Dagbok 2020: 29. oktober

Klokka er no 17.00 og det mørknar ute. Temperaturen er + 6 grader C og i dag har vi hatt regnbyer. Eg starta dagen relativt tidleg, så eg fekk både øve på spanskleksa og skrive litt på referatet mitt før eg møtte opp på hotellet i god tid før klokka 11. Dei to spansktimane går veldig fort.Vi har kaffipause mellom timane , då får vi servert rundstykke og kaffi.Eg føler no på at eg forstår litt meir av det spanske språket-det er ikkje heilt enkelt. Etterpå var eg og fylte bensin før eg handla litt på Spar. Det var ikkje så mykje eg skulle ha, men det tek si tid å leite opp alt når ein ikkje er kjent på butikken; der er store endringar etter oppussinga.Eg var ikkje heime før klokka var nærmare 14. Då låg der ei melding på Messenger frå Audun, han ville komme innom ein liten tur om ca 1/2 time. Det vart ikkje tid til så mykje førebuing så det vart berre til at eg tok opp eplekake og is frå frysaren og kokte kaffi. Det er veldig kjekt å få besøk av barnebarn-også når dei er vaksne. Etter at eg vart åleine igjen skreiv eg litt til på referatet.Eg kjenner på at eg er litt ute av trening, det er 8 månader sidan det førre møtet. Det er det 10.året eg skriv i avisa for Pensjonistlaget. Det 10. og siste. Nok er nok. I morgon har Margrete og eg avtalt å shoppe i Volda. Eg har lært at shoppe ikkje er det same som å handle. Når ein shoppar treng ein ikkje å kjøpe så mykje.Eg har hatt ei travel veke- alt er relativt. Veninna mi på andre sida av gata blei oldemor, ho også, i går. Eg merkar godt at eg er komen i oldemorsalderen. Men det er no berre kjekt.