Dagbok 2023: 19.april

 Klokka er no19.05, temperaturen ute er + 15 grader C, og det har ikkje vore ei sky på himmelen i heile dag.

I dag sov eg til klokka var 8 og då stod eg opp. I går hadde eg lova meg sjølv at det første eg skulle gjere i dag var å vaske og rydde i kjøleskapet. Og det gjorde eg. 

Marit og eg avtalte å gå på gravplassen og vatne og det gjorde vi, og eg trur det var bra,for sola skin så det tørkar opp lett.

Så gjekk eg ein tur på Vernet og sat på alle benkane og sola meg for å vere mest muleg ute.. 

Då eg kom heim tok eg meg litt mat før eg begynte å shine meg opp til pensjonistmøtet. Eg greidde å få håret nokonlunde bra i dag. Og fleire sa at eg var fin.Men det varer ikkje lenge.

Pensjonistmøtet var på Røde Kors-huset denne gongen. Det som var litt irriterande var at der var dårleg lydanlegg, og at eg hadde gløymt å ta på meg høyreapparat.

Rigmor var der og fortalde om det ho har skrive bok om. Eg fekk boka i gåve av henne i for på denne tid, så eg kan no lese den om att.

Det var to unge damer som spelte nydeleg musikk på piano og fløyte.Musikken fekk meg til å tenke på Irland, og det var vel ikkje så rart?

Eli snakka om pensjonistturen 30.juni-1.juli til Moldetraktene og Sunndalsøra, men eg har ikkje greidd å bestemme meg, så det blir ikkje tur på meg i år heller. Marit skal heller ikkje vere med, for ho skal i bryllaup i Polen seinare på sommaren.

Vi fekk noko godt å ete i dag, noko som dei lagar på ASKO. Det var ei slik mjuk "lefse" med godt fyll.

Etter at eg kom heim tørka eg støv inne i bilen og spylte den litt utanpå. Sola skin framleis, men her oppe på bøen varer det ikkje så lenge no.

Då deg skulle finne noko å ha på meg i dag, såg eg at det var manko på sommarklede generelt, så Marit og eg vurderer ein tur på Aandahls.

Her vurderer eg å plante noko, det vart litt snautt etter at Rasmus saga ned grana i fjor. Ja, det var no eg som ville ha den vekk, då.Eg tenkte på ein Rhododendron øvst oppe der er to rhododenron frå før.