Dagbok 2015: 15.juli

Klokka er 17.00, temperaturen er + 13 grader C , og det er skodde og regn. Surprise! Surprise!
Det var ikkje særleg oppløftande å sjå ut i dag, og ikkje fristande å fare nokon stad. Men ein kan ikkje sette seg ned og deppe heller, så eg fann ut at eg kunne bake litt til frysaren.
Eg plar alltid sjekke FB rett etter frokost, men i dag sette eg i gang med diverse kjøkkenaktivitetar først. Dermed las eg ikkje meldinga som Bodil hadde sendt meg, og mobilen min låg død på eit anna rom. Så Bodil fekk ikkje kontakt før ho sende melding på Nils sin mobil.
Dei skulle ein tur til Ørsta og ville stikke oppom til ein kopp kaffi.
Då passa det veldig godt at eg hadde laga to små prinsessekaker i staden for ei stor, slik eg plar gjere. Eg sjekka først steikomnen, og såg at eg hadde plass til to runde former før eg sette i gang.Det er kjekkast å sette heile kaker på bordet når ein har besøk.
Vi plar ikkje gjere det så høgtideleg når vi besøker kvarandre, det er no viktig å få tid til prat. Dei skulle no ikkje vere så lenge heller.
Slik vart ein grå og trist dag veldig koselig. Takk for besøket Bodil og Svein.
No ser eg at skodda kjem lenger og lenger ned. Det plar vere teikn på at vêret betrar seg.Det er von i hangande snøre.
I dag gjorde vi noko vi ikkje plar gjere; vi såg TV på dagtid. Skummelt med tunnelulykka. Vi har faktisk køyrt den tunnelen ein gong, og bror min køyrer der når dei skal på hytta. Ja, og så såg vi litt på Sommerbåten også.
I dag blir det fiskegrateng til sein middag, gjorde klart det meste tidleg på dag.