 2023: 25.mai



Mange store tre stenger for fjord-utsikta vår

Klokka er no16.33, temperaturen ute er+ 9 grader og det regnar meir og mindre heile tida. Eg har ikkje greidd å komme meg ut enno, og det spørs om det blir noko av. Eg skulle hatt utover kugjødselkomposten, men det har ikkje blitt til denne tid. Eg tenkte å gå ein tur på Vernet, men heller ikkje det har det blitt noko av.Enno.

I dag var det 14 dagar sidan eg sjukmelde meg, så i dag ville eg prøve å gå på trening igjen. Eg er ikkje heilt fri verken hosten eller snufsen, men eg kjenner meg ikkje direkte sjuk, det har eg ikkje gjort før heller. No er det andre også som har fått same sykja-men det er ikkje eg som har smitta dei. Bodil for eksempel har eg no ikkje vore i nærleiken av. Det har vore litt av ei "sykje", men eg har i grunnen ikkje vore sjuk-berre forkjøla. Veldig forkjøla.

Det gjekk greit på treninga i dag, det var eg som køyrde til og frå. Etterpå var vi ein tur på ALTI, og så handla vi på KIWI på heimvegen. Då eg kom heim att laga eg ein slags middag og åt godt. Den sykja som kan ta frå meg appetitten-den finst ikkje. Eg sette meg inn og såg nyheilter men det var ikkje så varmt i stova, så eg gjekk ned i tilbygget og henta heimelaga ved. Så i dag har eg brent opp mykje av den veden som eg saga for ei stund sidan. Då får eg på ein måte rydda på same tid som eg varmar opp. 

Det vart både nok og for mykje vatn på kunstgjødselen som eg hadde ut i går, men eg håper at jorda tok imot. Gjødselen var i alle fall ikkje synleg i dag.

Det var snø langt nedetter fjellsidene i dag tidleg, og det no når vi endeleg hadde fått vår.

Ja, det hjelper vel ikkje å sitte å ergre seg over vêret, enten får eg gjere noko inne eller så får eg gå ut . Tida vil vise kva eg landar på. Og i morgon er det fredag igjen, og så kjem pinsa,eg har hatt flagget ståande på stova heilt sidan 1. mai, men etter pinse blir det lenge før flagget skal opp igjen.

P S: Det vart ingen tur i dag. Eg valde å støvsuge teppegolva.

onsdag, mai 24, 2023

Dagbok 2023: 24.mai

Eg ønska meg litt regn, for det var tørt i jorda, og gjødselen treng også væte. Men det kom meir enn nok regn, og kaldt vart det også

Klokka er no16.47, temperaturen er + 11 grader C og det regnar rett som det er. Eg får opp ver og temperatur nedst på PC-en min, Som regel stemmer det med veret slik det er og blir. Men i dag kom det melding om snøbyger, då stussa eg litt. Men meldinga vart fort vekk.

I dag morgon var eg effektiv. Eg hadde fylt bilen med hageavfall i går kveld, så i dag var det berre å ta av. Eg sjekka at der var ope på VØR klokka 9, så eg køyrde dit så snart eg var klar. Eg hadde 6 store, svarte sekkar, men alle var ikkje like fulle. Det gjekk greitt å kvitte seg med avfallet, og så tenkte eg at eg kunne køyre bort på Plantasjen og få ein sekk med kugjødselkompost til beddet ved garasjen.

Då eg kom bort på Plantasjen var der ikkje ein einaste bil, og då eg skulle gå inn var døra låst. Eg forstod ingen ting før eg las på eit oppslag, der stod det at dei opna klokka10. Eg vart litt paff då eg såg at klokka mi berre var  kvart på 10. Eg plar ikkje vere ute så tidleg på morgonen. Men eg brukte tida til opninga godt, for då fekk eg handle på Coop og der har dei silda "mi".

Eg er alltid litt forsiktig med å kjøpe store sekkar med ditt og datt, og ho som stod i kassa var åleine, for ho som skulle vere der i lag med henne ,var ikkje komen. Men sekken med gjødsel var så lett at eg bar den under arma. Eg kjøpte ikkje noko meir i dag , for eg har ikkje oversikt over kva eg treng.

Då eg kom heim var veret slik at eg kunne ha ut gjødsel, så då strødde eg "risengryn" over plenane mot gata og rundt huset. Skråninga får ikkje gjøsel i år, for eg kjøpte berre to sekkar. 744kr kosta dei. Det begynte å regne litt og det er bra for gjødselen -berre det ikkje blir for mykje. Beddet har ikkje fått komposten enno, for det vart så ufyseleg mykje regn ei stund.

Eg kosa meg inne med å lage til middag til meg sjølv. Det vart favoritten min i dag, krydder-spekesild med kålstuing, poteter og rødbetar til. Det er noko av det beste eg veit, så eg kjøpte heldigvis to pakkar med sild. 

Etter middagen har eg stort sett sete ved TV-en og sett på den store båten, mens eg har drukke kaffi og brus etc,etc.

Eg trur ikkje eg får gjort meir ute i dag og eg trur ikkje eg kjem til å gå på Vernet heller, for i morgon skal eg friskmelde meg sjølv og fare på trening. Heilt ferdig er eg vel ikkje med forkjølinga, men i morgon er det 2 veker sidan eg vart "sjuk". Det har vore ei seig forkjøling, og heilt bra er eg vel ikkje, men bra nok til å gå på trening, trur eg. Eg håper eg ikkje smittar andre.

Epletreet står i sin finaste blomstring, berre synd at ikkje sola skin.

tirsdag, mai 23, 2023


 Klokka er no 18.40, temperaturen ute er +14 grader C, det er lettskya, men vi har sett sola av og til i dag også. 

EG hadde planlagt å ha utover gjødsel i dag, viss det var vått i graset. Det var ikkje godt å vite om det var vått nok, så eg venta og såg etter regnbyer -som ikkje kom. Prøvde å gjere litt husarbeid,  men det vart ikkje så mykje av det heller. Då det leid litt på gjekk eg ut og jobba i hagen, der har eg så mykje arbeid på vent at det er berre å begynne ein stad. I dag kriga eg mot Skvallerkålen -ein krig som ein aldri kan vinne. Løvetennene kan ein no få litt kontroll på-men ikkje skvalleren. 

Marit måtte fare utan meg på trening i dag også. Ho meinte at eg no hadde vore sjukmeld i nærmare 2 veker. Eg trudde ikkje det var så lenge , men då eg såg etter i dagboka mi, såg eg at eg melde meg sjuk den 11.mai, og enda er eg ikkje friskmeld,. Då ho kom att frå treninga i dag, sat vi ei stund på benken hennar og passa katten og hunden. Det leid så langt på dag at eg måtte ha litt mat, og så var der ei maskin full med reine kjørel- som måtte tømast. Eg vart trøtt og la meg ut på solsenga ei stund, men der var ikkje så varmt at det var koselig.

Eg kunne like godt gjere meir hagearbeid, og det gjorde eg. Eg rydda fint opp sist haust, men det blir likevel noke å ta igjen. Eigentleg likar eg godt å halde  på i hagen, men så er det den ryggen. Eg har vore på MR med den, der fann dei berre vanlege slitasjeskader, så det er vel ikkje så alvorleg skjølv om det er vondt.

No har eg pakka inn i bilen til i morgon, då MÅ eg på VØR, eg har meir enn 6 store svarte sekker som skal tømmast-og slik blir det vel heile sommaren.

Eg har ikkje hatt på TV i dag, så mykje kan ha hendt i verda utan at eg veit det.


mandag, mai 22, 2023

Dagbok 2023: 22.mai


 Klokka er no18.15, temperaturen på trappa er +18 grader C. Det er lettskya med sol innimellom, ein nydeleg dag eigentleg.

Eg hadde store planar for dagen, eg skulle gjere mykje hagearbeid og kanskje fare på Plantasjen. Det vart ikkje akkurat slik då. Eg fekk klipt plenane oppe mot gata og det var no greit. 

Så sette eg i gang nedst i hagen, der eg ikkje får gjort det heilt skikkeleg med plenklipparen. Eg tok opp løvetannrøter i "jordbæråkeren" og mange andre stader, klipte gras for hand og rydda såpass som eg greidde det. Eg skulle eigentleg ha brukt den elektriske kantklipparen, men den var det ikkje liv i. Eg kjøpte den seint på sommaren i fjor og den vart ikkje så mykje brukt då, men eg fekk ikkje liv i den i dag. Og ingen mann var å sjå. Dermed klipte eg med handsaks, men eg vart no ferdig på ein måte. 

Ryggen min vart også ferdig, så eg gjkk like godt inn og laga til litt mat og så sette eg på TV-en og såg nyheiter. Eg forstod etter kvart at eg ikkje kom meg ut att for å jobbe, så eg tok heller ein god dusj og vart rein både på hender og føter og det var godt. Turen på Plantasjen vart utsett enda ein gong, men eg kunne tenkt meg å ha med meg nokon.

I morgon skal ein tidlegare kollega gravleggast og eg skulle ha vore i kyrkja, men eg hostar og snufsar for mykje til å vere i lag med folk. Eg kan ikkje gå på treninga heller, for eg har ikkje lyst å smitte andre. Eg trur det må vere mange år sidan sist eg var skikkeleg forkjøla-men no er eg det.

Eg tenkjer på skvallerkål. I fjor kjøpte eg noko som drap den-ei lita stund- før det var på han igjen. 

Rasmus kom vel fram til Mo i Rana i dag, han hadde overnatta i Steinkjer.

søndag, mai 21, 2023

Dagbok 2023: 21.mai


 Klokka er no 16.00, temperaturen ute er+19 grader, og det er nokså overskya, men stille og fint. Som de ser på bildet har eg vore ein liten tur på Vernet i dag også for å få vere ute, eg synest ikkje eg kan halde på så mykje ute i hagen på søndagar, men det kan hende eg gjer litt still arbeid ei lita stund, viss eg får ånden over meg. Akkurat no er nokså slapp og giddalaus. Eg åt middag for ei stund sidan og då blir eg litt sløv ei stund etterpå.

Eg sov til klokka var nesten 9 i dag,  eg legg meg ikkje tildleg om kveldane, men eg har sove veldig godt desse siste nettene sidan eg ikkje har hatt noko "å skulle" på dagtid. Forkjølinga er ikkje over, men eg er ikkje sjuk på nokon måte. Det er mitt eige val at eg har gått her åleine, eg er ikkje interessert i å smitte andre.

Det er ein nydeleg temperatur ute, og det ser ut til at sola kan komme fram. 

Eg trur det må vere eit veldig godt løvetannår i år, har aldri sett mykje av denne sorten før. Det var heilt gult i plenen då eg klipte i går enda eg hadde tatt opp fleire bøtter med løvetannrøter på førehand. Og enda blomstrar det i hagen. Ein av naboane mine påstår at løvetennene er fine, og det kan eg gå med på så lenge dei ikkje veks på min plen.

No kom eg på at eg kan gå ut og pynte litt her og de med hand-reiskapar som ikkje lagar lyd.

I dag er Rasmus på veg nordover med bil, han skal til Mo i Rana og halde kurs. Eg skulle så gjerne ha vore med på bilturen, men ikkje på dei 4 kursdagane .Eg håper berre at han kjem vel fram og tilbake. Eg har vore i Mo i Rana 2 gonger, på gjennomreise. Eg saknar alle bilturane våre i Norge og Sverige.


Epletreet blomstar fint, men det kjem ikkje så godt fram på bildet.


lørdag, mai 20, 2023

Dagbok 2023:20.mai


 Klokka er no 17.15, temperaturen ute er eventyrlege + 20 graderC-første skikkelege sommardagen i år.

Alt i går kveld begynte eg å føle meg friskare, og i dag tidleg var eg nesten normal, berre litt småhosting. Eg var klar til å gjere ein innsats i dag, men visste ikkje kvar eg skulle starte. Så melde Marit at ho skulle ta soverommet sitt i dag, og det var ein god ide  for meg også. For på soverommet mitt er det så mykje teppe og styr at eg må vere om meg når det er opplett. Eg skulle bytte på senga også. Eg fekk litt fart på meg då eg hadde bestemt meg og så tok eg datarommet i samme slengen. Og klede vart lagt i vaskemaskin og det vart reine storreingjeringa i dag.

Alt gjekk fint, men eg hadde ein tanke i bakhovudet som sa:PLEN. Eg høyrde det surra i fleire retningar ute, så då var det altså tørt nok til slått . Eg fekk i gang klipparen og klipte rundt huset. Det går heilt greitt. Me Skråninga er tung, så eg måtte ha eit par pausar, men eg greidde å fullføre på den måten som var. Eg har tatt opp fleire fulle bytter med løvetannrøter hittil i år, men det skulle ein ikkje tru for det var meir løvetann i plenane enn nokon gong før. Eg kom no i mål med klippinga i dag, på den måten som var. Opp mot gata vart det ikkje klipt i dag, så det har eg til gode.

Eg var nokså gåen etter arbeidsdagen min i dag, det er no berre så vidt eg har friskmeldt meg. Eg hostar enno og er ikkje heilt i form, men mykje betre enn eg har vore. Eg tok meg litt mat då eg kom inn, og så sette eg meg inni godstolen og sette TV-en på "You Tube". Eg trur eg datt ut ein augneblink og vakna opp att til Elvis som song "Bridge over troubled Water", og mange andre kjende songar. Det er TV-en sjølv som vel kva dei skal spele til meg, utfrå diverse som eg har høyrt på PC-en. Eg kan ha mange fine konsertar på den måten.Eg tenkte litt på Elvis og livet hans. Han var ein vakker gut med ei fin stemme, men han øydela seg sjølv på ein måte. Og så tenkte eg på korleis det hadde vore om tvillingbroren hans hadde fått leve om det hadde blitt " Presley-brørne "? det får vi aldri vite.

Men det var ein ting til eg måtte gjere i dag, eg måtte ned på ALTI og betale i ein spleis. Eg venta til langt ut på ettermiddagen, for ikkje å treffe bort i så mykje folk. Men no har eg altså betalt og slepp å tenkje meir på det.

Eg har att å strekke på senga mi-så er eg i mål for denne gong. Mandag håper eg å få klipt resten av graset.

Det er så nydeleg ute no, det har ikkje vore så klår sol i dag, men varmt og godt. I dag sløyfa eg turen på Vernet, ein går mykje når ein klipper gras.


Eg har ikkje gjødsla enno, det har vore litt for tørt, dei lyse flekkane i plenen or mose, som eg håper å få vekk med tid og stunder.

fredag, mai 19, 2023

Dagbok 2023: 19.mai.


Klokka er no18.43, temperaturen ute er+12 grader C, det er overskya ,men opplett.

Denne dagen har gått veldig fort. Eg var oppe til vanleg tid, men det tok si tid før eg var ferdig med fredagsvasken. Alt gjekk så treigt i dag, og eg var ikkje så opplagt på å gjere noko. Då klokka var 14, leita eg fram litt mat som eg fann i kjøleskapet, så vart det middag. 

Eg talde på knappane om eg skulle ta ein tur på butikken å skaffe litt mat, eller om eg skulle gå ein tur. Det vart butikken, så no skal eg ikkje svelte i hel i helga i alle fall. Men då eg kom heim hadde eg fått blod på tanna, så eg tok ein tur på Vernet også. 

Då eg hadde sett meg til for å skrive blogg ringde telefonen, og eg tok den til slutt og snakka med mi gamle venninne frå skulen, Astrid. Ho og andre hadde ordna med blomster til gravferda til Tora. Det er mange av dei gamle kollegaene mine som ikkje lever lenger. Men slik er det.

Eg er delvis tett i nasen , men hostar ikkje så mykje lenger. Eg er på ingen måte ferdig med forkjølinga, men har det tolleg bra.

Ein kan lett gå i surr med dagane  i disse tider, men i dag er det fredag, så eg kan ønske alle ei god helg!

torsdag, mai 18, 2023

Dagbok 2023: 18.mai

 


Klokka er no 17.17, temperaturen ute er + 15 grader, det er overskya og litt vind. Og eg trur ikkje det har regna i dag, men det har heller ikkje vore sol. Eg har vore inne for det meste; sette på klesvask i kjellaren og oppvask på kjøkkenet, så det vart litt husarbeid i dag, elles såg eg TV og strikka.

Eg er mykje betre i dag enn eg har vore dei andre dagane. Eg har nesten ikkje hosta i dag. Så no ser eg ein ende på plagene. Eg er ikkje vand til å vere sjuk, så eg blir fort lei når eg ikkje er i form. Eg hadde ein ekkel hoste, men i dag har eg ikkje hosta mykje. Middag hadde eg att frå i går, så eg slapp å koke i dag.

Marit hadde vore fram på gravplassen og der hadde ho sett til Nils si grav. Der hadde fuglane vore og grisa til, og då eg fekk vite det, køyrde eg fram med såpe og klut, vatn er der. Det blei no mykje betre, men eg skal  snart fram og pynte litt meir. Eg må handle ein del - plantar til kassane utanfor kjøkenglasa t.d. Sist eg var på Plantasjen såg eg at prisane hadde gått opp der også.

Då eg kom heim følte eg meg bra i form, så eg tok ein tur opp på Vernet. Ytst ute i Starevegen  møtte eg Solfrid og Turid med barn og barnebarn. Ja, det er no berre Solfrid som er bestemor av dei to-.

Eg har ikkje så mykje planar framover, men mykje står på vent. Eg har ikkje tatt med den vonde ryggen i planane mine- men eg har tenkt å kjøpe robotklippar, sjølv om det ikkje er klipping som røyner på ryggen.

I morgon er det fredag, så då må eg gjere ein innsats med husarbeid-tru eg.Eg hadde ikkje telefonen med på Vernet i dag, så eg får sjå etter eit fotomotiv i nærleiken.

Plommetreet på plenen har blomsta av. Men det store gamle epletreet nedst i hagen står klar med tusenvis av blomsterknoppar. Det skulle ha vore saga ned litt både her og der, men det skal få blomstre ferdig først.

onsdag, mai 17, 2023

Dagbok 2023: 17. mai

                              Gratulerer med dagen alle som les dette!

No held sola på å bryte seg fram mellom skyene, for det har sanneleg ikkje vore så fint ver hittil i dag. Første gongen eg vakna i dag , var det for tidleg å henge ut flagget, andre gongen gjekk eg ut og fekk flagget på plass. Då hadde alle naboane heist flagg for ei god stund sidan. Men eg stressar ikkje. 

Eg hadde planlagt å vere åleine heile dagen, då kunne eg kanskje bli frisk, i alle fall kunne eg hindre at andre vart smitta. Eg har hatt ein stygg hoste i snart ei veke, men elles har eg ikkje vore sjuk, berre litt slapp.

Sidan eg skulle feire dagen åleine, sette eg meg til å sjå TV, såg heile barnetoget i Oslo, der dei gjekk og vinka til kongen. Eg kunne knapt tru at der fantest så mykje folk i byen.Eg visste kva skule Ingeborg skulle gå med og eg såg barna , men det var umuleg å sjå Ingeborg mellom alle dei andre. Det varte og det rakk før alle var komne forbi. Heldigvis såg det ut som der var bra ver.

I dag hadde eg planlagt å lage god middag til meg sjølv. Eg hadde tatt svinekotelettar opp frå frysaren, og så fann eg ein pakke med Béarnaise saus. Grønnsaker har eg alltid og poteter. Det blei eit godt måltid og til dessert fekk eg friske jordbær frå Holland med fløte og sukker. Jordbæra som dei dyrkar i Holland er veldig smaklause, det er fordi dei dyrkar dei i drivhus, der dei står i vatn og ikkje i mold. Men det var no ein liten smak av sommar uansett.

Eg har ikkje strikka mykje dei siste dagane, på grunn av venstre skuldra, den har vore litt vond. Men kanskje alt kjem seg når det blir sol og fint ver.

Eg ser så fram til å få jobbe litt i hagen med å gjere der litt fint til tross for alt rotet. Det er no heilt greitt å få ein dag i morgon så ein kan kvile ut etter festen-og så er det no snart pinse også.

Håper alle mine over alt i landet har ein fin dag.



 

tirsdag, mai 16, 2023

Dagbok 2023: 16.mai


 Klokka er no17.25, temperaturen ute er stakkarslege 7 varme- men det er litt lysare i lufta no enn tidlegar i dag, det har vore ein litt trasig dag etter alt det fine veret vi har hatt. Eg bestemte med i går for at eg ikkje skulle på trening i dag. Vil ikkje smitte andre med denne sykja. Ikkje sdet at eg er så sjuk, men eg hostar mykje og det tek på. Eg syntest det var heilt greit å vere heime til eg er i betre form.Eg har ikkje gjort så mykje i dag, eg har verken strikka eller laga mat, men eg har lagt i hop klesvask, dusja og vaska og rulla håret mitt etc. Men meste tida har eg vel brukt på sudokuar. Fekk bladet "Pensjonisten" i dag, med bildet av mitt store ideal Stortingspresidenten. Han er berre så sjarmerande og flink-heilt unik, synest eg.Ja, og så er der sudoku i bladet også.


Eg brukte så å seie det meste av dagen til å vente på at eg skulle til Vik og kjøpe meir hostesaft. Eg villle vente til det verste rushet var over. Men då eg endeleg for ned var det meir trafikk enn vanleg, så eg kom vel litt for tidleg--eller litt for seint-alt ettersom ein ser det. No har eg i alle fall nok hostesaft i hus, eg håper berre at eg ikkje får bruk for alt. Det er tungt og vondt å hoste- lyden er som når ein skal starte ein bil som ikkje heilt har tenning.

Då eg kom heim såg eg at det var behov for å rydde litt på tunet, sjølv om ikkje toget kjem hit opp i år. Den raude rhododendronen står fin no, vi kjøpe ein gong tre, men ein for grasklipparen med og ein annan døde av noko anna. Marit har så mange fine rhododendron og eg har planar for å kjøpe minst ein til, men det får bli etter den 17. Eg reknar med å vere her heime åleine 17.mai det har eg vore før også og det går heilt fint. Eg har no TV-en.

No skal eg snart gå ut og rydde litt. Og så vil eg ønske alle ein fin 17.mai

Eldste guten til Rasmus har fødselsdag i dag, eg reknar med at han er i Tromsø enno. Eg har no gratulert han på FB, men kan gjere det her også.

Gratulerer med 21-årsdagen, Eivind !


mandag, mai 15, 2023

Dagbok 2023: 15. mai

Klokka er no 16.08, temperaturen ute er + 13 grader C. Det har regna litt i dag, men det ser ut som det lettar opp etter kvart. Eg høyrer at naboane er ute og klipper plen, men eg klipte min plen før helga og treng ikkje klippe den meir før 17.mai.(Eller så kan eg klippe i morgon)

I dag sjukmelde eg meg sjølv, ikkje fordi eg er sjukare enn før, men tenkte det gjorde godt med ein "fridag". Eg måtte ta meg av ein klesvask, elles  har eg ikkje gjort så mykje . Føremiddagen gjekk med til å øve på AFRIKA på gruble.net, og no trur eg at eg kan skifte over til ein annan vedensdel. For nokre år sidan kunne eg alle landa i verda. Men kunnskapen sat ikkje fast no. Når eg ikkje studerte Afrika hosta eg. Å hoste er travelt og tidkrevjande og eg likar det ikkje.Men det stilnar litt utover dagen.

Når eg hadde fått hosta nok tok eg ein dusj for å friske meg opp. Og så har eg hatt på You tube og høyrt gamle fine songar med Elvis, Tomren og andre som eg likar. Det er fordelen med å bu åleine-ein kan spele kva ein vil, så mange gonger som ein vil. Og viss eg vil ha det skikkelig fint, så kan eg sette på You tube på TV-en. Eg kan ha fine konsertar her heime-gratis.

Eg vil ikkje at Marit eller andre skal komme på besøk, for eg redd for å smitte folk no rett før !7. mai. Marit spør om eg har feber, men det veit eg ikkje, sist eg hugsar at eg hadde feber var i 1958 -då Asiasykja herja. Eg har ikkje febermålar ein gong. Eg kjøpte ein då Nils var sjuk, men den virka ikkje.

No lurer de vel på kva bildet mitt i dag skal handle om. Jau, det skal eg seie. Eg rotar mykje i mold og jord og alt muleg. Det går ut over neglene mine blant anna. Eg går nesten alltid rundt med øydelagde negler, sprukne og brotne.Eg kan ikkje bruke farga neglelakk for då måtte eg male kvar dag. Eg tenkte eg skulle kjøpe lakk utan farge og gjekk inn på butikken til Mariann og spurde etter fargelaus lakk."Då vil du vel ha ein slik som reparer neglene då? Sa ho, og kom med den som de ser å bildet. OG den var ei FUNN. Ein kan ta fleire strøk oppå kvarandre for at det skal bli enda sterkare. No har eg høyrt at folk kan tene pengar på å reklamere på nettet, så kanskje eg kan begynne med det.

Plenen min er ikkje så veldig stygg etter vinteren. Dei lysebrune flekkane er mose, og dei skal er få bukt med når eg begynner å gjødsle. Etter 17.mai må eg gå inn for hagearbeid. Eg hadde ikkje planlagt å bli så skrøpeleg no, men det går vel over, Eg skal ikkje på trening i morgon, for eg treng ikkje å fare rundt med smitte.

 

søndag, mai 14, 2023

Klokka er no 17.14, det er lettskya og + 17 grader. Det er berre lekkert, det spennande no er om vi får finever 17.mai.

Eg har ikkje hatt det så bra i dag heller, sov lite i natt og var oppe halv sju. Hosten plagar meg heile tida. Det er veldig mange år sidan eg har hatt noko liknande . Ei anna som går på samme trening som eg, er også forkjøla, så det er kanskje der vi har blitt smitta.

Eg kan no ikkje gramme meg for mykje , eg har vore frisk i mange år, og ei forkjøling må eg no tole. I dag har eg gjort lite og ingen ting, men eg var ein tur opp til Marit ei stud. Ein i familien der er også forkjøla, så det er vel noko som går-

Eg laga meg ikkje skikkeleg middag i dag, men åt grønsaksalat -og det er godt. Til i dag som til i går tok eg is til dessert. Når ein er "sjuk" må ein få noko ein har lyst på.

Eg tok ein runde på Vernet, sat ei stund på alle benkane. Der oppe møtte eg Varaordføraren og mannen hennar, dei heldt på å pynte til 17,mai-på samme måte som i fjor; eit lite flagg på annakvar"gjerdestolpe"- ca 100 flagg til saman. Det er så fint når dei blafrar i vinden-for vind er der. No går vi alle og drøymer om å få ein like fin 17.mai i år som i fjor.

Eg kjem ikkje til å gå på trening mandag, no må eg prøve å få sove igjen, sist nartt sov eg berre eit par timar igjen.

Eg ser no TV titt og ofte,men det har ikkje blitt strikka så mykje i det siste


 

lørdag, mai 13, 2023

Dagbok 2023 : 13.mai.



 
Klokka er no 18.36, temperaturen ute er+ 16 grader og det har vore sol og fint i dag, men no har det kome litt lette skyer på himmelen. Eg kom nettopp heim frå ein tur på Fonnvernet.

I går kveld var eg i tvil om eg kunne ta sovetablettar sidan eg hadde den fæle hosten, men eg tok sjansen og det gjekk bra. Eg sov godt heilt til klokka var 8 i dag-utan å hoste.Eg trudde eg var heilt bra igjen og satsa på det. Etter kvart forsto eg at hosten berre hadde tatt ein pause, så eg vurderte ein tur på Apoteket. Men først jobba eg litt i hagen ; eg klipte nokre greiner på "rygge-buska" mi, for eg trong betre sikt og Rhododenro- buska trong mein sol og lys. Det syner knapt at eg har vore der med "saksa" men eg har ein heil svartsekk full med greiner.

Så tok eg turen til ALTI og Apoteket, Laurdagane er der altfor mykje folk på kjøpesenteret for då kjem dei frå alle bygder her omkring; så eg var berre på apoteket og - så for eg opp på KIWI og handla litt der.

Marit ville at eg skulle komme opp og sitte med henne på benken, der ho sat og strikka. Eg gjekk sjølvsagt opp og sat der lenge. Då eg kom ned att angra eg litt, for tenk om eg har smitta henne med hosten min. Då skal eg i alle fall kjøpe medisin til henne. Det er ei rar sykje eg har, eg føler meg frisk som ein fisk, det er berre den hosten!

Har ikkje laga meg middag i dag, men det er vel ikkje for seint enno. Om ikkje anna så har eg ein klatt med risgraut. Eg lurte på å fare på Planrtasjen i morgon, men så kom eg i hug at det visstnok er "Bygde Pride" , så då er det vel mykje trafikk.

No ser eg fram til ein lang kveld med song og dans. Men ærleg tala så forstår eg meg ikkje så mykje på denne musikken. Den er for ein annan generasjon. Men det er no greitt å sjå på, og litt spennande kven som vinn. Eg trur Margrete har tippa rett kvart år.



No blomstrar det raude og gule tulipanar nedan for garasjen. ikkje visste eg at der var planta så mange.

fredag, mai 12, 2023

Dagbok 2023: 12.mai


 Klokka er no16.20, det er skodde i fjella, men sola held på å bryte igjennom.

Temperaturen ute er+17 grader, sjølv om det er nokså overskya.

Eg har hatt ein litt underleg dag, eg begynte å bli liksom forkjøla i går, men det var no mest at eg hosta-og det ganske kraftig. Eg la meg i 1-tida, og klokka 3 begynte eg å hoste ganske forferdelig. Eg stod opp og venta til det det verste var forbi. Då skulle eg legge meg att, men kom på at eg like godt kunne vere oppe, for det er veldig ekkelt å ligge inne i senga når ein får slike hosterier. Og slik vart det . Eg fann ei flaske med litt hostesaft og det hjelpte litt. Men når hosteria står på er det ikkje lett.

Eg hadde ein halvferdig sudoku liggande frå i går kveld og den jobba eg med mens det gjekk mot dag-utan at eg kom i mål. Det vart ein lang dag når ein starta klokka tre. Eg fekk no tatt fredagsvasken om ikkje anna. Eg hadde ikkje tenkt å gjere så mykje i dag, og det var no bra. Eg har ikkje gått på Vernet ein gong. Vil vere heime når hostebyene kjem. Til "middag " åt eg risgraut frå i går, og etter middagen gjekk eg ut og slo dei to plenstykka opp  mot vegen. Oppom garasjen er plenen så ruglete  at han skulle ha vore pløgt opp på nytt og jamna, men det kan eg ikkje gjere noko med sjølv. Eg sat med Marit på benken hennar ei stund, vi har plage med ryggen begge to. Men så fekk eg ei hostebye så eg gjekk ned att til den var over. Eg måtte klippe dei to små bitane, så fekk eg spylt klipparen. Eg har bestemt meg for å kjøpe ein robot, når eg har fått rydda plenen. Då slepp eg å køyre gras bort på VØR-og så slepp eg å gjødsle så mykje. Nedanfor garasjen er det fint med raude og gule tulipanar, men på "garasje-muren" er der ingen ting no. Dei små blå har visna, og rosetrea er ikkje komne i gang enno. Det kjem vel ei tid.

I dag føler eg på at det er laurdag, men no håper eg at eg er friskare i morgon, så eg kan få gjort noko kjekt. No skal eg gå ut på altanen og ta nokre bilde, for no blir det etter kvart fint ute.



torsdag, mai 11, 2023

Dagbok 2023: 11.mai


 Klokka er no 16.16, temperaturen ute er + 14 grader C, og akkurat no er det opplett. Det har regna litt før i dag.Bildet over viser Vikelva, som blir større for kvar dag, det er mykje snø som skal smelte i fjella.

I dag stod eg opp og gjorde meg klar til trening. Men eg har hatt eit problem nokre dagar (og netter) no, og det har vore halsen. Det virka som der var noko nede i svelget som ikkje skulle vere der, så eg har gått og småhosta i fleire dagar utan at det gav seg. Det einaste som hjelpte var å drikke noko kaldt. I dag etter at eg hadde gjort meg klar til å fare, vart det skikkeleg gale, eg hosta og hosta heilt til eg kasta opp. Men då vart det betre-om ikkje heilt bra. Eg bestemte meg for å bli heime, så Marit for åleine i dag. Men eg var ikkje sjuk, så eg tok ein tur på Vernet mens ho var vekke. Eg var heilt bra og hostefri ei stund, men heilt bra er eg ikkje enno. Eg trur eg fekk det på mandag, for då sat eg og åt nokre nøtter. Min teori går ut på at noko har blitt liggande i svelget-men eg veit ikkje heilt. Viss det går over no, så blir det fort gløymt.

Eg har ikkje gjort særleg mykje i dag, verken ute eller inne. Det har no regna litt av og til, men eg har ikkje utover gjødselen før Gudmund gjer det. Plenane er ikkje så stygge viss eg ser bort frå plenen rett nedanfor huset -der er det berre mose.Det einaste eg har gjort ute i dag er å flytte nokre bøtter med singel - frå kjellarinngangen og opp på tunet. Det gjer eg kvart år, for rimeleg nok flyttar singelen seg nedover når vi går der. Til middag i dag kokte eg risgraut, det gjer eg nesten ein gong i veka.

No på ettermiddagen tok eg ein tur ned på KIWI og handla diverse som eg trong. Eg synest at eg kjøper meir mat enn det eg et-merkeleg nok.

Eg snakka med Marit som hadde vore på trening  i dag. Der var så stilt i dag, sa ho. Skal tru kvifor?

No kan det kanskje bli rabarbrakake snart.?


No blomstrar tulipanane nedanfor garasjen, dei raude først, så kjem dei gule snart.


onsdag, mai 10, 2023

Dagbok 2023: 12.mai


 Klokka er no 17.00, temperaturen ute er +15 grader og det er akkurat passeleg varmt når ein skal jobbe litt ute, for eksempel-

Sist natt sov eg lite og dårleg, eg veit ikkje kva som gjorde det,  kanskje virkar ikkje sovetablettane så godt lenger, men det er eit lite problem førebels.

Eg har mange jobbar å velje mellom her heime.I dag valde eg å begynne å ta bort eføy på murveggen til tilbygget. Eføyen trivast så godt at det blir reint for mykje. Eg tok berre eit lite stykke i dag, men eg heldt på i fleire timar,

Desse brune stammane skal vekk, så snart eg får dei lause frå veggen, eg har no saga dei av så dei ikkje har kontakt med rota lenger, så får vi sjå.

Same kor lite ein gjer i hagen så blir det mykje rusk som ein må få vekk. Før i gamle dagar tende vi opp eit bål og brende all slags rusk i hagen. No er det ikkje så enkelt lenger, men vi har VØR. Eg talde på knappane om eg skulle køyre bort i dag, eller vente til i morgon eventuelt. Det blei til at eg fylte opp bilen med 6 store,svarte sekkar og køyrde bort med det samme. Det blir vel slike turar nesten kvar veke heile sommaren. Og det var ikkje berre eg som leverte, der hadde vore mange før. Vi er no veldig glade her i nabolaget at vi har VØR, slik at vi kan bli kvitt rusk og rask på ein skikkeleg måte.

Då eg kom heim var klokka over 15, så eg tok like godt trimturen min med det samme, så no kan eg late meg resten av dagen/kvelden. Eg trefte ingen på Vernet i dag, men sat litt på nokre av benkane.
Naboen min var på EIK-sentret i dag, og han kjøpte gjødsel til meg også. Eg har ikkje klipt plenane oppe mot vegen, men det er no ikkje noko som hastar. Det blir ikkje gjort meir i dag, men kanskje eg lagar meg litt middagsmat. Eg har no nok å styre med både inne og ute, så eg slepp å kjede meg.






tirsdag, mai 09, 2023


                                                     Litt grønare for kvar dag

Klokka er no16.20, temperaturen ute er nydelege +17 grader, det er overskya, og ein og annan regndråpe dett ned.

I dag var det trening og eg køyrde. Etterpå hadde både Marit og eg ærend på Apoteket, så då vart det ein tur på ALTI, men så for vi heim att. Eg skulle ha handla litt, men fann ikkje att hugselappen, så det vart beine vegen heim.

Men eg hadde ein plan. Eg trong meir bensin til plenklipparen, så eg måtte på bensinstasjonen - like godt først som sist. Eg tok med to kanner  som eg fylte opp på Shell, og så fekk bilen sitt, så slepp eg å tenkje på fylling før det har gått ei stund.

På heimvegen handla eg litt på KIWI, men då eg fann hugselappen heime, hadde eg ikkje kjøpt det som stod der- ikkje alt i alle fall. Eg laga meg eit måltid av diverse som eg fann i kjøleskapet m.m. Det vart ikkkje direkte middag, men det får vere greit nok i dag. Eg er ikkje underernert. Eg såg gjennom avisa,sudokuen løyste eg før eg la meg i går.

Og så gjekk eg på Vernet. Det var nydeleg å vere ute i dag, og eg sat ei stund på kvar benk. Då eg kom til siste benken (Der eg to benker som står i lag der) kom ein mann som eg kjenner og sette seg i lag med meg, og vi prata om Ørsta og utviklinga som har vore i vår tid. Han er innfødt ørsting og eg kjenner kona hans.

No er eg heime att og skal kanskje få gjort noko ute i dag også. Plenklippinga får vente, men eg så mange løvetannrøter i plenen ovafor garasjen, så der har eg ein jobb.

Løvetann er ugras i plenen, men oppe på Vernet er det fint med dei kraftige gule blomstrane.



mandag, mai 08, 2023

Dagbok 2023: 8.mai Frigjeringsdagen

Klokka er no16.22, temperaturen er + 15 grader, det er skya, men stort sett opplett.

I dag hadde eg bestemt meg for å støvsuge teppegolva, så det vart gjort. Eg tenkte også at eg kunne begynne å slå plen, så eg sette startbatteriet på ladding. Men akkurat då eg skulle ha gått ut, begynte det å regne,ikkje så mykje, men ein kan aldri vite.....Eg tok og ringde til Bodil for å prate, og eg trur vi snakka i over ein time. Vi hadde mykje på hjartet begge to-. Då leid det så langt at det var tid for middag, og det var fort gjort å lage til .

Då eg hadde ete såg veret bra ut,og eg trur ikkje det var så mange dropar som hadde kome. Eg tenkte at eg i alle fall kunne prøve å starte klipparen, og så kunne eg eventuelt klippe så lenge eg hadde bensin.Det vart til at eg klipte rundt huset og heile skråninga. Det som står att er dei to små plenane opp mot gata. Det vart ikkje så fintklipt i dag , men eg fekk no vekk engkarsen, og då vart det finare. Elles er her ein del kantar etc. som eg må bruke kantklipparen på. Når finn att den rette, den som eg kjøpte i fjor. I tibygget er det rimeleg ryddig, men i garasjen er det full kaos. 

Før helga tok eg opp minst to store bøtter med løvetannrøter, men i dag var det fullt opp av blomstrande løvetann likevel. I morgon skal vi på trening, og så må eg kjøpe bensin på kannene mine- kanskje, for eg må no klippe plenane opp mot gata uansett. Eg trur eg sløyfer turen opp på Vernet i dag, for eg har fått bra med mosjon. Viss eg har meir energi, kan eg no ta opp fleire løvetann-røter.
 


søndag, mai 07, 2023

Dagbok 2023: 7.mai


 Klokka er no 17.17, temperaturen er +15 grader, sola skin og himmelen er blå. Men i morgon skal det vere regn, seier PC-en min. Eg prøver å nyte sola og fineveret så mykje eg kan. No kom eg rett inn frå altanen der eg har lagt på solsenga sidan middag-ein kan ikkje vere altfor fornuftig slike dagar, det er ikkje SÅ mange av dei-

På føremiddagen sat eg os strikka og såg Tv til gudstenesta var over, då gjekk eg på Vernet. Der var ikkje mykje folk i dag, så eg fekk sitte litt og nyte sola på mange av benkane. Der var ingen eg kjende i dag.

 Då eg kom heim att var klokka så mykje at eg begynte å tenke på middagen. I dag vart det steikt ørret, som vanleg, med poteter, grønsaker etc. Det vanka også ein porsjon med is til dessert. Etterpå angra eg på at eg hadde ete for mykje. Og eg var for mett til å gjere noko anna enn å sole meg. I fjor trur eg knapt at eg brukte solsenga,  men til no i år har eg alt brukt den fleire gonger.

Eg hadde noko eg skulle gjere i dag, men veit ikkje kva det blir til. I morgon ville eg klippe plen, men viss det blir regn får eg ikkje gjort det.

Eg tenkte at plommetreet ville blomstre i dag, men det er ikkje heilt klart, Bjørkene og lerketrea oppe ved Vernet vert grønare for kvar dag. Det hastar litt no, skal det bli skikkeleg fint til 17.mai.

Eg ser der er ymse ting eg skulle ha gjort i hagen først best før det blir for seint, så eg treng eigentleg eit par fineversdagar.Eg har tatt opp ei mengde med løvetannrøter siste par dagane, men no ser eg gule flekkar i plenen over alt





lørdag, mai 06, 2023

Dagbok 2023: 6.mai


Klokka er no 18.18. Temperaturen ute er +15  grader.  Det har vore nydeleg ver i dag også, men ut på ettermiddagen kom det nokre skyer, som er nesten vekke no. Oppe i hovudet mitt har det vore sundag i dag, endå eg veit godt at det er laurdag.

Etter frokost etc. i dag, vaska eg håret og rulla det opp for å få litt skikk på det. Eg hadde bestemt meg for å gå turen på Vernet før eg starta med hagearbeid. Men eg måtte sjå nyheitene først og der tabba eg meg ut. For der var det kroning av ny konge i England, og det måtte eg no berre få med meg. Eg som har sett all verdas seriar om det engelske kongehuset måtte no berre ha med meg dette. 

Så eg tok fram strikketøyet og strikka i  veg, mens Charles vart både krona og salva. Eg kunne ikkje la vere å tenkje på at då eg var på hans alder hadde eg vore pensjonist i 11 år. Han virka litt puslete, men vil han vere konge, så skal ikkje eg nekte han det. Tre timar sat eg og følgde med på kroninga og strikka ferdig ein lest og festa trådar på to. Og så gjekk eg på Vernet. Då eg kom ned att var Marit ute med hunden så då måtte eg prate litt med dei. 

Eg skulle lage middag til meg sjølv, men utsette det til kvelden og tok eit par brødskiver så lenge. Då vart eg plutseleg så trøtt at eg måtte legge meg ut på solsenga og kvile litt, men vart ikkje liggande så lenge sidan det skya til litt. 

Det har ikkje blitt hagearbeid på meg i dag, og ikkje veit eg kva eg skulle ha gjort heller. Gartnaren heime sa alltid at ein ikkje skulle plante noko før 17.mai. Men eg kunne no kanskje ha klipt plenen? 

Eg har vurdert å kjøpe robotklippar så eg gjekk inn på nettet for å sjekke prisar etc. Og når eg sat her attmed maskina, kunne eg like godt skrive på bloggen. Slik kan ein surre vekk ein heil dag. Men jobbane mine forsvinner ikkje.

I dag er det to i slekta som fyller år. Det er Stein Inge på Eid som fyller 54 år og Lise i Stryn som er 71. Viss eg har rekna rett.

No får eg vel prøve å finne meg litt middagsmat til kvelds. Men så blir det visst nyheiter igjen-og då blir det vel reprise på kongekroninga. TV-en styrer visst mykje av tida mi, men veldig kjekk å ha når ein bur åleine.



fredag, mai 05, 2023

Dagbok 2023: 5.mai


 Klokka er no18.50, temperaturen ute er+ 13 grader C, og det har neppe vore ei sky på himmelen i dag.

Eg hadde rimeleg plan for dagen og starta med fredagsvask, Etterpå gjekk eg ein tur på Vernet, der eg ikkje møtte nokon som eg kjende i dag. Då var klokka blitt så mykje at det passa å ete middag. Eg hadde noko risgraut ståande som eg tok, og med litt spekepølse ved sidan av , var det heilt greitt. 

Eg hadde i grunnen store planar om hagearbeid i dag, men først ville eg slappe av og tok Møre-Nytt med meg ut på solsenga. Der var det varmt og godt i dag, så eg vart liggande å sløve ei stund, Møre-Nytt måtte eg lese etterpå. Sudokuen tok eg i går kveld.

Dagen var nesten over før eg kom meg ut i hagen. Eg fekk ikkje gjort så mykje, men tok i alle fall opp ei heil bøtte med løvetannrøter i dag også. Og enno er eg ikkje begynt ovafor huset, De er mykje å gjere i hagen i år, og eg veit ikkje kor mykje eg greier, men trur det går bra.

No skal eg kose meg med TV og strikketøy, har ikkje hatt på TV-en i dag.

Som sagt; fredagane kjem ofte, og no vil eg ønske alle ei fin helg. Held veret seg så kan det bli kjempefint.



Dagbok 2024: torsdag18.april

   Det er nokre år sidan dette bildet vart tatt på Hareid, med alle barnebarna i samme sofa Klokka er no16.56, temperaturen ute er + 10 grad...