Gratulerer med dagen!

Vi gratulerer Audny med 43 -årsdagen i dag.
I staden for å trekke fem år frå alderen slik som vi har for vane her i huset, har eg funne fram eit fem år gammalt bilde.
Fortvil ikkje; du er ung i mange år enno.
Ha ein fin dag!

Nye lydbøker i dag.

Kvar gong eg er på biblioteket er eg spent på om der enno finst lydbøker eg ikkje har "lese". Men heldigvis kjem der stadig nye bøker inn. I dag vart det to krim-bøker, men det får eg vere nøgd med sidan eg no har lese tre "ikkje-krim-bøker". Det er nemleg veldig mykje av den sjangeren som kjem på lydbok.
Elles hadde vi ei runde rundt på diverse butikkar. Alltid noko ein "treng", merkelig nok. Då vi kom heim, dukka Øystein og Håkon opp med litt forsinka fødselsdagspresangar. Dei hadde vore på sonesamling i Volda.

Fleire bilde frå dåpsdagen.

Her ser vi Ingeborg saman med presten på det eine bildet, og med søskena på det andre. Kjolen til Ingeborg vart kjøpt på Eid til denne anledninga, Amanda stilte i julekleda og gutane i dei vanlege bestekleda.Det er ein fin bukett, sjølv om bildet er heller dårleg. Er samd med Solveig i at presten heldt ei fin (og lågmelt) tale .Det blir noko spesielt med gudsteneste og dåp i ei så lita kyrkje der dei fleste kjenner kvarandre.Organisten var flink. Han sat synleg for kyrkjelyden under heile gudstenesta, rett bak preikestolen til høgre i bildet, og spelte på "sokkelesten".

Dåp

I dag, på 15-årsdagen sin, vart Ingeborg døypt i Kilsfjord kyrkje. Det var ei fin høgtidsstund. Veslesyster Amanda bar dåpsvatnet inn først i gudstenesta, og etter henne kom "dåpsbarnet". Alle fire besteforeldra stilte som fadrar, og minstebroren var også med fram til døypefonten.

Etterpå var vi samla til familiemiddag på Bjørneset. Det har snødd mykje i dag også, så Nils er ute og mokar. Det minte meir om jul enn om påske då vi køyrde heimover mellom snødekte tre.

Innepåske.

Tenk hadde vi fått all denne snøen i vinter då vi ønska oss snø!
Hadde det ikkje vore såpass mildt at noko av snøen smeltar nedanfrå, trur eg vi hadde budd i ei snøhole.
Dei tre eldste karane var på ei lita handlerunde i dag, mens mamma og besta kosa seg heime med storsjarmøren som nærmar seg 2 år.

Familiepåske

Rasmus med fam. kom laurdags kvelden i det nydelige veret. Dessverre varte ikkje det, så søndag blei inne og kvilever. I går kom heile gjengen frå Bjørneset, så då gikk den gjennomsnittlege levealderen betydelig ned. Alle barna med unntak av minstemann var på garasjetaket og hoppa ned og elles underheldt dei kvarandre med leikar og spel inne. Alle kom ifrå det utan synlege skader.

Det har kome enda meir snø sidan i går, men no ser eg ein flik av himmelen. Rasmus ,Wenche og vesleguten er på handlerunde, mens eldstemann hjelper farfar med snømoking.Eg nytta høvet til å rydde litt.

God påske !

No har eg gått ein tur i det fine veret.Har gått rundt Storebakken som er den øvste gata/vegen her på Vallabøen.Ingen stor idrettsprestasjon for andre enn ev.meg.Så får vi sjå om eg får mein av turen. MÅTTE ha meg ein tur ut og på altanen var det rett og slett for kaldt. Skal legge inn nokre bilde frå turen; går ut frå at dei fleste bloggleserane vil dra kjensel på Melshornet og på huset vårt+bil og båt.

Ved foten av Melshornet ligg Melle, eller Melsbygda, der vi budde våre 5 første år i Ørsta.Den vart også kalla Svartebygda fordi sola var borte store delar av året,særleg midt på dagen.Sola "kleiv Hornet" ca 1.april,då vart det sol frå tidleg morgon til sein kveld.

Vi får besøk av Rasmus og fam. i påska, men veit enno ikkje akkurat kva tid dei kjem.Gleder meg spesielt til å sjå att gutane, det blir så altfor sjelden vi møtest.

Første påskedag, på 15-årsdagen sin, skal Ingeborg døypast i Kilsfjord kyrkje.

Så vil eg ynskje alle lesarane mine ei GOD PÅSKE.

Første dag på altanen i år.

I dag før middag var vi på shopping, og etter middag, mens det enno var sol, laga eg til solsenga mi på altanen, men dyne,pute og pledd. Det vart varmt og godt sjølv om sola forsvann ganske fort. Eg skulle lese dei siste par platene av Kafka på stranden. Det er berre det at når eg ligg slik og "les" blir det meste borte i ein draum som eg ikkje hugsar. No har eg imidlertid lese ut denne heilt spesielle boka. Var innom biblioteket i dag og sikra meg påskelektyre. Kjenner ikkje til desse bøkene og forfattarane, så det kan bli eit spennande møte, eller kanskje ikkje?

Våren er komen?

Som de ser av bildet er det framgang i blomster- potta, men hårstrikken ligg framleis på trappa.Eg lovar at den skal vere vekke neste gong eg tek bilde!

Elles har Nils brukt fineversdagen så langt til sette motoren fast på båten etc., mens eg har vaska og rydda inne. Typisk, men berre vent til det blir litt varmare, då skal eg lage meg "seng" på altanen.

Det er heilt håplaust å vere inne slike dagar, for då ser ein meir støv enn det som godt er.

No håper eg at det snart blir fisk på bordet igjen, for frysaren er tom.

Rasmus med familie kjem til påske,det gleder vi oss til.Og så vil vi gjerne servere god fisk!

Hyggelig besøk på kvinnedagen!

I dag venta vi ein snarvisitt av Einar; han skulle hente bilen sin i Ørsta. Så fekk vi melding frå Bodil at ho og Svein var i Volda. Dermed fekk vi besøk frå to kantar samtidig. Det vart ikkje til at Bodil og Svein tok turen gjennom tunnelen i dag, så det blir vel ikkje så altfor lenge før dei tek ein tur igjen. Tunnelen slår dobbelt positivt ut for dei som elles har måtta ta to ferjer. Når det vårast vert det vel ein del turar ut i øyane, det er så fint på kysten om våren. Har aldri forstått dei som reiser til fjells i påska når dei kunne reise ut til havet!

Vil også ønske dei kvinnelige lesarane til lykke med dagen!

Vi har det bra samanlikna med kvinner i andre delar av verda!

Ei tilståing.

Må berre innrømme det: Vi har vore gjennom tunnelen igjen!
Eg var til Volda og fekk smertelindrande sprøyter både i hofta og skuldra i dag.Sidan vi siste åra har vore til så mange kontrollar og behandlingar begge to, har vi fått til vane å finne på noko kjekt i tillegg.
Når vi er i Volda, brukar vi t.d. å ete middag på Kina-restaurant. Men i dag foreslo eg( som aldri skulle sette min fot i tunnelen) at vi like godt kunne gå på kafe i Ulsteinvik. Så gjorde vi det. Fann ein japansk-kinesisk restaurant på Blå Huset og fekk oss brukbar middag der.
I tillegg var eg på An Chri og kjøpte meg ein fin og tidlaus bluse.
Inn på Åse Dimmen ein tur var vi også. Det var ei dame der som var veldig hjelpsom, og då vi kom i prat viste det seg at ho hadde vore nabo med Margrete då dei budde i Hofsetråsa. Forstod det slik at ho budde i det blå huset. Kom meg unna med å kjøpe ein løpar i turkis til 150 kr. Lova å helse så mykje til Margrete.
Hadde tenkt oss ein snartur ut til Flø og sjå oss om der, men så hadde eg ikkje fotoapparat med, så vi sløyfa den turen i dag.
Til slutt hamna vi på Lidl og kjøpte mat.Der trefte vi Anders som brukar å vere på besøk hos Einar på Hareid.
I går kveld var eg i etterpåsyttiårsdag hos Margrethe K. i Volda. Det var hyggelig. Seks gamle kollegaer, tre av oss pensjonerte.Mykje å prate om som vanleg.Mellom anna tok vi opp diskusjonen om ros der også. Aktuelt tema for lærarar, foreldre og besteforeldre.

Flinke jenter.

Av dei 10 barnebarna våre er berre tre jenter. Men for nokre flinke, kjekke jenter! Ikkje berre spelar og dansar dei, men syr til og med.Desse talenta har dei i alle fall ikkje arva etter mormora. Eg har laga ei eiga lov som gjeld alle bestemødrer: Det er lov å skryte heilt uhemma av barnebarn!

Denne puta fekk eg med Olaug på søndag, ho har sydd den sjølv på den vesle symaskina ho fekk til jul! Ho kjenner nok mormora sitt store putebehov!!

Endelig gjennom tunnelen.

Etter å ha skrive side opp og side ned om det nye Eiksundsambandet,har eg endelig vore gjennom verdens djupaste undersjøiske tunnel. Tunnelen var fin, han, men veldig lang etter min smak.Sjølv om han var godt opplyst heile vegen, fekk eg litt av den same klaustrofobiske kjensla som eg har t.d. om bord i fly.Men det gikk bra, til tross for at eg fekk eit lite sjokk då det kom ein vassdrope på frontruta midt inne i tunnelen! Vi hadde ein fin dag på Hareid med alt for mykje god mat, som vanleg.

Underhaldning fekk vi også då Olaug tok fram klarinetten og spela ein song til oss. Ho var flink! Sjølv har ho mest lyst å spele saksofon, men då må ho bli litt lengre både i armar og bein først.

Gutane såg vi ikkje så mykje til anna enn ved måltida, dei har så mykje anna på gang.

Påske heile året.

Dette er eigentlig eit påskeservise, men her brukar vi det heile året. Då vi pussa opp kjøkkenet for 6-7 år sidan valde vi veggfarge som passa til serviset i hylla. I tilleg til det som heng på veggen ,har vi 4 koppar med tefat til, eggeglas og ei høne som ligg på reir oppå kjøleskapet. Dette er eit gammalt mønster som heiter Hahn und Henne, men butikkane har det framme før påske kvart år, gjerne på tilbod. Eg vil ikkje ha fleire delar til dette serviset, sidan eg ikkje har plass til fleire rundt kjøkkenbordet.

Frå jul til påske

I dag var vi ein tur til Vik. Møtte Harald og Ruth, Gerd og Tor og vart ståande og prate både her og der.Eg hadde ikkje så mange ærend, men ville spandere eit par nye plantar i viduskarmen. Sidan det nærmar seg påske tenkte eg at eg like godt kunne kjøpe gule ildtoppar for dei står lenge og trivast bra her.Kjøpte dei rimelig på Coop. Sjelden eg kjøper gule blomster til meg sjølv, for sidan eg har bursdag rundt påsketid dei fleste år, plar eg få nok gule blomster då.Dei raude julestjernene går no for lut og kaldt vatn, men nektar å gi opp. Viss estetikarane blant dykk synest det ser nokså forferdelig ut med dei gule og raude blomstrane i lag, kan eg berolige dykk med at dei ikkje står slik plassert anna enn ved fotografering. I utepotta spirer løkane som eg fekk med Solveig sist helg, og dei veks fort.Sist eg var på Sissels blomster på Ørsta torg hadde dei så nydelige engelske pelargoniar; tenkte eg skulle kjøpe med ein til Solveig sidan vi skal dit ut i morgon. Men, dessverre Solveig, i dag hadde dei ikkje!!!!