Sist natt vart eg liggande vaken til det leid mot morgon, hadde lydbok på øyret utan at det hjelpte. Grunnane var vel så ymse, blant anna drakk eg kaffi litt seint på kveld i går, og så var eg forkjøla og elendig. Men eg kom meg på beina i 8-tida og har fullført dagsprogrammet. No kjenner eg at eg er noko utbrukt.
Vi var på Kulturhuset og dekka bord etc. frå klokka 12.00, så var det pause og "pynting" (av meg sjølv) før møtet klokka 16.00. Sidan det var regnfullt og grått, og sidan eg trudde eg måtte kle meg varmt, vart ikkje sommarkleda tekne i bruk i dag. Tok nokre gamle"filler" eg fann i skapet i staden.
Vi hadde kjempeflott program i dag. Alf Vatne song og Svein Kvamsdal spela rolla som Anders Hovden. Eli stilte som fortellar og Elisabeth Stave var pianist. Dette programmet har vore vist i kyrkja før, og somme hadde sett det der, men hadde ingen ting imot å sjå det ein gong til.Svein Kvamsdal imponerte, han er ikkje berre prest, men ein framifrå skodespelar. (Det var han som døypte Eirik.) Eg skal skrive referat frå møtet i morgon, så eg må spare orda til då. Eg synest det er veldig flott at pensjonistlaget kan by på program med så høg kvalitet.
Nils har somna framfor TV-en, han har også oppgåver på møta sidan han er vara i styret. Eg noterer heile tida, så eg får ikkje berre sitte og ta imot. I dag var det litt slitsomt sidan eg var så groggy.
Elles har eg ikkje gjort noko i dag, men reknar med at eg frisknar til etter kvart.
Må vel sjå det fly-programmet i kveld også, trur det skal vere herifrå. Såg det som vart sendt i går, men vart ikkje imponert, så eg håper det blir betre i dag.
Ingen kommentarer:
Legg inn en kommentar