Klokka er no 18, temperaturen ute er minus 9 grader C, det har kome litt meir snø i løpet av dagen, men for det meste har det vore opplett. Viss det hadde vore klårt så hadde vi få sol i stova i dag, men så vel var det ikkje.
Eg var litt spent på vestrehanda i dag, lurte på å ta ein tur på legesenteret og få dei til å sjå på den der, men slo det frå meg. Handa er hoven, det er lett å sjå, men eg syntest ikkje den var så vond at eg måtte gjere noko med det. Men i morgon går eg ikkje på trening, det er ingen vits i det når eg ikkje kan gjere alt slik det skal gjerast. Eg synest hevelsen har gått litt ned sidan i går, men eg er ikkje sikker.
Eli har lagt inn lekse til oss på nettet, vi skal starte opp med spansk den 13. februar, og til den tid må vi ha oppgåva i boks. Det var heilt greit for meg å ha dette å jobbe med, når eg ikkje kan gjere så mykje anna.
Så var eg opp til Marit ei stund og drakk kaffi og prata. og slik gjekk denne dagen. No har eg på TV og skal sjå på alt det vonde som skjer i verda. Då blir ei vond hand eit veldig lite problem.
Det er meldt snø i morgon, så då kjem eg meg kanskje ikkje ut i det heile tatt, elles så har ei ei rås frå huset til garasjen der eg har veden min. Det er godt å ha nokre gode kubbar i omnen når det er så kaldt. Det har snødd litt men ikkje så mykje at det må mokast enno i alle fall.
Det skjer ikkje så mykje når eg er her heime, og det kan eg no vere glad for, men eg har ei bok som eg har lese på senga ei stund, den reknar eg med å bli ferdig med i dag.
Ingen kommentarer:
Legg inn en kommentar