Dagbok 2025: 3.januar

 Eg har ikkje moka trappa skikkeleg enno, men kanskje i morgon?

Klokka er no17.56, temperaturen ute er ca minus 2 grader, ikkje så kaldt, men desto meir snø. Det har lava ned i heile dag stort sett. Eg gav meg ikkje til å moke i dag, for det er fredag og vaskedag. Eg rydda ut jula i går, så i dag vart det å vaske og støvsuge Eg ønska at Margrete hadde vore her , for ho greier å opne støvsugaren så ein kan få ta ut "Posen".

Då eg var ferdig med vaskinga tenkte eg som så: Eg greier ikkje å moke heile tunet, men eg kan lage meg ein "veg" til postkassa og ein til garasjen.Eg hadde ikkje før tenkt tanken så såg eg at Even laga vegane eg trong. Så eg fekk henta både avisa og ved,

Seinare kom ein annan nabo og tok resten av tunet. Eg får ikkje takka dei nok , eg synest det er litt gale at dei skal gjere det gratis, for eg får aldri gjort noko for dei.

Så fekk eg telefon frå Margrete ho var i Volda og ville komme bortom ein tur, og då var det godt at det var moka her, så ho fekk sette frå seg bilen.

Kjekt at Margrete kom akkurat i dag, eg fekk henne til å vise meg korleis ho opnar støvsugaren. Elles prata vi og drakk kaffi. Vi hadde det varmt og godt , for eg fyrte i omnen i tillegg til varmepumpa.

Eg har litt problem med å følgje med på dagane, men eg får snart noko å henge dei på, det blir trening tysdag og torsdag som før, og kanskje spansk på onsdagar, eg veit ikkje enno om eg held fram med spansken. Og eg treng nokre føremiddagar heime for å få gjort det eg skal.

No ser eg i avisa at det vert billeg - SAL- på klede m.a. og eg er heilt klelaus så eg treng å kle meg opp. Det SALET eg er interessert i tek til på måndag 6.januar

Rikeleg med snø over alt. I fjor var det ikkje så mykje snø, men då var det is og glatt.

Dagbok 2025: 2.januar

 Klokka er no 18.25,temperaturen ute er minus 4 grader, det kjem heile tida litt snø, men ikkje mykje (håper eg). I dag morgon var det mykje nysnø og eg såg at eg ikkje ville klare å moke sjølv. Og eg visste ikkje kva eg skulle gjere for eg måtte på butikk og kjøpe mat, elles ville eg  kanskje svelte?

Men eg fekk no på meg klede og sette meg til å ete frokost, då kom Helge nabo og moka heile tunet på ei bitte lita stund. Og takk og pris for det

Så eg gjorde meg klar til å fare på butikken. I dag var det det som ein kallar blindeføre, det er når det er vanskeleg å sjå kva som er vegen og kva som er vegkanten eller grøfta. Men eg kom meg fint ned på butikken, fekk handla og var nesten heime.  Eg køyrde ut Olavsgata og svinga opp i vegen som går hit. Det var berre det at eg svinga litt for tidleg, så eg vart sittande fast i ein haug med snø. Men der var to damer og ein mann som hjelpte til med å få meg på rett kjøl igjen. Ikkje det at dei gjorde så mykje, men dei sa  kva eg måtte gjere. Eg hadde nok greidd det heilt sjølv, men kjekt å få assistanse .Det var berre å rygge litt så kunne eg køyre. 

Resten av dagen har eg vore inne. Enten dokke trur det eller ei, eg har rydda ut heile jula.Og det var nokså mykje arbeid, meir enn ein skulle tru.Eg er plaga med ryggen så det går ikkje fort  No er all pynten komen ned i kjellarbuda igjen, og der blir den liggande ei stund. At eg absolutt måtte gjere det i dag, kom av at det er fredag og vaskedag i morgon.  Eg finn ikkje att voksduken som eg brukar å ha på kjøkkenbordet, men den dukkar vel opp. Enn så lenge har eg ein annan duk som passar fint - den også.

Håper alle barnebarna har kome sg trygt heim, det er så mykje skummel som skjer i desse tider, synest eg. Ser der på TV.

Elles ser eg TV og strikkar i det nye året også. Og i går skreiv eg litt i den nye dagboka mi, den eg fekk av Rasmus til jul. 

Håper alle har det bra i det nye året og så vil eg gratulere Audun og Elisabet som forlova seg nyttårs-aftan

Dagbok 2025: 1.januar: Godt nytt år!

Dette bildet tok eg no akkurat , eg var ute og såg på temperaturmålaren som stod på MINUS 10, Helge gjekk forbi på vegen så eg fekk snakke eit par ord med han .

Klokka er no 20.23.

I dag då eg stod opp såg eg at det var kaldt og klårt ute, og så såg eg at ein nabo hadde fått ut flagget sitt. Så då fekk eg det travelt ei lita stund med å få flagget mitt på plass på altanen.

Eg skulle sette meg til å strikke og sjå TV, men der var berre slikt som eg hadde sett før. Så eg vart sittande med strikketøyet og halvsove. Marit hadde lova å kome ned , men det varte og rakk før ho kom. Det var litt miss-forståing ute og gjekk. 

Men ho kom og vi fekk prata frå oss; vi er vande med å prate kvar dag - enten snakkar vi , eller vi skriv meldingar, Og vi har alltid noko å snakke om. Då Marit gjekk opp att begynte eg så smått å rydde ut jula, men eg vart ikkje ferdig i dag. Så ringde det på døra og der stod det 4 ungdommar som skulle besøke meg, det var Margrete sine 4 som var på veg til faren i Mosmarka. Dei gav seg  til ei lita stund og då fekk eg prata min del. Dei spør om så ymse, så eg får snakke mykje og forteje frå "Gamle dagar" . Erlend blir no att her hos meg, Amanda bur hos Margrete for tida, Eirik skal heim til Trondheim og Ingeborg skal til Oslo. Eg synest denne julehelga har gått veldig fort. 

Eg likar ikkje kulde, men det er ikkje eg som styrer ver og vind, og det må eg finne meg i. Viss eg få ut bilen i morgon  må eg på butikken  for no manglar eg litt av kvart.

Godt nytt år!

 Så går vi inn i det nye året med mykje lys og smell, som vanleg - men det er vanskeleg å få fine bilde,og eg har aldri brydd meg særleg om desse fyrverkeria.

Det som eg tenkjer mest på i kveld, er korleis det vil utvikle seg vidare i verda, det er eit skummelt år vi legg bak oss, og håpet i år blir vel at det året vi går inni akkurat no  må bli betre enn det som var. No tenkjer eg ikkje på meg sjølv og mine, vi har vel hatt eit heilt greitt år om lag som før, men eg tenkjer på heile verda og alle land. Det er mange som har hatt det vondt og vanskeleg. Og sjølv om vi har vore langt unna krig og naud, har vi sett bilde og høyrt om det som skjer i land langt borte. Eg har eitt ønske for det nye året og det er FRED PÅ JORD. 

Eg vil ønske alle som les bloggen min, eit godt nytt år og takke for året som er forbi. Kjekt at dokke les bloggen.