Dagbok 2021: 19.januar

Klokka er no 17.40, temperaturen er minus 1 grad , det er opplett og fint vêr, og i dag har vi sett sola. Ho skein inn på stova ei stund rundt klokka 11, men det var ikkje så mykje eg fekk nyte den, sidan vi skulle på trening . Vi starta litt seinare enn vanleg i dag fordi det skal vere lenger opphald mellom gruppene. Det vart til at eg køyrde, og det gjekk heilt fint, sjølv om vegane ikkje var særleg mykje grusa.- Etter treninga var vi ein tur på Spar og handla litt; det var ikkje så mykje eg trong, men kom likevel ut med eit tungt nett.- Før eg åt "middag" tok eg meg ein spansktime på data; eg har vore lite flink å øve no i det siste; men viss eg ikkje jobbar litt med det, så gløymer eg det vesle eg kan.- Som før fortalt, har eg strikka ny høgre-erm på den oransje kofta mi. Det viste seg at den nye erma var litt kortare enn den skulle vere. Eg trudde ikkje det gjorde så mykje, men då eg fekk kofta på meg var eg ikkje heilt nøgd. Derfor rekte eg opp brotet for å forlenge erma. Eg strikka med opprekkstråden, men då eg var nesten ferdig tykte eg det blei stygt.Eg rekte opp att det eg hadde strikka og strikka på nytt med ubrukt garn. Det blei betre. Skøyten synest sjølvsagt, men det går seg til.- Eg trudde eg hadde kjent det i armane i dag at eg heiv på snø i går, men armane var heilt OK i dag, så då går eg ut frå at senebetennelsen er over.- No er det mørkt ute og eg ser månesigden på himmelen utanfor glaset, det er veksande måne. Eg har begynt på enda ei bok av Joy Fielding, les på Storytel. Det er ikkje så mykje å gjere verken ute eller inne i dette vêret. Viss snøen blir liggande får eg ta fram sparken.