Dagbok 2019: 12.mars

Klokka er 21.10, temperaturen er + 3 grader, det regnar og er litt kjedelig vêr-men det må vel til for å få bort snøen.
I dag skulle eg ikkje strikke! For første gong på tre veker. OK, då måtte eg finne noko anna nyttig å gjere-det var nok å ta av. Eg tok fram strykebrettet og strauk nokre plagg eg hadde liggande. Så tok eg meg på tak, tok ned dei kvite "vintergardinene" på stova, og begynte å stryke "sommar- gardinene", seks lange lengder. Eg vaska dei sist haust, for første gong, tidlegare har eg levert dei på rensing. Eg vaska dei i maskina, og tørka dei i trommelen. Eg var spent på korleis det skulle gå, men dei var så fine at eg kunne ha hengt dei rett opp. Men i dag, etter overvintringa, måtte dei få litt stryk. Det vart ein del arbeid, og eg kjende det var uvant å gjere noko fysisk. Men resultatet vart bra.
Elles vart det ikkje gjort så mykje. Litt "kotorarbeid"-og så dusjing og pynting før vi skulle på FEST.
Det var ikkje så mykje folk som det plar vere på festane som Rotary byr inn til. Eg kjenner mange av vertane, og no tek alderen over der også, trur vertane var på alder med oss pensjonistar no. Trefte mange eg kjende.  Det var to eldre karar som song til oss, elles var det maten og loddsalet som var underhaldninga. Sist Marit og eg var i lag på fest, vann alle ved bordet ein eller fleire gjenstandar, alle med unntak av Marit. Ho var redd set skulle bli slik i dag også-og det blei det. Vi var berre fire ved bordet og tre av oss vann. Eg vann ein pakke med papir på, så eg såg ikkje gevinsten før eg kom heim. Det blir vel påskepynt i år?
Even køyrde oss ned, men vi hadde ikkje skyss heim. Eg spurde Magnar, bror til Helge Lid , og han frakta oss heim. Han har no køyrt meg heim eit par gonger før. Han er nestleiar i pensjonistlaget,
Vi fekk veldig mykje god mat på festen, masse fine og gode smørbrød, og etterpå fekk vi bløtkaker, "Verdens beste" , pavlova, etc.etc.  Eg åt for mykje, som vanleg.
Eg prata med mange kjende som eg ikkje har sett på ei stund, så det vart ein hyggeleg kveld. I morgon er det SPANSK 11-13.30-inkludert matpause.

Dagbok 2019: 20.februar

Klokka er no 20.40, temperaturen er +3 grader. Det var rimeleg bra vêr først på dagen, litt vått seinare.

Dette har vore ein veldig aktiv dag for meg - det skal ikkje så veldig mykje til. Eg vakna tidleg og fekk styrt litt både med meg sjølv og huset før eg vart henta av ei "spansk-kollega" vel halv elleve. Fekk tid å stikke innom legesenteret og hente epikrisene frå røntgen og CT før franskkurset. No forstod eg ikkje allverda av av det som stod på arka, men skjøna såpass at dei hadde funne litt av kvart inni knea mine- og det forundrar meg ikkje.

På spanskkurset har vi det kjekt, vi lærer no litt av kvart, men kor lenge det sit er ei anna sak. Vi er samde om at viss vi hadde vore så iherdige då vi var unge, så...……… Vi ler og kosar oss, og så har vi lang pause mellom dei to timane. Då er vi i kafeen og et og pratar. Det sosiale er viktig for oss pensjonistar, vi har blitt ein fin gjeng etter fire treff.

Då eg kom heim hadde eg litt av kvart å styre med. Hente post, betale rekningar, skrive eit lite avisinnlegg  etc. Og så fekk eg melding om at Svein N. var sjuk og ikkje kunne vere med på musikal. Eg averterte billetten som vart til overs på FB og fekk Solveig til å bite på. Ho kunne komme på kort varsel.

Det varde ikkje så lenge før Margrete, Eirik , Ingeborg og Erlend kom for å hente meg. Margrete hadde kjøpt meir garn, så no får eg snart nytt strikketøy, men må legge siste hand på Margrete sin genser først.

                              Opningsnummeret. Isfjella smeltar. Amanda sit på golvet og syng.

Og så vart det MUSIKAL. Denne musikalen var annleis enn dei VVS har produsert før. Her var lite "prat" -heile handlinga vart fortalt gjennom song , musikk og dans. Og for meg verka heilt proft. "Den beste musikalen ever", skreiv Arne Ola og det er eg samd i. Amanda hadde det første solonummeret, elles var ho i ei gruppe og så fekk ho den tvilsame æra å spele "fru Donald Trump". Bildet er frå gruppa; som fru Trump hadde ho raud kåpe. Dei skulle ha ei framvising til i kveld. Premieren var i går. Før har dei bygt musikalane over ein film eller liknande, i år var det TEMA. Og temaet var klimakrise og jordas undergang. Men i andre delen  som heiter VON får vi sjå korleis livet kjem tilbake. Mange flotte kostymar var det også. Det kjem sikkert mykje om det i Møre Nytt i morgon. Solistane blir vel dei som får mest merksemd, men eg måtte beundre kora som stod mykje rett opp og ned veldig lenge. På andre delen var Amanda i koret. For oss i familien var det viktig at Amanda greidde seg bra, og det gjorde ho. Takk for ei fin oppleving.

Dagbok 2018: 20.oktober

Klokka er ca. 19.30, temperaturen er +  grader C. Det har visstnok regna litt i dag også, men eg har ikkje vore så mykje ute at det har skada meg, det er tørt på gata no.

For det meste har eg strikka i dag, og saga ved i garasjen, middag hadde eg ein rest frå i går osb. 

Margrete kom klokka 16.00 og så drakk vi litt kaffi før vi for på konsert. Det var veldig kjekt. Eit lite blandakor frå Hovdebygda med Øyvind Lid som dirigent heldt Beatleskonsert. Det var sikkert ikkje 100% reint, eller heilt perfekt på alle måtar,  men vi storkosa oss. Salen var stappfull. Om lag halvparten av dei som var der var sånn om lag på alder med Beatles-medlemmane, den andre halvparten var dei som vart fødde på 1960 talet eller der omkring. Det var siste aldersgruppa som prega koret også. 

Børre Lødemel var solist på nokre av songane, og Øyvind Lid tok seg heilt ut på siste songen "All you need is love". Publikum klappa og song med. Håper dirigenten ikkje brukte opp heile stemma si , for dei skulle  ha ein konsert til i kveld. Kirsten Ose var fram og takka både den eine og den andre og delte ut blomster til musikarane og til elevane frå ballettskulen, som også var med. Ho er ein "komikar" av rang! Trur alle koste seg. Det er noko spesielt å vere på konsert når du kjenner mange av dei som er med.

No skal eg sette meg i godstolen med strikketøy og sjå Stjernekamp, det er høgdepunktet i veka når det gjeld TV. Og etter midnatt skal eg spele Beatles på You Tube på full guffe. Skulle hatt betre høgtalarar!

Dagbok 2018: 3.oktober

Klokka er 19.30, temperaturen er + 5 grader og også i dag har vi hatt regnbyger så det held. Eg prøver å trøste meg sjølv med at det blir lite snømoking til vinteren når vi får så mykje nedbør no.
 No er eg nyss heimkomen frå eldrefesten på kulturhuset. I dag hadde eg ikkje ansvar for noko. Ikkje var eg ned og dekka på borda ein gong, og leiar i eldrerådet sa at eg skulle sleppe å skrive, for dei var der frå Møre-Nytt. 
Så eg sette meg langt bak og slappa av. Nabo Solveig køyrde Marit og meg ned,  og så tigga eg oss skyss heim att med ei som sat ved samme bordet som oss. Det var mykje program, mellom anna eit kjempeartig kåseri. I matpausen snakka eg litt med Eli, som fortalde at der ikkje var nokon frå avisa- . Eg sa som sant var at eg er i alle fall ikkje i stand til å skrive noko referat, eg sat ikkje slik til at eg høyrde alt, og hadde ikkje notert noko. No får einkvan annan ev. ta ansvaret.Vi fekk så mykje vi ville av smørbrød, kaker og kaffi.
Føremiddagen gjekk med til diverse huslege syslar, hårfarging og fyring i omnen. Her heime har eg det varmt og godt no når eg bestemmer temperaturen sjølv, men kledde meg godt sidan det ofte er kjølig på kulturhuset - og det var det verkeleg i dag. Eg fraus som ei bikkje i ulltrøye, genser , jakke og sjal.
Det var loddsal og eg vann to gonger, først ein liten ildtopp og så ei stor korg med lyng, som eg gav bort. Eg har to lyngplantar på trappa og ein lyng på grava, så eg trong ikkje meir.
I morgon ventar eg middagsgjestar, kanskje to, kanskje fire og så kjem Solveig innover på fredag, så dette er ei sosial veke. Snikkaren dukkar vel ikkje opp att før det blir opplett og fint vêr.

Dagbok 2018: 20.juli

Klokka er 22.50, temperaturen er + 17 grader og vi har hatt enda ein fin dag.
I dag kan eg ikkje skryte av å ha gjort så mykje. Har vatna litt i hagen, klipt litt kantar etc.og så låg eg og las og sov på altanen ei stund.
Måtte ladde opp til kvelden og den store filmpremieren med  "Mama mia-here we go again". Marit hadde ordna med billettar og ho køyrde. Vi trefte mange andre venninner på vår eigen alder, og vi konkluderte med at over 90 % av publikum var kvinner i alle aldrar, med hovudvekt på dei eldste og dei yngste. Eg har sett den første ABBA-filmen på TV og var sånn måtelig begeistra, så forventningane mine var ikkje skyhøge. Dessutan plagar den høge lyden meg kvar gong eg er på kino.
Men eg trur alle kosa seg i kinosalen i kveld. Filmen inneheldt ikkje så mange kleine historier, hovudvekta var på musikk, dans og show. Det var full rulle heile tida. Vi fekk sjå att dei tre fedrane som ikkje hadde tapt seg så mykje, og så kom bestemor Cher og song til /om Fernando. Jau, dette var fest, fart og humør. (Det ligg mange "trailarar" på nettet for di som vil sjå.) Mange av songane hadde eg ikkje høyrt før, men der var også mange av dei mest kjende. Heile filmen var eigentleg eit show-til å bli i godt humør av.
No skal eg finne meg litt mat, og så treng eg ikkje legge meg på lenge enno. No har eg sove skikkeleg i to netter+ at eg har sove på altanen, så det står ikkje på.

Dagbok 2018: 30.mai

Klokka er no 19.00, temperaturen er + 28 grader C, tidlegare i dag var den oppe i + 29 grader. Det er heitt til å vere mai, men godt også, for oss som slepp å gå på jobb. Dvs. i dag har eg hatt litt å styre med. Solveig nabo køyrde meg ned på kulturhuset klokka 12.00, men der var det mange som hadde møtt opp før, så borddekkinga var så å seie i boks. Eli skulle lære meg å sette på songar frå laptopen-og det tok si tid. Når den eine pedagogen skal lære den andre, blir det litt hibbel. Ikkje det at det var vanskeleg, det er berre det at eg er vant til å bruke mus. Det var der ikkje. Det er sjølvsagt ikkje noko problem å bruke andre metodar, men her heime brukar eg stort sett den "store" maskina -fordi eg likar den best, og der er det berre mus. Laptoppen har det vore krøll med heilt sidan vi kjøpte den, så den får stort sett stå i fred. Eli køyrde meg heim, så eg skulle sleppe å gå med den vonde foten min, eg øvde litt her heime, så det gjekk heilt greitt på møtet.
Eg fekk ein liten pause, før Marit og eg skulle nedover. La meg ut på altanen i nokre minutt og presterte å sovne, men vakna eitt minutt før vi skulle fare. Då vart det det litt stress med å få på seg "bestekleda".
Det vart eit kjekt møte. Børre Lødemel skulle ha vore der og sunge, men han hadde mist stemma. Han hadde tipsa Eli om ein annan ho kunne spørje, ein frå Vartdal. Han kom og var veldig flink !
Vi hadde loddsal og eg vann ein sommarleg voksduk. Til mat var det Wraps med veldig godt fyll, kake og kaffi fekk vi og. Heilt til slutt var det kviss, og då var vi berre to att ved bordet våret, Per og eg. Hadde vi sett alle spørsmåla hadde vi vunne, men vi hadde hoppa over nr.1.
Det var bra frammøte tross det fine vêret. No skal eg ha på meg kvardagshabitten og sette meg med beina høgt. Vatna gjorde eg tidleg på dag.

Dagbok 2018: 26.mai

Klokka er 21.20, temperaturen er + 14 grader og det er stilt. Dagen starta med skodde, men etter kvart kom det sol og varme.

Noko av det første eg gjorde i dag var å plukke inn rabarbra. Laga ei rabarbrakake som eg tok med til Hareid seinare på dag. Klokka 13 kom Einar, som hadde vore i Volda og sprunge rundt Rotevatnet. Håkon kom hakk i hæl, for dei skulle vere to om å male i dag. No er garasjen ferdigmåla og huset påbegynt. Det vart ikkje så lang arbeidsøkt i dag sidan alle skulle vidare til Hareid på Verdas minste poesifestival -"Under linda", som den heiter. Det er Øystein og Solveig som har arrangert dette i fleire år på plenen ved huset sitt, trur det var sjette gongen i år, men første gongen eg har vore med. Det var musikk, diktlesing og song, plussmat ,kaffi og drøs. Heile Hareids "kulturelite" var møtt fram, og der var også langvegsfarande folk frå Ålesund og Volda. Og Christine de Luca frå Shetland, som har vore der fleire gonger før. Alt var kjekt og alt var vellykka, med eitt unntak. Ein ubeden gjest: NORDAVINDEN, isande kald som gjekk til marg og bein. Somme innfødde hadde forstått at dei måtte kle seg godt, Einar stilte i boblejakke og hue. Øystein hadde skrive på FB at vi måtte kle oss godt, men vi som kom frå Ørsta og kjende på temperaturen her, vi forstod ikkje problemet - alle fall ikkje eg, så eg fraus, trass i strikkajakke og strømpebukse.

Margrete henta og bringa meg i dag, og på heimvegen handla vi begge på Rema 1000. Så no har eg fått fylt opp att i kjøleskap og frysar.

Takk til Solveig og Øystein for ein fin dag. Bilde frå hagefesten har eg ikkje, men eg reknar med at Einar og andre legg ut bilde på nettet.

Dagbok 2016: 16.mars

Klokka er 21.00, temperaturen er +2,5 grader C. Vi vakna til fotsid skodde, men det letta etter kvart, og i 14-15-tida skein sola frå nesten skyfri himmel. 

Nils og Kjell for på sjøen i halv ni-tida, så eg nytta åleinetida til å bytte på sengane og vaske golva, så no er vi klar til å ta helg.

Fiskefangsten var ikkje så stor, småsei er der flust av i sjøen, men det er grenser for kor mykje vi vil ha av den sorten. Kjell har to hundar, så han tørkar fisk til dei. Vi hadde kokt småsei til middag, og somna som stein etterpå. Fisk er bra sovemedisin. den største seien skal vi steike ein av første dagane, best før frysing.

I dag var vi invitert til musikal på Folkestad skule, det var 10. klasse som stod for programmet. Vi hadde bestemt oss for å ta ferja 18.30, men då klokka var 18 sjekka eg nettet, og der var det ikkje sett opp ferje 18.30. Programmet skulle begynne klokka 19, så det var berre ein ting å gjere:  Køyre rundt fjorden!

Det var i ein viss fart vi for ut dørene, for vi trong tida. For sikkerheits skuld sende eg ei melding til Margrete, slik at ho kunne stoppe programmet til vi kom. Det såg litt svart ut ei stund, men så oppdaga vi at klokka i bilen var 8 minutt for snar. Vi nådde fram i god tid, men kva møtte vi då vi nærma oss Folkestad? Jau, ferjekøen frå 18.30-ferja ! ? Som altså gjekk likevel.

Musikalen var eit forrykande show med song og dans. Det som batt i hop programmet var ei tidsmaskin som gjekk heilt tilbake til 1950. og stoppa på alle 10-tal fram til år 2000. Vi fekk songar frå alle ti-åra. Det vi aldri kjem til å gløyme er nummeret "Ghostbusters" der  "spøkelser" i store kvite laken- vart jaga rundt i salen svevande på segways. Håper Margrete har bilde.

Dei er ikkje meir enn 13 elevar i klassen, så alle fekk vere med på mykje, og det er heilt utruleg at der er så mange gode artistar på ein såpass liten skule. Lars var lydmann og hadde Erlend som assistent i dag.

Etter programmet fekk vi kjøpe god mat og kaffi til inntekt for klasseturen til 9. klasse. Eg åt godt for å støtte ei god sak.

Heim att tok vi ferja i lag med Ruth og Harald.

Dagbok 2016: 1.mars

Klokka er 21.00. Temperaturen er + 4 grader; det har vore overskya, men opplett i dag. Nils reiste ut på Rjåneset før middag og såg etter båten, men han var ikkje utpå og fiska. 
Eg fekk gjort litt husarbeid mens han var vekke, blant anna  pussa eg vindua på utsida, og denne gongen trur eg dei vart bra. Eg har kjøpt meg ein nal som eg fekk prøve i dag.
Det vart spekemat til middag i dag sidan vi skulle på "fest" klokka 18.00. 
På Rotaryfestane er det overflod av god mat, nydelige smørbrød og bløtkaker. Der var ikkje så mykje underhaldning, men vi hadde det kjekt attmed bordet. Vi var 7 damer+ Nils attmed bordet vårt, og alle var godt kjende frå før.Det vart litt morsomt under utloddinga. Eg hadde berre pengar til tre lodd, Nils hadde litt meir, og han lånte også 100 kr til Eli som kjøpte lodd for pengane. Det var to av dei som sat ved bordet, som ikkje vann noko, men både Eli,Nils og Petra vann to gonger kvar. Brita, Hilde og eg vann ein gong kvar. Trur ikkje det var så mange gevinstar ved noko anna bord.Og eg som hadde berre tre lappar, to av dei med nr.01 på og ein med 02-vann på den eine 1-aren. På bildet over ser de mine gevinstar. Nils vann først ein kartong med kaffi, så eit par lestar og ein lyng. Det var ikkje dei heilt store gevinstane, men Eli vann eit par nydelige selbuvottar-fint strikka i skikkelig garn.
Marit sat på med oss både ned og opp att- det skulle berre mangle.

Dagbok 2016: 27.januar

Klokka slo nett opp sju (19) og vi er nettopp komne heim frå pensjonistmøtet.Temperaturen er +0,6 grader C og det hadde frose på utanfor Kulturhuset.Ja, sikkert på alle vegar og gater.
Før middag var vi nedover og dekka bord etc. og så hadde vi ein pause før vi møtte opp att klokka 15.00.
I dag var vi verkeleg spente på kor mange som kom, i og med at programmet rett og slett var ein film. Og den filmen var så lang at vi hadde valt å dele den i to økter, med mat og møte midt i. Så vi vandra frå kinosalen til flatsalen og tilbake til kinosalen igjen. Ikkje så farleg når det er så å seie vegg i vegg.
Nils var veldig skeptisk til opplegget, og eg var også i tvil. Nils trudde ikkje det kom meir enn 30 personar-toppen. Eg var meir usikker. Faktisk var vi nærmare 90 som møtte fram. Trur nesten det er rekord.
Filmen frå Færøyane freista spesielt dei som var med på turen sist sommar, men dei fekk ikkje sett korleis det verkeleg kan storme og regne der borte, for dei var utruleg heldige med vêret. I dag fekk vi sjå både regn og uvêr, drama og folklore. Eg synest filmen var fantastisk. Ikkje først og fremst handlinga, men natur, vêr, tidskoloritt , song og dans. Filmen er er ein dansk produksjon, ein av dei dyraste filmane som er laga i landet. Sjølvsagt var det mange som ikkje likte filmen så godt, men slik er det:"Til lags åt alle kan ingen gjera."
Nils såg ikkje filmen, han brukte tida til å rydde litt og prate med folk. Han orka ikkje å sitte i ro så lenge. Dessutan er han ikkje så glad i å sjå film.
I morgon skal eg skrive referat i avisa, men har ikkje tenkt å skrive så mykje om filmen.
No håper vi at dei som møtte i dag, også vi møte på årsmøtet neste månad.

Dagbok 2015: 6.desember.

Klokka slo nettopp 8 slag, noko so vil seie at klokka er 20.00. Temperaturen ute er + 4, 8 grader C, og i dag har vi hatt både vind og regn, men også gløtter av lys, nesten sol. Det voldsomme styggevêret har ikkje nådd oss - i alle fall ikkje enno. Ikkje mykje julestemning kva vêret angår i alle fall.
I dag har eg gjort botimot ingen ting, anna enn å rydde litt i huset og lage middag. Resten av tida har eg brukt til å lese i boka mi etc. Eg held på å lese Edvard Hoem si bok " Bror din på prærien", den er eit framhald av "Slåttekar i himmelen", som eg las to gonger.
No er vi nettopp attkomne frå Volda der vi var på konsert i kyrkja i lag med Margrete. Den direkte grunnen var no at Amanda skulle synge duett i lag med ei anna jente. Men det er kjekt å høyre på alle dei andre også. Amanda song "The little drummer boy"-ho har ei veldig djup stemme, men kan også synge lyst, i følge Margrete.Det er ikkje så ofte vi har høyrt henne synge åleine.
Trur det har vore rekordmange julekonsertar i Ørsta-Volda i år. Opp til fleire pr.dag - somme dagar. Og vi har vore på tre arrangement i løpet av veka,  det er litt uvant til oss å vere, men no begynner eg snart å forstå desse som går på "alle" konsertar, for det er kjekt!
Dermed er kakeboksane mine like tomme som før, og ikkje ei einaste julegåve er på plass. Men det blir vel jul i år også. Det viktigaste no er at Nils blir bra i foten og hofta, slik at vi blir litt meir mobile. Det gjekk no bra i dag, viss han ikkje får ein baksmell.
Elles er vel det største av alle juleønske i år FRED PÅ JORD- og det kan vi verken kjøpe eller bake.
I kveld ser eg fram til å sjå neste episode av den tyske serien. Sjeldan vi ser noko tysk av nyare dato, så det er litt spesielt. 
I dag er det Nilsmesse/ Nikolausdagen til minne om den heilage Nicolaus av Myra i Lille-Asia(Tyrkia)- det er han som er opphavet til Santa Claus, julenissen. I gamle dagar var det tradisjon å gi gåver denne dagen-helst til barna.
Bilda under viser vêret ca kl.12.00 i dag.

Dagbok 2015: 4.desember

Klokka er 20.45, temperaturen + 5grader og akkurat no er det opplett. Før i dag har det regna litt.
Vi er nettopp komne heim frå konserten i Fosnavågen, den begynte så tidleg som klokka18.00, fordi dei skulle køyre konserten to gonger.
I dag hadde vi fått billettar på rad 4, og derfor ville vi gå inn nede, ein kan nemleg gå inn i konsertsalen både frå 1.og 2.etasje. Resepsjonen er i 2., derfor ville vi ta heisen ned. Og kva skjer, vi går inn i heisen, og eg står face to face, bokstavleg tala, med Didrik Solli Tangen. Like vakker som på TV- men altså veldig liten og tynn.Han smilte og nikka til oss.(Heisen er veldig liten, så det er sagt) Eg blei sittande midt på rada og såg han inn i ansiktet under konserten også.
Hovudpersonen og leiaren for konserten var Ole Edvard Antonsen, gjestar var Didrik ST og Elisabeth Andreassen. Med seg hadde dei ein musikar på keybord, ein bassgitarist og ein på slagverk. At Didrik er flink å synge visste eg jo, men at Elisabeth song så bra, var litt overraskande.Eg har jo sjølvsagt høyrt henne på TV, men ho er betre live. 
Ho hadde ein kjole i 50-talsstil på seg-eg likte den godt. Knekort med "vimpa"skjørt. Vimpa tyder ikkkje foldar men "bølger". Ole E A spelte på fem ulike trompetar og var med og song eit par gongar også. Det var mange julerelaterte songar, men ikkje berre det. Av mange høgdepunkt vil eg  dra fram  "O helga natt" med Didrik og "Gabrielas song" med Elisabeth.
Dette er fjerde gongen vi har vore på konsert i Fosnavåg, den første gongen var 4.desember i fjor. Alle gongane i regi av pensjonistlaget.
For ein gongs skuld har eg litt anna å skrive om enn husarbeid, men eg kan no nemne at eg støvsuga alle teppegolvet før middag og rydda fint på kjøkkenet.
Vi hadde gledd oss til ein god kaffikopp med kake til på hotellet, men i dag var det berre kaffi, kaker hadde dei ikkje. Eg spurde etter kaffisukker, og då fekk eg ei slik hylse med strøsukker. Det var nedtur- men det var FØR konserten.
Kjekt å komme heim så tidleg, men eg hadde no sett TV på opptak.

Dagbok 2015: 2.desember

Klokka er 20.15, temperaturen ute er +5 grader C. Det har vore overskya og regn i heile dag.Men regn er betre enn snø på den måten at vi slepp snømòking. Vi er nyss komne heim frå pensjonistmøte og eg er nokså tom i hovudet. Nils ligg strak ut i reclineren, han har vondt i ryggen, truleg etter fallet på glattisen. Håper han kjem seg til att snart, for eg veit kor vondt det er å verke i ryggen- så det er ikkje noko eg unner andre.
Vi har vore opptekne med pensjonistmøtet det meste av dagen. På føremiddagen var vi på Kulturhuset og dekka og pynta.
Oddgeir Bruaset var ein kjekk kar å ha på besøk. Han sat ved VIP-bordet i lag med oss i styret+ Matias og Jorunn, som var der for å  spele piano og synge i lag med oss. Dei song også ein ny, vakker julesong i lag, berre dei to.
Oddgeir Bruaset kåserte/fortalde i bort imot ein time, men det var interessant heile vegen.
No skal eg ikkje gi meg ut på å skrive referat her, berre konstatere at det var eit vellykka møte. God mat fekk vi også.

Dagbok 2015: 19.november

Klokka er snart 17.00. Temperaturen er så vidt under 0, veldig kaldt etter det vi har blitt vant til i seinare tid. Sist det var skikkeleg kaldt her i Ørsta var vinteren 2012- 2013. Håper ikkje denne vinteren blir like kald. Men vêret har vore fint i dag , og vi hadde sola bortimot ein time i dag også.
Eg har vore ekstrem lat i dag. Før middag gjorde eg to ting; eg farga håret og så laga eg ein stor fiskegrateng. Prøver å variere all fisken, og til grateng får eg brukt småseien. Elles har eg pausa på sofaen med lydbok etc. Prøver å ikkje sitte for mykje sidan vi skal på konsert og sitte på harde kyrkjebenkar. Det kan bli ein "prøvelse" for meg.
Fann ei side med fransk grammatikk på nettet, og det frista over evne, så eg måtte berre la den vere. Eg oppdagar at eg gløymer mykje av det eg har kunna før, og då får eg det for meg at eg må repetere.
For ikkje å sitte for mykje, brukar eg å stå ved kjeøkkenbenken og lese avisene, løyse kryssord og soduku etc.
I morgon er det fredag igjen, det er berre utruleg kor fort tida går.
Konserten tek til klokka sju, men vi må vere ute i god tid, for dei sel billettar berre ved inngangen.

Klokka 21.30:
Så var vi heime att etter ein flott konsert i Volda kyrkje. Vi hadde avtale med Margrete om at den som kom først av oss skulle ta av plass til den/dei andre. Vi kom klokka halv sju ; då var kyrkja fullsett, og Margrete såg vi ingenting til. Eg sende melding på mobilen, og ho ringde tilbake. Ho sat langt framme på høgre sida, vi bak på venstre. Vi snakka med henne etter konserten og det viste seg at vi hadde kome om lag på same tid.
Vi snakka også med Harald og Ruth og ungane. Dei hadde kome klokka 18 og fått god plass langt framme.
Det var ein kjempeflott konsert med kor, solistar og musikarar. Eirik hadde det travelt; han song i koret, song ein song solo, spelte til eit par andre og i tillegg var han konferansier gjennom heile programmet i lag med ei jente. Dessverre fekk vi ikkje sjå så godt, og eg forstod heller ikkje alt som vart sagt, men det er no mitt problem.
Solonummeret til Eirik var "Jordan" av Rival Sons. Han spelte sjølv gitar til,med seg hadde han kameratar frå Lommerosk på gitar , trommer og bass. Eirik har ei spesiell, fin og lys stemme. Det vart sjølvsagt ståande applaus til slutt og ekstranummer frå koret.

Dagbok 2015: 8.november

Klokka er 17.15, temperaturen er + 11 grader C. Det har vore overskya og opphaldsvêr i dag.
Eg vakna med voldsom verk i rygg og hofte m.m. så då er det berre å prøve å bevege seg. Det vart til at eg bytta på sengane og moppa over soveromsgolvet. Seinare vaska eg håret i håp om å bli bra nok til å fare bort i Aasentunet der blant andre Øystein skulle lese frå ei bok med korte tekstar av fleire forfatterar, "Steikje te styr" heiter boka. Harald Grytten var der også og las og ein frå Sykkylven som eg ikkje fekk tak i namnet på.Etterpå vart det ein diskusjon om "Sunnmøringen".
Eg var litt skuffa fordi vi skulle vere i kafeen, for der er ein grusom akustikk; eg trudde vi skulle vere i salen. Men det varte berre ein time, og vi trefte mange vi kjende. Solveig var også med. Mange spurde Nils etter båten, det er blitt reine
 "snakkisen " etter at det stod om den i avisa. No kunne vi fortelje at båten er komen til rette, den var ikkje stolen. Han som tok den gjorde det i god tru-han tok berre feil båt. Oppklaringa kjem i avisa på tysdag!
Etterpå reiste vi til Volda og åt kinamat. Vi plar ete lunsj der av og til, men i dag var det middagsmeny, og eg lurte på om vi skulle ta nr.20. "Den har dokke hatt før", sa kinadama  "den er litt sterk, men dokke lika sterkt". Ja, ho hadde rett, som alltid. Ho har god hugs.
No har Nils sett på kaffien, og funne seg fotballkamp. Noko feiring av farsdagen blir det ikkje-men neste helg han Nils bursdag, så vi tek det att då.

Dei tre forfattarane som las. Det er fleire enn dei tre som har skrive i boka.

(Foto: Solveig)

Dagbok 2015: 24.oktober.

Klokka er ca 22.00, temperaturen er + 6 grader C og det regnar. Før middag var det opplett, mildt og fint. 
Vi er nyss attkomne frå Fosnavåg, der vi har vore på konsert med "Nordic Tenors". Konserten varte ca 1,5 timar og var veldig variert, det var opera-ariar, poplåtar, musikal og ikkje minst JODLING. Alle melodiane var slike vi har høyrt før, kjent stoff altså, og det er jo det vi helst vil høyre, vi som har levd ei stund. 
Dessutan hadde dei med seg ein veldig flink pianist. Fin konsert! Turen utover-og heim i minibuss gjekk heilt fint.
Før konserten sat vi ein times tid i resepsjonen på hotellet og drakk kaffi og åt kake.(Nydelig eplekake).
Vi for frå Ørsta klokka 17. Før den tid hadde eg vaska eit par maskiner med klede, stroke litt og laga middag. Elles brukte vi tida til å lade opp til kvelden.
Det er kjekt å fare på konsert i lag med mange andre, men eg synest det er litt trist at ingen av dei gamle vennane mine er med. Med gamle venner meiner eg dei eg kjende før eg begynte i pensjonistlaget, ingen av dei er med i "laget".

Dagbok 2015: 1.oktober

Var innom biblio i dag, og fekk med meg eit par lydbøker som eg skal rippe. Så får vi sjå om eg les dei også.

Klokka er 19.45, temperaturen er + 13 grader, og akkurat no er det nokså fint ute, lettskya og litt vind. Men det mørknar tidleg. Vi er nyss heimkomne frå pensjonistmøte, og Nils for nedover for å sjå andre omgangen av ein fotballkamp.
Dagen i dag har stort sett dreia seg om pensjonistmøtet på Eldredagen.
Før klokka 12.00 var vi på plass på Kulturhuset for å dekke bord og lage til.
Då vi kom heim åt vi litt og slappa av ei stund etterpå. Eg sov dårleg sist natt så eg trong ein pause.
Møtet tok til klokka 16.00. Vi hadde besøk av ein pensjonert lærar frå Dale i Sunnfjord som fortalde om Jakob Sande, spela trekkspel og song. Vi hadde også allsong, og eg hadde lagt ganske mykje arbeid i eit fint songhefte. Og så blir eg gjort merksam på at eg har skrive feil på framsida.  Der hadde eg kopiert eit fint bilde av diktaren og skrive med store bokstavar og tal: Jakob Sande 1006-1967.
Ja, det er ikkje første gong eg trykker feil, og treffer 0 i staden for 9-talet. (Eg har til og med prestert å skrive at eg er fødd i 1040) Dette ergra meg, men ikkje dei andre.
Møtet vart vellykka og damene i Lions hadde laga nydelige snittar og eit hav av fantastiske kaker.
Eit skår i gleda for meg, var at Møre-Nytt ikkje dukka opp, så då må eg skrive sjølv. Synest jammen lokalavisa kunne støtte litt opp om dei eldre-dei er no til stades overalt elles.
No er eg litt sliten, så eg skal slappe av litt med boka mi, så får eg skrive referat i morgon.

Dagbok 2015: 28.juli.

Hjørundfjorden/Leknes.

Skår.

Finnes.

Bjørke

Klokka er no 0.30 og temperaturen er + 10 grader ute. Det har vore ein fin, lettskya dag med mykje sol,men varmen let vente på seg.
Det eg gjorde i dag før middag var å lage ei kake, lufte diverse dyner og puter og legge i hop klede.Nils koka lange til tidleg middag, så vi fekk tid å "sove middag" på altanen før vi skulle fare på tur. Bussen skulle gå frå Møre-bil klokka 14.45.Og då var vi klar.
Bussen køyrde oss til Sæbø, der vi gjekk rett om bord i båten. Det var frisk bris på Hjørundfjorden i dag, men eg sat ute heile tida i vind og sol. At eg sat på eit kaldt underlag av jern, tenkte eg ikkje på før eg kom heim. Skipsføraren gaida oss inn fjorden og fortalde litt frå dei små bygdene. Eg er rimeleg kjend der frå før, men han hadde diverse anekdotar i tillegg til geografien.
På Øye slo vi oss til ved båthamna med kaffi og kake. Prinsessekaka mi vart veldig godt motteken-alle skrytte av kor god den var.(Og det var den). Då det leid på rusla vi opp i hotellhagen der det var sett ut campingplassbord og anna. Dessverre var der mykje skygge så det vart etter kvart ganske kaldt. Det vart ei stund å vente før konserten tok til klokka 19.30.
Det var berre to av Vamp-gruppa eg kjende att, gamleguten sjølv og sonen som eg berre kallar "Liten fuggel". Han som var hovudvokalist er ny, trur eg, han song bra, men vart etter kvart nokså hås i målet.Alle var flinke, men yndlingen min er den vesle fuglen. Dei avslutta konserten med Tir na Noir, berre for at folk skulle reise seg og klappe for meir. Då kom fuglen inn att og song ein song om fuglar- og avslutta med "Liten fuggel"-delvis med allsong. Det var fin stemning i hagen, med unntak av dei som var meir opptekne av øl, vin og høgrøsta prat. Dei irriterte oss andre litt. Og dessverre, Ingeborg, dei song ikkje songen din.Nils kjøpte eit fint hefte med songtekstar og bilde, som han sølte kaffi på i ryggsekken sin...........
Heimturen gjekk med buss gjennom Nordangdalen og Honndalen i nydeleg vêr. I styggevêr er ikkje den turen noko særleg. Eg fekk ikkje til å ta gode bilde av scena, men det kjem vel eitt og anna i avisa. No drikk eg sitronvatn og håper på betre tider.

Nordangsfjorden/ Øye

I hagen til hotellet på Øye. Bilda er dårlege, men håper dei kan gi eit inntrykk av stemninga. Elles har eg alt no funne fleire betre bilde på FB.

Dagbok 2015: 4.mars

Klokka er snart halv sju, og klokka sju skal vi reise utover til Fosnavåg på konsert.Vi er 11 pensjonistar som reiser i lag - med Maxi Taxi, til konsert med 12 tenorar. Vi skal på ei ekstaframsyning som tek til klokka halv ti.
Ute er det snø og slaps og + 1 grad C. Eg har kvilt meg mest mulig i dag for å klare å sitte  den tida konserten varer.
Nils var på vedaskog i dag igjen. Eg styrte litt heime, strauk nokre klede m.a. Til middag laga eg steikt blålange med remuladesaus. Steikte fisken på panna først, og i steikomnen etterpå. Det blei veldig godt.
Ei stund etter middag fekk vi besøk av Margrete, Ingeborg og Erlend. Det var veldig hyggelig å ha nokon å drikke kaffi i lag med. Og Margrete fiksa kamera mitt; som eg trudde var det ikkje noko alvorleg i vegen, men eg er ikkje særleg flink til å sette meg inn i alle duppedittane.
I dag er det feiring på Kongsberg, det er fem år sidan minstemann kom til verda. Eg skriv blogg no, i tilfelle eg ikkje orkar når eg kjem heim att. Har sett Anno på opptak !

Om konserten:
Av dei 12 tenorane kom 10 frå GB, ein frå Frankrike og ein frå Canada. Alle kunne sjølvsagt synge, det må ein nesten rekne med. Dei hadde med seg fire musikarar, ein på slagverk, to med gitarar og ein med tagentinstrument. Skal eg kritisere noko, måtte det vere at musikken var litt for sterk i forhold til songen. Tolv tenorar, dei fleste unge, med kvar sin mikrofon lagar bra mykje lyd !
Konserten var eit fyrverkeri av song og dans.Alle tenorane var kledde i mørkegrå dressar og svarte lakksko, det var stilig. Men at dei i tillegg til å synge dansa i tillegg var meir enn imponerande. Repertoaret var mangfoldig, frå Nessum dorma til rock. Konserten varte i vel to timar inkl. ein liten pause, så det var nesten midnatt då vi kunne sette oss i bilen. Dei hadde to slike konsertar på ein kveld, så dei må ha bra kondis.
Vi var heime i 1-tida og då måtte eg sjå opptaket av Anno før eg la meg.
No har vi bestilt billettar til Vampkonserten på Øye 28.juli, pensjonistlaget arrangerer turen, som også inkluderer båttur på Hjørundfjorden. Trur alle plassane er borttinga alt.

Dagbok 2015: 7.februar

Klokka er19.15, temperaturen ute er +1 grad C. Nokon storm er det ikkje her, men det kjem nokre vindrosser av og til.
Vi kom nettopp att. Vi har vore i lag med Margrete og ungane, først på musikal og så på Rosabella og ete pizza etterpå. Vi feira både musikalen og morsdagen i morgon under eitt.
I år var det 20 årsjubileum for musikalarrangementa ved VVS, så det var litt spesielt opplegg. Dei sette saman ein kabaret, eller kva eg skal kalle det, av songar frå alle musikalane.Der var mange utruleg flinke songarar, dansarar og musikarar.
Eirik var flink, som forventa, som tøff offiser. Han song to songar, delvis solo, med kor innimellom. Eg har nesten lyst å reise til Fosnavåg og sjå heile forestillinga ein gong til. Det kjem sikkert bilde i Sunnmørsposten, og Eirik er lett å kjenne på grunn av uniforma.
Tidlegare i dag var Nils ut og såg etter båtane, vår og Jørn sin, og fekk tatt nokre bilde av Ørstafjorden. Det er ikkje ofte her blæs såpass. Men båtane hadde det bra. No skal vi kose oss med kaffi og TV.

Bildetekst: Eirik Trovåg Bjørneset imponerte i sine solonummer i "Be our guest". ( (Han song "Come together "(Beatles) og "Thriller" (Michael Jackson)).