Dagbok 2025: 9.juli

Klokka er no 18.44, temperaturen ute er + 15 grader. Det har vore opplett og relativt varmt i dag, men ikkje sol. Eg prøvde å gjere litt husarbeid på føremiddagen, eg støvsuga teppegolva, men elles vart det ikkje så mykje gjort. Eg vart så trøtt at eg la meg ned på "dagsenga" ei stund,  eg er ikkje sikker på at det var så lurt. Men etterpå kom eg meg i alle fall ein runde på Vernet, til tross for at venstre hofta var litt trøblete. Ikkje alle dagar er like vellykka.

Eg har ikkje sett nyheiter i dag. Eg har problem med å sjå TV viss eg ikkje har strikketøy og no minkar det på garnet. Eg vurderte å fare til Vik og kjøpe, men det vart ikkje noko av.Solveig har visstnok kjøpt garn i Sverige som eg skal få. 

Kort sagt vart dette ein dag då lite vart gjort og lite hende.

No etterpå er eg litt irritert på meg sjølv, for eg kunne no gjort ein liten innsats i hagen. Der er det alltid noko som skal gjerast. Eg skal no ta meg ein tur rundt huset og sjekke. Naboen er komen heim frå sydenferie og har klipt plenen ovafor garasjen i dag. Eg klipte sjølv ein gong mens han var vekke.

Kvar gong eg går her må eg beundre det fantastiske byggverket som Fonnvernet er.