Dagbok 2023: 4.mai

                                                      Utsikt frå rasteplassen på Vernet.

Klokka er no 18.12, temperaturen ute er + 10 grader og det har vore sol frå skyfri himmel i heile dag. Men vi måtte likevel passe på treninga vår, frå 10-11.

Etterpå hadde vi nokre ærend og så handla vi på KIWI på heimvegen. Eg ville gå trimturen min mens eg hadde høvelege klede på meg. Det var fint på Vernet i dag, og eg sette meg ned på alle benkane på vegen rundt, ikkje for å kvile, men for å nyte sola. Siste biten gjekk eg i lag med ei "venninne" som nådde meg att.

I dag var det grønsakmiddag -eg brukar som regel å ha det ein dag i veka. Det er sunt og godt.Eg måtte kvile meg ei lita stund og drikke kaffi før eg kom meg ut for å gjere hagearbeid. Eg er ikkje den arbeidsmauren som eg var før, eg likar å jobbe, men må ta pause ofte for å rette opp ryggen.

Eg klipte ned rosebuskene,  dei såg ikkje så veldig trivelege ut men det er tidleg på våren enno. Her er jobbar nok å velje mellom, og alt får ein ikkje gjort på ein dag, men eg fekk tatt opp ei stor bøtte med løvetannrøter , etter at eg hadde tømt den , tok eg opp nesten ei halv bøtte til. Men problemet i år er ikkje løvetann, men Engkarse. Heile plenen er full og ikkje berre her hos meg.Overalt tek den over. Det hadde kanskje hjelpt litt å fare over med klipparen , men eg veit ikkje om det er tørt nok.

Kvilestolar har eg plassert rundt omkring, dei er gode å ha for ryggen sin del. Bøtta er full av løvetannrøter.

I beddet nedanfor garasjen,plantar eg diverse som eg har fått i gåve, men eg veit ikkje kvifor der er så mange tulipanar. Der er to roser, men eg veit ikkje om dei kjem att i år.Der er to mørke flekker nedanfor beddet, det er fordi eg har klipt av buskene det som låg over kanten. Eg gler meg til tulipanane sprett ut. Synd at så få ser dei, der dei står.

Eg har mykje å gjere i hagen no framover, eg må gjødsle først og fremst-naboen har heller ikkje gjødsla enno, men han har mykje finare plen.

Det er utruleg at det har gått enda ei veke av våren-i morgon er det fredag igjen.

Eg må ta meg ein dag til å rive vekk eføy, for den er skikkeleg stygg-  det er eksta festlig fordi eg er allergisk mot den planten. Den kvite toppen på garasjetaket er ikkje snø-men Vallahornet.

Dagbok 2023: 3.mai

 Klokka er no 16.36, temperaturen ute er+ 10 grader C. Det er lettsky, opplett og nokså fint- Eg har nettopp vore ein tur på Vernet, eg var ikkje så lett å foten som ein dag før, det var vel fordi eg hadde ete graut før eg gjekk ut..

I dag hadde eg heimedag, og hadde tenkt å få gjort mykje i huset. Det vart ikkje så mykje som eg hadde tenkt,nei. Eg tok meg no av klesvasken min, både den tørre og det som vart vaska i dag. Prøvde å rydde litt her og der men etter ørten turar ned kjellartrappa og opp att, vart eg lei og fann ut at det var betre å bake brød, så det gjorde eg.

 Eg har ikkje smakt dei enno, det får eg ikkje lov til før det er på tide med kveldsmat. Eg hadde tenkt å begynne på eit nytt og betre liv i matvegen, men så vart det besøk i heimen og på kafé. Og i går hadde eg restar-. Det er på tide å komme i gang og klippe plenar, såpass eg får brukt opp nokre kaloriar. Apropos plen så er det fullt av blomsterstilkar på min. Naboen har fjerna mykje av sine, men han har heller ikkje gjødsla enno. Eg plar rådføre meg med han når det gjeld plen. Eg hugsar frå åra før, då har eg klipt plenen 2 gonger før 17.mai, dei fleste åra.

No skin sola her, så håper eg på finever i morgon. Då skal eg på trerning, men de sluttar klokka 11, så då er det mykje att av dagen.

Dagbok 2023: 2.mai

Klokka er no 17.07,temperaturen ute er+10 grader og akkurat no skin sola inn vinduet her. Tidlegare i dag har det regna.

I dag tidleg var det berre å stå opp og gjere seg klar til trening. Marit ville køyre i dag, for ho skulle på Plantasjen etterpå. Eg vart med henne på Plantasjen og der var det mykje fint å sjå. Eg lurer på om dei kan få selt alt her i Ørsta/Volda. Det var Marit som skulle handle, i dag skulle eg berre sjå meg om og sjekke prisar etc. Ein ting er opplagt: Plantar blomster, mold og gjødsel m.m. er dyrare enn før. Eg har ikkje kjøpt gjødsel til plenen enno, eg brukar å kjøpe den på EIK-senteret. Kva eg gjer i år, veit eg ikkje enno.

Då eg kom heim att bytta eg på meg andre sko, og så gjekk eg tur på Vernet. Eg var komen berre eit lite stykke ut gjennom gata, så kom regnet. Men eg ville ikkje snu, så eg tok heile runden, og då eg kom heim var eg våt til skinnet. Så det var berre å få på seg tørre klede før eg år middag, som var restar frå sundag. Etterpå sette eg meg inn for å sjå nyheiter, og der vart eg sittande lenge og vel. Men no er eg oppe og går igjen, har sett på vaskemaskina, så ordnar det seg med klesvask.

Eg lengtar etter å få komme ut i hagen og jobbe litt der, så veldig mykje blir det nok ikkje, men her er nok å ta tak i. Og andre jobbar ligg også på vent. Så eg treng litt fint ver og opplett.

I dag fyller "Mellombror" på Kongsberg 17 år. Eg ser Kongsberg-gutane så altfor sjeldan, så vi blir ikkje så godt kjende. Vebjørn bur heime enno og går på vidaregåande.

GRATULERER MED DAGEN VEBJØRN!

Dagbok 2023: 1.mai

 

Klokka er no 17.00, temperaturen ute er + 5 grader. Vi har hatt ein sur og kald dag, men akkurat no kom sola fram, det hender ho kjem fram på sein ettermiddag.

Flagget vart i heist i gry-otta i dag, men 9-tida går no også an.

Eg hadde tenkt å stå opp tidleg i dag, for å få vaska og tørka håret i god tid før eg skulle til Volda. Men for ein gongs skuld sov eg godt til klokka nærma seg 9.  Eg kom meg likevel til Volda til rett tid.

Eg køyrde opptil det nymåla   Samfunnshuset , og det varte ikkje lenge før Margrete og Amanda dukka opp, dei hadde med seg bilen over på ferja. Det var vi tre; tre generasjonar, som representerte Trovåg-familien i dag. Vi har ofte vore ein heil flokk rundt bordet på Samfunnshuset på 1. mai arrangementet. Eg kjende ikkje mange der i dag, men såg no at eit par frå Ørsta også var der.

I dag vart det eit veldig fint møte, med gode talarar og fin musikk. Arrangementet er for både AP, SV og Rødt, og alle partia hadde gode talarar. 

Men eg må berre innrømme at i dag slo representanten frå RØDT alle andre talarar eg har høyrt. Anten ein var samd med han eller ikkje , så heldt han ein tale som stod til karakteren 6. Talen var innhaldsrik, interessamt og flott framført, han snubla ikkje i eitt ord. Eg har aldri høyrt maken. Eg meiner han var frå Kragerø, og har sikkert  halde talen fleire gonger før, for han såg nesten ikkje på papira sine. 

AP og SV hadde også gode talarar. Til slutt var det ein mann frå Sudan, som fortalde frå landet sitt. Han snakka norsk, for han har budd mange år i Volda og har høg utdanning, men eg sleit litt med å forstå kva han sa. Eg hadde ikkje høyreapparat med meg, og eg veit ikkje om det hadde vore hjelp i det.

Det var ei flott samkome i dag, og varaordføraren i Volda var "programleiar.

Vi tre jentene bestemte oss for å ikkje ete kake på møtet for vi skulle på Kinarestauranten etterpå. Og i dag kom vi ikkje til stengde dører. Margrete og eg åt det samme, men Amanda ville ha noko anna. Det var store porsjonar, men vi greidde å ete opp alt.

Så var det berre å køyre heim att. Eg vurderte å stikke oppom Plantasjen, men slo det frå meg.Eg må i alle fall bort når det blir temperaturar til å vere ute.

I dag fyller søskenbarnet mitt, Kjell 81år. Besta og besten i Innvik hadde berre 4 barnebarn, og eg var einaste jenta. Og derfor fekk eg heilt frå barnsbein inntrykk av det var noko stort å vere jente. Eldste guten var to år eldre enn eg , så kom Svein, bror min, og til slutt Kjell. Ofte slo dei tre gutane seg saman og skulle erte og plage meg, og eg lærte fort å ta igjen. Men uvenner var vi vel aldri. Siste krigsvinteren budde mamma, bror min og eg i Innvik hos foreldra til mamma og bror hennar med familie. (Tyskarane hadde tatt huset vi budde i) Og der var det eg måtte kjempe mot overmakta.

Gratulerer med dagen Kjell.

Dagbok 2023: 30.april

 

Klokka er no 18.51, temperaturen ute er+ 4 grader. Eg kom nettopp att frå ein runde på Vernet. Der oppe var det mykje snø og slaps på vegen, og eg gjekk i "småsko"- men det gjekk bra.Toler no å bli litt våt når ein eikkje frys

Elles har eg hatt ein innhaldsrik og sosial dag i dag også. Då eg sjekka Messenger etter frokost, var der melding frå Einar som som ville komme på besøk. Eg hadde no føremiddagen fri til å lage mat til oss to, så slapp eg å kjede meg.Menyen var som så ofte før, kjøttkaker og is. Etter at Einar hadde reist og eg hadde rydda opp litt, var eg ein tur opp til Marit og drakk meir kaffi og åt meir is.

Men så måtte eg ut og lufte meg litt, så vart det Vernet i dag også, eller "strafferunda" som eg plar seie. Forma er ikkje lik alle dagar, men i dag var eg veldig lett på foten.

I morgon er det som kjent 1. mai,, og då seier tradisjonen at eg skal til Volda og feire dagen med Margrete og Co. Eg køyrer bort sjølv så det går greitt.

Dagbok 2023: 29.april.

 

Klokka er no 17.46, temperaturen ute er + 2grader C og det kjem eine snøbya etter den andre-akkurat no er det nesten sol. Eg har nettopp vore ute og gått tur og tatt bilde, men eg får ikkje bilda rett plassert , trur eg. Eg har no gjort berre slik eg brukar å gjere det, så eg får det vel til med tid og stunder.

Rett før eg kom heim, kom det ei voldsom snøbye. Då kom eg på kva mamma brukte å seie: "April snø og mai kulde gjør bondens løer fulle." Dette hadde ho lært av faren sin. Gamle besten Isak kunne så mykje om vêrspådomar, om dei var å lite på er ei anna sak. I den gamle tida då dei ikkje hadde verken radio eller TV, hadde dei mange slike spådomar. Viss dei ikkje slo til, så var det no berre å gløyme, men noko rett var det vel  ut frå erfaringar dei hadde gjort.

I dag stod eg opp tredje gongen eg vakna. Det var no ikkje noko særleg på timeplanen i dag, så eg vart no sittande å strikke mens eg høyrde om alt det vonde som skjer i verda og som vi får høyre om på tV.  Elles så prata eg med fleire på Messenger. 

Eg sette på ei grauta - panne i dag også; når eg ikkje har brukt melk heile veka, så må eg koke graut i helga. Og så skulle eg handle på KIWI. Eg hadde laga meg ei lita liste. Mens eg var på butikken begynte eg å lure på om eg hadde slått av plata som grauten stod på. Eg sette opp farten og kom meg heim på no time. Og ja, der stod grauten på plata, og plata stod på 3, eg brukar å ha den berre på 2. Men ikkje noko gale hadde hendt, ikkje det minste brunt i botnen. Og takk for det! Eg har diverre veldig dårleg hukommelse av og til, så eg må lære meg nokre knep, slik at det ikkje skjer så mykje gale.

Eg fann ei melding frå Solveig på PC-en, ho og Øystein ville komme innover ein liten tur-og det var no kjekt. Solveig ville ha med seg nylaga bollar, så eg skulle ikkje lage til anna enn kaffi, smør og sylte. Og slik vart det. Øystein plagast med ein arm så han kan ikkje ta store utfordringar-i dag var det Solveig som køyrde bilen. Og så hadde ho med seg masse lestegarn, slik at eg skal ha noko å henge fingrane i. Det gjeld berre å ikkje strikke for mykje for då blir det vondt både her og der.

Det vart ei koseleg pratestund i dag, eg set pris på å få vere sosial innimellom. Heldigvis trivest eg godt åleine også.

Etter at dei hadde fare, gjekk eg min( nesten) daglege tur på Vernet. Ein halvtimes tur for dag skal gjere underverk seier dei som forstår seg på det. 

No vert det to fridagar for dei som er yngre, mens eg har 365 fridagar i året. Det er det gode med å vere pensjonist. GOD HELG!

Dagbok 2023: 28.april

 Klokka er no 17.37, temperaturen på trappa er + 11grader C, det er lettskya og fint, sola har også vore framme, men tidleg i dag var det iskaldt.

I dag stod eg tidleg opp, men då eg såg at klokka var berre 6, la eg meg igjen og sov ein time til. Eg måtte i alle fall tidleg opp viss eg skulle rekke å vaske håret, rulle det opp og få det tørt til klokka 13, eg greidde det-så vidt.

Eg hadde ingen planar for føremiddagen, men fann ut at eg kunne fare over alle bilde-glas med spay og vindusskinn(som det heitte før). Det vart nokså mange bilde når eg var innom alle romma. Men eg rakk no å lese avisa og løyse nesten heile kryssordet før Ragnhild kom.(Sudokuen løyste eg mellom klokka23-og 24 i går kveld )

 Vi var altså på Stødt, og ho kjenner han som driv geskjeften. Ragnhild fikk bestemme menyen, og eg betalte. (Det var forsinka fødselsdag-gåve frå meg). Då eg kom heim kontakta eg Marit og spurde om vi skulle ha ein handlerunde, men ho var opptatt. Derfor gjekk eg ein tur på Vernet i det fine veret .

Men eg ville til Vik og kjøpe garn sidan eg hadde begynt på ein lest, men hadde for lite garn. Sidan eg likevel var i Vik gjekk eg inn på Aandahl og såg om dei hadde fine "toppar" gjerne i blått. Og det hadde dei, eg såg på mange som eg kunne ha tenkt meg, men avtalte at eg skulle komme inn ein annan dag for å prøve.

Handla litt på Clas og på Europris før eg tok på heimveg. Fann ut at eg skulle sjå bortom gravplassen. No hadde dei sett på vatn. Eg ville sjå om blomstrane eg hadde planta hadde overlevd snøen og kulden og det hadde dei, sjølv om dei var litt puslete. 

Så er det fredagskveld igjen og no står vi framfor ei langhelg sidan det er 1. mai på mandag, snakk om flaks! No må eg hugse å handle inn mat i morgon. Eg veit ikkje kor vidt det blir aktuelt å feire 1.mai i Volda i år også-det er liksom ein tradisjon.

Ønsker alle ei god helg uansett politisk tilhøyring-!