Dagbok 2022: 9.mai

 

Klokka  er no 16.42, temperaturen er + 14 grader C og det er overskya, opplett, men ikkje sol.

I dag hadde eg planane klar, for eg ville klippe plen i dag, sidan det er meldt regn i morgon. Det var første plenklippen i år. Eg klipte først plenen rundt huset. Såg at eg hadde stil klipparen litt for mykje ned, men eg måtte berre fortsette slik eg hadde begynt.

Så vart det ein liten pause for eg måtte ned og kjøpe bensin på begge kannene mine. Då skal eg ha bensin til fleire klipp. Så sette eg i gang med skråninga og den er det verste, til slutt klipte  eg utan å samle opp. Der var i grunnen ikkje så veldig mykje gras, men alle hagane her omkring er fulle med engkarse. Blomsten er fin nok, men vi vil ikkje ha den i plenane våre. Klipte dei små plenstykka opp mot vegen også.

Så var klokka 15, og eg måtte ha meg litt mat og drikke. Eg måtte ut att og rydde litt her og der og finpusse somme stader. Eigentleg skulle eg tatt opp løvetannrøter også, og eg skulle gjødsle. Men eg kjende at eg hadde fått nok for i dag, så eg spyla klipparen og sette den på stall. Det rare er at det er lenge sidan venstre foten og hofta har vore så bra, men eg har sagt det heile tida, at det verste er å sitte i ro.

I morgon er det trening 10-11, og så har eg time hos legen klokka 13, det gjeld fornying av sertifikatet, men eg får sikkert tid til å gjødsle plenane også. I dag har eg snakka med naboane både til høgre og venstre, det er den sosiale tida vi går inn i no. Begge naboane i nr.5 fyller 80 år i år, han den 15.mai og ho den 2.juli.

Det har gått med ein del brus i dag . Soloflaska gjekk tom, men eg fann boksar med sukkerfri julebrus. No skal eg koke kaffi og sjå litt TV, det er mykje som har forandra seg på tV-en no, men eg trur eg kjem til å komme inn i det.

Eg flytta litt rundt på granstammane for å få vekk gras og ugras, men eg greier ikkje å bere dei vekk åleine. Eg skulle ha hatt Rasmus her med motorsaga!!