fredag, mai 31, 2024

Dagbok 2024: 31.mai




 
Klokka er no 17.45, temperaturen ute er + 19 grader , vi har hatt skodde i heile dag, men den minkar heile tida. Og det er opplett. Eg var nettopp ein tur på Vernet, der var ikkje så mykje sol, men det var ikkje kaldt.

I dag morgon såg det litt skummelt ut med veret, så eg tok sikte på ein innedag. Då fekk eg ein lys ide; eg kunne sylte plommene frå i fjor, dei hadde eg i frysaren. Som sagt, så gjort, men eg måtte ein liten tur på butikken først for det var nesten tomt for sukker. Å sylte plommer er ein enkel jobb og i dag fekk eg ti store glas med plommesylte. Det gleder eg meg over, for eg et nesten berre sylte på skivene. Litt rot og oppvask vart det, men så tok eg og laga middag med det samme, og fekk rydda opp det rotet også.

Det er to ting som kan drive meg til vanvidd; det eine er sudokuen i Møre-Nytt, det andre eg datamaskina mi. Og i dag har eg kava med begge deler. Om eg ikkje alltid greier sudokuen som eg tek frå maskina kvelden før avisa kjem ut, så brukar eg å fullføre til frokosten dagen etter. Men ikkje i dag, eg har prøvd å begynne frå begynnelsen om att og om att, men er enno ikkje i mål.

Datamaskina får slike underlege tokter der ho ikkje vil godkjenne verken adresser eller passord, det virkar som om Google og  MIcrosoft krigar om å ha meg som kunde. På denne maskina eg har no, har vi brukt Google. Når eg seier VI så er det fordi eg har diverse hjelperar som eg må sende bod på når alt stokkar seg. Men eg vil no helst greie meg sjølv.

Eg er litt dagvill i dag, sidan eg tok "fredagsvasken" på onsdag, og fekk fri frå treninga i går. I dag er det siste dagen i ein mai -månad som vi neppe har sett maken til før. Men vi kan no håpe på fine dagar i juni-juli-august også.

God helg!

torsdag, mai 30, 2024

Dagbok 2024: 30.mai


 Klokka er no 18.48. temperaturen ute er + 19 grader C. Det har vore fint i dag,opplett men ikkje myke sol. Eg følte at eg hadde fridag i dag, sidan eg ikkje skulle på trening. Men eg stod no opp til vanleg tid. Eg shina meg litt opp ,for Marit og eg skulle på butikken i lag.

EG hadde ein lang prat med bodil i telefonen. Men telefonen min er ikkje i orden ,trur eg, det var vanskeleg å høyre, men det er vel eg som ikkje kan å bruke den.Når Amanda får litt fri så kan kanskje ho sjå litt på den.

Eg lurte på om eg skulle gå på vernet i dag, eller om eg skulle gjere ein innsats i hagen. Det blei Vernet, det var fint å gå der i dag og eg sat liytt på kvar benk i dag også. Då eg kom heim att laga eg meg ein slgs middag før eg gjekk ut o begynte å rydde i hagen. Der eg rydda i dag har eg rydda før i vår, men skvallerkålen kjem fort att. Eg  tok eit bilde av resultatet, men har ikkje fått det inn på bloggen enne. Bildet over tok eg på Vernet i dag.I morgon er det siste dagen i mai, ein mai månad som vi knapt har sett maken til. Det er nesten som om vi har hatt ein ein heil sommar .

                                                   Her rydda eg, luka ugras m.m.




onsdag, mai 29, 2024

Dagbok 2024: 29. mai



Klokka er no ca 18.30 . temperaturen ute er +20 grader C, sola skinog det er nydeleg ver no. Sist natt hadde det regna igjen, men regn om natta og sol om dagen må no vere heilt perfekt.

Eg hadde ikkje så mange planar for dagen, men sidan eg ikkje hadde vaska til sist helg, kunne eg ta ein onsdagsvask i dag og det gjorde eg. Tok ein liten klesvask også. Då eg var ferdig gjekk eg ein tur på VERNET, eg trefte berre ei eg kjende i dag, og eg sat og slappa av på alle benkane.

Då eg kom heim laga eg middag og åt-

I dag morgon var eg låk i venstre hofta, det er eg ofte, men det går over. Det kjem frå ryggen og i går ettermiddag jobba eg mykje i hagen. Eg hadde planlagt å legge kjøpemold på jordbæråkeren min i dag. Og det fekk eg faktisk gjort. Eg tok sekken i trillebåra og hadde ein spade som eg tok molda med. Det vart på ingen måte perfekt, men viss det regnar i natt også får vi sjå koleis det står til i morgon. Eg har att ein sekk med kjøpemold som eg kan bruke viss eg vil. Eg har ikkje greie på det, men kan ein gjødsle jordbæråkeren med vanleg plengjødsel ? Eg kjøpte berre ein sekk gjødsel i år, for no tek dei litt for godt betalt.

I morgon skulle vi eingentleg ha vore på trening, men fysioterapeuten hadde noko anna som ho måtte gjere i morgon, så då får vi fri. Eg trur at Marit og eg kanskje tek ein handletur.

I dag er det Amanda sin fødselsdag, men det blir ikkje råd å feire så mykje midt i eksamenane. Når ho blir ferdig med eksamen i år er ho utdanna lærar, eller lektor som det heiter no. Lærarstudiet er no på 5 år, då eg tok utdanning var det 2 år,  eg tok to år på DH i Volda mange år seinare, men eg blei ikkje lektor, berre adjunkt.

Amanda blir sikkert ein god lærar, ho er no nesten utdanna hunde-dressør, og det kan komme vel med. Sidan ho er fødd i året 2000 er det alltid lett å hugse kor gammal ho er. I juni månad har vi mange fødselsdagar i familien+ Solveig 3.juli, det blir kanskje ei fellesfeiring i år også ?No ser eg at det er tid for nyheiter, har ikkje sett så mykje på TV siste dagane, så eg må oppdatere meg.


tirsdag, mai 28, 2024

Dagbok 2024: 28.mai

Klokka er no 20.12, temperaturen ute er +18 grader og det er altfor kaldt.-. Eg sat og såg tv ei lite stund og begynte å fryse. Varmen er nok over for denne gong. Dessverre.

Dagen i dag begynte med trening, som vanleg på tysdagar. Marit og eg handla på KIWI på heimvegen, og då eg var komen heim  gjekk eg ein tur på Vernet,mens eg gjekk i treningsklede. Eg tok det med ro og sat litt på alle benkane. Siste benken fekk eg selskap med naboane mine som også var ute og trimma.

Då eg kom heim laga eg middag, i dag vart det pølser og potetstappe m.m.

Etter ein liten pause gjekk eg ut og begynte på hagearbeidet mitt. Eg fekk reinska nokså bra i "jordbæråkeren", men stileg vart det ikkje ,for plantane har flytta på seg og står ikkje lenger i fine rader. Det var mykje arbeid og det tok si tid. Eg hadde tenkt å få på meir mold, men det måtte eg utsette, på grunn av RYGGEN, som ikkje likar at eg bøyer meg. Det kjem kanskje ein bra dag i morgon også, men slik som vi har hatt det no i heile mai månad kan vi ikkje forvente så mykje lenger. Eg føler nesten at sommaren er slutt, eigentleg er den ikkje begynt.

I dag kunngjer Olaug jr. at ho ventar barn i oktober, så no har vi noko å sjå fram til. Men dei bur i Bergen så det blir vel ikkje så mykje vi får sjå til barnet i begynnelsen. Håper at alt går fint. Det er berrre det 2.oldebarnet mitt, Bodil har fleire. Men det er ingen konkurranse.

I morgon har Amanda fødselsdag og det er lett å hugse kor "gammal" ho blir. Ho vart fødd i året 2000.

Eg sette på varmepumpa men det tek si tid før det kjem noko varme, men det er kanskje litt for mykje av det god å fyre i omnen.
 

mandag, mai 27, 2024

Dagbok 2024: 27.mai

 Klokka er no 18.11,, temperaturen ute er +22 grader C, det er delvis skya, men ikkje nedbør.

I dag tidleg tenkte eg at eg skulle gjere ferdig"prosjektet mitt" på føremiddagen, og så kunne eg gå tur på Vernet utpå ettermiddagen og kanskje fare på butikken også.

Eg blei ferdig med prosjektet og gjekk inn og åt litt lunsj i 14-tida.

Men eg hadde fleire jobbar på vent, og så snart eg var ferdig med ein jobb, såg eg noko meir som måtte gjerast. Til dømes raka eg opp tørt gras som hadde lagt etter plenklippinga, eg reinska og rydda beddet nedanfor garasjen-og diverse anna. Vatne måtte eg også, for det er veldig tørt alle stader no. 

Eg hadde ikkje klokke på meg, så eg ante ikkje kor langt på dagen det leid då eg endeleg greidde å slite meg laus og gå inn. Eg prøvde å gjette- og gjetta "Ti på halv seks"- men klokka var faktisk18.00 då eg kom inn. Eg har slått frå meg turen på vernet i dag, for no skal eg lage meg litt middag, og så må eg slappe av litt. Sjølv om eg har mykje energi att- hagearbeid likar eg kjempegodt, berre det er høveleg ver. I morgon er det trening igjen, og då blir det ein tur på butikken også, for no er det mykje eg treng.Husarbeid utset eg til det skyar over.

Eg kjøpte tre slike på tilbod i fjor, no har denne blomstra av, men dei andre to har ikkje begynt enno.

søndag, mai 26, 2024

Dagbok 2024: 26. mai



 Akkurat no, klokka 16.16, viser termometert på trappa + 30 grader C, men er ser at det skyar opp, og då
trur eg vi får ei skikkeleg regnbye, og det treng vi, og det treng alt som skal vekse.

I dag har eg hatt ein litt uvanleg dag, Eg visste at Solveig skulle komme ein tur innover, men ikkje akkurat tida. så eg begynte å rense meir nede i jordbæråkeren  min, for der var det berre kaos. Då Solveig kom gjekk vi ein tur på Vernet i lag; eg trur at både ho og Rasmus vart overraska over kor stort byggverket eigentleg er. Det ser ikkje så stort ut nedanfrå. 

Eg hadde ikkje laga til middagsmat så eg inviterte Solveig til kinesisk mat i Volda. Vi fekk store porsjonar - så vi vart godt mette. På vegen bortover var vi inn på Askjellhaugen og vatna blomsten på grava og det kom vel med for blomsten. No skal eg ut og sjå om det er noko meir eg kan gjere før det eventuelt kjem regn.Eg heldt på med å reinske i jordbæråkeren før i dag.Eg er glad for kvar dag eg får stelle fint til i hagen.

Ein slik mai månad som vi har hatt i år kan eg ikkje tru at vi har hatt nokon gong før.Alt er kome tidlegare enn før- t.d. bær og plommer.


lørdag, mai 25, 2024

Dagbok 2024: 25.mai

 

Dette er den finaste av Marit sine Rhododendron, og no såg er på Plantasjen at dei har allereie sett ned prisane på desse plantane, og der var nokre som likna denne. Eg kjøpte tre små kvite i fjor på salg, dei er no fine men ikkje som denne

Klokka er no ca 17,30, temperaturen ute er +25 graderC. Det var litt skodde på morgonen, men den forsvann fort.Eg gjekk tur på Vernet frå klokka 10, og då eg kom heim sette eg i gang med hagearbeid. Først måtte eg klippe plenen attmed postkassene, og der var det meir som måtte gjerast, som diverse klipping med saks,raking etc. 

Så skulle klipparen spylast så den tok eg ned på plenen, og det vart ikkje berre klipparen som fekk nyte strålen frå slangen, heile hagen fekk drikke og alle blomsterbed og plantar rundt om kring. Eg sparer ikkje på vatnet, der er enno snø i fjella-men ikkje mykje.

Der var ei jasminbuske som trong litt stell. Eg hadde eigentleg tenkt å klippe den heilt ned, men det var ikkje så lurt, for mange "greiner" var heilt døde og andre var bra, så eg måtte sortere. Eg har no eigentleg lyst å ha den buska, men ho fekk  ikkje rett stell i fjor då hausten og vinteren kom så brått. No let eg dei friske stammane stå att så får  eg sjå om den overlever slik at eg kan klippe den i fasong til hausten igjen. 

Eg begynte på beddet nedanfor tilbygget men det må eg vente litt med, for det blir ein skikkelig Jobb. No håper eg berre at eg skal få litt skikk på hagen før det blir regn og stygt ver. Sjølv om det er ganske mykje å gjere i ein hage / tomt så likar eg veldig godt å styre i hagen. Det som eg ikkje er fornøgd med er ryggen min, så eg må heile tida ha ein stol som eg kan slenge meg ned på- I halv 4 tida gjekk eg inn og tok meg litt mat, og etter kvar vart det såpass seint at eg ikkje gjekk ut att.

Eg passar katten til Marit når ho er vekke, men i dag hadde eg ikkje sett Lollo, så eg gjekk ut på trappa og ropte på henne og då kom ho, eg trur ho hadde vore i garasjen til Marit.

Eg hadde tenkt meg ein tur på butikken i dag, men slo det frå meg og tenkte at eg kan ete av det eg har.

I morgon er det søndag, men det kan hende er lurer meg til å jobbe litt på "prosjektet" mitt.Det er no eit fredelig arbeid og ikkje bråk.



fredag, mai 24, 2024

Dagbok 2024: 24.mai







 Klokka er no 18.10, temperaturen ute er + 22grader c , men det var mykje varmare før i dag, minst +28 var det her.

I dag hadde eg store planar om å få gjort noko ute. Først skulle eg på VØR med sju svarte sekkar med hageavfall. Det gjekk heilt greitt, -der var ei anna dame også med hageavfall - ho hadde mykje gras. Eg køyrer ikkje mykje gras bort dit, men prøver å kompostere og få mold av graset. Det går bra,og det blir god jord. Eg har lagt merke til at dei fleste som kjem med hageavfall på VØR er damer i pensjonistalder, det er vel vi som har best tid til slikt. Når mennene kjem er det med store tilhengerar og store tre og busker.

Det blei plenslått i dag, og det var ikkje berre moro, for det vart utruleg varmt. Klipparen fungerte fint, men kvar gong eg stoppa for å tømme, måtte eg inn og lade opp batteriet. Eg syntest det var litt rart, for slik har det aldri vore før. Så prøvde eg å ta batteriet av og på igjen, og det funka. Det vart etter kvart veldig varmt så eg måtte ta pauser, men eg kom no i mål på ein måte.

Middag var det ikkje snakk om i dag, så det vart lunsj med brødskiver, men det kan hende eg finn eit kvart godt til kvelds.

Eg har vore ute og jobba på etter middagen også, då brukte eg opp sekken med kugjødselkompost. Eg spanderte den på dei som veks i rosebeddet ved garasjen.Eg har heile tida lyst å gjere meir, men både ryggen og føtene protesterer. Av samme grunn har eg ikkje gått på Vernet i dag heller, men eg trur eg har gått nok.

No har Janne og familien reist på hytta og Marit er med,og då kom  katten ned til meg med det samme. Janne og Even blei besteforeldre for første gong i går. Det var ei fin jente dei hadde fått Stian og Anja, eg har sett bilde, og jenta såg ut som ho var fleire månader gammal. Eg hugsar godt då Janne vart fødd-og no er ho bestemor. Og Marit er oldemor til tre. Tida går. Det er fredag i dag, men eg har utsett fredagsvasken til i morgon eller ein annan dag. Eg synest det er viktig å stelle ute nå veret er så fint, det kjem tidsnok regnversdagar  og då kan eg vaske inne. 

Eg ønsker alle som er innom bloggen ei fin ,nydeleg og varm helg.

torsdag, mai 23, 2024

Dagbok 2024:23.mai


Klokka er no 19.13, temperaturen ute på veggen ute er + 25 grader, men eg trur det er varmare inne, det kjennest slik ut. Det er ikkje klårt , men skyene er lyse og lette.

Eg har hatt ein aldeles artig dag i dag. Først var eg på trening, så vatna eg i hagen, mens eg venta på at Margrete skulle kome, for ho ville ha meg med på biltur i dag. Det vart ikkje ut mot havet denne gongen, men inn i Honndalen.Det er så fint å køyre innover der, og så visste eg om ein butikk der inne som sel dameklede blant anna.

Eg fann meg ei bukse som eg slepp å legge opp og bevilga med ein ny topp til. Vi gjekk bort på hotellet for å sjå om dei serverte mat. Det gjorde dei, men vi måtte opp i 2. etasje, der vi vart servert av ein engelsk "kelner"-i alle fall snakka han engelsk, men det var no ikkje noko problem når ein har ein engelsk- lærar med seg- Det var ein litt spesiell meny vi sette i hop. Men det var no godt. 

På Heimvegen var vi innom Plantasjen og handla mold og blomster, før vi køyrde rundt Berkneset og heim. Takk til Margrete for ein kjekk tur i dag. I morgon får eg prøve å komme meg bort på VØR med alle sekkane mine.

onsdag, mai 22, 2024

Dagbok 2024: 22. mai







Klokka er no 19.48, temperaturen ute er+23 grader no, før i dag var den oppe i +28grader C.Det er sol, varmt og deilig , så lenge det varer .Alt kjem tidleg og blomstrar og i kveld såg eg grøne rips på ripsbuska. Eg meiner det må vere veldig tidleg.

I dag hadde eg planlagt arbeidsdagen min: eg skifta på senga mi og henge ut på altanen sengetøy og golvteppe , før eg vaska rommet. Eg sette på klesvask+trommeltørk seinare. Og så gjekk eg ut for å jobbe på "prosjektet" mitt,men så såg eg at behovet var større ein annan stad-så eg ombestemte meg og begynte å rydde og klippe etc.der som den gamle    kompostkassa står. Heile området måtte renskast opp for skvalderkål, brenn-nesler og andre  uønska plantar. Det vart veldig mykje arbeid, for eg måtte ned på nabotomta og rydde på muren derifrå også. Eg fekk gjort mykje , men vart ikkje ferdig. Eg måtte kvile ryggen litt og vatne rundt omkring; eg vatnar nesten kvar dag men like tørt er det.

Nok om det. Marit og eg skulle på pensjonistmøte, ikkje på filmen som vart vist først, men på møtet etterpå. Vi orka ikkje å sette oss inn og sjå film i det fine veret.

Men på møtet etterpå var vi. Der kom Marie Austerheim Riise og Karen Rosenberg Olsen(gift med Egil Olsen) Marie spela og Karen song. Ho var heilt fantastisk, ho er utlærd operasongar-trur eg. Det høyrdest i alle fall slik ut- Vi fekk pizza til mat og heldigvis hadde dei kjøpt inn drikke også.

Det kom ei dame frå kommunen og snakka om hus og rom for eldre. Det vart litt langdrygt. Turen til Astruptunet er full booka, men ein kan sette seg på venteliste i fall der er nokon ikkje kan fare likevel.

Det var eg som køyrde i dag , i morgon skal Marit køyre til treninga, men eg har tenkt meg ein tur på VØR etterpå, for no har eg meir enn nok sekker fulle. Eg håper vi får fleire fine dagar slik at eg får rydde skikkeleg opp. 
Eg hadde så smått tenkt meg på Vernet i kveld, men fann ut at eg trong å kvile litt.


tirsdag, mai 21, 2024

Dagbok 2024: 21.mai

Klokka er no 17.32. Temperaturen ute er +25 grader C, og sola skin. I dag har det vore varmt heilt frå morgonen av, så vi var ikkje heilt begeistra for å fare på trening, men det gjorde vi. Det var eg som køyrde i dag. Etter treninga var vi bort på Ose og kjøpte blomster med gartnaren frå Urke. Han kjem kvart år og er her nokre dagar. Eg kjøpte berre ein rosa geranium, det gjer eg kvart år. Marit kjøper meir, men ho er flinkare å stelle blomstrane sine enn det eg er. Vi var også ein tur på ALTI, for Marit skulle ha seg nye sandalar. Og det fekk ho. Klesmotane er litt variable for tida, nokre kjem i nymotens klede, mens andre held fast i dei gamle. I dag såg eg t.d. ei ung dame i nesten golvsid kjole-eg synest det er rart å kle seg slik når ein ikkje skal vere i selskap t.d. Men alle har rett til å kle seg som dei vil. Eg også.

Eg køyrde heim og sette av Marit før eg køyrde fram på Mosflata på EIK-senteret. Der har eg vore mange gonger i det siste. Men i dag fekk eg det eg skulle ha, nemleg batteri til plenklipparen min.  Ein av dei som jobba der hadde kjent meg att og kom med batteriet til meg. Dei hadde nettopp fått det. Rasmus hadde skræmt meg med å antyde prisen, så eg var budd på at det ikkje var heilt gratis; det kosta ganske nøyaktig 1100 kr. Eg fekk ikkje sjokk.

Eg vart sittande på benken med Marit ei god stund. Vi diskuterte kor vidt vi skulle gå på filmen før pensjonistmøtet i morgon. Sidan dagsturen i år går til Astruptunet handlar filmen om Nikolai Astrup. Vi vart samde om ikkje å sjå filmen, men gå på møtet som tek til litt seinare, etter filmen altså. Det er ikkje fleire bilettar att til turen, eg visste ikkje at dei hadde begynt å bestille, så eg vart snytt for å vere med. Eg hadde ofte lyst bort på andre sida av Jølstravatnet når vi køyrde nedover mor Førde, men det vart aldri tid til det.

Eg hadde tenkt å jobbe vidare med prosjektet mitt frå i går, men det var for varmt! Det var litt betre å køyre klippar, så då valde eg det. Eg køyrde med oppsamlar og tømde tre gonger. Eg tok berre plenen rundt huset i dag, men det er ikkje så mykje i å ta resten når eg vil.

Eg har ikkje gått tur på Vernet i dag; eg plar skofte turen dei gongane eg klipper plen. I morgon er det vel dags å køyre på VØR, eg har mange sekker med "hageavfall" no; eg plar køyre når eg har 6 stappfulle sekker, og det nærmar seg. Plengraset komposterer eg her heime.

No er det spennande om det blir fleire slike dagar,men eg må for sikkerheits skuld sette klipparen under tak.

Mai månad har gått veldig fort til denne tid, men det er no håp om meir sommar framover.
 

mandag, mai 20, 2024

Dagbok 2024: 20.mai


 Klokka er no 18.07, temperaturen ute er  + 19 grader, og sola skin. Det har ho gjort i heile dag, men på føremiddagen var det litt kjølig. Marit og eg hadde snakka om å fare på Plantasjen i dag, men utsette det til i morgon. Eg gjekk tur på Vernet på føremiddagen, og det var fint. Eg tok mange fine bilde, men det er så mykje tull med telefonen at eg har problem med å få bilda over på PC-en. Dei som høyrer til familien får vel sjå bilda på FB-sida vår.

Eg bestemte meg for å jobbe i hagen i dag, kjekt å få begynne tidleg og bli ferdig. Eg tok først beddet ved Urke-garasjen, og eg syntest eg fekk det fint til, Tok litt mold frå ein sekk og hadde på før eg vatna.

Så klipte eg litt med saks her og der, vatna overalt -nesten.

Så har eg eit prosjekt nederst i hagen der Thujaene stod. Dei vart nedsaga i fjor. Eg har køyrt på litt mold no og då der som stubbane står att, og så har vi tenkt å plante noko. I mellomtida har skvalderkålen flytta inn og formera seg veldig. Men i dag blei det styr, for eg begynte å ta opp alle stilkane og rista molda frå rota. Eg blei faktisk nesten ferdig før eg måtte gi meg. Men ferdig er eg no ikkje; for eg må spade opp og rake reint. Så skal eg legge kjøpemold oppå og så i grasfrø. Då kan vi i alle fall få klippe graset mens vi ventar på det vi ev. skal plante. Som dokke forstår så er eg nokså glad i hagearbeid. Sjølv om ryggen er dårleg, så blir eg heilt bra med det same eg set meg ned. Veret kan eg ikkje gjere noko med, så eg må nytte høvet når det er fint ute.

Men i morgon er det kvardag igjen og trening. Men vi har hatt mange flotte dagar hittil i mai.

No skal eg lage meg pølse og stappe til middag.



søndag, mai 19, 2024

Dagbok 20 24: 19.mai Pinsedag





 Klokka er no19.15, temperaturen ute er +12 grader, det er litt vind og fin sol. Eg kom akkurat heim frå ein tur på Vernet, og det var friskt og nydeleg ute. I går kveld og i dag morgon var det heller guffent,med regn og kulde, men så vart det ein fin dag til slutt. Eg var tidleg oppe i dag også, men no er eg lei av dette at eg skal så tidleg opp. Det er berre noko eg innbiller meg i halvsøvne at eg må-.

I dag sat eg og strikka framfor TV-en, og så gjorde eg litt husarbeid før eg gjekk opp til Marit klokka 13 - som planlagt. Marit hadde dekka fint bord og sett fram god mat som ho og eg skulle ha til lunsj. Vi kosa oss og prata ei god stund før det kom ein bil på tunet mitt. Eg hadde hengt ut ein lapp om kvar eg var- og så fekk eg besøk av Margrete og 1-åringen Dennis (hunden). Så  då vart det enda meir kos i dag. Og Margrete greidde å fikse støvsugaren min-eg hadde ein mistanke om at ho fekk det til.

Då eg vart åleine igjen, tok eg turen på Vernet. Eg tok bilde, men det er ei stund før eg får dei ut der eg vil ha dei.

Viss der er ope på Plantasjen i morgon, kan det hende eg fer ein tur dit, eg har ikkje fått pynta opp så mykje i år, for sommaren kom så brått. No er det vel ein einaste flaggdag igjen, og så blir det pause -. Kor lenge? Det veit ein aldri-


lørdag, mai 18, 2024

Dagbok 2024: 18.mai



Klokka er no 17.56 , ute er det overskya, opplett hittil og berre +16 grader, det var litt av ein overgang, og eg likar det ikkje.

Og no er vi komne til pinsaftan med to helgedagar framfor oss. I morgon er det opp med flagget igjen, eg har sett det i ein krok i stova i denne flagg-tida.

I går kveld vart eg sittande oppe lenge, men vakna likevel tidleg i dag; eg stod opp to gonger før eg stod opp for alvor tredje gongen-då var klokka 7. Eg kom rimeleg tidleg i gang med "fredagsvask" og bestemte meg for å støvsuge litt skikkeleg i dag.

Eg ville først prøve ut den nye støvsugaren, for då kan eg gå meir oppreist. Den må tømmast nokså ofte, men eg har lært meg korleis eg skal gjere det, så det var greitt. Då eg hadde tømt to gonger ville eg tømme enda ein gong, slik at eg var heilt sikker på korleis eg skulle tømme og sette den  i hop att- for 3. gong. Då skjedde det som eg frykta-eg fekk ikkje til å sette den i hop att- Eg har prøvd mange gonger, men står heilt fast. Men elles var det no berre å drage fram den store,gode og gamle, så eg fekk støvsuge alle teppegolva.

Eg var opp og prata litt med Marit som var ute, men så bestemte eg meg for å ta ein runde på butikken, for no blir det stengt i to dagar. Men først kokte eg ei panne med graut-og åt.

Då eg kom ned til KIWI var der så mange bilar  at eg såg meg ikkje syn med å parkere. Derfor køyrde eg bort til gravplassen -tenkte at eg kunne vatne blomsten som eg hadde planta på grava, og det trur eg var lurt, for der var ganske tørt. Blomsten hadde vakse og såg ut til å trivast; då eg planta den var der tre blomster-no var der 17, eg talde for moro skuld.No kan det hende at det blir nok vatn ei stund. "Lett regn" står det på skjermen min.

Då eg kom heim frå handleturen var eg trøtt og sliten, så eg sette meg inn til TV-en og der sat eg og halvsov ei stund, eg såg ikkje på klokka så eg veit ikkje kor lenge eg sat og slappa av..

Eg bestemte meg for å ikkje gå på Vernet i dag, for eg har hatt nok mosjon og var trøtt i beina. 

Eg får til å ta bilde og legge inn på datamaskina no, men somme gonger må eg vente ei stund før alt er klart. 

Kva eg skal gjere desse to dagane veit eg ikkje, men for meg som har fri dei fleste dagar, er det ikkje så stor skilnad på helg og yrke

Eg vil i alle fall ønske alle som er innom bloggen ei fin pinsehøgtid.


fredag, mai 17, 2024

Dagbpk 2024: 17.mai


 Då er klokka 19.00 på sjølvaste 17.mai Det er enno sol og varmt ute, +22 grader har no, på føremiddagen var det oppe i + 28 grader, så eg venta med Vern-runden min til seinare, eg kom akkurat heim att no og sveittar som ein sil. Bildet over er tatt for nokre dagar sidan, i dag hadde eg ikkje telefonen med, dessutan var alle flagga borte no.

Det har vore ein strålande dag  med tanke på veret, men eg har ikkje vore med på noko av det som går føre seg nede i Vik. Eg har vore her heime og slappa av, og så har eg vore oppe hos Marit. Lurte meg til å ta litt ugras her og der etc.  Klokka 16 kom Einar, så  vart det litt feiring med kaffi, kake og is. 

Etter at han reiste kledde eg meg litt om før eg gjekk tur. Eg har sett at det er moderne med dongeri bukser og anna. Og eg hadde eit fint, gammalt skjørt i dongeri som eg tok på meg, det var blått og til ein topp i kvitt og raudt følte eg meg  up to date. Eg trefte heldigvis ikkje så mange-berre ein, og eg trur ikkje han la så mykje merke til kleda mine.

EG har hatt ein roleg og fin dag, men eg har ikkje laga middag enno. Eg kan kanskje lage til litt saltmat no. I morgon blir det å vaske og rydde litt til helga og kjøpe inn mat til to dagar. Skal tru om eg får batteriet mitt då?




torsdag, mai 16, 2024

DAGBOK 2024: 16 MAI



Idag har maskina mi fått ein ny ide; når eg vil ha små bokstavar; så skriv no store ; og nåreg vil ha store så skriv ho små: Derfor må eg sitte med ein finger på tasten heile tida:
eg får sjå om det betrar seg. I dag har det vore like varmt som i går og eg orka ikkje å gå på Vernet når eg kom heim att: Istaden prøvde eg å jobbe litt i hagen; med vekslande hell; men litt fekk eg no gjort. For morgondagen har eg ingen planar; eg har ikkje kjøpt klede ;ein  gong, og dei eg har veit eg ikkje om passar. eg veit ikkje kva eg skal gjere i morgon heller; men eg har no "timeplan i avisa: eg har brukt å vere i Laguneparken etter middag; fordi Erlend har vore med og spele der; men i morgon skal han spele ein annan stad. 
På bildet i dag ser det den første av tre rhododendron eg kjøpte i fjor, dei andre to blomstrar ikkje enno; men dei er samme sorten. Ja om eg ikkje har noko å styre med ein dag; så har eg no hagen,der blir eg aldri ferdig. Så vil eg ønske alle ein fin 17.mai:
I dag fyller barnebarnet Eivind 22 år, han er enno i Tromsø og studerer.

onsdag, mai 15, 2024

Dagbok 2024: 15.mai

 

Klokka er no 17.30, temperaturen ute er + 25 grader og sola skin. Det har ho gjort heile dagen, og eg rekna med at det vart varmt etter kvart,. Derfor tok eg trimturen min på Vernet tidleg på dag. Då eg kom heim, kom naboen og sa at no kunne vi ikkje vente lenger med å klippe plen. Det var eg for så vidt enig i , men eg syntest det var for gale at han skulle gjere det. Eg  hadde ikkje  klippar , så eg hadde ikkje noko å stille opp med. Kort fortalt, naboen klipte heile hagen min, og der var ikkje ein einaste engkarse att. Eg rydda litt rundt omkring, men det trengst meir . Det er så tidleg og så voldsomt vokster i år. Somme gonger er det nesten snø på 17.mai, det blir det visst ikkje i år. Då eg såg på termometeret på trappa viste det + 26 graderC.

Eg åt middag, 3.dagen med pølse og stappe, men eg er ikkje kresen i matvegen.Men etter maten vart eg så trøtt at eg datt ned på dagsenga mi -og eg trur eg sovna.

Marit og eg hadde tenkt oss på gravplassen og så korleis det stod til der. Eg hadde mange hjelpemiddel med meg, men gløymde det viktigaste, Saksa. Men eg fekk ikkje bruk for den. Blomsten som eg planta sist eg var der hadde vakse og fått fleire blomster, eg berre vatna godt og fylte på med meir jord.

Då eg kom heim att orka eg ikkje å jobbe så mykje, men energien rakk til å ta vatneslange og vatne litt her og der. Eg veit kvar som blir først tørt.

I fjor på ettersommaren kjøpte eg tre små rhododendron, men ikkje på samme til. Den som eg kjøpte først blomstrar no, med kvit/rosa  blomster. Når eg kjøpte Rhododendron var det mykje fordi det er så lite stell med dei. Elles så blomstrar tulipanane enno, naboen har også fått tulipanar i hagen, som ho ikkje har planta sjølv. Eg lurer på om det kan vere fuglar som sprer løkane.

I morgon er det trening igjen, men så blir det vel pinseferie.



tirsdag, mai 14, 2024

Dagbok 2024: 14.mai



Desse tulipanane har eg planta sjøl og dei har stått i beddet ved garasjen i mange år. Dei har ein nydeleg raud farge, ikkje knallraude som eg også har.

 Klokka er no 21.12, temperaturen ute er + 20 grader, og det har vore ein varm og nydeleg dag. Eg vart litt forsinka med å skrive blogg, men det var kongane si skuld, når kongane besøker kvarandre så må vi no  følgje med.med.

Elles har dagen ikkje  vore   heilt på topp, men det er no mi eiga skuld. Eg vart ikkje ferdig med sudokuen i går kveld, den var liksom litt annleis enn den brukar å vere. Men då eg tok den att i dag, fekk eg heller ikkje løyst den. Som vanleg var eg på trening i dag,og då eg kom heim gjekk eg like godt runden min på Vernet med det samme. Der var ein del folk i dag også, men berre ei som eg kjende, og det var venninna mi frå Bhutan. Ho skulle lenger opp, men "eg seier til meg sjøl at du skal ned igjen" sa ho og det var  kloke ord. 

Det var så varmt og fint at eg måtte sitte ei stund på kvar benk-og eg trur eg sov litt på den siste. Då eg kom heim att tok eg meg litt mat før eg gjekk ut. Det er ikkje så mykje eg kan styre med ute når eg ikkje har klippar og i tillegg har vond rygg. Men eg har no rensa ugras og vatna etc,NOKO må eg no styre med og eg vil vere ute. Då eg kom inn att sette eg meg til med sudokuen, og etter ei stund var eg i mål. Eg meiner dette var ein sudoku slik dei var før-og då løyste eg dei på ein annan måte. Ja, noko må ein bry hovudet sitt med.

No nærmar det seg den 17 og eg har ikkje klipt plen. Men Gudmund klipper ioppe ved vegen, så det får vere godt nok. Eg går kvar dag og tenkjer på at eg skal bort på PLANTASJEN, men eg kjem liksom aldri i siget.



mandag, mai 13, 2024

Dagbok 2024: 13.mai

Det var eigentleg ikkje dette bilde eg skulle ha i dag, det liknar veldig på det eg hadde i går,men litt har det skjedd. Eg har til dømes klipt litt meir med kantklipparen , så no har eg ikkje sen igjen. På dette3 bildet er også naboane med , dei jobbar i hagen begge to, så der går det unna.

Det er + 23 grader ute, sol og fint, vi kan ikkje betre ha det. 

I dag starta eg dagen med å køyre fram på EIK-senteret, for å spørje om kva tid eg skulle få det nye batteriet til klipparen. Eg skulle få det til 17.mai var svaret, og han lova å ikkje berre ringe, men sende melding. Det hadde vore kjekt å få bort graset før den 17. Ikkje det at eg bryr meg om det, men eg likar no å ha orden rundt meg. Plenen ovafor garasjen har Gudmund alt klipt ein gong, men vil klippe det ein gong til før den 17. Det har eg gitt han lov tll.

Då eg kom heim att tok eg ein tur på Vernet, og i dag var eg der ikkje åleine. Tre relativt unge menn sprang fleire rundar med barnevogner. Dei kunne ikkje springe på sjølve Vernet, men tok vegen nedanfor. Skal tru om ungane sov eller var vakne?

I dag laga eg meg skikkelig middag tidleg. Det vart pølser og potetstappe. Eg kan ikkje forstå at folk kjøper "potetstappe-pulver"-det går no like fort å lage frå grunnen, når det er små porsjonar i alle fall.

Etter middag har eg prøvd å få gjort litt ute, men det går ikkje fort fordi eg må kvile ryggen heile tida.Her har vore fleire naboar og tilbode hjelp, men eg vil helst styre på sjølv. Å klippe plen med klippar greier eg heilt fint sjølv, for då går eg oppreist. Det vart slutt på sen og då rydda eg bed og vatna etterpå.

I morgon er det trening igjen, dagane og vekene går så altfor fort for meg-


søndag, mai 12, 2024

Dagbok 2024:12.mai


 Klokka er no 18.45, temperaturen ute er ca 20 grader C, det er delvis skya og sol.

Eg trudde det var heller kjølig på føremiddagen då eg tok ein tur på Vernet, så eg hadde på meg både genser og ytterjakka. Sjølv om det var tidleg på dag, vart det varmt NOK. Eg sat ei stund på altanen med Marit før eg gjekk ned og laga meg middag.  Måtte ha ei stung i godstolen etterpå, så då var mykje av dagen briukt opp.

Men litt må eg no ha å pusle med , så eg gjekk ut og tok opp ein 2-3 bøtter med løvetannrøter. Men ver sikker! I morgon er der kome ein ny hær av slike frekke gule og då er det på han igjen. Men det første eg må gjere i morgon er å køyre fram på Mosflata og høyre om det nye batteriet mitt er der. 

Som de ser på bildet har eg klipt litt på plenen med kantklippar, det blir ikkje så fint.Eg håper veret held seg nokonlunde fint fram til 17. mai. Desse maidagane har ein tendens til å fare fort forbi. Eg likar å jobbe i hagen, berre eg slepp å bøye ryggen for mykje.

No har eg tatt kvelden, må vel finne meg eit nytt "spøt", eg må ha noko på hendene når eg ser TV.

lørdag, mai 11, 2024

Dagbok 2024: 11.mai


Klokka er no 16.48,temperaturen ute er + 16 grader, det er overskya men ikkje nemnverdig dråper frå himmelen.

I dag hadde eg tenkt å køyre fram på Mosflata og spørje etter batteriet mitt. Men det vart ikkje noko av, for brått kom Solveig og Øystein køyrande. Og Øystein var klar for å male endeveggen på huset  mitt. Einar fekk så vidt begynt i fjor, før hausten kom. No fullførte Øystein nedste delen, men ein lyt ha litt meir utstyr når ein skal opp i høgda. Eg likar ikkje å gå høgt opp sjølv, og eg likar ikkje å sjå andre gjere det. Men no er eg veldig fornøgd med det som er gjort -så langt.

Sidan dei kom så overraskande hadde Solveig tatt med seg gode heimelaga rundstykke og syltetøy som ho hadde laga sjølv av rabarbra og jordbær, krydra med gurkemeie . Veldig godt. Det vart til at eg utsette turen til EIK-senteret, men måndag berre må eg fram.

Øystein sette sen i  kantklipparen, så eg fekk tatt bort litt av graset på plenen. Ein av naboane kom og lurte på om eg ville at han skulle kloppe plenen min, men det takka eg nei til, Eg har det med å ville gjere det meste SJØLV, men somme gonger må ein no ta imot hjelp.

Eg strikka ferdig lesteparet som eg heldt på med, så Solveig fekk dei med seg heim.

Det blir sikkert ein dramatisk kveld på TV, med MGP. Når eg tenkjer på kor koselig det programmet var FØR, synest eg det er trist at det er så annleis no. Kanskje blir det siste gong -kven veit?
 Håper berre at det går rimeleg fredeleg for seg.

Skulle ønske freden senka seg over heile kloden.

fredag, mai 10, 2024

Dagbok 2024: 10. mai

 

Klokka er no 17.55, temperaturen ute er + 14 grader, så eg syntest det var litt kjølig inne, så eg fyrte litt i omnen, etter kvart greier varmepumpa å halde på varmen. I dag morgon var det sol, men den vart borte så no er det overskya, men opplett. 
Bildet over tok eg nettopp, Der står epletreet vårt nedst i hagen og skal snart blomstre for fullt. Etter blomstringa har eg tenkt at ein av gutane i familien kan få lov å saga av alle greinene på midten. Eg er ikkje interessert i epla, men blomstringa vil eg ha.
Som de ser har eg enno ikkje fått klipt plen, så viss eg ikkje høyrer noko frå EIK i morgon, køyrer eg fram og snakkar med dei.Dei er veldig greie der framme, så det går bra.

I dag tok eg fredagsvasken + diverse ryddeprosjekt før eg tok ein runde på Vernet. Ei stund etterpå køyrde eg til Vik med Marit og meg, og så handla vi på KIWI på heimvegen. I dag fekk eg endeleg kjøpt grøn JAM så no kan ar lage sylte- tøy av plommer som eg har i frysaren, nokre er knapt årsgamle, andre nærmar set 3-årsalderen. Men dei står seg godt i frysaren. 
I morgon er det den store MGP- og då skal Marit komme ned og sjå i lag med meg. Eg forstår meg ikkje på MGP lenger, det er for mykje ståk og støy, songen er ikkje lenger så fokusert.




torsdag, mai 09, 2024

Dagbok 2024: 9.mai : Kristi himmelfartsdag


 

Klokka er no16.47 , temperaturen ute er +10 grader, det har regna og blése i heile dag; det var ikkje slik eg hadde tenkt at den ekstra fridagen skulle bli. På føremiddagen sat eg og jobba litt med spansken, som vanleg og så strikka eg og såg TV-. Eg fyrte litt i omnen , for eg syntest det var litt hustre. Eg utsette trimturen min i håp om betre ver når det leid på.

I dag laga eg kylling og ris til middag, og til dessert vart det kaffi og sjokolade,. Eg sovna med hovudet på kjøkkenbordet då eg skulle prøve meg på ein sudoku, så eg gjekk inn og sette meg i godstolen, og sovna der også. Det må vere veret. No ser det faktisk ut til at det kan klarne opp litt, og då skal eg gå tur. Men eg må vente til telefonen min er opplada. Sjå der! No vart det nesten fint ute, så det er berre å sko seg til tur.

KL 18.24: Ja, det blei tur på Vernet i dag også, det regna ikkje no, men det bles litt.Det var friskt og fint å vere ute. Men telefonen låg att heime. Eg trefte naboane der oppe også. På dette bilde kan de så vidt sjå tulipanane oppe ved garasjen. Eg kan ikkje hugse at eg har planta tulipanløk, men det kan no hende viss eg har fått ei sammenplanting ein gong. Det poppar i alle fall opp tulipanar både her og der, og det er ikkje meg imot Buskene som eg planta i garasjebeddet er neste usynlege på bildet, men dei var så store at eg klipte dei ganske kraftig. Det er litt farleg å sleppe meg til med saks i hagen, det har lett for å bli litt mykje.




Nede ved den gamle kompostbilgen står trillebåra. Eg fekk lasta opp eit lass i går med rein kompostmold og køyde det bort der som Thujaen stod. Eg må prøve å få litt orden og så gras om ikkje anna. Det er mykje å gjere viss ein vil ha ein fin hage, men eg legg lista lågt-eg er åleine og eg er gammal, så eg kan ikkje få alt til slik eg har lyst. Men eg ser veldig fram  til å få klippe plenen, for no har eg tatt opp alle løvetannrøtene , trur eg. Eg likar å styre på i hagen, berre veret er nokonlunde.

I morgon er det fredag igjen og ei ny helg i kjømda. Desse vårmånadane går så altfor fort.


onsdag, mai 08, 2024

Dagbok 2024: 8.mai

Det var fart på elva i dag igjen,det er snø som smeltar

 Klokka er no 16.50, temperaturen på trappa er +16 grader C, sola er litt av og på i dag, men såpass varmt at Marit og eg kunne sitte på benken ei stund.

I dag skulle eg til frisør klokka 11.30, så det var ikkje vits i å begynne på noko arbeid før den tid. Eg jobba litt med spansken etc.

Eg fekk ikkje klipt håret så kort, eg sa at ho skulle klippe tuppane og det gjorde ho-, så det var greitt. Då eg såg flagga rundt omkring her i dag morgon forstod eg at det var freden vi feira, så eg skunda meg å få ut flagget mitt også. Men frisørdama hadde ei anna overrasking til meg: Kristi himmelfartsdag i morgon, det hadde eg ikkje  oppdaga.(Kalenderen min har små bokstavar) Då vert det ikkje trening i morgon- Fridagar er alltid velkomne og neste helg -, det har eg fått med meg, er det både 17.mai og pinse.

Då eg var ferdig hos frisørdama, køyrde eg beint heim og gjekk tur på Vernet med det samme. Det vart ein lang tur med tanke på tida, for eg sat på alle benkar og slappa av . Den einaste eg trefte i dag, som eg kjende, var venninna mi frå Bhutan. Ho går ofte tur lenger oppover i skogen.

Då eg kom heim sat Marit på BENKEN og så sat vi der ei god stund, så eg fekk høyre frå Spania-turen. Og så hadde Marit kjøpt med sjokolade til meg fordi eg "passar" Lollo. Eg er blitt veldig glad i sjokolade i seinare tid og det har eg betrudd Marit. Så no ligg sjokoladen og fristar meg når eg skal ha ein kaffiskvett.

Eg trur ikkje eg får gjort noko i hagen i dag, eg har enno ikkje fått batteriet til klipparen. Eg får ta ein tir fram på Mosflata over helga viss eg ikkje høyrer noko.

Men eg kan no frakte graset eg klipte ned i bingen om ikkje anna. No har eg trillebåra og kan køyre meir mold bort dit somThujahekken var.Men eg vil ikkje grise meg til i dag når det er helg i morgon.

Viss nokon vil besøke meg har eg gulrotkake, is og kaffi.



tirsdag, mai 07, 2024





 
Klokka er no16.50, temperaturen ute er +12 grader, og det regnar, så no er det slutt på herlegheita for denne gong. No ventar eg på at Marit skal kome heim att i dag. Ho gjekk glipp av dei fine dagane her, men det var no fint i Spania også- 

I dag slo eg av vekkarklokka to gonger, før eg forstod at eg skulle stå opp, for i dag var det trening. Det gjekk heilt bra , som forventa. Etter treninga for eg bort i Gågata for å bestille frisørtime før 17. mai. Eg brukar som regel å somle slik at eg blir for sein, men no skal eg dit i morgon. Ei "gammal" venninne sat og venta på tur, så vi fekk ein hyggeleg prat før det vart hennar tur. 

Alltid når eg køyrer opp Mosvegen, tenkjer eg på grava og i dag hadde eg tenk å sjå bortom, men først skulle eg handle på KIWI, dei har blomster også, så eg ville sjå pm der var noko brukbart. Eg hadde ikkje tatt med verken spade eller saks slik eg brukar å ta med, men det var no greitt å køyre heimom også. 

Det vart til at eg kjøpte ein plante som skulle avløyse kransen som har lege der sidan jul, og var like fin enno. I staden for å køyre heim etter reiskapar, for eg ned på gravplassen, for eg hadde ein plan. Ikkje langt frå gravplassen driv dei og tek ut skog titt og ofte. Eg gjekk bort der som dei held til med saging etc. og der fann eg det eg leita etter-eit stykke tre som gjekk an å grave med. Så eg fekk planta blomsten på ein måte. Seinare skal eg sjå om eg kan finne ei lita fin rosebuske i staden. 

Eg strevar enno med å få bilda på rett plass slik at eg får dei ut når eg vil. Bildet av grava ligg på Trovågarane -sida.

Då eg kom heim laga eg meg litt mat, men eg vart sittande lenge ved bordet, fordi eg tok fram att SUDOKUEN som eg begynte på i går kveld, og ikkje vart ferdig med. Eg gav ikkje opp i dag, og etter eit par timar var eg ferdig. Eg må trene hovudet også ikkje berre armar og bein.

Marit skulle komme heim i dag, men eg har ikkje sett henne enno. Katten har kome ned til meg fleire gonger, slik han (ho) gjer når Marit er vekke.

I dag har eg altså ikkje fått gjort noko i huset til denne tid, og i morgon blir det frisør, så går den dagen......... Det var synd at eg ikkje fekk halde på ute i dag også for der er mykje å gjere, men det kjem vel dagar etter desse.

I år blir det reine pinseferien -med 17.mai og pinse på ein gong. Det kan vi sjå fram til. I sommar skal vi ha pensjonisttur til Astrup-tunet, og dit vil eg vere med. Vi har køyrt 100 gonger ned Jølster, men ikkje på Astrupsida. Eg har to maleri som Svein har laga -dvs. kopiert Astrup, og eg er like glad i dei bilda som eg hadde vore i dei ekte.




mandag, mai 06, 2024

Dagbok 2024: 6.mai

Klokka er no 17.24, og eg har avslutta dagens arbeid, trur eg. Eg veit ikkje kor lang arbeidsdag ein kan rekne med når ein er 84.

Temperaturen ute er + 17 grader. Sola skin no, men det gjorde ho ikkje i dag morgon, i alle fall ikkje her. Skodda låg tjukk heilt ned då eg gjekk turen min på Vernet klokka 10-11. Men det lysna etter kvart, og då eg var heime var sola komen fram.

I dag hadde eg tenkt å begynne ryddinga på austsida av huset og slik blei det.

Sidan eg ikkje har plenklipper for tida, tok eg kantklipparen og klipte graset på "nyeplenen". Det gjekk heilt fint så lenge der var sen i klipparen. Eg er så hjelpelause at eg kan ikkje sette i sen sjølv i den nyaste klipparen.


Men der var mykje eg kunne gjere. Eg rensa vekk mesteparten av  skvallerkålen ved husmuren-og slikt tr tid. Eg hadde klipt graset ved hellevegen, men der måtte eg gjere litt meir. Det siste eg gjorde var å rense rundt peonane, gjødsle og ha på meir jord. Så får eg håpe på ei fin blomstring om ikkje så lenge. Eg har joobba ute det meste av dagen, men resultatet er ikkje såvoldsomt-men det er mykje småpirk eg har styrt med. Ryggen må ha pausar og så går tida. Eg jobbar ikkje på akkord og tek den tida eg treng.

Då eg avslutta kom det ein bil ned på tunet, det var Lars som kom og henta Erlend for å ta han med på køyre-trening.

I morgon er det trening og så håper eg at eg får batteriet til klipparen snart. Graset er høgt no.

Eg har problem med å få lagt inn bilde, men dei ligg på sida vår på Facebook-
 


Nyklipt -Nyeplen.



Gravmyrten blomstrar(blå) eg klipte den heilt ned i fjor.






søndag, mai 05, 2024

Dagbok 2024: 5.mai


Klokka er no 18.13, temperaturen ute r + 13 grader C. Det har vore sol og fint i heile dag, men ikkje så varmt som i går. Eg vakna tidleg i dag,men gjekk ikkje på Vernet før i halv 11 tida. Eg har ikkje gjort så mykje til gagn i dag, men eg laga meg i alle fall skikkeleg middag. På ettermiddagen har eg drive og tatt opp løvetannrøter i store mengder, men der er sikkert mykje att enno. Elles er vi også i år plaga med engkarse, gras er her også, så eg håper det ikkje går for lenge før eg får batteriet til klipparen. Elles kan eg ta kantklipparen og klippe heile plenen-eg har gjort det før.

Eg strevar enno med å få bilda mine på rett plass, men det skjer no somme tider. Når eg er ute og jobbar i hagen, ser eg bort på naboen sin hage-der er alt i orden, men dei er to. På blde kan de sjå Gullbusken som vi fekk til gullbryllaupet. I framgrunnen står ein klikk med stilkar-der skal det komme raude peonar når det lid litt på. Eg samlar rusk og rask i sekker, men køyrer ikkje på VØR før eg har minst 6.

Det vart ikkje til at eg køyrde på Plantasjen i dag, eg fann ut at eg ikkje hadde førebudd meg nok. Eg må vite kva eg skal ha,og ikkje berre gå og vime der borte og ikkje vite om ein skal kjøpe noko

I morgon er det heimedag, og snart kjem Marit heim att. Vi pratar med kvarandre på Messenger akkurat som når ho er heime og ho les bloggen min nede i Spania også. Eg forstår på ingen måte korleis det går til. Men slik er det med mange ting.

No skal eg tømme oppvaskmaskina, så skal eg sette på TV og ta fram strikketøyet-

 

lørdag, mai 04, 2024

Dagbok 2024: 4.mai

Dette bildet er tatt i dag.

 Klokka er no 17.23, temperaturen ute på trappa er + 22grader C, sola skin og det har ho gjort i heile dag. Kjempefint vêr har vi no. Eg hadde ingen spesiell plan  for dagen, berre at eg måtte på apoteket for å kjøpe medisin, og så kjøpe mat etc. på KIWI. Då eg kom heim, tok eg med meg eit eple og telefonen og så gjekk eg på Vernet. Eg møtte ei som eg kjenner godt med det same eg kom opp, og vi vart sittande lenge å prate. Ho er så sprek at ho skulle vidare oppover og så ned Kanalvegen til Vinjevoll. Den turen har eg gått, eg også, men ikkje i år. Eg gjekk runden min og så gjekk eg heim og laga meg litt enkel mat. Etterpå fann eg att sudokuen min og løyste det på ei lita stund.

Eg gjekk ut i hagen og ville prøve å jobbe litt. Eg renska beddet nedanfor garasjen, klipte busker etc. og til slutt vatna eg godt og rikeleg både der og der som eg rydda i går. Eg prøvde å rydde litt nede i hagen og ta opp løvetannrøter, men måtte gi meg på det. Det er ryggen som bestemmer kva og kor mykje eg kan gjere, så eg får rette meg etter det. Viss eg får i orden klipparen snart, så kan eg klippe plen, Det er ikkje vondt for ryggen, for då går eg oppreist. Og eg verker ikkje heile tida, når eg sluttar å jobbe og sit i ro-eller går, er eg heilt i orden. Eg håper eg får batteriet snart, så eg får begynne å rydde. Eg meiner at eg plar klippe to gonger før 17.mai.

Det kan hende eg tek ein tur på Plantasjen denne søndagen også, men eg har ikkje bestemt meg enno. Men litt stillferdig luking av ugras kan ein vel drive på med om det er søndag.

Det blomstrar fint hos naboen på andre sida av gata; Marit er i Spania, men vi pratar med kvarandre på data slik som vi gjer når begge er heime. Veldig kjekt å ha den kontakten. Dei har det fint i Spania også.

fredag, mai 03, 2024

Dagbok 20 24: 3.mai




 Klokka er no18.30, temperaturen ute er + 20 grader. Det har vore ein strålande dag, med sol frå klar himmel. Eg har vore her åleine heile dagen, men prata litt på PC-en med Marit som er i Spania. Eg passar katten.

I dag etter frokost kunne eg ikkje halde meg frå Sudokuen i fredagsavisa, den er ofte litt vanskeleg. Eg plar løyse den kvelden før, men det greidde eg ikkje denne gongen, enno er eg ikkje komen heilt i mål og det plagar meg.LITT

Etter at eg hadde tatt fredagsvasken gjekk eg ein runde på Vernet og sat lenge på kvar benk. Eg har ein tendens til å bli låk i føtene når det er varmt. Men det er fint å sitte på benkane- i dag kom der ingen eg kjende.

Då eg kom heim, laga eg litt mat, men ikkje middag, det kan bli til kvelds. Eg la meg ut på solsenga ei stund, men eg har ikkje rast og ro til å ligge strak ut, så der var ikkje så lenge eg låg der før eg måtte inn på PC-en og- så sudokuen.

Eg ser at naboane i nummer 5 styrer i hagen. Det skulle eg også ha gjort, men eg veit ikkje kor mykje eg kan styre på med låk rygg. Eg gjorde no ein jobb i går. Eg må kanskje bort på plantasjen og kjøpe diverse viss eg skal få til noko.

Det er heilt nydeleg ute og plommetreet på plenen blomstrar som aldri før-og eg ser at humlene jobbar, så det blir vel plommer etter kvart.


Eg skulle ha klipt treet så det såg litt skapleg ut, men eg trur det er for gammalt til det. Mange tre har vi hatt, og dei fleste er borte no.

De er fredag igjen og eg kan ønske alle ei god helg !


torsdag, mai 02, 2024

Dagbok 2024: 2.mai


Klokka er no 17.32, temperaturen på trappa er + 22grader C, så her er det full sommar i dag.

Dagen starta med trim frå 10-11,då eg kom heim tok eg ein runde på Vernet; i dag var det så fint at eg måtte sitte litt på kvar benk ei lita stund. 

Så vart det middag etter kvart, men ikkje middagskvild i dag.

Eg har vore ute og rensa ugras etc. i beddet ved garasjen. Eg plar kjøpe ein sekk med kugjødselkompost og ha på det beddet, men det kom eg ikkje på då vi var der borte. Men eg kjøpte i alle fall 5 sekkar jord, så eg kan kanskje ta av den + kunstgjødsel. Ikkje alle rosetrea var like fine etter vinteren , så eg får kanskje kjøpe litt nytt. Eg begynte eigentleg å ruske opp skvallerkål ved huset og ved Urke-garasjen, men det vart trasig. Alle tre Rhdodendron- buskene som eg kjøpte i fjor står friske og grøne, den gamle raude ved Ryggebuska blomstrar fint no.

Eg sakna ei stor saks då eg skulle klippe litt gras nedanfor garasjen, den eg hadde var for lita, Så såg eg opp i beddet og der var den som eg sakna. Eg får mykje å gjere framover viss det blir bra ver. Gudmund har heller ikkje klipt plen enno, og eg kan ikkje få klippe før klipparen er i orden. I morgon er det fredag, eg må inn att på sporet etter at vi vart ferdige med første ekstra fridagen i mai.

I dag fyller Vebjørn 18 år, det er ikkje til å tru. Han er godt i gang med utdanninga si.

No må eg sjå om eg får til å legge ut bilde, i går gjekk det bra, men no har det rota seg til igjen for meg. Bilda ligg på telefonen, men eg får dei ikkje over til Bloggen. Det gjorde eg i går.Eg må visst ha enda litt hjelp med dette.


onsdag, mai 01, 2024

Dagbok 2024: 1.mai

 

Klokka er no 17.22, temperaturen ute er + 20  grader, og no skin sola igjen etter at det kom regn midt på dagen. Det har vel vore rimeleg bra ver i dag for dei som er ute og feirer. Eg har meldt meg ut i dag, og brukt dagen til å rydde opp og vaske klede. No har eg igjen hatt trøbbel med TV og datamaskin, enda eg kunne alt i går. No fekk eg til å legge inn bilde her -det var etter MIN metode. Det verste trøbbel eg veit er data-og TV-trøbbel. Det var godt å ha Rasmus her, men no er han heime på Kongsberg og det er no bra. Han har gjort ein heil jobb mens han var her. Han kunne godt ha fått vore her lenger. Men eg får prøve å få unna litt sjølv også. Det er mykje som må gjerast ute, men eg likar no å halde på med slikt også.
Eg var litt trøtt i dag men etter at eg hadde rydda opp litt gjekk eg ein runde på Vernet før eg åt middag. Det vart restemat i dag, og etter måltidet sov eg middag i godstolen , så no kan eg ta fatt igjen ; eg er ikkje heilt ferdig med klesvask m.m.

Og så blir det å få TV-en opp å stå igjen. I dag fekk eg ikkje til det eg kunne godt i går. Bilda vart heilt OK, men det vart stumfilm.  Eg trudde eg skulle greie meg utan meir hjelp no.

Eg passar katten til Marit, men i dag ville ho ikkje komme ned. Det var visst fordi Even var heime, for då han for med bilen, kom katten springande ned til meg. 

No er det veldig fint ute- men det er veldig mykje ugras også; ryggen min protesterer, men no har eg fått nye øvingar på treninga, som skal hjelpe for ryggsmerter. Måtte det berre hjelpe. Det blir trening i morgon, og dså må eg vel fram på EIK -senteret og få vite kva eg skal gjere for å få grasklipparen til å gå.


Dagbok 2024: 30.april

 Klokka vart litt for mykje før eg kom så langt at eg skriv blogg, men eg skal fatte meg i kortheit. Det er no + 10 grader ute, for i dag kom sommaren med varme vindar og grøne bjørker.

Eg starta dagen veldig tidleg, men skulle ikkje på trening før klokka 10.Men sidan marit ikkje vart med reiste eg ned litt før, og kom heim tilsvarande. Der hadde Rasmus saga opp all thuja-veden og ordna ut.  Eg var heime ei lita stund, men så kom Ragnhild og henta med til lunsj på Hotellet. Vi var 4 gamle lærarar frå Velle skule. Det er no fleire att av den gamle gjengen, men ikkje mange. Det tynnast ut i rekkene.

Rasmus fann ut at vi skulle starte opp grasklipparen, men det gjekk ikkje. Vi sette batteriet på ladding, men det hjelpte ikkje. Vi fekk ikkje start. Dermed for vi ned på EIK-senteret og spurde der kva det kunne vere som gjorde at batteriet ikkje tok ladding. Vi hadde med batteriet , men ikkje laddaren, for den måtte dei ha for å stille diagnosen. Så etter helga må eg ned att. Det er veldig kjekt å ha med seg Rasmus i slike ærend, men no reiser han i morgon, så då må eg klare meg sjølv.

Vi køyrde rundt og tok Melsvegen på heimturen og såg kjende stader.  Rasmus sett meg av, så eg fekk gå ein runde på Vernet før eg kom heim. Då laga vi middag, det var Rasmus som bestemte at vi skulle ha Pasta Carbonara, så det vart det. Elles har vi sete her og prata og sett TV. Det har vore kjekke dagar, i alle fall for meg, å ha Rasmus her, så det blir litt tomt når han fer i morgon. Marit reiste til Spania i dag, så no skal eg vere kattepassar.Men dert går nok bra.




Bilde frå Melle der vi budde ein gong. Huset vi budde i er rive for lenge sidan, men løa er der enno. Det er Rasmus som har tatt bilda.

Dagbok 2024: 22. juli

Blikkstille fjord i dag  Klokka er no 18.20, temperaturen ute på trappa er + 20 grader, det er lettskya  og opphalds-ver, men på PC-en min s...