Klokka er no 16.15, temperaturen ute har stige til + 3,5 grader C, gjev det vart så varmt at snøen smelta! I dag hadde eg vekkerklokka på 8, men vakna ein time før. Hadde mest lyst til å vere der eg var, men kom meg opp i halv åtte tida. Planen min var å moke såpass at eg fekk bilen opp på vegen. Moke med spade, det kan eg ikkje, men eg kan drage brettet. Det let seg ikkje drage noko særleg, sidan det var isa oppunder, så eg tok snømoka (spade) og drog som eit brett. Då eg hadde fått vekk litt snø tok eg sjansen på å rygge ut bilen. Eg kom meg opp på vegen og køyrde litt att og fram slik at det skulle bli bra underlag. Så gjekk eg inn att glad og fornøgd og åt frokost, var litt på data etc. Vi plar fare heimanfrå kl.9.45 når vi skal på trening. Marit kom og sette seg inn i bilen, og så-stod bilen blegg fast. Eg prøvde både framover og bakover, men nei-! Marit skubba, Marit køyrde og eg skubba, men nei. Eg spada vekk snø, bar til litt singel osv. Bilen ville ikkje. Så henta eg litt varmt vatn og slo under eine hjulet, men i det samme kom Solveig nabo, og ho og Marit skubba. Og der fekk vi bilen i gong. Vi kom litt for seint til treninga, men det gjorde ikkje noko, for vi kunne berre halde på til vi var ferdige - og det gjorde vi. Etter treninga var vi på Spar og handla.
Då eg kom heim fyrte eg i omnen, og så laga eg meg middag med poteter, julepølse og raudkål. Julepølsa var av det kvite slaget - og smakte nesten ingen ting. Men mett vart eg. Så mett at eg måtte slappe av i godstolen med lydbok etterpå. Sjølvsagt sovna eg ei stund, og den energien eg hadde før, den var borte då eg vakna. Trøsta var at oppvaskmaskina hadde tatt oppvasken mens eg slappa av.
Neste tysdag skal eg ikkje på trening. Mor til fysioterapeuten er død, og Anne Elisabeth skal i gravferd bortpå Austlandet ein stad. Men eg skal få kome på torsdag i lag med Marit i staden, det er ikkje om morgonen , men ca.13.30 eller noko slikt, det blir siste gong før jul -tysdagen deretter er julaftan. Så det blir ikkje mange timar på frikortet, men det skal det bli neste år!
Denne laurdagen er det konsert i Fosnavågen.
Eg veit ikkje om eg får gjort noko meir i dag, men eg kan i alle fall strikke litt. Det meste av det eg skal gjere til jul må gjerast i siste liten. Og kvar gong eg kjem på noko som eg kunne ha laga, dcs. bakt, så mangler eg ein eller fleire ingrediensar. Merkeleg!
No skal eg i alle fall tømme oppvaskmaskina-så får vi sjå kva det blir til.
Ingen kommentarer:
Legg inn en kommentar