Dagbok 2022: 10.mai

 

I beddet nedanfor garasjen planta eg tre busker, men etter kvart har der blitt meir. Løkar frå potter og samanplantingar, små rosebusker frå potter og frå grava  etc. har eg putta ned i molda  der. Molda er veldig fin og litt tørr , så kattane brukar dette beddet til do. Det er heilt greitt for meg, men det ser ut til at dei flyttar litt på plantar og løkar. Akkurat no er det sesong for tulipanar.Det er ikkje direkte stilig, men eg set ekstra pris på dei tidlege blomstrane

Klokka er no 20.08, temperaturen ute er+ 12 grader. I dag har det regna litt av og til, sola har vore framme litt, og akkurat no er det skya og opplett. Eg har ikkje vore så mykje ute i dag, så eg har ikkje gjødsla, men i morgon er det "heimedag" så då får eg vel gjort ein del.

I dag var vi på trening og etterpå var vi ein tur på ALTI. På heimvegen handla vi på KIWI. Eg hadde ei lita stund heime før eg skulle til legen. Det var ikkje noko alvorleg ærend eg hadde i dag, måtte berre ha papir på at eg er frisk nok til å køyre bil. Sertifikatet mitt går ut 1.juni, så eg må snart ta turen bort på biltilsynet.

 Då eg kom heim tok eg meg av nokre småjobbar i huset, eg laga røre til pannekaker og steikte bacon til. Einar kom etter at han hadde vore til fysioterapeut og då kosa vi oss med pannekaker med bacon og blåbærsylte, og kaffi til siste pannekaka, slik som skikken er her i huset. Eg steikte pannekakene i den vesle steikepanna, så dei var små og nette.

Etter at Einar hadde fare, sette eg meg til å feste trådar på den nystrikka genseren min, så no står det berre att og sy saman under ermane og brette ned "halsen" og sy så den blir dobbel. Dette er ikkje det kjekkaste arbeidet når ei strikkar noko.

 Heretter må eg begynne på lestar igjen, men det blir ikkje så mykje  strikking viss eg kan vere ute -for det er kjempemykje å ta tak i - i hagen. Det begynner å bli fint ute no, og frå vinduet her kan eg sjå at epletreet snart vil blomstre. 

I kveld blir det å sjå1.delfinalen av MGP-eg synest no det er litt artig, sjølv om den moderne musikken ikkje fell heilt i min smak. Slik har det vel alltid vore. Eg hugsar til dømes for eit ramaskrik det var då Beatles kom med sin musikk. Det var ikkje alle som likte den -men no kan vi kose oss med dei gamle melodiane deira - på pensjonistmøta.

Det er mykje fint å sjå i hagen no, så eg skal ta ein tur ut og knipse.

                                  Det ser ut til å bli eit bra ripsår.

Det finaste akkurat no er den raude rododendronen. Har to større som er lilla, men dei blomstrar seinare