Dagbok 2021: 14.april Sommardag.

Klokka er no 16.05, temperaturen ute er + 10 grader, det er opplett- og sol av og til, men også sist natt hadde det snødd. Heldigvis ikkje så mykje at ein måtte moke. I dag hadde eg ingen planar, men fann ut at eg kunne bake nokre rundstykke og få brukt opp ein melkeskvett. Elles har eg sete mykje her ved laptopen og hatt kontakt med heile slekta på Messenger.Det er no bra å ha datamaskiner og telefonar i denne tida. Etter at eg var ferdig med rundstykka, laga eg grønsaksuppe, eg hadde kjøpt kål sist eg var på KiWi så eg hadde mange gode grønsaker. Eg hadde kontakt med Rasmus og han meinte at det som feila storemaskina var ein kabel, og den var det berre å bytte ut. Det ville Helge gjere på eit øyeblikk. Eg sende ei melding til Helge, og det varte ikkje lenge før han ringde på døra. Han var heimeverande i dag. Og han hadde kabelen med. Dessverre hjelpte det lite. Så ringde han til Rasmus og fekk gode råd. Rasmus skulle sende noko. Eg blandar meg minst mulig borti det, for eg har ikkje forstand på slikt. Eg vart litt forseinka med middagen, men no har eg fått suppe, og til dessert vart det eit rundstykke med syltetøy+ kaffi. Eg har ikkje så mykje å gjere for tida, for eigentleg var det hagearbeid som stod på agendaen- men det står på vent. Eg håper det blir mindre matlaging og eting i sommarhalvåret som tek til i dag. I gamle dagar var det slik at tenestefolk måtte begynne eller slutte i jobben,på halvt-årsdagane 14.april(1.sommardag) og 14.oktober (1. vinterdag)Det betyr ikkje at sommaren kjem i dag - det skulle tatt seg ut. I morgon må eg skulke treninga fordi eg skal på styremøte i pensjonistlaget. Eg trur det er bra å ikkje trene for mykje, for eg fekk vondt i begge knea etter treninga i går. I dag har eg veldig lyst å gå ein tur, og det skal eg gjere. Men det blir neppe på Vernet, der er mykje snø.I går fekk eg kjøpt meg garn på Bunnpris såpass eg fekk strikke nokre lestar. I Møre-Nytt kan eg lese at det no er 31 korona-smitta i Ørsta, men dei har kontroll over smittekjeldene, og mange er i karantene.