Dagbok 2013: 2.juli

Solveig og eg for snart 50 år sidan.

Klokka er snart 21.00. Ute er det lettskya og ganske fint. Temperaturen er + 16 grader. Tidlegane i dag var det meir skya, men ikkje regn.
Det har i grunnen vore fint arbeidsvêr, utan at vi har gjort så mykje. Før middag var vi ein tur nedover og handla litt, så vart det middag, og først på ettermiddagen kom vi oss ut i hagen for å gjere noko. Eg er plaga med ryggen, så det blir ikkje så mykje med meg for tida. I dag skulle eg slå med kantklipparen, men det vart berre tull, sena rauk heile tida og Nils måtte reparere fleire gonger.
Har hatt hønsegjødselpellets ut over bedda i håp om at kattane sluttar å grave der.
Eg får ikkje gjort mykje for tida, har ikkje lyst å vere inne om vi skulle vere så heldige at det skin opp. Eg er litt irritert på meg sjølv fordi eg går og føler på at eg skal GJERE noko heile tida.
I morgon er det 50 år sidan vi fekk det første barnet vårt på sjukehuset på Eid. Den sommaren var det veldig fint vêr, så då legen spurte kva eg ville kalle jenta, sa eg at eg ville kalle opp att sommaren. Det vart Solveig. Nils hadde tenkt at ho skulle kome før han reiste på fiske til Island, men slik vart det ikkje. Han fekk meldinga over radiotelefon mens han var til havs: " Ei jente. Alt vel." Solveig var 6 veker gammal då faren fekk sjå henne for første gong. Då begynte eg i full jobb etter  permisjonen, og Nils hadde "pappaperm" - lenge før ordet var oppfunne. Vi budde på Raudeberg den gongen.
Solveig feirer 50-årsdagen i Roma.