torsdag, februar 29, 2024

Dagbok 2024:19.februar

 



Dette bildet tok eg av Ingeborg i februar i fjor, det var så fint den dagen. Då eg kom heim frå turen, var det at eg snubla og datt på altanen. Deet var vår i februar ifjor, men så fekk vi fleire vintrar etterpå.I dag er det 29.februar, ein dato som vi har berre 4.kvart år.
 

Klokka er no 18.13, temperaturen ute er +8 grader, det har vore mest overskya i dag, men berre litt regn. No blæs det.

Det har vore ein litt spesiell dag for meg sidan eg skulle til Volda og måle beintettleiken på sjukehuset der. Etter å ha snakka med Marit om det, bestemte eg meg for å ta ein tidlegare buss enn det eg først hadde tenkt, så slapp eg å stresse. Om eg måtte vente litt gjorde ingen ting.

Før eg reiste gjorde eg ferdig litt av spansk-leksa til onsdag, så gjekk den stunda. Eg har ikkje strikka i dag, for tommelen på venstre handa er litt vond.

Eg køyrde ned til haldeplassen og sette frå meg bilen der, då bussen kom gjekk eg om bord, men eg fekk ikkje betale, for eg hadde ikkje  app    og sjåføren hadde ikkje annan betalingsmåte. Sånn er det når ein ikkje følgjer med i tida, men eg fekk no vere med og han køyrde heilt opp til sjukehuset, så eg slapp å byte buss. 

Der gjekk eg i luka,leverte eit ark som eg hadde fylt ut, betalte og gjekk til venterommet-det som eg har vore på så mange gonger men enno ikkje greier å finne att. Eg har aldri vore skikkeleg sjuk, men eg har vore på røntgen veldig mange gonger så eg skulle no greie å finne venterommet, det var no sist i desember eg var der også. Men eg fann no fram til slutt og sat der ei stund og såg på dei andre pasientane, dei var stort sett av min årgang.

Eg kom inn til ho som skulle fotografere alle beina i kroppen min, det var ei hyggeleg dame, og det var ikkje så lenge før eg var ferdig. Eg hadde time klokka 13, og 13.15 var eg komen ut att.Eg spurde, og fekk vite, at det er vanleg å ta slike undersøkelsar når folk bryt bein.

Eg gjekk rett ut etterpå og ville gå ned til haldeplassen, den turen har eg gått mange gonger då Nils var sjuk, i seinare tid kanskje ein gong i året.

Og der var eg heldig, der kom ein buss køyrande på same tid som eg, og på den bussen stod det:Ørsta. så eg slapp å vente eit sekund. Sjåføren kunne bruke kortet mitt så eg fekk ikkje gratis skyss heim.  Eg fann att bilen min der eg hadde sett han og så var eg snart heime. Dette vart ei heil Amerikareise  for meg som sjeldan reiser med buss og ikkje åleine.

Då eg kom heim var eg svolten og trøtt. Eg sovna i godstolen framfor TV. No er eg letta for at eg er ferdig med den turen, og det kan ikkje bli så alvorleg om dei finn ut at eg ikkje har sterke nok bein i kroppen.Men eg får ikkje strikke i kveld og det er eit sakn.

onsdag, februar 28, 2024

Dagbok 2024: 28.februar

Rasmus-familien si hytte i Telemark. Eg har vore der ein gong, men då var det sommar. Det har vore foreldra til Wenche si hytte, men no har visst dei yngre teke over. Det er far til Wenche som har bygt den.Eg har ikkje orden på bilda mine , så eg får pynte opp med andre sine.

Klokka er no17.55, temperaturen ute er +6 grader og det er overskya. Trur ikkje sola har vore framme i dag. Eg vakna grytidleg fordi eg tenkte på at eg måtte ringe eit telefonnummer som stod på innkallinga mi, det galdt "transport" til sjukehuset. Eg visste ikkje at eg kom rett til "pasientreiser"-og der var den inga hjelp å få. Eg måtte ha legeattest for å få taxi til og frå sjukehuset.

Når eg ikkje køyrer sjølv er det fordi eg ikkje likar å køyre til Volda og fordi eg ikkje kan med parkeringssystemet. Men sidan eg skulle på spaskkurs på Bakk-Ola, kunne eg stikke innom legesenteret med det samme -og det gjorde eg. Nei, taxi kunne eg ikkje få når eg var i stand til å til bussen.Det var ikkje spørsmål om kva eg meinte, og legen min var der ikkje i dag. Så no må eg gå til bussen i morgon, dvs. eg tek bilen ned til Vik. Eg ringde 177 for å få rutetider.

Eg har ikkje bedt om denne undersøkinga, det er noko som legane har kome på, og eg må berre ha klede utan metall som glidelås, knappar etc. Berre det er god nok grunn for å køyre i bil åleine. Men eg reknar med at når eg skal heim att må eg få bil. Ein annan gong då eg tok bussen til sjukehuset måtte eg gå ned i sentrum etterpå for å komme på bussen heim. Så ein veit aldri. Eg greier meg vel denne gongen også.

Då eg kom heim att frå spansken, laga eg meg eit godt måltid av det som var att frå i går, og så sette eg meg inn i godstolen og såg TV og sovna ei lita stund. Eg skulle ha vore ute og gått  tur, men no er det snart mørkt, så eg får heller gjere litt husarbeid. DEt er nok å ta av, eg vaska mykje lklede i går, og nok o skal strykast t d.


 

tirsdag, februar 27, 2024

Dagbok 2024: 27.februar.

Klokka er no 16.00. temperaturen ute er +5 grader C, det er ikkje så kaldt, men når det blæs kjennest det ikkje heilt bra. Vi var glade for å komme i hus, Marit og eg, etter at vi hadde vore på trening. Ja, på treninga var det ikkje kaldt, men vi var både på ALTI og KIWI og handla etterpå og då fekk vi kjenne litt på vinden. Det er så sjeldan det blæs her i Ørsta at eg brukar å fryde meg over vind-men ikkje når den er SÅ kald.

Eg måtte på apoteket i dag, for det var heilt tomt for nødvendige tablettar og Marit skulle ha ei lyspære på Clas. For oss gammeldagse er sjølv det å kjøpe lyspærer eit lite problem, det veit eg av erfaring. Før var det greitt nok å vite watt-styrken!

Vi gir oss god tid når vi er ute og fer, så klokka var 13 før eg kom i hus. I dag laga eg meg god middag, og sette meg inn i godstolen, der eg sovna, og fraus då eg vakna. Så eg fyrte opp i omnen, henta opp tørre klede og sette på ny klesvask. Så langt er eg komen til denne tid, no skal eg lage meg litt god kaffi, og etterpå blir det å øve ,lese på spanskleksa. Men først av alt skal eg ta inn avisa, eg greidde heldigvis å løyse sudokuen i går kveld. Eg går innpå avisa på PC-en og så lagar eg meg ruteark på dataen også. Sudokuen i tysdagsavisa er som regel lett, så eg blir fort ferdig med den. Spansken er vanskelegare men eg prøver å henge med så godt eg klarar. Ja, i morgon er det spansk igjen, men det blir vel snart påskeferie..............................

Dette med bilde på PC en er eit stadig problem, så eg trur Solveig må prøve ein gong til å få orden på det.
 

mandag, februar 26, 2024

Dagbok 2024: 26.februar

 Klokka er no 17.05, temperaturen ute er + 2 grader , det har vore nokså overskya i dag, no er det nesten sol, men den går snart ned. Då eg såg ut vinduet i dag tidleg  var alt kvitt, men snøen smelta fort.

I dag hadde eg planen klar, eg skulle vaske fleire vegger på stova. Eg vaskar den  ulakka/ubeisa/umalte panelen med spesialsåpe som skal halde veggane lyse, så det går med mykje både vatn og såpe. Eg har ofte vaska med mopp, men det gjekk ikkje i dag. Eg måtte bruke klutar og hender, men jammen fekk eg vaska alt før klokka var 13.Dvs. vindu og vinduskarmar står att, eg orka ikkje meir i dag. Som alle veit er det ikkje berre vasking, men så skal alle bilde etc. ned og opp att, møblar skal flyttast fram og tilbake etc.etc.Det var godt å ha ein liten lett støvsugar i dag. 

Då eg hadde kvilt meg litt og ete noko som eg kalla middag, spurde eg Marit om ho ville komme ned og drikke kaffi, og det ville ho. Så fekk vi ei koseleg pratestund før ho skulle heim og ete middag. I morgon er det trening igjen, men på torsdag vil eg skofte treninga sidan eg skal på sjukehuset og ta prøver. Eg har ikkje bestemt reisemåten enno, men der går vel bussar. Eg vil ikkje køyre sjølv ,eg likar ikkje å køyre i Volda, og så er der eit betalingsystem på parkeringa ved sjukehuset som eg ikkje kan noko med.

Eg var rimeleg fornøgd med dagen før eg sette meg til med datamaskina og skulle legge inn bilde. No er det berre surr -eg fekk lagt bilda inn, men fekk dei ikkje ut att,så får det bli bildelaust i dag.No er det snart tid for strikketøy og TV. Det vart ikkje til at eg gjekk tur i dag, for eg var litt sliten av all vaskinga

søndag, februar 25, 2024

Dagbok 2024: 25.februar.

 Klokka er no 16.45, temperaturen på trappa er +6 grader og tunet er nesten bert, men på PC-e min står det Regn/snø i morgen. Ja, vinteren er ikkje over enno. Eg hugsar i fjor på desse tider, var det full vår, nesten. Men vinteren kom tilbake.I dag har eg vore tur på Vernet for første gong i år, men eg gjekk berre på den fremste vegen, for på andre sida var det snø og is. Bilda får tale for seg.







I dag venta eg Ingeborg og Daniel på føremiddagen. Eg hadde påbegynte kaker , men kom på at Ingeborg likte prinsessekake før i tida, så eg sette i gang å lage, utan tanke på at gjærbakst alltid tek tid, men det blei ferdig før dei kom klokka 13. Det var kjekt å sjå dei att, det var lenge sidan sist, og Daniel fekk yndlingskaka si, gulrotkake. Etter at dei hadde fare, tok eg årets første tur på Vernet, det var kjekt å kome opp til utsiktsplassen igjen, men eg trefte ikkje mange i dag, berre Helge snakka eg med, og sidan eg tok gatene heimover trefte eg også ei gammal veninne som bur her oppe.
No har eg ete siste resten av fredagsmiddagen, men eg var ikkje svolten i det heile tatt. Eg strikka litt og såg TV tidleg på dag, men no blir det vel ei stund framfor skjermen.
No er det tull med telefonen min igjen, der kjem meldingar som eg ikkje får opne. Eg vil oppmode dei som sender meldingar til meg å bruke Messenger i staden for telefon. Eg har Messenger både på PC og telefon.

lørdag, februar 24, 2024

Dagbok 2024: 24.februar

Klokka er no17.11, temperaturen ute er + 5 grader C, og det pøsregnar. Utsikten frå altanen er ikkje så innbydande, men det som er bra er at snøen smeltar. Det går seint med dei store snødungane , men plenen kjem no fram att, eg hadde nesten gløymt kor stor den er. Solveig lærte meg litt om bildebehandling i går, og det kan eg i dag, det er berre det at der er bevegelse  i bilda, så eg får ikkje printe dei ut etter at eg har "behandla" dei.

Eg vakna relativt tidleg i dag også, og stod opp. I dag tok eg "fredagsvasken" noko som var fort gjort, elles har eg sete og strikka og sett om att krim frå i går kveld for då sovna eg undervegs. Eg åt middag, det var restar frå i går; og så streva eg aldri så lenge med å få eld i omnen med ved frå hagen. Det gjekk berre ikkje , så eg måtte ut i garasjen etter skikkeleg ved, då brann det godt-hageveden også. 

Eg visste ikkje  kva meir eg skulle styre med, men så kom eg på at det var lurt å begynne på spanskleksa i god tid. Så no har eg jobba med den. Det er berre det at eg gløymer så fort igjen. Eg får skulde på alderen. I morgon ventar eg besøk av Ingeborg og Daniel, dei har vel med seg hunden også. Det er lenge sidan eg har sett dei, for dei var her ikkje i jula, då var dei i Gøteborg. Det blir sikkert kjekt å sjå dei att.


 

fredag, februar 23, 2024

Dagbok 2024: 23.februar




Klokka er no 16.37, temperaturen ute er + 3 grader C og det regnar. Bilda tok eg frå altanen for litt sidan. De ser at snøen er borte mange stader men opp mot vegen/gata ligg det enno store dungar med gammal snø, og den kan bli liggande lenge. Vi ventar på vår no,men det tek si tid.

I dag har eg hatt ein annleis dag.Eg vakna tidleg , som vanleg men prøvde å ligge i ro før eg stod opp i 7-tida. I dag var det tid for fredagsvask, men den er utsett til laurdag denne veka.Eg var på butikken og handla i går utan å ha skrive liste, så det var ikkje heilt vellykka, så i dag måtte eg på butikk igjen så får eg håpe at eg fekk med det meste.

Eg hadde avtale med Einar om at han skulle komme i12.30 tida , så skulle vi kjøpe støvsuger til meg. Ja, eg har no ein kjempegod støvsuger frå før, men eg ville ha ein oppladbar til å bruke på småjobbar. Det er tungt for ryggen min å støvsuge skikkeleg så det kan eg ikkje gjere så ofte. Det var god hjelp å ha Einar med seg,og han var litt interessert også, for han hadde lyst på noko liknane sjølv.

Eg hadde laga ferdig middagen før vi for så det var berre å sette seg til bords då vi kom att. Menyen var som alltid, kjøttkaker i brun saus. Så kom Solveig og Øystein med Amund som dei hadde henta i Volda, og då hadde vi kaker og kaffi.Han likte godt gulrotkake, han også.

Dette er Audun.
Solveig lærte meg å bruke det nye bildebehandlingsprogrammet på maskina mi, men eg er visst ikkje heilt oppgradert enno. 

I går fylte Audun 34 år. Han er i Oslo og jobbar der. Men eg håper han kjem heim til påske.
 

                       Oldemor fekk besøk i dag, håper å få sjå fleire av undommane i helga.

torsdag, februar 22, 2024

Dagbok 2024: 22.februar

Klokka er no 18.06, det har vore opplett så langt i dag, men ikkje så mykje sol. No er temperaturen ute +  8 grader og det blæs litt.

Dagen min begynte sjølvsagt med at eg stod opp. Inga vekkerklokke i dag så eg kunne sove så lenge eg ville, men som sagt eg stod opp, kledde på meg og laga frokost utan stress. Då eg var ferdig med frokosten såg eg på klokka, den var 8. Så eg hadde ikkje sove så lenge som eg trudde. Eg kan kanskje legge til at eg sjeldan søv før klokka er 1-2 om kvelden.

Eg hadde ikkje plan for dagen ferdig, men tenkte eg skulle prøve å gå på Vernet i dag, for det såg ut som der var bert no. Men for sikkerheits skuld tok eg på meg piggsk,Ja det var nok bert i skråningane, men då eg skulle gå opp vegen til fonnvernet, var der hard og blank is, så eg gjekk heller langs skråninga, men der var heller ikkje så trygt, isen er knallhard og det vart verre etter kvart, så eg gjekk ned på bilvegen og tok resten av turen derifrå. Sjå bildet.

Eg fekk melding frå Marit , ho skulle handle på KIWI klokka 12 og spurde om eg ville vere med. Det ville eg og er tok med to store posar med tomme flasker og boksar for å pante dei.

Etter at vi kom heim vart vi sittande i bilen til Marit og prate. Der er slik vi gjer, særleg når det er Marit som køyrer, det er ikkje så kjekt å sitte nede på tunet mitt.

Eg kokte graut til middag i dag, det gjer eg kvar gong eg har melk som må brukast opp. Eg kjøper melk for å ha i hus, men sjølv smakar eg ikkje ein dråpe- eg greier ikkje å drikke vanleg søt melk, har aldri greidd det, sidan eg var 3 år.(Sa mamma) Men eg kan bruke melk i maten. 

Etterpå har eg site og strikka og sett TV-så det har vore ein lat dag, av ein eller annan grunn har eg vore trøtt i dag, men heldigvis er tinnitusen svakare enn i går, men litt er der. Eg føler på at det er fredag i dag, men det er det ikkje. I morgon ville Einar ta seg ein tur innover og då har eg ein plan. Kanskje-
 

onsdag, februar 21, 2024

Dagbok 2024: 21.februar


 Klokka er no 18.00, temperaturen ute  er+ 5 grader C, det er skya, men opplett.

Eg kom nettopp att frå pensjonistmøtet og det var ikkje mørkt å køyre heim i dag.

Det har vore ein "travel" dag, men veldig kjekt. Først var eg på spansk-kurs 11-13, og så måtte eg bort til ALTI og ta ut cash, Hadde ei lita stund heime før eg skulle på kino, vi skulle sjå filmen SAU før pensjonistmøtet.

Marit var ikkje med i dag så for ein gongs skuld gjekk eg på kino åleine. Mange av dei som skulle på pensjonistmøtet såg filmen først.

Filmen var noko av det beste eg har sett og den handla om SAU. Og den handla rett og slett om sau på ein gard i Nord-Norge. Eg tenkte på Margrete då eg såg filmen, for jammen kan sauer også vere artige å styre med, nesten som hundar. Alle sauene hadde namn, ei heitte Solveig til dømes, og så var der ein liten svart ein som heitt Ståle. Det er nesten litt pinleg å sitte å le når ein er åleine på kino. Viss dokke får høve til det, å sjå denne filmen!!

Så var det pensjonistmøte i storsalen og der fekk vi karbonadesmørbrød, noko som kom vel med når ein ikkje hadde ete middag. Eg sat i lag med Grete, systra til Solveig nabo, Inger, som eg er i lag med på spansken, to andre som eg kjenner, og to som eg ikkje kjende. Men eg synest no alltid det er kjekt å bli kjent med nye folk.



Eg har hatt ein fin dag, men noko skal det alltid vere, og no har eg fått att tinnitusen for full musikk. Men det er ikkje farleg-berre irriterande.

PÅ tunet mitt er der enno så mykje is at eg måtte ta på meg piggsko for å gå opp til gata.

No har eg ferie resten av veka, i dag har eg vore veldig sosial og det var no kjekt sjølv om eg trivst godt i mitt eige selskap også.No må eg gå på jakt i kjøleskapet for å sjå om eg finn noko godt, og så skal eg sjå TV og strikke og ikkje tenke på spanskleksa,




tirsdag, februar 20, 2024

Dagbok 2024: 20.februar

                                 Vegen frå meg til Marit er framleis isa og glatt

Klokka er no 18.23, temperaturen ute er +6 grader og det regnar. Skikkeleg kjedelig ver altså. Og for ein gongs skuld har eg ikkje gått trim-tur.

Føremiddagen gjekk med til å legge i hop klede, stryke og sette på ny vask etc. Eg hadde elles nokre småjobbar som eg fekk unna. Ja, og så las eg litt på leksa til i morgon. Ingen store planar i dag. Eg strikka litt etc. før eg gjekk opp til Marit i 13-tida. Ho var heime åleine i dag, så vi hadde ei stund med kaffi og prat.

Då eg kom heim att,  hengde eg opp ein klesvask før eg laga middag. I dag vart det tomatsuppe med hardkokte egg. Eitkvart må ein no finne på om ein er åleine. No har eg sete og sett TV og strikka ei lita stund, eg må lese meir på spanskleksa, men det er best å gjere det i morgon tidleg, for eg hugsar ikkje så lenge.

I morgon skal eg altså på spanskkurs kl.11-13. SÅ er det kino-kl.15 (trur eg) og pensjonistmøte etterpå. Eg har ikkje bestemt meg om eg skal sjå filmen (SAU), men Marit skal i alle fall. Eg er ikkje så glad i å gå på kino; eg synest ofte at der er kaldt og så er det så høg lyd-og det er ikkje noko for tinnitusen min. Eg har vore ein del plaga av tinnitus denne hausten og vinteren, etter å ha vore bra i årevis. I går kveld var det skikkeleg plagsomt, men ikkje gale i dag.

Då eg gjekk opp til Marit i dag måtte eg ha på meg piggsko og så hadde eg stav. Heile tunet mitt er enno dekt av is, og eg har ikkje vore ute med bilen på mange dagar.


 

mandag, februar 19, 2024

Dagbok 2024: 19.februar



Klokka er no17.06, temperaturen ute er+4 grader C, det er overskya, men opplett.Eg har nettopp vore på ein liten luftetur. Eg gjekk samme ruta som i går, men i dag hadde eg stav, for den fann eg att i dag føremiddag ute på altanen. Den ha sikkert vore der heile tida. Eg trefte ingen på ruta mi i dag, men det var no godt å komme seg ut litt.

Sidan eg har vinterferie denne veka, ville eg prøve å få gjort noko her heime. Så eg begynte å vaske veggane på stova.Veggane der er verken mala eller lakka, så eg vaskar med ei spesiell såpe som skal halde treverket lyst. Eg vaskar sjeldan alle veggane på ein dag, for det er så mykje som skal ned og opp att. Mest bilde. I dag tok eg to veggar, så er det tre igjen. Dei tek eg meg av når det passar meg.



Eg brydde meg ikkje om å lage middag i dag så det vart brødskiver etc. Det er utruleg mange bilde som skal ned og opp att når eg har vaska. Men det er slik eg vil ha det. Etter at eg var ferdig med å vaske , sette eg på vaskemaskina, og tok meg litt mat. 

Så var det spanskleksa. Eg har ikkje heilt fri denne veka, spansken tek ikkje vinterferie, så eg vart sittande ei stund med den. Det går ikkje så lett inn som det gjorde då ein var ung.

Eg har ikkje hatt på verken TV eller radio i dag så eg har inga aning om kva som skjer i verda i dag. Kanskje like godt.




 

søndag, februar 18, 2024


Klokka er no 18.02, temperaturen ute er +4 grader- Det har vore opplett i dag, men ikkje noko særleg med sol. Eg stod ikkje tidleg opp og då eg var ferdig med frokosten, sette eg meg til å strikke og sjå TV.

Etter ei stund bestemte eg meg for å vaske og rydde i bokhylla på stova. Det er ein heil liten jobb, men godt å få gjort den ferdig. Så åt eg resten av ballen frå i går før eg gjorde meg klar til å gå tur.  Eg gjekk ein litt annan veg enn vanleg i dag,og då eg var komen opp på Storebakken stod der 4 personar og snakka med kvarandre og eg kjende alle 4 frå før. Tre av oss er faktisk nordfjordingar. Det var folk på min alder-og eldre.Den eldste hadde med rullatoren sin, og ho og eg gjekk i lag heimover(ho er 92 år). Elles har det ikkje hendt noko her i dag.

Komande veke er det vinterferie, men spansken tek ikkje ferie, og ikkje pensjonistlaget heller. Eg tenkte eg skulle prøve å få gjort noko i huset denne veka-har diverse planar om kva eg kan greie.

Som de ser på bilda er det enno mykje snø på tunet mitt, så eg går i piggsko.
 

lørdag, februar 17, 2024

Gratulerer

 I dag vil eg gratulere venninna mi i Bergen som fyller 84 år i dag. Vi gjekk i samme klasse på barneskulen og og på realskulen,, men så valde ho reallinja på gymnas og eg gjekk engelsklinja, men vi heldt i lag på fritida då også. Vi har ikkje så mykje kontakt lenger, men vi hugsar fødselsdagar.Og så har vi mange felles minne frå barndommen og ungdommen. Kvar gong vi møtest  kjem minna fram. Spesielt minnet om då vi gjekk på Trollenyken for å sjå soloppgangen- og det enda med at vi sat der klokka 4 om morgonen i silande regn. 

Gratulerer med dagen Ambjørg, håper du har hatt ein fin dag.

Bok nummer 4 -2024; Veien videre



( Eg må berre beklage at eg enno ikkje har lært meg å  endre  bilda på dette bildeprogrammet )

Eg likar tynne bøker, bøker som ein ikkje treng å lese hundre vis av sider for å komme til saken.Dette er ei slik bok som eg likar å lese. Mesteparten har eg lese på senga, men dei siste sidene tok eg i godstolen etter middagen i dag. Ogja, eg likte boka. Og no må eg rote i bokkassa mi for å finne ei ny bok som eg kan lese på senga. Eg har mange å velje mellom.

Dagbok 2024: 17.februar.

Klokka er no 17.02, og sola skin framleis slik ho har gjort i heile dag, eg trur vi får mykje gratis varme frå sola slike dagar, no er det + 2 grader på skuggesida av huset, men mykje varmare i solveggen vil eg tru.
Eg hadde ingen spesielle planar for dagen, og då har det lett for å bli liitt stussleg. Eg somla no litt på føremiddagen, før eg kom meg ut for å gå tur. Det vart ein tur rundt omkring i nabolaget med piggsko på føtene. Då eg kom heim fann eg ut at eg kunne lage glasur på gulrotkaka som eg hadde i frysaren. Det vart ein heil oppvask etterpå, som eg tok for hand. Eg hadde ikkje tenkt ut noko til middag i dag, så eg tok opp ball som eg hadde i frysaren. Eg er ikkje matvand så alt går ned. Men eg vart så trøtt etterpå at eg sette meg inni godstolen, og er trur eg sovna litt. Så las eg ut boka som eg har lese på senga i det siste. "Problemet" er at eg ikkje kan strikke så mykje som eg vil. Strikka litt for mykje i går kveld, så handa var låk i dag. Det irriterer meg litt.

No er sola gått ned bak fjella langt i vest, men eg håper ho kjem att i morgon,
 

fredag, februar 16, 2024

Dagbok 2024: 16.februar


Klokka er no 17.54, temperaturen ute er +2 grader C, det har stort sett vore opplett i dag trur eg, men ikkje så varmt at snøen har smelta skikkeleg, så eg orka ikkje å gå tur i dag. Eg har hatt diverse turar til garasjen og til postkassa, men då har eg tatt på meg piggsko.  Eg tok også og rygga bilen opp i gata for å sjå om det gjekk bra utan å moke. Og det gjekk heilt fint, men eg skulle ingen stad i dag


I dag hadde eg tenkt at eg skulle sove meg godt ut, for eg var litt sliten etter denne veka.Men så ringde vekkerklokka klokk 8, eg hadde gløymt å slå den av. Men det var no ikkje så farleg om eg stod opp når eg hadde lege i ro heile natta.
Fredagane brukar eg alltid å vaske litt grundig på kjøkken og bad, og det gjorde eg i dag også. Men så blir eg låk i ryggen og må ta mange pausar, så det tek si tid. Etter at eg er ferdig er eg ikkje låk i ryggen, så det går bra.
I går kveld kom eg ikkje i mål med Sudokuen i Møre-Nytt, den som kjem i fredagsavisa er ofte litt vrien. Eg la den i frå meg i går kveld, og då eg tok den att i dag fekk eg den til. Å løyse sudokuar er noko eg testar meg sjølv med, så lenge eg greier det, blir eg ikkje heilt avskilta.
No har eg sete ei stund og strikka på ein lest, for eg har fått ny garnforsyning frå Solveig. Eg må sørge for at ingen frys på føtene etter at eg er borte, så vi har eit lager.
Det paret eg strikkar no var no veldig fargerikt, men det er no kjekt.


 

               Eg vil ønske alle ei fin helg, og så håper eg på berre vegar og sol

torsdag, februar 15, 2024

Dagbok 2024: 15.februar

Klokka er no 16.20, temperaturen ute er+ 1 grad C og det har vore ein fin dag hittil, med sol og blå himmel.I dag var vi på trening først, så på ALTI og på KIWI på heimvegen. Eg tok meg ei lita mosjonsrunde då eg kom heim. Eg gjekk i piggsko i dag også, for best det er så er der is på vegen. Eg tek ingen sjansar.
Då eg kom att frå turen laga eg skikkeleg middag med kyllinglår og ris.
Eg slappa av i godstolen etterpå, såg litt TV og strikka litt.
Men eg vart så trøtt at eg sovna ei lita stund. Alltid når eg skal på noko, trenoing eller spansk t.d står eg opp grytidleg, for så å legge meg igjen og stå opp igjen og legge meg igjen. Dette resulterer i at eg eg trøytt når eg endeleg skal opp for godt-
No har eg sete og strikka litt, men eg må vere forsiktig med det, for handa er ikkje heilt god. I morgon er det heimedag og fredagsvask, så då håper eg at handa spelar på lag.
Ei som eg går i lag med på spansken skada foten sin så den var heilt blå. Utan å ta røntgen sa legen at det ikkje var brot. Men det vart berre verre og då ho kom til lege for andre gong vart ho sendt på røbtgen -der var fire bein nede i foten som var brotne, og no er dama gipsa frå tå til kne. Eg synest det var rart at dei ikkje tok røntgenbilde med ein gong. Eg har ikkje vore mykje sjuk i mitt liv, men du store tid kor ofte eg har vore på røntgen.
Komande veke er det vinterferie på skulane og vi på treninga får også fri. Men Spansken og Pensjonistlaget tek ikkje ferie. Vi skal ha  undervisning  først og så er det møte-. Eg reknar med at eg får sjå litt til barnebarna og barna i ferien-og eventuelt nokre kjærestar også.



Desse bilda tok eg frå altanen då eg kom heim frå tur. bilda eg tok på turen var det ikkje blitt noko av.
 

onsdag, februar 14, 2024

Dagbok 2024: 14.februar,

Eg går helst med piggsko på tunet enno

Klokka er no 17.00, temperaturen ute er+3 grader C og det regnar. Det er ikkje det minste sjarmerande. I dag var det spanskkurs igjen, og det er  kjekt å vere i lag. Vi stressar ikkje så mykje lenger, men litt har vi no lært-.
Då eg kom heim ville eg gå ein liten tur, utan piggsko, så eg gjekk ut Starevegen, og hadde tenkt å gå Olavsgata , for eg var ikkje heilt god i venstre foten. Men eg snudde og gjekk heim att då eg såg kor mykje is og snø der var. EG VIL IKKJE dette, så eg planla kva eg skulle gjere før eg sette meg til å ete litt. Eg tok ut av oppvaskmaskina og sjekka klesvasken et cetera.
Eg veit at det er skulefri neste veke og då ventar vi at ungdommane som går på skule eller jobbar i skulen kjem heim. Og då må eg ha gulrotkake.
Så no har eg laga ein botn , fått steikt kaka og vaska opp for hand alt eg har brukt. Så LITT har eg no utretta i dag også. 
I morgon er det trening igjen, og der er det også ein kjekk gjeng, vi begynner å bli godt kjende no, vi har gått der i lag i mange år. Marit og eg tek oss kanskje ein tur på ALTI etterpå.
Eg begynte på ein ny lest i går kveld, men eg merka at eg ikkje kan strikke så mykje som eg har lyst til , for då blir eg låk i handa. Det er litt irriterande, men ikkje eit STORT problem. No ønsker eg meg litt finare ver, og gjerne sol.

Det har vore voldsomt med brøyting og skraping i vinter, så det meste av snøen som ligg att, den ligg på tuna våre.Og det er no heilt greitt-
 

tirsdag, februar 13, 2024

Dagbok 2024: 13.februar




 Eg ser på "havutsikten" vår, men eg skulle gjerne hatt bort den store bjørka som står att også, når det kjem lauv der, skygger den mykje.

Klokka er no 16.07, temperaturen ute er +5 grader. Det er opplett og det har vore sol innimellom skyene av og til.
I dag var det trening og eg køyrde, men eg hadde piggsko i dag også, for isen som ligg overalt er framleis glatt, særleg om morgonen. 
Eg køyrde heim etter treninga, og etter i pratestund i bilen, sette eg Marit av og køyrde på KIWI og handla litt, på vona eg skulle få tid og lyst til å bake til dømes.Det er snart vinterferie og då må eg ha gulrotkaka klar- for eksempel.

Eg fann diverse restar som eg åt til middag, eg forstår nesten ikkje at eg greidde å ete alt. Men det vart ikkje rømmegraut i dag. Og ikkje vart det trimtur heller, for eg vart trøtt og måtte slappe av litt før eg begynte på spanskleksa. Vi hadde ikkje så lang tid på oss  denne gongen, men så er ikkje leksa så vanskeleg heller. Eg sette meg inn her til PC-en for å skrive leksa her, så ser den ryddigare ut enn om eg skriv for hand.
Eg strikka ferdig eit lestepar i går, og begynte så vidt på eit nytt. Litt spennande med nytt garn og nye fargar. Det er Solveig som held meg med garn no. 
Det er onsdagane som er spansk-dag, men også pensjonistmøte-dag, men det møtet er om ei veke ikkje i morgon, slik eg trudde, og det er eg glad for.
No skal eg gjere leksa mi, og etterpå blir det TV og spøt-

mandag, februar 12, 2024

Dagbok 2024: 12.februar



 
 
Storebakken-i dag også

Klokka er no 17.33, temperaturen ute er+ 4 grader det er overskya, det har vore opplett til denne tid, men eg trur ikkje det vil vare.Eg vil helst at nedbøren kjem som regn og ikkje snø, regnet slepp ein i alle fall å moke vekk.
Eg var rimeleg tidleg oppe i dag, sjølv om spansken ikkje tek til før klokka 11. Eg var så forsiktig at eg hadde på meg piggsko heilt til eg var komen inn på Bakk-Olamarka.
Eg var ikkje så sikker på om eg hadde gjort leksa rett, men eg hadde no gjort den like bra som dei fleste andre. Det var kjekt å treffe igjen gjengen i alle fall, og så skal vi ha ny time på onsdag. Eg trudde det skulle vere pensjonistmøte også den dagen, men det er neste onsdag. Då er det årsmøte.
Eg hadde avtalt med Marit at ho skulle komme ned når eg var heime att, så skulle vi ete av kaka som Margrete kom med i går på morsdag. Eg hoppa over middag- og åt kake i staden, så no er der ikkje all verda att av den, og det er bra.
Eg skulle gå ein trimrunde, og hadde på meg piggskorne igjen, men i dag vart er låk både i ryggen og føtene, Det var kanskje fordi der ikkje var så mykje snø og is lenger.
I morgon er det trening igjen, og så er det "Grauta-tysdag" som det heiter her. Eg trur eg står over rømmegrauten i år.




søndag, februar 11, 2024

Dagbok 2024: 11.februar

Klokka er no 18.20, temperaturen på trappa er 0 grader, så no smelter vel snøen igjen .Eg syntest det var så fint desse dagane då det var kaldt, klårt og sol heile dagen, men veret vekslar fort på desse kantar-

Eg var ikkje klar over at det var både morsdag og fastelavn i dag før utpå dagen i går, så eg hadde ikkje budd meg på å ta imot gjestar.

Men så kom Solveig og Øystein på føremiddagen med blomster og gåve og utpå ettermiddagen kom Margrete og Amanda og hunden Albert med ei stor kake og gåve i tillegg. Eg er einaste gjenlevande besteforelder her på våre kantar- i familien vår. Erlend kom også opp frå kjellaren og vart med på gjestebodet. Eg synest å kjenne kor kaloriane legg seg rundt midjen. Eg set sjølvsagt pris på at dei kjem og feirer dagen med meg.

I morgon skal eg starte å nytt med spanskkurs, men eg er ikkje så entusiastisk for det går lite framover med læringa. Eg trur eg er for gammal- men så er det kjekt å treffe dei andre på kurset; eg treng å vere litt sosial. Kan ikkje sitte heile dagane framfor TV og strikke lestar heller. 

Det er litt spesielt denne veka, for vi skal ha spansk både mandag og onsdag, til vanleg er det berre onsdagane.. Komande onsdag er det også pensjonistmøte på Kulturhuset. Eg vil vere med der så lenge eg kan, eg var i styret i 11 år-og eg synest det er viktig å ha eit pensjonistlag som fungerer. Eli har gjort ein kjempejobb ho begynte som leiar året etter at eg vart med, og ho held det gåande.

No blir det strikketøy og TV, og litt spansk  innimellom, resten av kvelden-


lørdag, februar 10, 2024

Dagbok 2024: 10.febuar

Klokka er no 18-00, temperaturen er ca minus 6 grader, men den er på veg opp att. Så endar det vel opp i regn og slaps igjen. Vi har hatt nokre fine dagar no med sol og utan nedbør.
Eg vakna som vanleg tidleg i dag, men vart liggade ei stund etterpå. Det var ingen ting som hasta. Etter frokosten gjekk eg og sette meg ved datamaskina og  såg på så ymse før eg gjekk inn i stova og fann fram strikketøyet mitt. Eg skulle no berre strikke litt, men det var no greitt å få felt hælen.......... 

Eg hadde så smått tenkt meg til Vik i dag, men eg synest ikkje det er så kjekt å fare åleine, så eg handla på KIWI i staden. Då eg kom heim var klokka 14. Det var tid for middag, men først måtte eg ha trimturen min. Eg fann ein liten kasserolle med ballj i frysaren og sette den på på plata -på 1. Det var ein fin tur i dag, og eg møtte to naboar som eg kjenner. 
 
Då eg kom heim att var ballen framleis frosen, men ei lita stund med plata på6 vart det middag. Maten var heilt OK, det var berre det at eg hadde så lite rømme igjen, eg hadde visst skive det på lista mi, men det er ikkje alltid eg les den. Eg vart stappmett, slik ein ofte blir av ballj og då eg sette meg inn i godstolen etterpå var det like før eg sovna.

Marit sende melding til meg og lurte på om eg ville komme opp og smake bollane ho hadde laga. Det kunne vore freistande om eg ikkje var så forferdelig mett.No har eg tatt meg ein kaffisvett men er framleis overmett.
I morgon kjem Solveig og Øystein innom, dei skal til Volda. Eg kjem til å bruke heile morgondagen på spanskleksa -for det går ikkje så fort inn lenger. Vi skal ha spansk to gonger denne veka fordi vi ikkje fekk ha det i veka som var, onsdag skal det vere både spansk og pensjonistmøte.
Alle tre bilda er tatt frå Storebakken. På bilde nedst ser ein opp på Vernet, der er altfor mykje snø enno til at eg vil gå der.





 

fredag, februar 09, 2024

Dagbok 2024: 9.februar

Klokka er no 16.05, temperaturen ute er minus 4 grader og sola skin frå klår himmel som ho har gjort i heile dag, utan pauser. Vi seier at sola "klive honnje" når ho ikkje fer bak Melshornet midt på dagen.Det har vore ein strålande dag. Eg har rettnok vore inne det meste av dagen, men det er der sola varmar best.Dessverre var ikkje vindua nypussa akkurat no, men det får vi ta seinare. Føremiddagen gjekk mest med til det som eg kallar fredagsvask, og så tok eg ein spasertur opp Storebakken og litt sikk-sakk på heimvegen. Eg trudde eg hadde telefonen i lomma, men slik var det ikkje , så eg fekk ikkje ta bilde av fineveret før eg var heime igjen, så bilda er tatt frå altanen. Solveig nabo og eg har fått "havutsikt" etter at to store lerketre vart saga ned i hagen nedom oss.



Eg har ikkje moka altanen i heile vinter, slik eg brukar å gjere. Men ryggen held ikkje til slikt arbeid lenger og etter at eg braut handa, er ikkje den så god til slikt arbeid heller. Eg reknar med at snøen smeltar ein eller annan gong. 
No har eg ete middag, det vart pølser og potetstappe i dag også. Og så sette eg meg til med fredags-sudokuen frå Møre-Nytt. Eg måtte gi tapt i går kveld, men trudde eg skulle få komme i mål i dag. Men NEI. Førre veke greidde eg begge.(Tysdag og fredags-avisene)
Eg har ingen planar for helga, men eg skulle ha vore og kjøpt meg nokre klede-eg er snart bukselaus. Eg plar handle på Møre Konfeksjon, men no er dei konkurs , las eg i avisa, så eg må finne meg ein annan butikk. Vi har no billeg-kjedane på ALTI, mellom anna .
Resten av denne dagen i dag blir det vel å strikke og sjå TV.
Eg synest vinteren til denne tid har vorre relativt lys og lett, og no blir det stadig lysare dagar. Det merkelege er at tida går fortare til eldre ein blir
Ønsker alle ei fin helg !



                                      Her kan de sjå "Havutsikta" vår
 

torsdag, februar 08, 2024

Dagbok 2024: 8.februar



                                              STOREBAKKEN


Klokka er no 17.48, temperaturen ute er minus 4 grader. Det er skyer på himmelen , men det har vore sol også i dag- Eg var tidleg oppe og sjekka veret og såg at det hadde kome meir snø, men ikkje så mykje at det var eit problem. Eg fekk tatt bort noko av snøen med brettet, og så køyrde eg frå garasjen og opp til vegen  eit par gongar -og det heldt. 
Marit var i Ulsteinvik hos augelegen i dag derfor var eg åleine. Eg handla ikkje på heimvegen, men eg gjekk tur før middag. Det er fint å gå no-om ein har piggsko- dei vert brukte kvar dag no. Berre eg skal ut i garasjen tek eg dei på meg-eg vil ikkje dette meir! Og eg køyrer bil også med skorne på. Då eg kom heim frå turen laga eg middag og åt altfor mykje, eg er stappmett enno. Kanskje fordi eg laga potetstappe?
Ei stund etter middag kom Marit ned så eg fekk høyre korleis ho hadde hatt det, og ho var veldig nøgd med det legen hadde sagt.
Eg har berre så vidt hatt TV-en på så eg har ikkje høyrt så mykje om det som skjer i verda. Enno. Det er sjeldan ein får GODE nyheiter.Dessverre.
I morgon er det fredag igjen, og så er enda ei veke gått over i historia. Eg synest tida går altfor fort, og vinteren er snart slutt, enda den har nyss begynt. Men eg ser fram til lysare dagar -hadde sola inn i stova ei stund i dag-og då får ein i alle fall sjå  at det trengst vinduspuss.




Sola streva heile turen min på å komme gjennom skydekket, og ei lita stund fekk ho skine.

onsdag, februar 07, 2024

Dagbok 2024: 7.februar



Utsyn til Mosmarka frå Storebakken.


Klokka er no 15.25, temperaturen ute er minus 5 graderC, det er oppplett, og der har vore skyer på himmelen til no-men no ser eg sola,så det held vel på å klarne opp.

I dag var det heimedag, så eg prøvde å få gjort litt husarbeid. I dag tørka eg støv, vaska vinduskarmar og støvsuga på stova og rydda litt her og der. Det blir nok rot om ein berre er her åleine.

Så tok eg på meg piggsko og gjekk ein tur.Vegane er fint pløgde og skrapa,men der er is og snø, så eg må ha piggskorne. Då eg kom heim åt eg,   søndagsmiddag for tredje gong denne veka, men no er det slutt.

No kjem det sol inn til meg; slik var det i fjor også, då kom sola mens eg skreiv blogg.

Det er mykje eg kunne ha gjort i huset, men ryggen vil ikkje. Eg har ikkje vondt i ryggen heile tida, berre viss eg jobbar med noko, då må eg ha mange pausar.

Eg har ikkje hatt på verken TV eller radio i dag, så no får eg sette meg inn og bli oppdatert. Det er vel ikkje noko gledeleg som skjer i dag heller.
 

Bok nr.3 -2024:Menneske og møll.



Denne boka las eg ut i går kveld på senga, det er den treje boka eg har lese i år, og også denne handlar om problem menneske i mellom. Her er det ein gammal far/bestefar som er problemet. han er gammal og sjuk og vert lagt inn på sjukeheim. Barna kjem på besøk av og til, men det er ikkje noko dei gjer fordi dei er glad i far sin. Eigentleg bryr dei seg lite om han. Det kan vere så mange grunnar til det, men det viktigaste kjem ikkje fram før i slutten av boka. Eg synest boka var heilt grei å lese, mykje var attkjennande på ein eller annan måte.

Noko som var litt artig, var at midt i boka kom Astrid frå den førre boka eg las. Det viste seg at ho var dorttera til eit  av "borna" til den gamle mannen. 

Korleis kan ein person flytte frå ei bok til ei anna? Var det samme forfattar? Nei. Men forfattarane hadde samme etternamn, og Øystein kunne fortelje meg at dei to forfattarane var mor og dotter. Eg går ut ifrå at det var den eldste som hadde skrive om den gamle mannen.

Eg les berre på senga, ca 1 time kvar kveld. Då får eg til å fokusere på boka, når der ikkje er noko anna å sjå på.
 



tirsdag, februar 06, 2024

Dagbok 2024: 6.februar

 

Klokka er no 15.46, temperaturen ute er minus 4 graderC, men eg synest det er kaldt. Ikkje inne-men ute.

Sist natt sov eg godt  og vakna av vekkerklokka i dag klokka 8. Sidan det var eg som skulle køyre i dag, sjekka eg tunet m.m. for snømengde etc. Eg  hadde vore ute i går ettermiddag og sjekka at eg kom meg opp på vegen utan å moke.I dag køyrde eg opp til vegen ei stund før vi skulle fare. I dag var det det vi kallar blindeføre, dvs. at ein ikkje ser skikkeleg kvar vegen sluttar. Det kan vere at ein t.d. køyrer litt for langt ut, eller oppå eit fortau. Eg bryr meg ikkje så mykje om det, så lenge det ikkje går heilt gale. Då vi køyrde ned "Skrågata", var det ikkje råd å sjå alle fartshumpane til dømes. Men alt gjekk bra, vi kom oss på trening og på heimvegen handla vi litt på KIWI.

Eg bestemte meg for å gå tur med det same eg kom heim, mens eg hadde uteklede på meg. EG hadde på meg piggsko i dag også og det var bra, for der var ikkje berre snø på vegane, der var is også.

Til middag i dag vart det restar frå sundag, og det ser ut til at eg må ete resten av resten i morgon. Eg vart litt for mett, så eg måtte ha ei kviletid i godstolen og eg fyrer i omnen så eg har det godt.

Eg fekk brev frå Helse Møre og Romsdal i dag . Det galdt undersøkelsen som legen min ville at eg skulle ta. Eg er sett på venteliste, så eg veit ikkje kva tid det blir.

I morgon er det bosshenting, så eg må ut og grave fram bossdunkane og få dei opp til vegen. Dei plar ikkje komme så tidleg, men det er greitt å ha det gjort.

I dag er det to månader sidan eg braut handa, den er ikkje heilt bra enno, men eg kan no gjere nesten alt, kan i alle fall strikke.

Den dagen eg braut tenkte eg som så:" Tre veker i gips, og så er eg like god", det er ikkje det samme å bryte bein når ein er 80+ som det var då eg var 24.

Eg plagast med dette bildebehandlings-programmet eg har. Eg trur eg skal spørje Torbjørn litt om dette for han er interessert i bilde på nett, og kan mykje om det.

Eg tok mange bilde då eg gjekk tur i dag, men det vart noko tull då eg skulle legge dei inn på maskina. Til slutt stod eg att med bildet øvst på denne bloggen. Det tok eg då eg var ute og gjekk i sluttenden av Vallabøvegen. Der ser vi husa på oppsida av Starevegen-på baksida.



No skal eg ut og plassere dunkane før det mørknar.I morgon er det heimedag.


mandag, februar 05, 2024

Dagbo 2024: 5.februar


Utsikt mot vest frå øvst i Storebakken.

Klokka er no16.10, Temperaturen ute er minus 5 grader, og sola er i ferd med å gå ned. Vi har hatt mykje sol i dag, og den varmar godt inne i huset, så eg kunne stille ned varmepumpa.
Eg var lettare fortvila då eg sat med frokosten og såg ut. Det var mykje nysnø, og feiaren kunne komme kva tid som helst. Eg hadde knapt tenkt tanken før Geir var her med ATV-en og moka heile tunet, og like etterpå kom feiaren. Han var visst fornøgd med stigen Det hadde faktisk kome litt meir snø etter at Geir hadde moka, men eg fekk ikkje påtale frå feiaren verken muntleg eller skriftleg. Eg greier ikkje å moke alt sjølv på grunn av handa, men noko greier eg no.
I dag la eg opp til husarbeid, for no kan eg ikkje vere så lat lenger. Eg hadde ein liter med kefir liggande så eg bestemte meg for å bake brød; eg har ikkje baka noko som helst etter at eg braut handa. Det vart tre brød i dag, men eg var ikkje heilt fornøgd med dei-likevel kjem eg til å ete dei opp- Eg vaska opp og rydda etter meg, og så rydda eg nokre skuffer på badet. Eg får ikkje tak i hyllepapir lenger, men eg tok like godt ein rull med julepapir og brukte av den til å ha i skuffene. Det vart ein del boss, og onsdag er det henting av restavfall og matavfall så då få  vi tømt, Vi er alle samde om at vi skulle hatt oftare tømming av restavfall.
Akkurat no fekk eg melding frå Brannvesen: "Hei,feing Starevegen 7 vart utført. Vi fann ingen avvik.". 
Takk og pris! Eg brenn så mykje rart i omnen at eg hadde ikkje heilt godt samvit.Sotet skal Erlend og eg ta ut nede når han kjem att. Han er hos Margrete no



                                                         Og mot aust, klokka ca 15.30


EG åt skiver til middag i dag, så eg sparte restane frå i gå  til i morgon når eg skal på trening. Eg gjekk ein liten runde i dag, det har vore nokre dagar utan mosjon.

Eg strikka nesten ferdig ein lest i går, no skal eg felle den av. Eg kan ikkje strikke så mykje eg vil enno, eg må ha pausar . Eg strikkar berre når eg ser TV; men no er det nesten som eg kvider mot å sette på TV-en, det er så mykje vondt i verda, så mange som lid: Krigar, jordskjelv, skogbrann  mord etc. etc. Naturkatastofar er ikkje lett å hindre, men at vaksne vetige folk går til krig, det forstår eg absolutt ikkje. Kva er det vi prøver å lære barn frå dei er små? 

No har sola gått ned i vest, men det er no lyst enno,                        

søndag, februar 04, 2024

Dagbok 2024: 4.februar







 Klokka er ni 18.18, temperaturen ute er +3 grader C, og det har snødd i dag, tung våt snø, som ikkje er sjarmerande i det heile tatt. Plogen har vore og lagt ein tung kant , men gata er skrapa og fin.

I dag har eg hatt ein skikkeleg sløv dag. Eg har gjort minimalt med husarbeid og anna. Har lagt i hop klede og vaska ei maskin igjen, og så har eg laga skikkeleg middag til meg sjølv. Eg har vel fått ein uvane med å late meg så lenge som eg måtte passe på handa mi. Den er bra  no, men ikkje heilt god, så eg må vere litt forsiktig.

Eg starta dagen med frokost -sjølvsagt, og så sette eg meg til å sjå MAKTA mens eg strikka. Det vart litt plunder med strikketøyet, så eg måtte sjå  om att episoden. Eg hadde ikkje tenkt å sjå den serien syntest ikkje det var så interessant, men då det leid på såg eg heile serien på kort tid. Det vart kjekkare. Eg likte så godt han som spelte Reiulf Sten- og sist fredag var han på Lindmo, veldig sympatisk skodespelar.I dag var det Gro og Kåre, det hugsar eg no, men elles er det lite eg hugsar frå politikken-det har aldri vore mi store interesse, Det var Nils og Margrete som var politikarar. Nils var i kommunestyret her i Ørsta og no er Margrete i formannskapet i Volda.

Så var eg ned og henta opp stigen så den ligg langs veggen, og no meiner eg at han er lang nok. Eg har skrive under på at eg skal ta ut soten ,men det hastar ikkje. Det er nede på kottet ved badet at vi tek ut sot, og Erlend har lova å hjelpe til med det. Han er hos Margrete no akkurat og passar hundar.

Eg laga god middag til meg sjølv i dag, eg orka ikkje å gå tur i dette veret, men eg kan no ikkje bli sittande i ro for lenge, og bilen må også få lufta seg. Han har stoppa opp 3 gonger i vinter fordi han ikkje har vore nok køyrd.

Men komande tysdag er det trening, og då skal eg køyre. Torsdagane er det Marit som køyrer, men det kan no hende at eg skuldar ein tur. Den 13. februar startar vi opp att med spansk, eg trur ikkje eg greier å lære så mykje meir, men det er no kjekt å vere der i lag med gjengen og drikke kaffi og prate.

Eg skulle sikkert ha begynt å vaske ned huset, men eg er ikkje heilt klar for det enno. Det er godt å ha to hender når ein skal vaske.

MGP gjekk som eg trudde,men eg er for gammal til å like songane og showet. Likevel var det no dei to eg likte best som gjekk til topps. Men eg synest det var kjekkare med Bobby socks og Alexander Rybak. Eg fekk ikke tatt bilde fordi det ikkje var straum på telefonen, men kanskje det kjem eit seinare.

Dagbok 2024: torsdag18.april

   Det er nokre år sidan dette bildet vart tatt på Hareid, med alle barnebarna i samme sofa Klokka er no16.56, temperaturen ute er + 10 grad...