Dagbok 2019: 2.juli

Desse bilda tok eg med min Doro-telefon klokka21.15.Sjekk nysnøen i fjella.

Klokka er 18.30, temperaturen på trappa er knappe 8 grader, og det er nysnø i fjella. Ikkje akkurat sommarvêr.  Voldsomme regnbyger har det vore mange av. Men eg har no hatt ein kjekk og sosial dag i alle fall.
Marit G og eg var bedne til føremiddagskaffi hos Marit U. Først då vi såg kaka forstod vi at det var fødselsdag. Eg trur at eg har hugsa fødselsdagen hennar kvart år, men altså ikkje denne gongen.
Kanskje var det fordi eg hadde diverse å tenke på. Bodil og Svein skulle komme ein tur oppover i dag, og det varde ikkje lenge etter at eg kom heim, så var dei her. Det var surt og kaldt ute i dag, så eg hadde kveikt i omnen før dei kom.
Det var ikkje mykje til servering dei fekk, men vi har alltid så mykje å snakke om at maten kjem i andre rekke.
Svein ville sjå på bilen enda ein gong, og han fann feilen, men kunne ikkje reparere, for han måtte ligge under bilen -og det er ikkje så enkelt her på tunet. Eg fekk han også til å sjå på opplegget til oppvaskmaskin i kjellaren. Det blir ikkje så vanskeleg å få til.
Bodil og Svein var vel fornøgde med TV-en min og benken det står på.
Eg har altså ikkje gjort noko særleg arbeid i dag, men eg kan no skrive det opp som ferie.
Rasmus og familien er på veg heim no. I morgon har Solveig fødselsdag, men det blir ikkje feiring, ho er ikkje heilt bra av "sykja" enno.
Også i kveld ser det ut til å lette opp litt.Så får vi håpe på sol og varme om ikkje altfor lenge.

Dagbok 2019: 1.juli

Rasmus camperer i Starevegen- i Tyskland.

Klokka er 18.35, temperaturen er + 12 grader C og det har regna meir og mindre i heile dag, men som vanleg vert det litt lettare mot kveld. Marit og eg kom nettopp att frå ein handlerunde, eg må passe på at bilen ikkje blir ståande for lenge i ro.
Vi var på apoteket og på Spar blant anna. Vi synest det er kjekt å fare i lag å handle.
Ikkje før er føtene blitt betre, såpass eg kan gå skapleg, så dukkar noko anna opp. Ja, dukkar og dukkar, eg har no lenge hatt trøbbel med høgre arm og skulder, men no er det blitt verre. Verst er det når eg er i ro, men heller ikkje så godt å strikke. Eg skal strikke ferdig lesten eg held på med, men då kan det bli ei pause.
I dag skulle eg eigentleg ha klipt plen, men eg trur det blir ei stund til eg kan gjere det, for det er meldt regn heile veka. Graset veks godt no, og mosen blir mjuk og god av alt vatnet. Ja, det hjelper ikkje å ergre seg, vêret kan vi ikkje gjere noko med.
Eg er kvar dag oppteken av at eg skal gjere litt gagns arbeid. I dag fann eg ut at eg kunne vaske og rydde i dekketøyskapa på stova. Der er fleire servise som nesten aldri er i bruk. Dei som har vore ubrukte lenge, vaska eg for hand før eg sette dei på plass igjen. Så kom eg på den geniale ideen at eg kunne bake brød. No ligg det tre store brød på benken, og eg ser fram til å smake på det eine i kveld.
Elles har eg hatt litt andre oppgåver; eg ringde til Tussa og fekk kjellarmålaren over på meg -til Linda flyttar inn. Eg var inne på nettet, men ville helst snakke med eit menneske og då kunne eg berre ringe. Litt seinare fekk eg krav på NRK-lisensen, og betalte den med ein gong, så eg ikkje skulle gløyme det.Innimellom andre gjeremål har eg øvd på spansken, strikka og høyrt lydbok.
Margrete & Co er komne heim, eg trur dei treng eit par kviledagar etter ein nokså strabasiøs tur. Rasmus og fam. er på campingtur i Tyskland, dei badar og kosar seg i Starenweg. Solveig har fått ei sykje-håper ho blir feisk snart.
No skal eg inn i stova og sette på TV-en.

Bok nr.15 - 2019: Hold pusten så lenge du kan

Forlagets omtale:

Alva er mor til Runa, en intens åtteåring med hvitt hår og hjemmestrikket jordbærlue. Tjuefire år tidligere er det Alva som er åtte og har hvitt hår og jordbærlue og behov for at noe skal være annerledes, men ingen prøver å finne ut hva. Bortsett fra Kjersti, bestevenninnen, som likevel vender seg vekk når Alva har det som verst. Og plutselig forsvinner Kjersti. Alva går inn i tenårene med en mørk sorg bak seg. Siden vokser Alva opp til å bli en retningsløs ung kvinne. På fergen til og fra jobb treffer hun Martin, som har strikkegenser og snekkerbukser og store, trygge never. Alva lurer på om hun endelig kan trekke pusten. For det må da finnes hvile et sted? "Hold pusten så lenge du kan" er en rik og medrivende roman om å vokse opp med ubotelig svik og svart skam. Men over den vonde historien legger det seg et mildt skjær, for i denne tette, energiske teksten må fordømmelsen vike for et konstaterende og overbærende blikk på menneskene.
……………………………………………………………………………………………………………………
Eg veit ikkje om eg kan vurdere denne boka sakleg, men det seier sitt at eg ikkje greidde å legge den bort.
Boka har kvitt omslag, derfor blir bildet så dårleg.

Dagbok 2019: 30.juni

Klokka er 18.15, temperaturen + 13 grader og i dag har det regna nesten heile tida, no ser det ut til at det skal lette opp. Dagen har gått som ein røyk, sjølv om eg ikkje har vore ut for ei dø og ikkje sett eit menneske.
Eg finn alltid noko å sysle med og får sjeldan dagane til å strekke til for alt eg vil gjere.
Det er fleire gode grunnar til at eg sjeldan les papirbøker.

1. Eg har lett for å dette ut/ sovne og begynne å dikte vidare sjølv.
2. Når eg først har begynt på ei bok, så skal den lesast ut på no time Det er litt stressande.

I dag skjedde det at eg tok att ei bok som eg hadde lese nokre sider i, og så blei den så intens at eg berre måtte lese heile, og no har eg gjort det.
Eg begynte no ikkje før på ettermiddagen, og boka var ikkje så tjukk.
Før middag rydda eg litt i huset, gjorde spanskleksa mi, la i hop klesvask og mykje anna. Strikka litt også.
No ser eg på data at Margrete &Co er komne til Gardermoen. Dei skal ta buss heim så dei er vel i Volda i morgon tidleg.
Både Marit og eg hadde lyst å spasere litt i Starevegen i dag, men skulle vente til det slutta å regne. Så får vi sjå om det blir noko av. Det er ikkje direkte varmebølge ute. No lakkar og lid det til det er tid å sette på TV-en.

Dagbok 2019: 29.juni

Desse bilda tok eg kl.19.00

Klokka er 18.00, temperaturen ute er + 20 grader , det er skya, men ikkje skodde no. I løpet av dagen har det kome nokre regndropar.
I dag har eg ikkje vore effektiv, men eg har pusla med eit kvart nesten heile tida. Eg har til dømes vatna blomster både ute og inne, tatt oska ut or to omnar, reinska ugras etc. etc.  Innimellom har eg sett litt TV, løyst kryssord og studert spansk. Eg får ikkje gjort alt eg har lyst til, for då streiker ryggen min. Men det er no ingen som jagar på meg - berre eg sjølv. Eg har så mykje eg gjerne skulle ha gjort.
I dag har eg gått her åleine og surra, men timane flyg av garde likevel. No er det veldig fint ute, sola kjem fram litt og himmelen er delvis blå. Trudde vi skulle få litt varme frå Afrika vi også, men så les eg på FB at første veka i juli skal vere kald.
Tenk at det berre er ein dag att av juni. Sommarmånadane går altfor fort.
Eg skulle ha gjort litt meir i hagen i dag, men stillferdig arbeid kan eg lure meg til med i morgon også. Elles har eg ingen planar for helga. Eg veit ikkje kva tid Margrete kjem att, har ikkje høyrt frå henne i dag. no skal eg finne meg ein kaffikopp såpass eg held meg vaken utover kvelden.

Siste dagen på Island. Amanda og Erlend ved Seljalandsfoss.

Dagbok 2019: 28.juni

Klokka er no 20.,temperaturen ute er + 18 grader. Det er skya, men skodda er vekk no til kvelden, så det er ikkje så grått som det var før i dag.
Eg sat og såg TV og høyrde om varmerekordane på kontinentet, eg var frostig av ein eller annan grunn, så eg gjekk etter ved og fyrte opp i omnen. Denne dagen har gått veldig fort. På føremiddagen støvsuga eg alle teppegolva, og så fekk eg telefon frå Solveig om at ho ville komme innover ein tur. Eg rakk å dusje, vaske håret og kle meg om før ho kom.
Vi tok ein kaffikopp før vi la ut på tur. Først var vi bortom gravplassen og vart samde om at vi ikkje trong å kjøpe fleire blomster enno. Fuglane er enno ikkje komne på plass, så eg lyt visst purre på han som skulle fikse det.
Solveig skulle ha seg ein ny shorts til ho skal til Italia, derfor var vi innom Amfi. Eg kjøpte ikkje anna i dag enn ei flaske shampoo.  Eg syntest vi skulle gå på kafé. På Føniks var der stappfullt av folk, så vi gjekk opp på fru Svendsen og kjøpe oss kake, i dag valde vi den spesielle kaka deira, med nøttebunn, krem, pærer og sjokoladelokk på. Den smakte ikkje vondt.
Vi køyrde ein tur fram i Nupen, Solveig hadde lyst å sjå gamle tomter. Det er forresten ei god stund sidan sist eg var der også. Neste gong ho kjem skal vi fram på Melle.
Det vart ikkje så mykje shopping med oss i dag, men eg er så ofte nedover no at eg kan ikkje handle meir mat enn eg treng.
Etter at Solveig hadde reist, sette eg meg ved datamaskina og gjorde spanskleksa mi. Marit og eg hadde tenkt oss på kino i dag å sjå YESTERDAY, men Marit var ikkje heilt i form så vi avtalte å utsette det til ein annan gong, filmen skal gå fleire gonger.
Det blir ikkje mykje å sjå på NRK 1 i kveld, så eg lyt finne meg ein annan kanal.
Denne helga er det "Elskhug og eksersis " på Eid, men eg kjem meg visst ikkje av garde i år heller, lite fristande å sitte ute når det er så kaldt.
No får eg ta fram strikketøyet og parkere meg framfor TV-en. Margrete og barna skulle ride i dag, så eg får vel sjå bilde etter kvar. Det er ei fabelaktig tid vi lever i ; vi kan ha kontakt med kvarandre på mange måtar sjølv om vi er langt frå kvarandre.
Ønsker alle ei GOD HELG !

Dagbok 2019: 27.juni

Amanda og Erlend badar i Den blå lagune på Island.

Klokka er 17.05, temperaturen er +  grader,  det er overskya og litt kald vind. Skodde i fjellsidene. Og sola har snudd!

Då eg  stod opp i dag verkte eg ganske mykje i høgrearmen, men eg veit det hjelper å komme i sirkulasjon. Så etter frokost shina eg opp kjøkkenet, vaska golvet på kjøkken og bad og sette i gang klesvasken. Armen betra seg med ein gong. Tok pause framfor dataen, og gjekk gjennom dagens spansk-lekse før eg gjekk ut.

Utearbeidet mitt no er å reinske gras og ugras vekk frå singelen, pluss bere singel som har forflytta seg nedover opp att på tunet. Dette er totalt uinteressant, og eit Sisyfos-arbeid som aldri tek slutt. Heldigvis var naboen ute så vi kunne prate litt i staden for å jobbe. 

Og så fekk eg besøk! Det var Geir, ein "gammal" kollega, han hadde bilen på reparasjon her i Ørsta og tok seg ein tur oppom. Vi har alltid mykje å prate om sidan han er frå Solund og vi har mange felles kjende der. Vi drakk kaffi og prata heilt til han måtte gå.

Eg skal ikkje stikke under stol at eg har sete her ved datamaskina ganske lenge i dag.

Har prata med både den eine og den andre. Kan ha kontakt med fleire på ein gong på Messenger. No skal eg prøve å få gjort litt meir ute før det blir kveld. Eg hadde heilt gløymt kor tung ei bytte med singel kan vere. Men eg har funne att den riva som erstattar jernrive, vi kalla den "plast-jernriva".

Eg ser mange grøne plommer på opaltrea, dei var ferdige med blomstringa før snøen kom. Eg har ikkje sett etter korleis det er med Victoria-treet. Dei to siste åra har vi mist to plommetre, så no har vi berre tre att.