Dagbok 2019: 18.juni

Klokka er 17.30, temperaturen er + 14 grader og det har nettopp vore ei kraftig regnbyge.
Vakna tidleg i dag, men låg til bortimot 7.30. Det vart ikkje gjort så mykje før vi reiste på trening, berre frokost+ avis+ litt Facebook og dusj og hårvask. Det var varmt og fint då vi for nedover, og fint då vi var ferdige også. Vi var på apoteket og på Spar og handla.
Då eg kom heim fann eg fram kofta mi og begynte å feste trådar mens eg høyrde lydbok på PC-en. No er det Solveig som skal gjere resten. Så er eg utan strikketøy, men eg har garn så eg kan strikke lestar. Det er vanskeleg å sitte i ro utan å ha noko å fikle med.
I går kveld vart eg så svolten at eg laga middag, det vart steikt laks og spagetti og litt grønsaker. I dag hadde eg resten av spagettien meg grillpølser til, eg komponerer stadig nye rettar.
Etter at eg hadde ete gjekk eg ut i hagen og heldt fram der eg slapp i går. Det vart opp til fleire trillebårlass med skvallerkål og anna ugras som eg fann under thujaene og på grensa til naboen nedanfor. Skulle klipt litt med saksa i dag også, men så langt rakk eg ikkje før regnet sette inn. Eg ser stadig nye prosjekt i hagen. Nokon spennande hage får eg aldri for eg brukar all tid og energi på å halde orden på det eg har.
For morgondagen har eg ingen planar, så då får vêret bestemme kva det blir til.