Klokka er no 18.08, temperaturen ute er +6 grader og det regnar og blæs-. Tidlegare i dag kom det nokre vindkast som sende mokebrett og bossdukar av garde i full fart, så eg var ut og sette alt inn i garasjen, der er litt ekstra plass no når eg ikkje brukar bilen min.
No skulle eg eigentleg vore på kulturhuset og feira Marit sin 85 årsdag (ho har bursdag på lille julafta)men eg såg meg ikkje syn med å delta i dag, for eg strevar enno med å halde handa mest muleg i ro -og så verker eg nesten heile tida. Det er tysdag eg skal bort att på sjukehuset. Ca kl.13.
i dag då eg vakna var eg ikkje bra, eg hadde lagt søvnlaus det meste av natta, men sovna litt på morgonkvisten. Eg tok meg saman etter frokosten og fekk dusje og vaske håret, pakka armen godt inn i plast, så det gjekk bra.
Neste problem var varmepumpa, sist natt hadde eg ein el-ovn ståande på stova for at det ikkje skulle vere iskaldt når eg stod opp. Men eg tenkte som så at varmepumpa som er heilt ny, kan ikkje vere øydelagd, så det måtte vere noko ein kunne gjere, så eg sende ei melding til Helge, og han kom når det leid litt på og fann feilen med ein gong. Det var ingen feil på pumpa, det var eg som hadde kome bort i ein knapp som eg ikkje skulle ha trykt på . Eg seier ofte at eg kunne ikkje ha budd her åleine om eg ikkje hadde så mange gode hjelparar, for det er mykje eg ikkje grier sjølv. Men det kan no hende at naboane blir lei av meg til slutt.
Det einaste eg kan bidra med er å strikke lestar til dei som vil ha,men no kan eg ikkje strikke ein gong.
Sjukehuset sender betalingskrav på Helse Norge, det synest eg eg litt styr med,og sjølv om ein har frikort må ein betale, for så å få pengane tilbake etterpå. Dei har vel sine grunnar.
I dag fekk eg langt velskive julebrev frå søskenbarnet mitt på Sørumsand, får slike brev kvart år og det er koseleg. Eg skriv ikkje julebrev, eller kort.Men eg veit at mange les bloggen min så eg sender julehelsing herifrå. Takka vere at eg braut venstre handa og ikkje høgre, kan eg skrive på tastaturet, og sikkert med hand også, men det er ikkje aktuelt.
Eg blir mykje sittande å sjå TV, eg brukar alltid å strikke når eg ser TV, men no kan eg ikkje det, og det saknar eg. Det er sjølvsagt veldig irriterande å plagast med ei broten hand, men som eg sa til venninna mi; der er ikkje det verste som kan skje i min alder.
I morgon er det tredje søndag i advent, og takka vere at eg begynte så tidleg med julepyntinga, så er her no litt "julestemning".
Ingen kommentarer:
Legg inn en kommentar