Dagbok - 2016: 27.juni

Vi abonnerer ikkje på Sunnørsposten, men disponerer naboen sin mens dei er på tur. I dag var der ei heilside om Sissel (Lefdal) Ytre-Eide som flytta frå Starevegen til Markane og laga seg ny hage der. 

Klokka er 19.30, temperaturen er + 16 grader, og akkurat no begynte det å regne litt , elles har det vore stort sett opplett i dag.
Og så lurer ein på kva som har vorte av denne dagen.
Nils var nedover og tok nokre blodprøver før middag. Eg fann ut at eg skulle plukke inn og reinske alle rabarbrastilkane som var store nok, og det gjorde eg. Noko hamna i frysaren, og noko i ei kake. Vi fekk telefon frå Ingeborg om at ho ville komme ein tur, så det passa bra med litt kaffimat. Det er ikkje ofte eg bakar no for tida, og så fann eg sjølvsagt ikkje att rabarbrakakeoppskrifta, så det vart å gå inn på nettet. Eg likar å leite etter oppskrifter der, for då blir det kanskje noko nytt. Tykte sjølv at kaka vart god, og det gjorde dei andre to også. Nils var i så bra form at han både åt kake og drakk kaffi.
Men før Ingeborg kom i halv- fire tida hadde vi ete middag; i dag vart det spagetti med bacon og tomatpuré. I staden for tomatpuré kan ein bruke pesto om ein likar det betre. Når eg skriv om kva vi har til middag kvar dag, er det for å synleggjere at vi ikkje lenger et fisk/fiskemat fem dagar i veka og lever bra med det. Men Nils ventar veldig på makrellen no.
Etter at Ingeborg hadde reist klipte Nils bio på dei to små plenbøtene opp mot vegen; eg var ikkje nøgd med klippinga, eg ville ha klipt med den elektriske for å kome lenger ned på jorda. Men eg veit ikkje kor lurt det er å bruke elektrisk klippar når det regnar? Eg klipte litt med kantklipparen, men vart angripen av tusen uidentifiserte flygande objekt (UFO)som kraup opp i nasen og inn i augene, så eg heiv ifrå meg og rømde inn.
I kveld er det berre ein fotballkamp, eg les lydbok imens. Held på med ei bok som er gørr, men eg les den fordi historia skal vere den som Shakespeare la til grunn for "Much  Ado About Nothing"- "Beatrice og Benedict" heiter boka. Eg held på med plate nr.7 og då må eg nesten ta med resten også. Eller? Når ei bok er kjedelig, les eg oftast vidare fordi eg trur det skal bli betre etter kvart-det skjer ikkje alltid.I morgon er det visst tre kampar, så då kjem eg meg eit bra stykke vidare vil eg tru.
I dag er det to par som har bryllaupsdag. Bodil og Svein har no vore gifte i 52 år. Bryllaupet deira var på garden til Bodil sine foreldre i Torvika/Stårheim
Den yngste at døtrene deira, Hilde, gifta seg med Oddvar for 29 år sidan. Dei vart vigde på Eid, men festen vart halden på Raftevold hotell. Eg synest ikkje det er så lenge sidan.
Eg vil gratulere alle fire med dagen!