Vi var relativt tidlig oppe i dag, Nils skulle til rutinekontroll hos fastlegen, og viss alt var i orden skulle han og kamerat Kjell ut og fiske etterpå. Og fisketur vart det, fangst vart det mindre av. Dei fekk ein del småsei, men ingen store fiskar i dag. No driv Nils og lagar kokt småsei til middag.
Mens han var på fisketur styrte eg på her heime, baka brød, støvsuga etc.
NIls ville ha seg ein pause etter han hadde styrt med fisk, men eg ville ut i sola ein tur. Og så var eg så heldig at eg trefte ei veninne (Rigmor) som også var ute og lufta seg. Vi gjekk rundt her på Vallabøen i sola i 1 1/2 time og prata og prata. Det er ikkje så ofte vi snakkast, for ho bur ikkje fast i Ørsta.( Møter henne og mannen på Amfi av og til). Men vi var ikkje i beit for tema, hadde sikkert hatt stoff til enda ein time, og vel så det.Verken ho eller eg var interesserte i å gå fort, berre i å vere ute.
Då eg kom inn att ringde Ingeborg og takka for pannebandet, ho hadde ikkje kome seg til postkassa i går elles hadde ho fått det då.
Det har snødd noko alvorlig i Kristiansand. På bildet over kan de sjå kor mykje snø her er. Men dette vesle fjomet har lege her i vekesvis, på vegane ligg der også snø ytst på kanten. Men til helga er det meldt regn og sterk vind, så då blir det endring på det meste.
Så står det berre att å ønske alle ei god helg !
1 kommentar:
Bilen vår, som pip og varslar om det meste, åtvara mot glatte vegar i dag. Så feil kan han ta!
Legg inn en kommentar