Dagbok 2020: 11.februar

Klokka er 22.00, temperaturen er + 1grad C, og i dag har det regna og sludda. Eg vakna relativt tidleg og stod opp, likar å ha god tid når eg skal trene. I dag køyrde vi rett heim etter treninga utan å handle.
Eg sette meg til å lese då eg hadde fått opp varmen, men eg blei berre så trøtt at eg måtte legge vekk boka. Så strikka eg i staden og blei ferdig med det eg heldt på med, må berre feste trådar etc.
Eg laga meg mat og åt eit godt måltid- og då eg sette meg til att med boka sovna eg tvert, og eg trur eg sov ei stund! Og etterpå kunne eg lese bok heilt til eg begynte å gjere meg klar til å fare på Musikalen. Margrete og Amanda henta meg klokka 19 og køyrde meg heim etter festen.
Det var ei strålande framsyning i dag også, og eg synest dei blir fleire og fleire på scena for kvart år, i år var fleire linjer enn før involvert, det er ikkje berre musikklinja som jobbar med musikalane. Eg er ikkje så godt inne på kva alle linjene heiter, men det var i alle fall m.a. ei arkitektlinje (arkitekt var i namnet men der var fleire ting) Dei hadde laga flott til i foajeen. Ja, eg kan ikkje gå i detaljar. Erlend var berre med i koret i år, sidan han er førsteklassing. Og koret hadde meir enn nok å gjere. Somme av skodespelarane/songarane gjer meir av seg enn andre, men alle var flinke. Men vi tre damene som sat i bilen heim var samde om at vi likte musikalen i fjor betre, fordi den hadde ei tydelegare handling og ein god bodskap. Det hadde for så vidt den i år også-men det kom ikkje så godt fram.
No skal eg ete kvelds og styre på litt, skal ikkje tidleg opp i morgon, for spansken begynner ikkje før kl.11. Pensjonistmøtet tek til kl.16, så eg får ikkje så lang tid innimellom til å shine meg opp. Håper at det kjem mange på møtet.