Bok nr.32 - 2020: Et spørsmål om penger.

Den danske småbyen rystes av et grufullt drap. En styrtrik playboy blir funnet knivdrept i loftsetasjen til en bygning hans firma har under oppussing, og det viser seg snart at morderen antagelig finnes blant de få som har nøkkel til byggeplassen. Flere av dem – fra firmaets direktør til håndverkerne som jobber der – har gode grunner til å ønske Peter Münster-Smith død. Etterforskningen gir både politiet og privatdetektiven Dan Sommerdahl innblikk i en verden av kokain, dyre klokker og vakre kvinner. Finnes motivet blant avdødes damebekjentskaper, eller er motivet i virkeligheten et spørsmål om penger?
……………………………………………………………………..
Dette er 5.boka eg har lese i serien til Anna Grue, men det er enno to att. Dette er passeleg lektyre når ein solar seg og sløvar litt.

Dagbok 2020: 31.mai

                                                          Akkurat no.

Klokka er no 17.30, temperaturen er + 26 grader og det er nydeleg vêr. Det er sol og blå himmel frå morgon til kveld desse dagane, så lenge det varer. På føremiddagen i dag var det nesten FOR varmt, då stod gradestokken på +28 grader. Eg skulle prøve å ligge på solsenga på altanen-men det vart  travelt. Eg har halde meg inne og på altanen i heile dag. Har ikkje snakka med ei sjel-knapt nok sett ei. Eg kunne sjølvsagt gått ein tur, men eg blir så "trøtt" i føtene når det er varmt. Det kan hende eg må vatne litt i hagen no i kveld. Hageslangen min er ikkje god. Det er "framstykket" som er øydelagt og sprukke så vatnet fer i alle retningar. Kjøpte eit nytt "framstykke" -men er trur det må noko meir til. Eg treng slangen når eg vaskar stuevindua og  spylar altanen også. Eg har ikkje gjort ein einaste fornuftig ting i dag-anna enn å tømme oppvaskmaskina. Mykje av dagen har gått med til å høyre ferdig lydboka som eg har lese i det siste. 

Eg likar ikkje så godt raude dagar, for det er så lite å finne på når eg er åleine. Marit for på tur til Stryn i dag, men i morgon skal vi på Plantasjen viss der er ope. Eg må kjøpe nye kasser utanfor kjøkenglasa og plante i dei. Skulle ha kjøpt noko meir til hagen , men eg veit ikkje kva eg vil ha. Gras er det nok av her.

No har eg hatt meg eit lite måltid, har ikkje lyst på mat når det er varmt, så ein må nesten vente til sola går ned. Desse to siste kveldane har vi sete ute på Marit sin uteplass, der er det fin sol til klokka er over åtte(20) Her på altanen min blir den borte litt før. Det er i alle fall kjærkome med sol og varme etter ein lang vår med mange snøfall, regn og lite sol.

Dagbok 2020: 30.mai

Akkurat no.

Klokka er no 20.50, temperaturmålaren på trappa viser + 26 grader, men det trur eg er å overdrive sjølv om det har vore veldig varmt i dag.
Det første eg gjorde i dag etter morgonstellet, var å køyre ned på butikken og bunkre opp med Cola og brus+ litt brød etc.
På føremiddagen var eg ute og jobba litt i hagen, klipte med kantklipparen, vatna og rydda litt. Men eg vart fort lei i varmen -arbeidslysta minka. Eg gjekk inn og tok av meg mesteparten av kleda og la meg på solsenga med lydbok. Der låg eg til eg vart svolten og gjekk inn for å finne meg litt mat. Ikkje lenge etter ringde Amanda og fortalde at dei var i nærleiken og ville kome opp til meg ein tur. Det var Margrete, Erlend, Charlie og Amanda som kom. Det var ca. 1mnd. sidan sist dei var her, så det var veldig kjekt å få besøk. Dei hadde blant anna med seg ein diger vannmelon.
Vi sat inne mens dei var her, men då dei var reiste gjekk eg opp til Marit og sat på uteplassen hennar. Der var det fryktelig varmt. Det er nesten ikkje til å tru at det kan bli så varmt, så brått. Men heilt nydelig. Klokka var nesten 20 då eg kom ned att, så i dag har eg ikkje verken høyrt eller sett nyheitene, men Marit er flinkare å følgje med i det som skjer.   På andre sida av bygda skin sola enno, men her hos oss er den borte for i dag. Det er fantastisk å få oppleve slike dagar etter alt griseveret vi har hatt før.
No er det altså pinsaftan og eg vil nytte høvet til å ønske alle lesarane mine ei god og nydelig pinsehelg.

Dagbok 2020: 29.mai

Klokka er 17.05, temperaturen ute er + 20 grader C og det har vore sol og strålane vêr i heile dag. Eg har vore ute det meste av dagen. Det er mykje å gjere i hagen når ein er åleine om det, men kjekt å ha noko å gjere på. På føremiddagen var eg ute og rydda i hagen, eg fekk låne " løvetannopptakaren" til Urke og fekk tatt opp mesteparten av løvetennene mine med rot. Det var litt kjekt å halde på med. Så dreiv eg og klipte gras rundt jordbæråkrane med vanleg saks, det var ikkje SÅ populært, sidan eg greidde å få hol på skinnet på ein finger.  Eg var så dum i dag at eg ikkje brukte hanskar, så no veit eg ikkje kva tid eg kan stille med reine hender igjen. Akkurat no er dei både grøne og svarte. I 15-tida var eg inn og åt litt, før eg gjekk ut att og klipte plenen rundt huset. No reknar eg med at eg har hatt lang nok arbeidsdag-for alderen. Det røyner litt både her og der, så eg må ha diverse pausar innimellom. No skal eg vaske meg litt og ta på meg litt andre klede og så skal eg sette meg opp på uteplassen til Marit. Resten av familien skal til Stryn, der dei har campingvogna ståande.

Det har vore mange fødselsdagar i familien i år, og fleire blir det no i juni, i dag er det Amanda som fyller år-heile 20 år er det blitt. Og sidan ho er fødd i året 2000 vil det alltid vere lett å hugse kor gammal ho er.
    GRATULERER MED 20-ÅRSDAGEN, AMANDA

Dagbok 2020: 28.mai.

Akkurat no.

Klokka er no18.18 og temperaturen er + 16 grader. Det er lettskya og fint. Vi var budde på fint ver i dag, men det vart nokre dropar på føremiddagen. Det var greitt nok, for då tok vi turen til Vik og handla litt. Eg åt litt før eg gjekk ut og begynte på hagearbeidet. Først rensa eg litt rundt nokre busker på plenen, så klipte eg ferdig Skråninga, før eg flytta oppom huset. Der snauklipte eg dei to plenbitane opp mot gata. Der var mykje gras. Før eg kunne avslutte måtte eg spyle klipparen, det hadde eg ikkje gjort dei første gongane eg brukte den. Ergo var gras og mold størkna og tørka, så det var ein heil jobb å få den rein igjen; eg måtte til med skurekost og det som verre var. Eg lurte på om det kunne vere ein ide å smørje heile greia med matolje - det er glatt plast. 
Eg må ha ein liten premie til meg sjølv når eg har vore flink å jobbe. I dag fekk eg jordbær med fløte på. (Der er meir att!) 
I dag er det 28. mai-to månader sidan eg fylte 80. Eg synest det er rart at vi snart er i juni månad, tida stoppa liksom opp ein gong i februar. Komande veke har eg diverse avtalar. Tysdag skal eg til legen og fornye sertifikatet, onsdag skal vi på trening og torsdag er det frisør. Koronafrisyren er ikkje så populær lenger. Og så er det pinsehelg. Livet går sin gang. No er eg bra i rute-klar for Nyheitene. Eg går ikkje på Vernet dei dagane eg klipper plen.

Dagbok 2020: 27.mai

Klokka er no 18.10, temperaturen er + 12 grader. Det har regna mykje i dag, men så ser det ut til at vi skal få mange dagar med opplett- og det treng vi.
I går gjekk eg ut i hagen og skulle rydde litt rundt buskene, men det var ikkje mykje eg fekk gjort. Kantklipparen vart fort straumlaus og så kom regnet. Å klippe med klippar var ikkje råd, så der står att ein stor uklipt flekk. I dag var det ikkje å tenke på å gå ut og gjere noko, så då tok eg ein liten tørn inne-eg får kalle det "fredagsvask"- sjølv om det er onsdag. Eg har bytta på senga og vaska soverom, bad og kjøkken+ at vaskemaskina har vore i arbeid.

Eg hadde eit måltid klokka 15, og etterpå la eg meg på dagsenga med lydbok. Eg føler meg veldig lat når eg sløvar midt på dagen, men eg får ta det igjen når det blir opplett. Graset veks voldsomt i dette vêret. 

Elles kan de sjå epletreet på bildet, det står i full blomst no. Når det har blomstra av skal det klippast.

Nesten alle jordbærplantane eg sette lever, det er ein som kanskje er død, og sist eg såg etter var der i alle fall EIN potetplante. Men eg kan no berre stikke nedi fleire viss eg vil. Det er ikkje levebrødet mitt. Eg har ikkje vore på Vernet sidan Sundag, eg har satsa på hagetrim no framover-i alle fall til eg har fått plenane i orden. Så er det snart Amanda sin fødselsdag og så kjem pinsa.

Dagbok 2020: 26.mai.

Klokka er no ca.17.30 og temperaturen er +15 grader C. Eg såg på altanen i dag tidleg at det hadde regna, men då var det fint vêr, mildt og opplett. Sidan eg ikkje hadde fått klipt ferdig plenen i går, håpa eg å gå fullføre i dag. Eg hadde også lada opp kantklipparen og var klar til dyst. Men først var det trening. Det var for så vidt greit, sjølv om vi ikkje var så veldig gira. Eg trefte ei venninne der som eg ikkje har sett på aldri den tid og det var no kjekt
Eg hadde med meg bensinkanna for å kjøpe bensin til klipparen. Men då vi kom ned til Vik, oppdaga eg at eg ikkje hadde veska mi med, ergo kunne eg ikkje handle. Marit trong ikkje å handle, så eg køyrde heim, sette av Marit, og henta veska. Så var det ned på bensinstasjonen og fylle opp. På heimvegen stakk eg innom Kiwi og handla litt til meg sjølv. Hadde lyst på noko godt. Der trefte eg ei anna venninne frå mitt yrkesaktive liv, og vi hadde mykje å snakke om. Blant anna kunne ho fortelle at ho var blitt oldemor. Eg ser tydeleg at eg er komen i old-tida.
No held det visst på å klarne opp, men det er tvilsomt om det blir råd å klippe gras i dag. Hadde det ikkje vore for klippinga, så hadde eg vore glad for regnet sidan eg har sådd grasfrø i plenen.
Eg har ikkje gjort noko til gagns i dag, og det likar eg ikkje. Det eg har gjort er å lese ferdig boka eg heldt på med og så har eg ete litt. Så får vi sjå om det blir ute verande på kveldstid.

Dagbok 2020: 25.mai

Klokka er no19.55 og temperaturen ute er + 17 grader. I dag har det vore nydelig vêr og vi har fått ein smak av sommar.

Sist natt verkte eg så mykje i hendene og fingrane at eg måtte ta ein smertestillande tablett, noko eg gjer svært sjeldan. Eg hadde planane klar for dagen og det som skulle gjerast, men trudde ikkje eg kom til å greie det. Men det merkelege skjedde, hendene mine var ikkje så vonde lenger. Dermed fekk eg støvsuga alle teppegolva. Etterpå gjekk eg ut og jobba i hagen. Blant anna rydda eg bedet nedanfor tilbygget og fylte på med kugjødselkompost. No når løkplantane blir borte er der eit New Dawn rosetre som vi har hatt veldig lenge . I tillegg er der fire klematis-plantar. Dei klipper eg heilt ned kvar haust, dei blir store nok likevel. I fjor haust var det ikkje ute verande, men i januar tok eg ein tørn og rydda i hagen. Jordbærplantane fekk siste resten av kugjødselkomposten.

Til middag i dag kokte eg graut, og etterpå la eg meg på solsenga ei stund, men hadde ikkje trott til å ligge der så lenge. 

Eg hadde bestemt meg for å klippe Skråninga igjen i dag, for i morgon er det meldt regn. Eg måtte vente til eg fekk tak i ein mann som kunne hjelpe meg litt med klipparen. Det var fryktelig mykje gras i dag, for sist eg klipte samla eg ikkje opp. 

Eg visste godt at det var siste bensindropane mine som var i klipparen, men eg håpa at det skulle halde. Sjølvsagt kunne eg køyrt ned og kjøpt oppå kanna mi, men eg tok sjansen på å la vere. Dermed står det att ei uklipt bot nedi bakken. Eg er ikkje alltid like lur. Det er heller ikkje så lurt å gå berrføtt i croxane når ein klipper plen, det resulterer som regel i skitne føter som ikkje er så lette å få reine igjen.

I morgon skal vi på trening, Marit og eg, men vi har tenkt å forhandle oss fram til ein annan dag i veka. Etter treninga skal vi handle, og bensinstasjonen er ganske nær butikken.No må eg ut og rydde på plass diverse reiskapar etc.

Bok nr.31 - 2020: Kunsten å dø

Rate this book

1 of 5 stars2 of 5 stars3 of 5 stars4 of 5 stars5 of 5 stars

Då vart eg endeleg ferdig med denne boka. Det har blitt litt fram og tilbakespoling. Eg kjem nok til å lese fleire bøker i serien. Det er lettlest underhaldning. Som KRIM-bok er dei kanskje litt langdryge og ikkje så veldig spennande, men elles OK.

Opplesaren har eit lite snev av ittakisme slik at sykkel-blir nærmare sikkel etc. Det er berre litt morsomt.

Dagbok 2020: 24.mai

Klokka er no 19.55 og temperaturen er + 13 grader. Det har vore ein relativt fin dag i dag, sjølv om sola ikkje har vore framme heile tida.
På føremiddagen gjorde eg ein liten jobb , eg rensa skinnmøblane og sette dei inn med noko som ska hjelpe til å bevare skinnet. Det var ingen stor jobb. Etter at eg hadde vasa rundt ei stund gjekk eg ei runde på Vernet. Eg tok det heilt med ro og sat litt på kvilebenkane for å nyte sol og finevêr.
 På heimturen stoppa eg opp ved naboen og vart sittande å prate på trappa.Då eg kom heim vatna eg nokre blomsterbed, for det er faktisk ganske tørt.
Eg var veldig låk i hendene først på dag, men det har kome seg litt etter kvart. Eg veit ikkje heilt kva denne dagen har blitt brukt til, men den er i alle fall snart over. Eg laga middag i 15-tida som vanleg og etter middag skulle eg legge meg ut på solsenga, men då var sola borte. I staden la eg meg på dagsenga med Storytel.
Då eg stod opp att kokte eg kaffi og åt litt is til. Då sende Marit melding om at eg måtte komme opp til henne, så vart eg sittande der til klokka nærma seg Dagsnytt. Og det var den dagen. For morgondagen har eg ikkje så mykje program, men det er nok jobbar å ta av. Tysdag skal vi til fysioterapeut igjen etter ei lang tid utan. 

Dagbok 2020: 23.mai

No er klokka 17.50, temperaturen ute er + 16 grader C, og elles er vêret som på bildet over her.
denne dagen vart litt annleis enn tenkt, men det er berre bra. Eg var oppe i skikkeleg tid, åt frokost, bretta ein klesvask og rydda litt på kjøkkenet. Eg hadde planar om å dusje og vaske håret. Men før eg kom så langt, ringde Solveig og sa at ho og Øystein var på veg til Ørsta, og Øystein ville reparere trappa. Det var no veldig kjekt for meg, men Marit og eg måtte utsette handlerunda vår. Det gjorde ingen ting.

Øystein hadde med seg alt han trong og sette i gang og jobbe. Der var mange hol i "sementen" og dei vart fylte opp med eit stoff-eg veit ikkje kva det heiter. Så skal det stå i 48 timar før han pussar ned og målar. Inntil vidare må eg gå gjennom kjellaren når eg skal ut.

Etter at Øystein var ferdig åt vi brødskiver med plommesylte som Solveig hadde kokt heil nyleg. Og etter at dei var reiste vart det butikkrunde på Marit og meg. I dag handla vi berre på SPAR.

Eg laga meg litt middag då eg kom heim, og etterpå vart det litt hagearbeid. 

Tidlegare i vår gjødsla eg plenane  for å brenne bort mose, og det gjekk som planlagt. Det er berre det at der mosen vaks-var det ikkje gras. NO har eg fylt holene med mold og sådd i grasfrø, så får vi håpe det beste. Eg apar etter det som naboen gjer, for han har alltid så fin plen. Eg har ikkje brukt maskinene mine i dag. Der er diverse delar som må festast betre, og så må eg spare litt på hendene mine. Skuldra er ikkje så mykje i faresonen no når eg ikkje dreg i snora, men både fingrane og handledda får sitt. Men det går bra. Sidan eg gjorde hagearbeid vart det ikkje tur på Vernet i dag

Dagbok 2020: 22.mai

Klokka er 17.30, termometeret viser + 18 grader, så no kjem det seg. 

I dag har eg vore rimeleg aktiv, eg fekk m.a. vaska kjøkken og bad før eg reiste bort i Furene. Eg trudde kanskje eg skulle finne meg ein klippar der på Felleskjøpet. 

Eg snakka med ein hyggeleg ung gut og han forstod kva eg måtte ha, men dei hadde ikkje slike klipparar inne, og han visste ikkje kor det var å bestille-om det tok lang tid etc. Men han anbefalte meg å høyre på EIK-senteret. Han meinte dei hadde Honda. Det hadde dei ikkje men dei hadde HUSQVARNA. Han eg snakka med der hadde også god tid til å forklare og vurdere. Det stod mellom to, den eine gjekk på bensin, men hadde batteri til el-start. Den andre som var litt mindre og nettare gjekk på batteri. Eg kunne tenkt meg den, men spurde kor lenge batteriet varde. Ein halv time ! Ergo måtte ein då kjøpe to batteri til 1700 kr stk. Dermed var den klipparen mykje dyrare enn den eg kjøpte. Eg føler meg litt på tynn is når eg skal kjøpe sånne mannfolkting heilt åleine. Men eg er klar over at det er gammaldags å tenkje slik. Eg spurte om dei kunne køyre klipparen opp i Starevegen, men han eine meinte at klipparen gjekk inn i ein Yaris- det trudde ikkje eg, men han fekk prøve. Og så vart der ein annan som køyrde den heim til meg. Han var kjend i Starevegen for han hadde budd i kjellaren til Eliassen i 5 år. 

Marit og Marit og Torbjørn kom for å sjå på den nye klipparen, og Torbjørn meine det var eit godt kjøp, seinare kom Gudmund også og ville sjå. Eg synest det er kjekt når naboane er interessert i det ein styrer med. 

No har eg snauklipt rundt huset for andre gong i år. Deretter stilte eg klipparen heilt opp og klipte Skråninga utan å samle opp, eg måtte ta det litt på halv 8, for eg ville ha vekk engkarsen før den blomstra. Det var ei lette å sleppe å dra i snora, men om det sparte armane, så røynte det på hendene og fingrane, men det må eg vel rekne med. Eg må nok finne meg i at eg ikkje kan ta alt på ein dag.

No skal eg koke ein kopp kaffi og slappe godt av før det blir TV-tid. Det blir ingen tur på Vernet i dag. I morgon trur eg at Marit og eg må proviantere litt.

Eg har litt problem med å halde styr på dagane, men det er fredag i dag, så då ønsker eg alle ei GOD HELG.

Dei brune flekkane er død mose, eg skal fylle på jord og så frø i "holene"-det har Gudmund gjort.

Dagbok 2020: 21.mai

Klokka er no 20.35, temperaturen på trappa er + 15-16 grader, tidlegare i dag var det ikkje så varmt og fint som no.

På førmiddagen i dag rydda eg litt her og der og las litt i lydboka mi- eg er ikkje komen så langt, og det er fordi eg har spela tilbake eit par gonger. Marit var heime åleine i dag, så etter avtale kom ho ned ein tur så vi fekk planlegge litt. Vi vart samde om å ta ein tur på gravplassen og sjå korleis det stod til bed blomster og pynt på gravene. Stemorsblomstrane som Øystein og Olaug hadde planta stod fint og blomstra, men samanlikna med dei andre gravene var det litt smått. Det var voldsom kor folk hadde pynta til 17.mai, såg det ut til. I tillegg  til planta blomster var det opp til fleire bukettar på gravene. 

Vi bestemte oss for å ta ein tur på Plantasjen og sjå om vi fann noko fristande. Plantasjen har ope alle søndagar og mange andre raude dagar. Og mykje folk var der. Eg såg relativt unge par som kjøpte utruleg mykje plantar og moldsekkar. Eg kjøpte nesten ingen ting, vil heller ein tur på Felleskjøpet, dei har  finare plantar. Mykje av det som dei hadde på Plantasjen såg noko skrøpeleg ut. Plantane har vel stått ute i all slags vêr. Eg planta 3 rosa Potentilla nedafor garasjen i fjor, og den eine buska er noko tafsete, eg ville kjøpe ei ny i staden, men dei som var på Plantasjen var ikkje betre enn den eg har. Dei gule potentillaene var fine.

Vi for rett heim etterpå, og då laga eg meg ei blomkålsuppe til middag. Slappa litt av med Storytel før eg tok ein tur på Vernet. I dag var eg borte ca. 1 time, men det var fordi eg trefte nokre menn eg mått prate litt med. Det var Helge Dahl med hunden. Og så var det to frå ytre Starevegen som sat på ein benk. Eg kommenterte at der var stelt i hagen til Gunnar Aarseth, og dei kunne fortelje at no skulle huset seljast, det går den vegen med dei fleste husa her no-dei skiftar eigarar. Men mange blir tatt over av neste generasjon.

Eg kom heim rett før Dagsrevyen, og så vart det sy-program etterpå, derfor vart det litt lenge før eg fekk skrive blogg. Håper at alle har det bra.

Dagbok 2020: 20.mai

Klokka er 17.35 og temperaturmålaren på trappa viser 17 plussgrader. Eg tok nettopp kvelden, for eg trudde klokka var 18.30 - men det viste seg at eg hadde sett feil.

I dag er eg irritert på meg sjølv, som ikkje har fått gjort det skapte grann, alle naboane er ute og ryddar i hagane sine og her er det nada.  Eg skulle også jobbe ute, men etter å ha prøvd å få start på klipparen enda ein gong, utan å lukkast, gav eg opp.
Eg har bestemt meg for å kjøpe ny klippar og i dag gjekk eg bort til Torbjørn for å høyre kva slags han hadde kjøpt-men den sorten kjem ikkje eg til å kjøpe sjølv om det var ein framifrå klippar. Så for eg ned på Jernia til ein annan nabo og spurde om han hadde ein klippar for mitt behov-men det hadde han ikkje og kunne heller ikkje skaffe. Men vi var heilt samde om kva slags klippar det skulle vere. Eg kjøpte eit par andre ting på Jernia, blant anna ei ny greinsaks, som "gutane" skal få prøve når epletreet har blomstra av.
Neste stopp var EIK-senteret på Mosflata. Der torde eg knapt stoppe for der var mange digre maskinar som stod ute, så der var ikkje plass til ein liten Yaris i alle fall. Såg ikkje ein einaste klippar, men eg skulle sjølvsagt ha gått inn i butikken. Eg trur eg må ha nokon med meg når eg skal handle slike store ting. Ein eller annan må no ha ein klippar med elektrisk start, som ikkje er for stor og tung.
Då eg kom heim vart eg ståande å prate med ein nabo. Og så gjekk tida.
Eitt eller anna måtte eg no få gjort, så det einaste eg har gjort i dag er å pirke småstein  ut ur vinterdekka (heilårsdekk). No er dei komne i plastsekker og eg har kosta garasjegolvet EIN gong, det må nok meir kosting til.
Eg tok meg litt mat i 15-tida, som vanleg og då vart eg så trøytt at eg la meg ut på altanen på solsenga.
Eg føler meg lat og unyttig på jorda når eg ikkje får gjort noko. Eg har altså sjekka på nettet for å finne ein høveleg klippar, men det er vanskeleg å finne den rette .Her er mange butikkar som handlar på slike. Så eg får berre ta meg på tak.
No må eg ut og rydde litt, og så må eg leite litt meir etter batteriladaren til kantklipparen ute i garasjen.
Det er berre heilt nydeleg ute, så eg får prøve å nyte det.

Dagbok 2020: 19.mai

Klokka er no 20.13, temperaturmålaren viser +10 grader, men eg kan ikkje garantere at ikkje sola har vore bortpå. Det er sol og nydeleg vêr ute no, fint før på dagen også, men framleis kaldt. 

Eg bestemte meg for å klippe ferdig plenen ovafor garasjen i dag. Bensinklipparen fekk eg ikkje start på, så det blei å utruste seg med opp til fleire skøyteledningar og bruke den elektriske klipparen. Den er det ikkje drag på, så eg kan bruke den berre der det er nokolunde flatt. 

Eg stilte klipparen heilt opp, så det vart ikkje så snaut. Det kom seg no litt. Elles har eg rydda litt her og der, tok opp ei bytte med løvetann, blant anna. Eg er ikkje heilt nøgd med det eg ser i hagen. Syrinen ser nokså forkomen ut, så det blir nok å stusse den i år også. I fjor kjøpte eg ein blåbærbusk, og ville sjå korleis den greidde vinteren før eg kjøpte fleire. Den ser ikkje heilt god ut. Eg er ikkje gira på å kjøpe så mykje plantar enno, for det er kaldt om natta. Før eg la meg i går kveld var temperaturen nede i + 2 grader.

Marit inviterte meg på kaffi klokka 17 i dag, så vi fekk no prata om eitt og anna. Eg har ikkje vore verken på biltur eller trimtur i dag. Vi fekk melding frå fysioterapeuten om at vi kan komme på trening komande tysdag, det blir tilrettelagt smittevern. No er det strålande ute og vêrmeldingane for morgondagen er gode. 

Eg må ned på Jernia ein dag for eg treng ymse hagereiskapar.Men eg veit ikkje kva tid det blir.

Eg har strikka ferdig tre lestepar, så no må eg legge opp eit nytt "spøt".

Dagbok 2020: 18.mai

Klokka er 17.50, temperaturen ute er + 15 grader, det er ikkje til å tru. Og sola skin! Eg har sett opp dører og glas for å få inn den friske vårlufta.

Dagen i dag har gått som ein røyk. Etter frokost og litt data, sette eg i gang å lage kjøttkaker, hadde kjøttdeig i frysaren som eg gjerne ville bli kvitt. Så laga eg god heimelaga saus og skrelte gulrøter. Poteter var det litt smått med, men eg skulle no på butikken uansett, så det var ikkje noko problem. Men først måtte eg vaske håret-corona-frisyren er ikkje akkurat så kledeleg, men eg kan i alle fall VASKE håret.
Eg var ein snartur ned på butikken, skrelte potetene osv. Plutseleg var klokka 14. Og då er det eg surrar litt, eg trur at gutane skal komme klokka 15, enda dei tydeleg har skrive 14.30. Eg er visst litt rotete oppe i hovudet. Men det var ikkje så farleg, for vi hadde mykje å snakke om mens potetene kokte.
Etter middagen sat vi i stova og drakk kaffi. Einar hjelpte meg med datamaskina og Audun fiksa TV-en så eg skal kunne sjå NRK TV. 
Hadde eit par småjobbar til som dei fiksa. Eg får nok ikkje klippe gras i dag, men eg håper på fleire fine dagar. Nede i skråninga skulle absolutt vore klipt.
No må eg ta meg ein tur ut og vurdere kva eg skal gjere i nær framtid. Og så kan eg no ta bilde. Trur ikkje det blir Vernet i dag, eg er så METT.

Dagbok 2020: 17.mai

Klokka er no 17.40, temperaturen er + 9 grader og sola er så vidt igjennom akkurat no. Det ser ut til at det går rette vegen med vêret.
i dag sov eg heilt til klokka 9 og låg attpå til 9.30. Eg trur at eg var den siste i nabolaget som fekk opp flagget i dag.
For mange har vel denne 17.maien vore veldig spesiell, men eg er ikkje vandt til å feire så voldsomt, så for meg er det heilt greitt å sitte heime åleine og strikke framfor TV-en. Der har no vore program i heile dag. Eg hadde ikkje sett på klokka, men trudde det nærma seg middagstid (kl.15.00)- men då var klokka 17. No har eg ete, og viss eg får ånden over meg blir det ein liten mosjonsrunde i dag også.
Eg har no sjekka FB og sett kva som går føre seg rundt på bygdene. Eg trur denne 17.maien blir meir minneverdig enn dei fleste andre. Og så blir det no spennande når Erna skal konkurrere med heile Norge i "Alle mot en".
Einar hadde ærend til Ørsta i morgon, og då ville han komme oppom. Eg inviterte på middag. Kanskje Audun også blir med, og då får eg to gjestar. Det er ikkje meg i mot. Viss no vêret blir slik som det skal vere denne årstida får eg mykje å gjere. Til vanleg plar vi klippe plenen to gonger før 17.mai, i år var halve plenarealet klipt ein gong - og det var ikkje på grunn av manglande gras.
No kjem eg meg inn på både FB og blogg ved eiga hjelp, sjølv om det er litt kronglete.
Håper alle har hatt ein bra dag-eg har det bra, eg har berre ete litt (?) for mykje kake. Det var restar frå i går.

Dagbok 2020: 16.mai

Under over alle under - eg kom meg inn på bloggen på skikkeleg vis til slutt. Det er passeleg straff å sitte her midt på natta og streve med maskintrøbbel, men det er til pass til meg når eg rotar slik.
Klokka er no 25 minutt inn i den 17.mai, som blir heilt annleis i år enn andre år.
Ute er det vel mest regn no, og temperaturen er + 2 grader.
Sist natt hadde det kome mykje snø igjen, eg håper den var den siste rida - det er nok no.
I går var eg på handletur i Vik og hadde no passeleg mykje med heim, men etter kvart sakna eg både det eine og det andre, så eg laga ei liste. Eg tenkte å ta ein liten tur på Kiwi på føremiddagen i dag.- Snø på vegen, ikkje brøyta, bil i garasjen med sommardekk. Det var berre å gløyme butikken. Marit meinte eg kunne ringe Janne for ho var akkurat og handla. Hadde det vore berre ein ting, så kunne eg gjort det. Eg hadde tenkt å lage ei  kake, men hadde ikkje på langt nær alle ingrediensane, så eg fekk sjå meg om etter ei anna løysing. Eg fann ein kakebotn i frysaren, og så vart det ei slags kake likevel. 
Eg venta besøk av oldebarnet med foreldre i dag, så vi måtte ha litt kaffimat. 
Det var kjekt å få sjå Amund LIVE , og eg fekk no halde han også. Eg hugsar kor redd eg var for Solveig då hennar oldemor gjekk og bar på henne. Men har ein hatt barn sjølve, og barnebarn, så trur eg ein kan halde eit oldebarn også. Eg vil påstå at han smilte litt til meg.
Etter at gjestane var reiste, var det berre å benke seg framfor TV. Eg fekk no felt av ein lest og lagt opp til ein ny.
No er eg åleine i huset igjen, leigebuarane reiste i dag før middag, så no er det veldig god plass å parkere på tunet her. Eg har no lyst på besøk, men vil ikkje at folk skal komme viss dei er redde for at dei kan smitte meg. Eg er ikkje så redd, men det er dumt å ta sjansar.
Kva eg skal gjere i morgon, veit eg ikkje. Eg har ikkje feira så mykje 17.mai i seinare år. Så eg kan no berre sløve om eg vil. Trur eg skal ligge lenge
Ønsker alle ein fin grunnlovsdag anten ein held seg heime eller finn på noko.

Bok nr. 30 - 2020: Judaskysset

No kom eg meg inn på bloggen min, heile maskina er berre rot, og det er eg som har rota den til.

Denne boka las eg ut i dag. Den var sånn midt på treet, men til fleire bøker eg les i serien til enklare blir det å halde greie på folk. Denne boka hadde eit langt etterslep, den heldt fram etter at det meste var oppklart. Eg synest det vart litt langdrygt. Dessutan er det ikkje ein reinhekla krim , men meir som "En roman om en forbrytelse". Eg ser fram til den neste boka, for den meinte Margrete var god. Det er enkel litteratur, men greitt å lese "på øyret".

Dagbok 2020: 15.mai

Klokka er no 17.55 og temperaturen er + 7 grader, det har snødd i dag også, men den snøen har ikkje blitt liggande, derimot minkar det på den som ligg her frå før.

Marit og eg var ned på Spar og handla i dag, men eg har alt kome på fleire ting eg skulle ha kjøpt. Men det var noko som var litt pussig; dei var utselde for sitrongelé-pulver! No har eg rikeleg utval av gelépulver heime, men sitronpakkane "gjekk ut" på dato i 2015.

Då vi kom heim parkerte eg ved Marit sin garasje slik at vi kunne sitte og prate ei stund. Eg måtte fortelle Marit om Lollo, katten hennar. Ho er så rar. Når Marit er nede hos meg , ligg Lollo på trappa når vi kjem ut, likeins viss Marit er bortreist, då kjem Lollo hit. Men i går kom eg ut og då låg ho på trappa mi enda eg visste sikkert at Marit var heime. Men så forstod eg: BILEN til Marit var vekke, det var visst Janne som hadde den. Eg synest det er litt rart at ein katt kan forstå slikt.

Mens vi sat i bilen såg vi masse ungar sog gjekk opp Storebakken, og ei stund etterpå så vi dei på Fonnvernet. Dei feira "17.mai" med å gå i tog. Då eg var komen ned att til meg sjølv, kom dei marsjerande inn Starevegen. Dei hadde pynta seg og hadde flagg . Dei ropte, slik dei plar gjere i toget og såg ut til å ha det veldig kjekt. Eg sprang inn og fann mobilen så eg fekk tatt bilde.

I dag hadde eg bestemt meg for å lage skikkelig middag, dvs. Seibiff. Eg laga ein stor porsjon, så eg har i morgon også. Etterpå måtte eg kvile med lydboka, før eg tok ein trimtur på Vernet. Ein av grunnane til at eg går der er at der er nesten heilt flatt, for knea mine likar ikkje at eg går for mykje nedover, men eg tok ein liten omveg heim att for å få vere ute litt lenger. No er det snart TV-tid, men kanskje eg får lese litt før den tid. Leigebuarane skulle reise i dag, men no lid det så langt at dei må ha utsett det til i morgon.

Det er fredagskveld så eg vil ønske alle ei god helg inkludert 17.mai

Dagbok 2020: 14.mai

Det blei ein liten tur på vernet i dag også, mellom 18-19

Klokka er 17.40, temperaturen på trappa er + 6 grader C, det er skodde i fjellsidene, men opplett akkurat no.

Eg har ikkje vore ute for ei dør i dag, men eg tek meg kanskje ein liten runde før kl.19.
I dag har eg sete mykje i ro, strikka og høyrt bok, eg har fått smaken på krimbøkene til Anna Grue
og lestegarn har eg. 
Heilt sløv har eg ikkje vore i dag, vaska litt grundig på badet og kjøkkenet. Til middag år eg resten frå i går, og no har vel oppvaskmaskina gjort seg ferdig mens eg sit her inne på datarommet. 
Marit og eg skal på butikken og handle, det blir vel i morgon. Eg veit ikke kva eg skal kjøpe inn til 17.mai, for eg veit ikkje om nokon kjem hit eller har andre planar. Eg hugsa 17.mai i fjor, då var eg med Margrete og eit par barn til Volda på ettermiddagen. Det var så varmt at folk gjekk i shorts. Meldingane for dei første dagane viser nedbør og kulde. Eg orkar knapt å tenke på vêret utan å bli deppa. Eg gler meg til sol og varme og så blir eg berre sittande å fryse.
I morgon kjem vel Audun heim frå det høge nord, lenge sidan vi såg han no.
Feiaren var her før middag, han hadde ikkje anna å klage på enn at stigen var for kort. Eg er ikkje sikker på kva stige vi har sett fram til han før. No hadde eg berre ein.
No har eg kvinna meg opp til å ta på meg godt med klede og ta ein strafferunde på Vernet.

Dagbok 2020: 13.mai

Klokka er 17.30, temperaturen er +6 grader C, og no skin sola. Bildet over tok eg på heimvegen, for ei lite stund sidan. Då hadde eg vore ein tur på Vernet. Der bles det og hagla forferdelig ei stund for vinden spakna litt og det begynte å snø. Før eg var heime var det slutta å snø også, så veret er skiftande, ja. Og no er det altså strålande sol.

Eg var glad i dag tidleg då eg stod opp for at det ikkje hadde kome særleg med snø sist natt. Eg hadde tenkt meg ut på sommardekk og då bør det helst vere bert. 

No har eg gått inne i huset og pusla i fleire dagar, så eg var i grunnen lei. Men eg sette ikkje i gang noko storarbeid i dag heller; eg sette meg til med Storytel og kabal rett etter frokost. No har eg begynt på 2.boka i serien, "Judaskysset" , den handlar om ein ung vakker mann som sjarmerer gamle enker og andre einslege kvinner, og lurer frå dei pengane. Eg likar betre å lese krim som er skive av damer, dei er ikkje så opptekne av skytevåpen ag andre bestialske ting. Margrete les samme serien, men ho er komen lenger enn eg.

Då det leid på føremiddagen vaska eg håret og shina meg opp litt, men det var etter at eg hadde shina kjøkkenet. Laga meg litt middag også i dag, det vart ein spagetti-rett. Etter å ha slappa av litt, fylte eg bagasjerommet med tomflasker og køyrde ned på Kiwi og panta dei og handla aldri så lite med det samme.

Då eg kom heim att hang der ein lappe på døra om at Aret ville komme i morgon - og feie pipa. Og då eg kom att frå turen på Veret måtte eg leite fram stigen. Den plar ligge ovafor garasjen, men på grunn av måling av hus, låg den på altanen. No har eg lagt den attåt husveggen der som den brukar å vere når feiaren kjem. Eg har også varsla dei i kjellaren.

Tok nokre bilde av bedet nedanfor garasjen med det samme eg var ute. Der er masse tulipanar som ikkje har sprotte ut enno, og det er no bra. Om rabarbraen er brukbar veit eg ikkje.

Dagbok 2020: 12.mai

Klokka er no 18.20, temperaturen ute er + 8 grader, det er stort sett opplett og litt sol. Det første eg gjorde etter at eg kom meg på beina i dag, var å stikke mobilen ut dørgløtten og ta bilde. Det hadde kome mykje snø i natt, så mykje at plogen hadde køyrt. Då det skulle ha vore vinter, kom det ikkje ei snøflugse, men denne våren har vi fått eine snøfallet etter det andre. 
Bilen min står i garasjen med sommardekk; eg kunne lett ha moka tunet og køyrt i dag, men det var ikkje så viktig. Eg var så vidt utpå tunet og brukte snøbrettet, men berre for å lage hol i snøen så den skulle smelte fortare.
Eg er så innstilt på vår og hagearbeid at eg tek meg ikkje til noko anna, eg vart sittande framfor datamaskina og legge kabal ei god stund, mens eg  høyrde lydbok på Storytel. Etterkvart tok eg strikketøyet i staden for kabal. 
Eg har ikkje vore ute og trimma sidan fredag, men i dag gjekk eg ei lita runde på Vallabøen, ville ikkje opp på Vernet og vasse i snø når eg kunne gå på berr asfalt.

Slik såg det ut på toppen av Storebakken i dag. Det som ikkje kjem godt fram på bildet er bjørkene med grønt lauv. Det kom litt snø i lufta mens eg var ute og gjekk.

Eg tok meg litt mat då eg kom heim før eg sette meg til med bok og strikketøy igjen. No er klokka så mykje at det snart er tid for TV. Eg brukar å seie at eg aldri kjeder meg- men somme gonger er det like før.

Bok nr. 29 2020: Den skallete detektiven

Eg las den første boka i denne serien, "Dypt å falle" -  eg gjekk litt i surr i alle personane, så eg fekk ikkje rett inntrykk av boka, men bestemte meg for å lese fleire bøker i serien. Dessverre fann eg ikkje rette boka, dvs.nr. 2, så det blei nr. 4. Denne boka var mykje lettare å halde styr på , her er få personar og relativt enkel historie. Boka er grei nok, men eg synest dei drog ut hendinga vel lenge. Nr. 1 fekk terningkast 5, denne fekk 4. Og den er truleg ikkje meir verdt. No har eg rette rekkefølga , så kan eg følge den- eller kanskje ikkje.


I en alder av 16 år og 27 dager ble Rolf Harskov truffet av toget og drept. Rolfs lillesøster Gry sniffet kokain med en dødelig dose rottegift - akkurat ved samme alder. Til forskjell fra politiet, er de ulykkelige foreldrene sikre på at dødsfallene var drap. Når deres yngste barn, Malthe, nærmer seg samme alder stiger uroen. Foreldrene kontakter Dan Sommerdahl og ber ham finne morderen før det er for sent. Da det omsider går opp for «den skallede detektiven» hvordan det henger sammen, har Malthe allerede dratt til Roskilde-festivalen med sine venner.

Dagbok 2020: 11.mai

Klokka er no 18.04, og bildet over har eg nettopp tatt. Det var mykje meir snø i dag tidleg enn i går morgon, og i dag har ikkje snøen tenkt å smelte bort, slik som i går. Temperaturen er no + 4 grader. Bjørkene er grøne og plommetrea blomstrar, så ein kan bli litt usikker på kva årstid det er.

Eg misser stort sett all arbeidslyst når det er slik. I dag før middag sette eg meg til å legge kabal på data og høyre bok på Storytel. Men så vart eg litt irritert på meg sjølv, så eg tok fram støvsugaren og støvsuga alle teppegolva. Støvsuging er ikkje det kjekkaste eg veit, for armane mine likar det ikkje. 

Då eg var ferdig med den jobben, ringde Marit og bad meg opp på kaffi. Det var ei kjekk avveksling.

Då eg kom ned att vart det fram med lydboka igjen, men no kombinerte eg med strikking. Så må eg ta ein pause med det også, for venstre skuldra sa ifrå om at det var nok. Eg har sagt ifrå om at no er det nok med snø, for under snøen står det grøne strå. (Trur snøen gjer godt for gjødslinga.) Eg trur dei fleste her har halde seg heime, for vi har vel stort sett skifta til sommardekk. Det snøar jamt enno -men eg høyrde nokon som snakka om høge temperaturar lenger ute i veka.Det er tross alt snart midten av mai.

Dagbok 2020: 10. mai

Morgon

Klokka er no 17.50, temperaturen er + 8 grader og no skin sola ute, men det er kanskje litt for seint å gå tur no.

Dagen starta litt brutalt med snø på markane og snø frå himmelen. Det var ikkje uventa; etter kvart som ein eldest kjenner ein det meste på gikta. 

Den halvklipte plenen vart særs stilig med snø på. Eg har ikkje vore ute for ei dør i dag; på føremiddagen sat eg og såg gudsteneste frå Nidarosdomen med vigsling av ein ny boskop. Eg fekk strikka ferdig ein lest og lagt opp ein ny, før eg gjorde noko anna. Marit og eg driv ikkje og spring over gata så ofte, men vi held oss a jour på Messenger. I dag skulle Marit bake. Eg hadde ikkje lyst å bake, for då rotar eg så til på kjøkkenet, men det vart til at eg sette ein brøddeig, då fekk eg brukt opp ein slank med "gammal" melk og så fekk eg tømt nokre mjølposar.Det kan vel kallast "rydding"?

Då eg hadde fått brøda i form, laga eg ein deig til, etter oppskrift frå Marit. Det er ein type hamburgerbrød, som vi likar godt. Marit bakar dei ofte, eg berre av og til. I alle heve - og steikepusar har eg lese i Storytel-boka mi. Det er andre boka i krimserien til Anna Grue. Den er mykje enklare å følge med på enn den første, denne heiter  "Den skallete detektiven". Elles har eg vatna blomstrane og gitt orkidéane gjødsel. Eg har eit utal orkidéar med friske grøne blad-utan blomster. Eg trur det er noko skummelt med orkidéane no for tida, eg trur dei er programert til ikkje å blomstre meir enn ein gong. Før hadde eg orkidéar som blomstra igjen og igjen.

Eg ergrar meg grøn for at eg ikkje får klipt plenane, graset er no så langt at det blir eit problem å få tatt det. I alle år i seinare tid har vi alltid klip plen to gonger før 17.mai. Elles vurderer eg å kjøpe -ev. leige - ei geit.

No er eg ferdig med å steike brød og rundstykke, men det står att litt ryddearbeid.  Eg ser fram til at vêrmeldingane blir så optimistiske at eg kan handle plantar. Eg må ha ein nypotentilla nedanfor garasjen og så må eg ha ein blåbærbusk til, eg kjøpte ein i fjor. Det blir spennande å sjå kva som skjer no når skulane opnar meir opp. Det mest sutalause  denne tida har vore å vere pensjonist, men litt kjedelig er det no. Spesielt saknar eg spanskkurset, "La Professora" har gitt oss litt lekse på data, men eg saknar det sosiale.

Kveld.