Dagbok 2021: 11.august.

Klokka er no ca 18.30, temperaturen ute er + 22 grader, men det har stort sett vore skya i dag. Det er heilt i orden. Det har regna,men ikkje i dag. I dag var eg oppe i rimeleg tid, utan at eg stressa med noko, eg hadde faktisk ingen planar for dagen. Men sidan bilen stod ute og garasjen var tom, fekk eg kosta golvet der inne aldri så lite, men der er på langt nær så ryddig og fint som der kunne ha vore. Etter kvart fann eg ut at eg måtte ta turen til Vik og levere eine skoen min til reparasjon og kjøpe eit par joggesko på salg, så eg hadde noko å ha på føtene på heimvegen også. Det gjekk etter planen, men joggeskorne eg kjøpte var ikkje til nedsett pris. Eg var litt i beit om kva jobb eg skulle prioritere vidare, men så tenkte eg: I dag er det tørt, eg kan klippe plen! Og det gjorde eg. Då var det på tide å tenke på middagen, og etter eg hadde ete vart eg så trøtt at eg la meg bort på dagsenga mi, men eg sov ikkje. Eg gjekk ut på altanen og då oppdaga eg at ei stor grein hadde brotna på det minste Opal-treet. Eg gjekk ut og fann fram stige og sag og fekk kutta greina med ca 100 kilo grøne plommer på. Eg fekk kvister og plommer opp i ein sekk som eg må på VØR med før eller seinare. Eg klipte mange av greinene som hang tunge av plommer, så no ser treet litt betre ut. Men eg har ein plan om å sage litt meir. Dette treet har stått for fall i mange år, for halve stammen er død. Likevel er det her dei beste plommene veks. Fann meg litt puslearbeid i rosebeddet også, og så kom Marit ned ein tur for å prate litt. I dag har eg ikkje vore på Vernet, eg saknar turen, men tenkte eg hadde labba rundt nok i dag når eg klipte plen. Det blir ikkje trening på meg i morgon , for eg er kalla inn til styremøte i pensjonistlaget. Ja, eg manglar ikkje sysselsetting. No skal eg snart ha på meg høyreapparata og høyre nyheiter, og så blir det vel litt "strikketøy og TV" resten av kvelden. Slike passeleg varme dagar er aller best!