Godt Nytt År 2009.

Så er vi komne til siste dagen i året og det er tid for ettertanke, særleg for oss som har levd ei stund. Det skjer ikkje all verda på eit år lenger, slik som det gjorde då vi var yngre. 2008 var ikkje året for dei store hendingane her i huset, verken på godt eller vondt, og det er kanskje det beste i vår alder?
Vi har det bra, helsa er sånn nokonlunde og vi er relativt oppgåande, så det får halde.
Når det gjeld verda elles er det ikkje fullt så roleg og stabilt. Det er lenge sidan vi passerte grensa til eit nytt år med så mykje uro- i form av krigar og finansielle kriser. Dei har litt av ei oppgåve dei som skal prøve å "rette opp att alle feil i frå i går".Glad for at det ikkje er mi oppgåve.
Så vil eg ønske alle blogglesarane mine alt godt i det nye året, og takke for all kontakt vi har hatt i året som snart er slutt.For meg som kjem så lite ut, betyr denne kontakten mykje.Håper på mange koselige blogginnlegg også neste år.

Julesokkane.

Som de veit hadde eg eit prosjekt på gang før jul, og det var å strikke sokkar til alle barn, svigerbarn og barnebarn. Eg kom i mål med god margin, det vart opp til fleire par på somme av familiemedlemmene.Etterpå strikka eg eit par til meg sjølv og eit par til gemalen, før eg la pinnane på hylla.Eg strikkar sokkar, for då er det ikkje så veldig farlig om kroppen plutselig seier stopp. Kunne ikkje legge julegavene ut på blogg før jul, men her ser de prosjektet mitt strøydd utover stovegolvet.

Avreise.

I dag var vi tidleg oppe til å vere oss. Rasmus &fam skulle ta 10-ferja frå Volda.Dei har ei lang reise framfor seg,men heldigvis er veret fint.Det er trist når dei reiser,men sikkert godt for dei å få nokre dagar heime før dei skal begynne på jobb, skule og barnehage igjen.

Det har vore mykje liv og røre her mens vi har hatt besøk,så det blir nok litt av ein overgang no når vi blir "åleine" igjen.

Julaftan i Starevegen.

Tre år har Nils og eg vore "åleine" i jula, men i år har vi altså besøk av familien frå Kongsberg. Dermed vart det litt meir liv i leiren, blant anna med julenisse og masse pakkar. Dessverre vart kameraet tomt for straum midt i nissebesøket.

Noko av det kjekkaste gutane fekk var sengetøy med favorittane Ben 10 og Kaptein Sabeltann.For ikkje å nemne DVD-en Skrimmel skammel..........say no more. Håper alle lesarane mine har hatt det fint så langt i jula. I morgon ventar vi besøk frå Hareid og Bjørnaset.

God jul!

Så er det tid for å ønske alle blogg-lesarane mine ei riktig god jul!

Og takke alle for "samvær" på bloggen i året som ebbar ut.Det har vore til stor glede for meg å ha denne kontakten.

I dag har heile storfamilien vore samla på Hareid,der det ikkje var mangel verken på vått eller tørt. For ein gongs skuld laga det seg slik at alle barnebarna våre kunne samlast i ein sofa! Eg hadde med fotoapparat, men det var så mykje knipsing at eg avstod frå å ta bilde. Dette har eg rappa frå Solveig sin blogg.(Derfor må de gå dit for å få det forstørra).

Beste helsing frå oss som feirer juli Starevegen 7.

Julegjestane i hus.

Rasmus og fam. kom med 18.15 ferja frå Folkestad, så dei hadde ikkje dårleg ver anna enn på slutten av turen.Heldigvis.No er alle husvarme og og har kome i gang med diverse aktivitetar.Vebjørn og eg har hørt songar på You Tube m.a.,Rasmus og Eivind spelar Monopol.Elles så var det altså Rasmus som var syndaren med T-skjorta.

Etterlysing.

Nils fekk denne T-skjorta tilsendt frå FLYKTNING-HJELPEN for nokre dagar sidan. Vi gjekk sjølvsagt ut frå at det var julegåve frå Solveig.Ho kjøpte no ei geit til oss for et par år sidan, så det var nærliggande å tru at ho stod bak.Men så seier ho at denne gongen er ho uskyldig, og vi står heilt utan spor. Kan nokon hjelpe oss å finne "syndaren"?

Nye sofaputer.

Ein dag Ruth og eg vandra rundt på Amfi, fann vi nokre fine raude puter på butikken FRYD.Men eg fann sjølvsagt ut at slike kunne eg kjøpe nærare jul. Då det passa for meg å kjøpe , var dei sjølvsagt borte vekk! I dag var eg innom Princess og kika, der var det knapt ei raud pute å sjå.Så var det berre å stikke innom MÅLAR-Olav, der eg fann to puter som fall i smak. Ikkje heilt billege, men eg likar ikkje å kjøpe skrot heller. Den ensfarga puta er i Thaisilke, den mønstra i eit tjukt stoff.Fordelen ved å ha trekvite vegger,brun sofa og ecru-farga gardiner er mellom anna at ein kan skifte med alle andre fargar på puter, dukar etc.Moralen i historia er at ein bør kjøpe det ein likar når ein finn det. Der og då!

Spesielt for eldre?

No har eg lese ut denne litt spesielle boka.Eg vil anbefale den for alle, men særleg for dei som ikkje er heilt unge lenger. Boka handlar i kortheit om livet og døden, kjærleiken og havet, og ikkje minst om det å eldast.Boka er verken tung eller trist, men får ein til å tenkje over mangt og mykje som kan skje i eit menneskeliv.

Lesestoff til jul.

Var innom biblio som snarast i dag og hamstra inn til jul. No er det ikkje sikkert det blir lese så mykje, men det er godt å ha ei lydbok om det er netter ein ikkje får sove t.d. Alle desse er bøker eg har hatt lyst å lese og i dag var dei komne i "nye-hylla". Neste år skal eg blogge alle bøker eg les og nummerere dei slik som Margrete.Så hugsar eg kanskje kva eg har lese?

O holy night.

I går var Solveig med fam. på ein liten stikkinnom- visitt. Vi kom i ein liten diskusjon om julesongar og var heilt samde om at Adams julesang(O holy night) burde syngast av ein mann.Til dømes Magne Fremmerlid, som syng på plata som eg har skrive om før.
Men at songen også kan syngast av ei ung jente, synest eg Charlotte Church er eit godt døme på.Eg har blitt kjend med mange "nye" songerar etter at eg begynte å frekventere nettstaden YouTube.

Julestemning i heimen.

Det har vore smått med jule-stemninga hittil i år, når vi ikkje eingong kan tende eit kjerteljøs utan at einkvan blir allergisk.
Men no har det seg slik at "nabojenta" rett over vegen har studert musikk ved Høgskulen i Volda i fleire år, i tillegg til at ho dirigerer opptil fleire kor.I år har Høgskulen gitt ut sin eigen CD med gamle og nye julesongar, og eg fekk kjøpe ein med Janne til spesialpris.Ho har laga melodien til ein av songane og syng sjølv solo.
Til å synge O helga natt har dei leigt inn operasongaren Magne Fremmerlid.No har eg høyrt plata EIN gong, og det blir sikkert fleire.
Nils vil helst høyre og synge julesongane slik han lærte dei for snart 70 år sidan.Somme ting skal vere slik dei alltid har vore!
Før middag baka eg eit lad med pizzabotnar, slik at det skulle sjå ut som om eg baka til jul, eg også.Eg brukar Barmens oppskrift, som de kan finne på nettet.Eg dobla den tre gonger, då vart det 12 små botnar.

Lydbok- krim.

Når eg les krim på lydbok, har eg lett for å gå surr både i namn og hendingar, men denne boka var ekstremt rydding frå først til sist. Eg fekk med meg alt som skjedde utan problem, og tykte den var interessant og spennande. Så les eg kritikkane på nettet, og der meiner dei mellom anna at boka er for "enkel". Mulig det. Men det enkleste er ofte det beste-også når det gjeld krim.Eg likar at alle trådar blir nøsta opp og at ein ikkje er i tvil om kven "skurkane" er til slutt. Eg er kanskje litt enkel eg også?

No kan det virke litt umoralsk at eg sit og les krim( og strikkar) mens andre stressar med alle slags juleførebuingar. Til mitt forsvar kan eg seie at eg vart litt elendig etter at eg hadde vore på trening i dag. Men NO skal eg ta meg ei stund og jobbe.

Trendy julegåver.

Kom dessverre i skade for å slette den knusande kritikken min av MØRKEMANNEN i går, då eg skulle fikse på noko anna. Men eg går ut frå at lesarane hadde fått med seg det meste? Kanskje ikkje at Eidabesta og -besten hadde sett filmen.
Elles vart eg litt oppløfta då eg såg litt av Frokost-TV i går. Finn Schjøll ønska seg faktisk heimestrikka sokkar til jul.FORDI DET VAR SÅ TRENDY.Så hermed må det vere klart: Det er TRENDY julegåver eg gir bort!(Eg trudde berre dei var gode og varme).
Må også ta med ein kommentar frå Minstejenta, då ho såg på kor eg strikka:Det er ikkje vanskelig å LAGE julegåver når ein kan å strikke!

Først pølse og stappe.......................

Amanda har vore med oss sidan i går.Då hadde ho så mykje feber at det var ingen grunn til å ta henne med heim; ho hadde måtta vore heime frå skulen i dag uansett. Morfaren brukar alle triks for å skaffe seg yndlingsrettane sine, til dømes å skulde på at barnebarna likar det. Så i dag slo han til med pølser og potetstappe. Som de ser vart alle gode og mette.Margrete kjem og hentar Amanda litt seinare.

Veit ikkje om det er innbilning, men eg føler meg ikkje heilt på topp eg heller i dag.At morfaren treng å skifte til heile sokkar burde hermed vere dokumentert. Han HAR heile sokkar!