Dagbok 2021: 15.januar

Klokka er no 1.50 og eg har nettopp ete middag.Det er strålande vêr ute , men temperaturen har falle til minus 7 graser og det er altfor kaldt for meg.Tidlegare i dag var den oppe på 2 minus.Det var kaldt nok. I dag før middag såg vi nesten skin av sola i aust; det er alltid slik at det legg seg skyer der sola skulle vere, men om eit par dagar har vi litt sol i stova. Når det er så vinterleg og kaldt kjem eg meg ikkje ut-utan at eg er heilt nøydd til det. I dag skulle eg finne på noko nyttig å gjere inne, så eg valde å rydde på datarommet mitt, fordi der er varmt. Eg rydda i skapet og eg sorterte nokre papirer som hadde hopa seg opp, det blei mykje kveikje til omnen. Eg fann ein lest med eit digert hol. og det måtte stoppast. Det høyrest vel litt skrytande ut, men eg likar faktisk å stoppe lestar. Ikkje det at eg er flinkt til det, men eg likar å "reparere"- det eg kan. Det vart til at eg begyte å rydde og sortere alle garnrestane mine-og det tok si tid. Eg sorterer etter fargar og har ei stor plastkasse full nede i kjellaren. Eg studerer heile tida på kva eg skal bruke alt garnet til.Trur eg må til med "hønsestrikk" igjen. Middagen i dag var lettvint; eg tok suppa som var att frå i går og forlenga den litt, med vatn, fond, frosne grønsaker og litt juleskinke. Laga litt for mykje, men tvinga det ned, for eg ville ha slutt på suppa for denne gong. Før eg åt kveikte eg opp i omnen på stova så eg fekk varmen i meg både innanfrå og utanfrå. Eg har ikkje hatt annan trim i dag enn å gå opp og ned kjellartrappa, driv og vaskar litt klede langsmed. No fekk eg nesten lyst å gå ut, men trur ikkje det blir.Kanskje ein tur på butikken i morgon? Altanen skal eg moke når snøen fell meir i hop og ligg i ro på spaden.No skal eg flytte inn i stova og sette på litt kaffi. Vi pensjonistane har det godt !! (Når vi får vere friske)No kom eg på at det er fredag så eg må ønske alle ei god helg. Pass på å ikkje bryt beina! Bildet under er tatt ca kl.12.