Kva året vil bringe for kvar og ein av oss, veit vi ingen ting om, men vi håper på det beste. Sjeldan har det vore så mykje turbulens i verda som det er akkurat no, det gjeld både krigar og vêr. Det er somme gonger litt for spennande å vere menneske.
Akkurat her hos oss er det veldig fredeleg, vi har vore her for oss sjølve og ikkje vore særleg aktive desse dagane- slik er det med den saken. Vi får håpe på litt meir aktivitet i dagane som kjem.Nils er betre i foten- men må vere forsiktig, eg er bitte lite grann forkjøla.
Komande mandag skal vi begge til tannlegen, det er no ikkje akkurat det kjekkste vi veit, men det brukar å gå bra. Vi har avtale med tannlegen at vi får time samtidig-med ein halv times mellomrom, og eg får gå først inn sidan eg er den "reddaste"-tannlegeskrekken sit i frå barnsbein av.
Klokka er ca 18.10, temperaturen er nede i 3,6 grader C, og det er opplett. I dag var det ganske lyst midt på dagen, og kva såg eg då? Stuevindua! Å, du store tid - dei såg ut ! Så det blir ikkje lenge før eg set i gang med vindusvask.
I dag har eg strikka ferdig årets første sokk, den vart til forveksling lik førre årets siste-og det var i grunnen tilsikta.
Så har eg lese ferdig ei bok vi fekk til jul. Eg trur den ville høve godt å lese til litt store barn- eller la dei lese den sjølv.Sjølvsagt kan vaksne lese den også- eg gjorde jo det!
Låg lenge vaken sist natt også - då las eg krimnoveller av Unni Lindell, den boka er eg også snart ferdig med.
Til middag åt vi restar frå i går, og eg tippar vi har nok mat til langt ut i månaden. Men eg må nok bake brød!
Det blir mykje TV slike dagar. Eg såg/høyrde mykje av nyttårskonserten i dag; eg blir litt lei av Strauss, men det er nok ein seigliva tradisjon. I dag tek det til ein ny Anno-serie, den skal vi sjå. Vi kosa oss veldig med den vi såg i fjor.
Det var nokså mykje fyrverkeri her i går, særleg mellom 23.30- 24.00. Men det stilna ganske fort av. I fall det var mindre enn vanleg, så likar eg det. Eg er såpass "sunnmøring" at eg synest det er gale å kaste bort så mykje pengar på nokre blaff i lufta.
Ingen kommentarer:
Legg inn en kommentar