Dagbok 2016: 12.juni

Klokka har passert 20.00. Temperaturen ute er + 17 grader C og sola skin framleis. Det var litt kald vind ei stund, men elles har det vore ein fin dag.
Sidan Nils ikkje er i form held vi oss heime. Før middag var eg ute i hagen og pusla litt, vatna blant anna.
Seinare låg eg på solsenga og las, men då må eg ha lege i feil stilling, for etterpå vart eg låk i hofta.
Sidan eg ikkje var i form til noko særleg tok eg like godt og vaska og rydda kjøleskapet. Behovet var der verkeleg! Og etterpå vaska eg rundt på bord, benkar, komfyr og flisar. Alt var betre enn å sitte i ro.
Det blir nokre dagar til med opplett, så då gjeld det at alle plenar er snauklipte før regnet kjem. Eg har fått litt plen på hjernen, som de sikkert har oppdaga. Før om åra har eg "mobba" Nils fordi han har plendilla- no er det eg som er verst. Skal kjøpe gjødsel, så eg har den klar når regnet kjem.
Nils vil gjerne gjere både det eine og det andre, men så toler han det ikkje. Klart han blir frustrert, men det kjem seg litt etter kvart, vil eg tru.
I dag har eg ikkje laga middag, vi delte resten frå i går. Eg får i alle fall i meg nok mat!
Boka eg les no- Eplehagen- er SVÆRT lettlesen, og ganske rosa, typisk solsengbok. Slepp å bry dei små grå noko særleg.
No blir det vel TV og strikketøy resten av kvelden-viss det ikkje er fleire fotballkampar, då.