Dagbok 2015: 31.juli.

Klokka er 19.30, temperaturen er + 14 grader. Eg har nettopp vore ut på altanen og tatt ildet av "vêret"- frå vest mot aust. Eg gjer merksam på at dette er mellom bygene. For det har vore ei og anna kraftig regnbyge i løpet av dagen, såpass at det ikkje tørkar opp innimellom.Men i Nice ligg Solveig og Øystein og kosar seg på stranda i +32 grader C. I morgon er det første august og sommaren er enno ikkje komen hit. Ikkje verst for oss som har heilårsferie, verre for dei som snart skal starte på jobb og skule. Men mange har heldigvis vore til varmare strøk.
No håper vi og trur på betre temperatur til Rasmus kjem på besøk, slik at det kan bli høve til litt uteliv. Nils har kjøpt ein ekstra redningsvest i dag 70-90 kilo. Han vil sikkert ha med seg fleire ut og fiske. Trur ikkje han bryr seg om vêret, berre det ikkje er vind.
I dag tok eg fredagsvasken. Ikkje mykje å snakke om, eigentleg.
Så var Nils og eg nedover og handla inn diverse matvarer, først på Coop, så på Rema 1000. Det blir vel litt finpuss i morgon. Då er det forresten avslutning for 2-vekers naturfestival. Då skal det etter planen vere Saudehornet rett opp. Om dei kjem til å fullføre det står att å sjå. Det er mykje snø i fjellet enno. Kan aldri hugse at der har vore snø i Saudehornet 1.august før,
Nils har funne seg ein fotballkamp, så eg trur eg finn meg eit anna rom, såpass eg får lese i boka mi(lydbok). Ønsker alle ei god helg same kvar dei er.

Ingar er ute og syklar på Kongsberg. Ser ut til at der er betre temperatur enn her.

Dagbok 2915: 30.juli

Klokka er 21.15. Temperaturen er +11,5 grader C. Ikkje direkte tropevarme! Det har regna meir og mindre i heile dag. Og eg har halde meg inne.
Nils for på sjøen for å fiske sei klokka seks i dag tidleg. Eg har ikkje sett på fangsten enno, men han har tatt bilde, så eg er orientert.Han var godt nøgd med fangsten. Han vil ikkje ha for mykje om gongen, det er no ein god del arbeid etterpå også.
Eg brukte heile føremiddagen til å rydde, støvsuge og pusse vindu m.m. Ommøblerte litt i stova. Vi har to sofaer som vi kan bytte om på.
Seinare på dag vaska og rydda eg nokre skuffer på badet. Eg kan ikkje ha for mykje bøy og tøy for ryggen sin del, så eg får ikkje gjort så mykje kvar dag.
Fekk melding frå Margrete om at ho trong å printe ut noko, så ho ville komme oppom.
Sidan vi hadde kokt småsei til middag, kunne vi ikkje invitere henne til å ete i lag med oss, men is og kaffi gjekk bra.
No er Nils på møte i SV, og eg har nytta åleinetida til å lese i boka mi, det har blitt lite lesing i det siste.
Margrete skal til Nesbyen på hundeutstilling i helga og Ingeborg skal vere med og lærekøyre. Ho får god trening. Kjem an på om ho og Rasmus støyter på kvarandre?
Solveig og Øystein er vel framme i Nice. Dei slepp å fryse.

Dagbok 2015: 29.juli

Klokka er no 21.15. Temperaturen ute er + 14 grader C og dessverre regnar det igjen. Tenkjer på dei som er på konsert i kveld, dei er ikkje så heldige som vi var.
I dag vart det litt "dagen derpå", men etter kvart kom eg i siget. Fekk gjort mykje før middag, det gjekk i diverse opprydding og anna husarbeid.
Til middag åt vi opp resten av løk-fiskekakene, så no er dei ute av verda. Dei var i og for seg gode, men hadde vore betre utan løk.
Så slokna vi ei lang stund, eg på sofaen, Nils i reclineren. (Vi hadde ein travel dag i går-kjenner at vi er ikkje unge lenger).
Elles har Nils klipt bio, eg vaska klede og fekk dei tørre før regnet kom, så strauk eg det som skulle strykast. Innimellom har eg strikka litt. Ein ganske vanleg dag i pensjoheimen, med andre ord.
Solveig og Øystein er på veg til Nice. Rasmus og fam. kjem hit på sundag, Dei har bestilt overnatting frå laurdag til sundag på Vesterland ved Sogndal. Dei deler opp turen for ungane sin del. dei likar seg godt på Vesterland. Håper vi kan få nokre fine dagar mens dei er her.

Dagbok 2015: 28.juli.

Hjørundfjorden/Leknes.

Skår.

Finnes.

Bjørke

Klokka er no 0.30 og temperaturen er + 10 grader ute. Det har vore ein fin, lettskya dag med mykje sol,men varmen let vente på seg.
Det eg gjorde i dag før middag var å lage ei kake, lufte diverse dyner og puter og legge i hop klede.Nils koka lange til tidleg middag, så vi fekk tid å "sove middag" på altanen før vi skulle fare på tur. Bussen skulle gå frå Møre-bil klokka 14.45.Og då var vi klar.
Bussen køyrde oss til Sæbø, der vi gjekk rett om bord i båten. Det var frisk bris på Hjørundfjorden i dag, men eg sat ute heile tida i vind og sol. At eg sat på eit kaldt underlag av jern, tenkte eg ikkje på før eg kom heim. Skipsføraren gaida oss inn fjorden og fortalde litt frå dei små bygdene. Eg er rimeleg kjend der frå før, men han hadde diverse anekdotar i tillegg til geografien.
På Øye slo vi oss til ved båthamna med kaffi og kake. Prinsessekaka mi vart veldig godt motteken-alle skrytte av kor god den var.(Og det var den). Då det leid på rusla vi opp i hotellhagen der det var sett ut campingplassbord og anna. Dessverre var der mykje skygge så det vart etter kvart ganske kaldt. Det vart ei stund å vente før konserten tok til klokka 19.30.
Det var berre to av Vamp-gruppa eg kjende att, gamleguten sjølv og sonen som eg berre kallar "Liten fuggel". Han som var hovudvokalist er ny, trur eg, han song bra, men vart etter kvart nokså hås i målet.Alle var flinke, men yndlingen min er den vesle fuglen. Dei avslutta konserten med Tir na Noir, berre for at folk skulle reise seg og klappe for meir. Då kom fuglen inn att og song ein song om fuglar- og avslutta med "Liten fuggel"-delvis med allsong. Det var fin stemning i hagen, med unntak av dei som var meir opptekne av øl, vin og høgrøsta prat. Dei irriterte oss andre litt. Og dessverre, Ingeborg, dei song ikkje songen din.Nils kjøpte eit fint hefte med songtekstar og bilde, som han sølte kaffi på i ryggsekken sin...........
Heimturen gjekk med buss gjennom Nordangdalen og Honndalen i nydeleg vêr. I styggevêr er ikkje den turen noko særleg. Eg fekk ikkje til å ta gode bilde av scena, men det kjem vel eitt og anna i avisa. No drikk eg sitronvatn og håper på betre tider.

Nordangsfjorden/ Øye

I hagen til hotellet på Øye. Bilda er dårlege, men håper dei kan gi eit inntrykk av stemninga. Elles har eg alt no funne fleire betre bilde på FB.

Dagbok 2015: 27.juli

Klokka  har no passert 22.00, men kvelden er enno ung. Vi kom heim frå Hareid for vel ein halv time sidan. Temperaturen ute er +12 grader C, det er lettskya og fint. Sola har vore framme i dag, men det har ikkje vore spesielt varmt. 

Eg rydda opp inne, men var også ute i hagen ei lita stund før vi gjorde oss klar til å fare til Hareid. I dag baud Solveig på rømmegraut og spekemat, blant anna. Etter klokka 12 i går kveld, gratulerte Nils meg med dagen. Eg forstod først ingen ting, men så kom eg på at vi hadde bryllaupsdag. Ikkje rundt tal, rett nok, men i vår alder kan vi feire kvart år. I dag er det altså 53 år sidan vi gifta oss, og sidan Olaug jr. vart døypt på bryllausdagen vår for 18 år sidan, kunne vi feire det også. Margrete hadde enda ein god grunn til å stille opp, for ho treng staudar og andre plantar til ei skråning ho held på å beplante. Og Solveig trong å tynne ut litt i sin hage. Alle "barna"var heime på Hareid, det skjer ikkje så ofte, så det var enda ein grunn til å møtast. Margrete hadde med dei to eldste barna, og no er det Ingeborg som lærekøyrer. Som vanleg gjekk praten livleg når vi samlast.

Ei lita stund etter at vi kom heim ringde Rasmus, dei tenkjer seg oppover i løpet av helga, så det gler vi oss til.

Håkon, Eirik og Ingeborg. Eirik kom att med nattbussen sist natt, etter ei     veke på Mallorca i lag med kameratar.

I dag fekk eg endeleg bilde av "tvillingane" i lag. Dette året er begge blitt myndige og har tatt "lappen". Dei ser ut som dei godt kunne ha vore ekte tvillingar, men er søskenbarn, fødde med sju vekers mellomrom.

Denne "brudebuketten" fekk eg av Solveig. Det er bleikrosa peonar frå eigen hage.

Vi takkar alle for ein fin dag.

Dagbok 2015: 26.juli

Klokka er snart halv sju, temperaturen ute er + 18 grader C. Bildet rett over viser himmelen akkurat no. Elles har det vore så ymist vêr i dag. Om morgonen var det skodde og grått, men etter kvar vart det betre. 

Eg starta dagen med å lage fiskekaker av sei. Laga ikkje mykje, berre ca 50 kaker. Treng ikkje å lage meir om gongen sidan eg har jamn tilgang på fisk. Dei er best nylaga. Etter at eg hadde rydda opp, shina eg meg sjølv  litt, før vi tok ein tur til Volda. Nils hadde lyst på Kina-mat i dag. Men restauranten var stengt, eller så hadde den ikkje opna. Det var då vi såg på klokka og oppdaga at den berre var ca 13.30. Ingen av oss hadde tenkt på å sjekke tida.

Men så gikk vi på Maria`s i staden og åt pizza. Dei hadde mange andre rettar, men likar ein pizza kan ein godt ete det heile veka om så er. Det er jo det vi brukte å gjere før, når vi reiste på ferieturar.

Då vi kom heim skulle vi sole oss og kvile middag på altanen. Men det vart ei kort fryd. Eg hadde berre lege på solsenga nokre minutt før det begynte å regne. Eg les som ingen ting og tenkte det vart berre nokre dropar, men måtte gi tapt og gå inn. Då fekk eg lese ferdig boka mi mens eg strikka og drakk kaffi.
Bildet av skjærsminen tok eg frå altanen. Den buska kjøpte vi i fjor. Hugsar at "Bestemor på Hildegard" hadde ei slik buske, og den lukta så godt. Synest ikkje det er så sterk lukt av vår.

Så må eg berre beklage at eg enno ikkje har fått tid til å pusse kopar og messing, men det ser ut til at tinga får stå i fred.

Bok nr. 55 - 2015: Italienske netter.

«Italienske netter» er suksessforfatter Katherine Webbs beste roman til nå.
1921: Unge, skjøre Clare Kingsley reiser gjennom Sør-Italias solsvidde landskap på vei til den lille byen Gioia del Colle. Her skal hun treffe igjen arkitektektemannen Boyd, som jobber for landeieren Leandro Cardetta, en bekjent fra Boyds tid i New York. Men da Clare stiger av toget i Gioia, merker hun straks en eim av blod og frykt i luften. For bortenfor Cardettas villa er spenningen på bristepunktet.
Byens fattige arbeidere søker desperat etter jobb og mat. Blant dem er Cardettas nevø Ettore, som er for stolt til å be onkelen om hjelp. Møtet mellom Clare og Ettore blir skjebnesvangert; Clare forelsker seg hodestups, og opplever ekte lidenskap for første gang i livet. Men det elskende paret skjønner fort at de står på hver sin side i en konflikt som snart kan kaste Italia ut i borgerkrig. Før sommeren er over, skal blod flyte, hjerter bli knust og avskyelige hemmeligheter om Boyd bli avslørt. Og Clare skal lære en leksjon for livet på den verst tenkelige måten.
................................................................................
No har eg endeleg greidd å kome meg gjennom denne boka - men kunne like godt gitt opp, etter diverse omlesingar og tilbakespolingar.
Eg lånte denne boka ein gong eg ikkje fann noko anna, men la den vekk då eg fekk andre bøker om hende. Etter trilogien om Kråkejenta tenkte eg at det kunne vere greitt å lse noko lett og uklomplisert.
No burde det ha rint ei klokke, for eg har lese bøker av KW før..........Denne boka kjem i den "rosa" kategorien, og folk som har samme litteratursmak som eg, bør sky den  som pesten. Det vil seie, historia kunne i og for seg blitt bra om den vart formidla på ein annan måte, av ein betre forfattar. Men slutten er heilt hinsides. Ja, dette er mi objektive meining. Take it or leave it.

Dagbok 2015: 25.juli

                                           Morgon.
Klokka er snart 19.00. Temperaturen ute er + 19 grader C, det er delvis sol, men det kjem meir skyer etter kvart.
Då vi stod opp i dag var det strålande sol, men asfalten var våt. Og det såg ut som det skulle komme fleire byger; det har det ikkje gjort. Det har vore ein fin dag, men ikkje så veldig varmt.
Før middag tok vi ein tur til Volda, for vi har snakka om ein ny stålampe. Problemet er at dei helst er i stål, pluss svart og kvitt. Når nesten alt vi har er messing passar det dårleg. Vi (dvs.eg) hadde lyst på ein slik som er moderne no, sånn med tre skjermar. Det er smått med lampebutikkar rundt omkring, men vi visste om ein i Volda, og prøvde der. Og der hadde dei både det eine og det andre, blant anna børsta messing, slik vi har frå før. Dessutan godt utval i skjermar, så viss fargane vi tok ut vart feil, kunne vi berre kome og byte. Det er mann og kone som driv butikken, og eg vil skryte både av utvalet og sørvisen. Det er så få spesialforretningar att, og derfor er det ikkje mange som har så godt utval. Butikken ligg ved sidan av Møre konfeksjon - om nokon er interessert. Vi har ikkje montert lampen enno, så eg har ikkje bilde.
På El-kjøp i Ørsta kjøpte eg meg takke, så no har eg tenkt å lære meg å lage svele, som ei avveksling for vaflar.Dette har eg tenkt på lenge, men no tykte eg ventetida var over.
Vi handla på Kiwi, for då var vêret blitt så fint at vi ville heim. Og det til tross for at det var mykje liv og røre i gågata i dag. Etter lunsj sola vi oss på altanen, seinare klipte Nils plenar, det må gjerast ofte når han klipper bio.Eg var ikkje i form til å klippe i dag. Eg låg på altanen og las lydbok, prøver å bli ferdig med boka, men det går trått. Dessutan går det ikkje å lese lydbok når alle grasklipparane er i sving.
No har vi ete spekemat med potetsalat og poteter etc. Måtte ete opp den italienske skinka før den tørka ut.No står det kaffi på menyen, og på altanen står det eit bord fullt av kopar og messing som ventar på puss...... trur det står trygt.

                                                     Kveld.

Dagbok 2015: 24.juli

Fiskekameraten.

Klokka er snart 18.00, temperaturen er +12 grader, det er overskya og regnbyger.
Dagen starta fint med sol og blå himmel.Og eg skulle støvsuge og vaske til helga! - Nils måtte ut og fiske! Han har enno ikkje fått makrell.
I dag var det eit reelt behov for skikkeleg reingjering, så eg gjekk i gang med friskt mot. Men plutseleg oppdaga eg at det regna ute, og kjøkkenteppet måtte bergast inn.
All kopar og messingpynten hadde eg bore ut på altanen for at eg skulle pusse den seinare. "Juksepussinga" med sitronsyre og Zalo funkar ikkje i lengda. No er det berre å håpe på at skjora stikk av med alt i hop i løpet av natta.
Eg var akkurat ferdig å vaske då Nils kom heim med eit par fine seiar og nokre småseiar som han har egna resten av lina med.No er den klar.
Vi tok ein rask lunsj og eg måtte legge meg på sofaen for å komme meg til att i ryggen. Held på med ei heilt teit bok, som eg somna ifrå fleire gonger.
No har vi ete middag, ikkje fisk i dag heller, men spaghetti med bacon og tomatpure. Første gongen vi åt den retten var hos nokre naboar på Raudeberg.Vi har det av og til, og det er uforskamma godt. For å vere litt "sunne" brukar vi alltid fullkornspasta. Ærleg talt veit eg ikkje kor mykje grovt der er i den.
I går starta hundedagane, og slikt vêr som det er den dagen skal det vere i tre veker.
Ønsker alle ei fin helg!

Dagbok 2015: 23.juli.

Klokka er snart 17.30, og eg sit her med ein kaffikopp, etter at eg har hatt ei stund på sofaen.Ute regnar og blæs det, etter at vi har hatt ein ganske fin føremiddag med "nestensol". Temperaturen er + 13 grader. Heile føremiddagen i dag var vi på rek, måtte sjå ned i Vik på det som går føre seg der denne veka. Der er det nemlig rigga opp salsboder langs heile gata, der dei sel utanlandske godbitar, fortrinnsvis ost, spekemat og oliven frå italienske distrikt. Eg enda opp med ein italiensk ost og spekeskinke(oppskoren) frå Südtirol. Det var alt anna enn billeg. Eit halvt kilo parmesan kosta 250 kr, eg veit ikkje kva den kostar her til lands. Eg kjøpte ikkje enda den var veldig god. Dei tok berre kontantar, noko vi hadde lite av. Eg fann tilfeldigvis to 200-kr- setlar i lommeboka. Dama i ded südtirolske teltet snakka bra engelsk, så eg prat litt med henne.Ho ville vite kva fotoapparatet mitt kosta, for ho ønska seg eit slikt. Eg blir glad kvar gong eg opplever at engelsken min funkar sånn nokonlunde-den er sjeldan i bruk.

Sidan dei fleste butikkane i gågata har lagt ned blir butikkvindua brukt til kunstutstilling i sommarvekene. Det er ikkje lett å få tatt bilde gjennom rutene utan at uvedkomande ting speglar seg, så eg har fotografert sidelengs. All keramikken på bilda er det Rolf Vatn som har laga. Elles er det utstilt bilde i akryl, olje og diverse andre teknikkar. Også foto er det mykje av.Vi såg eit bilde av ein fiskebåt som eg trur Nils ville ha likt.

 I nedste gata låg "Fiskemat"-butikken før. Det er eit gammalt murhus som etter mi meining skulle ha vore rive for å opne sentrum mot fjorden. Men no mens dei har halde på å pusse opp sentrum, har dei mala både "fiskemat" og huset ved sidan av, der det var urmakarbutikk før. Og så har dei fått forstørra gamle bilde og "limt"på innsida av vindua. Eg er ikkje så begeistra som så mange andre er.(NB: bilda er ikkje i svart/kvitt, det berre verkar slik).

Vi enda til slutt opp på Amfi, der vi handla mat. På vegen ned dit passerer vi den gamle vòren som høyrer til Svendsengarden.

Vi kjøper mat kvar dag, somme gonger fleire gonger for dag. Kven er det som et opp alt?
I dag fekk eg ei betre bilde av Saudehornet, og så fekk eg vite at det er neste laurdag det skal vere rett opp-mykje kan smelte før den tid.
Eg kom på at eg hadde behov for blomsterpotter-eg har berre 1000 frå før- så vi måtte ein tur på Plantasjen.Det er vel ikkje berre eg som opplevere at blomsterpottene som vi kjøper plantar i,er blitt større? Men først måtte vi heim med isen vi hadde kjøpt.
Til middag vart det spekemat og potetsalat. Den südtirolske skinka smakte framifrå i lag med mòr frå Ringdal.

Dagbok 2015: 22.juli

Vi minnast 22.juli for 4 år sidan.

Klokka er 19.45, temoeraturen ute er + 15 grader C. Det er overskya, men opplett. Tidlegare i dag regna det litt. 

Men eg har vore inne heile dagen. Forma var heller laber etter to dagar med "hardt fysisk arbeid"-alt er relativt. Så i dag vart det lettare huslege syslar. Vi hadde planlagt i går at eg skulle lage fiskegrateng av noko av fisken Nils fekk i går. Mykje av føremiddagen gjekk med til å lage to store porsjonar grateng, men eg har bra tak på det no. Før nekta eg å lage grateng for eg syntest det var så mykje rot med det, men no har eg funne MIN måte, og då går det lett unna. 

Elles la eg i hop klede og strauk det som skulle strykast. Etter lunsj måtte eg kvile ryggen, men eg lurte meg til å strikke innimellom.

Eg fekk melding frå biblioteket i går- om to bøker dei hadde lagt til sides til meg, og Nils stakk nedom og henta dei. Eg har rippa dei inn på maskina, og lagt dei på minnepenn til Solveig. Om Margrete vil ha dei, må ho seie ifrå, elles leverer eg dei tilbake.

Mens eg sit og rippar, har eg sjølvsagt ei bok på øyret og strikketøy.

Til middag i dag var det steikt sei. Seien er aller best når den ikkje er for stor og ikkje har vore i frysaren. Det var eit herlig måltid. Eg kokar ut steikepanna med vatn+lettrømme, det blir herleg saus.

Det vart sein middag i dag også, men no er vi komne til kaffien.

Vi har ikkje sett på TV i dag; å sjå TV på dagtid er noko vi sjeldan gjer, så eg håper programma kjem i reprise-eller så får vi sjå på data. Ingeborg skulle ha vore på Utøya for fire år sidan-men i år skal ho dit, noko ho gler seg til. Alle dei tre jentene våre er AUF-medlemmer. Vi synest det er fint at dei engasjerer seg.

Dagbok 2015: 21.juli

 Klokka er 19.10. Temperaturen ute er + 15 grader, det er overskya og litt regn. No har vi nettopp ete sein middag, i dag var det kjøpepizza med mykje salat til. Godt vart det!
I dag då eg vakna var Nils vekk, det er noko som skjer relativt ofte. Eg rekna med at hanvar ute og fiska, og det var han. Eg låg ei stund til før eg stod opp, men eg visste kva eg ville. Rett etter frokost fann eg fram malersakene mine og sette i gang. Trudde eg skulle bli ferdig før Nils kom heim, men han kom før eg venta. Eg fekk i alle fall mala dei to siste vinduskarmane på stova og altandøra. Var ikkje heilt nøgd , særleg med døra, trur den må ha vore mala med "utemaling" før. Eg malar med Baronesse interiør-det skulle høve bra. Det vart i alle fall kvitt om det ikkje vart perfekt.

Nils ringde til Harald, som kom og fekk sei med seg heim. For meg er sei den beste fisken, og den kan brukast til det meste. Der er SMAK på seien, og alle mesterkokkar eg snakkar med er enig med meg. Eg plar seie at eg likar best fisk som fisk, fiskemat er eg rimeleg lei av, men lagar av og til. Fiskegrateng brukar eg også å lage somme tider. Og blandaball av og til.

Etter at Nils var ferdig med fisken vart det lunsj+ pause. Eg strikka litt på lesten min blant anna.
Så var vi ein tur på Plantasjen. Eg fann ut at eg trong eit rosetre til, og i dag var rosene på tilbod: 3 for to. Men eg kjøpte berre ei-visste ikkje kvar eg skulle gjere av dei andre to. I dag vart det Allotria. Pointet var at den skulle vere raud.

Vi køyrde opp til Opel for at eg skulle få ta bilde av Saudehornet, dessverre låg der ei sky over toppen. Men eg lurer på korleis det går med "Saudehornet rett opp" til helga.