Dagbok 2014: 18.desember

Klokka er 19.45, temperaturen er + 3 grader C, og det regnar. Regn og grått har det vore i heile dag. Og eg har vore trøtt ! Somna ikkje før på morgonsida, og så stod eg i tillegg tidleg opp.
Fekk gjort ein del før middag. Bytta på sengane, og vaska kleda. Vaska soverommet og dei andre golva, men støvsuge får eg gjere i morgon eller ein annan dag, litt nærmare jul. Då kleda var tørre i tørketrommelen, fekk eg stryke og legge på plass. Eg er vel inga superhusmor, men å stryke er noko av det eg likar, og derfor gjer eg det.
Middagen vart lettvint i dag også. No var det siste fiskegratengmiddagen som gjekk av stabelen, så får vi frigjort litt plass i frysaren. Kanskje eg kan bake litt meir?
Har att å kjøpe nokre gåver, kanskje det blir litt handel sidan eg likevel skal til Volda i morgon. Skal ta sprøyte for den låke hofta mi.
Pakken frå Rasmus er komen til bygda, skal hente den i morgon. Nils var nedover ein liten tur i dag, men eg miste lysta på å fare ut då eg såg vêret.
Etter at vi hadde ete middag, måtte eg berre gi meg over å slappe av på sofaen. Mens eg stryk, og mens eg slappar av kan eg høyre lydbok og det har eg gjort i dag også. Elles skjer her ikkje mykje, og det er kanskje det beste.