Dagbok 2018: 7.april

Klokka er 20.50, temperaturen er + 3grader C og det regnar. Ikkje samme fine vêret som vi hadde i påska, men vi treng litt mildvêr for å få bort snøen som enno ligg att. Det har tross alt vore ein lang vinter-om vi ikkje har hatt mykje snø.
Føremiddagen i dag sat eg stort sett med beina høgt og strikka, og trudde det var sundag, slik eg vanlegvis gjer om laurdagane. Hadde på Tv-en utan å sjå så mykje.
Margrete og dei to yngste kom i 14-tida. dei hadde kjøpt med seg kaffimat, blant anna store aniskringler, så det vart eit par timar med mat og prat før vi for ut til Nils.
I dag var han vaken, og ikkje dopa, så vi kunne snakke med han og få viselege svar. Det er alltid kjekt å få skikkeleg kontakt med han, det skjer ikkje kvar dag. Men han blir fort veldig sliten, og då må han sove litt. Margrete og barna var der berre ei kort stund, men eg var der til klokka 20, då kom Marit og henta meg, som avtalt.
Kvar morgon når eg vaknar er eg i villreie om kva dag det er, kva avtalar eg har  og korleis logistikken er. Dette var noko som kom då foten svikta, før den tid var alt greitt. Men eg har ingen ting å syte over, her er hjelparar i kvar ei krå.
Margrete kom med fleire lydbøker som eg skal rippe. Det var kjærkome, for den eg så vidt har begynt på var ikkje så fengande. Og så skal eg ha meg litt mat. Der er litt aniskringle att....
Eg veit at mange les bloggen min, for å vite korleis det er med Nils. Det at eg skulle orientere på denne måten var noko vi diskuterte oss imellom og vart samde om mens han enno var nokså oppegåande. På den måten blir dei som er interesserte vite korleis det står til utan å måtte ringe og spørje.