Dagbok 2016: 28.september

Klokka er 18.15, temperaturen er + 10,8 grader C og det har regna i heile dag. Eg har ikkje vore ute for ei dør. Eg har mykje eg skulle ha gjort ute, men då må det vere opphaldsvêr.
Vi var relativt tidleg oppe i dag, for Nils skulle vere i Volda klokka 10.00. Eg rakk akkurat å rense resten av teppegolva, dvs. datarom, gang og vindfang, før han kom heim att.
I går var vi innom fleire forretningar i Ørsta for å finne ein krakk til å sitte på inne i dusjkabinettet, men ingen hadde. Då sa eg:" Dei har sikkert på Bygg-Mix i Volda, for der har dei alt." Nils var enig, og i dag, etter at han hadde vore på sjukehuset, var han innom - og krakk fekk han. Dermed slapp vi å bestille på nettet.
Eg hadde lova Nils Taco i går, men då vart det berre tomatsuppe, så i dag fekk han ønsket sitt oppfylt. Han har fått beskjed frå legen om at han må ete mykje kjøt, fisk og egg for å få i seg nok protein. Han får no i seg bra med mat no, men det skal noko til at det blir nok.
Vi sløva etter middagen, og for meg er det heilt uvant å vere så lat etter ein så aktiv sommar. Elles har eg streva litt med datamaskina i dag også, og fekk i alle fall skrive ut eit par dokument som eg ikkje har fått til å skrive ut før.
Nils fekk nettopp telefon frå ein han kjenner som hadde sett Rolf på TV-om bord i Atløy. Eg blir nesten sjokka når eg ser dei gamle båtane på TV. Dei er så små !Værøy, Nesøy og Atløy gjekk mellom Solund og Bergen den tida eg var der ute -i all slags vêr. Og ikkje sjeldan gjekk dei på grunn. Eg var ikkje med på noko dramatikk.
I dag har eg lese ut ei bok, og så har eg funne fram spøtet-hausten er komen.