Dagbok 2020: 7.oktober

Klokka er no 20.07. Temperaturen ute er + 11 graderC.Det har regna meir omg mindre i heile dag, men eigentleg ikkje så mykje. I dag var det å møte opp på hotellet klokka 11 til spanskkurset. I dag fekk vi eit anna og betre rom enn det vi har hatt før. Det går mest på repetisjon for tida, mykje har blitt gløymt sidan i vår. Nokre har slutta på kurset av ymse årsaker og det er litt trist, for vi var ein fin gjeng som treivst godt i lag. Etter kurset tok eg ein tur til urmakaren"min"for å kjøpe ei ny vekkerklokke. Den eg kjøpte på Clas fungerte ikkje, så den fekk eg levere tilbake og fekk att pengane. Det kan høyrest litt rart ut at eg må ha vekkerklokke når eg ikkje skal tidleg opp. Eg har ingen problem med å vakne tidleg og stå opp. Problemet mitt er å sovne om kvelden og sove om natta. Eg trur eg kjem til å sove betre når eg veit eg blir vekt. I morgon skal eg ikkje på trening før kl.12.30, så då treng eg ikkje vekkerklokke, men det kan hende eg set den på likevel. Eg fekk melding frå Margrete om at ho og Amanda ville komme ein tur i 15-tida. Så då eg kom heim att laga eg ei svelerøre i dag også, sidan takka stod framme sidan i går. I tillegg tok eg opp eplekake frå frysaren og piska krem. Det var fort gjort. Det var kjekt å treffe Amanda som no held til i Trondheim for det meste, Margrete ser eg no av og til, om ikkje så veldig ofte. Eg stussa litt då ho sa at ho ikkje hadde sett Solveig sidan Coronaen kom. Då forstod eg at eg kanskje er den som har mest kontakt med andre i familien. No har eg sett i gang oppvask-og klesvaskmaskinene. Då eg vart att åleine såg eg at eg hadde sølt på kleda mine-eg som alltid seier at gamle folk ikkje skal gå med flekkete klede. Eg reknar med at flekkane var svelerøre. Dagane, vekene og månadane går fort, eg har knapt akseptert at hausten er komen-framleis vonar eg på fine "sommardagar".Oktober kan vere ein fin månad, det også.