Rundskue frå altanen.
Klokka er 17.30. Temperaturen ute er + 14 grader C og det har regna nokså jamt i heile dag. Eg seier til Nils at sola kjem frm til kvelden, men det trur han ikkje på. Skodda ligg nesten ned på jorda.
Nils har funne seg eit idrettsarrangement -på TV.
Eg har truleg fått sovesykja. I går kveld sat eg og somna i eitt når eg skulle sjå TV, så vi la oss før klokka var 1.00. DET er sjeldan vi gjer. Eg sov til klokka 9 og så sov eg middag. Like trøtt enno.
Etter frokost i dag sette Nils seg ut i garasjen og egnde liner, med makrell frå i fjor og småsei frå i år. Han hadde ikkje nok til heile lina, men fekk i alle fall brukt opp all den gamle agn-fisken.
Når det er slikt vêr kan ein like godt gjere ein slik jobb som ein har lett for å utsette, så i dag vaska eg dusjkabinettet grundig. Eg lengtar tilbake til badekar-tida, det var lettare å halde reint då. Grunnen til at vi skifta til kabinett var at vi rekna med at det etter kvart vart vanskeleg å klatre opp i karet.
Sist eg laga fiskekaker hadde eg løk i røra. Det plar eg ikkje ha, men snakka med andre som brukar det. Eg gjorde sikkert for mykje av det, for kakene blei ikkje gode. Heldigvis hadde eg laga berre tre porsjonar. I dag tok vi porsjon nummer to. For å dempe litt på smaken, laga eg dei i brun saus- utan at det hjelpte. Dei smakte som sildekaker. Sildekaker er greitt nok, men då må dei vere laga av sild.
Siste veka har vi hatt besøk og vore i besøk og på diverse småturar, så det var heilt OK å ha ein sløv dag.
Eirik og kameratane er vel framme på Mallorca, Magaluf. Han reiste med nattbussen frå Volda i går kveld. Fekk sagt "ha det" til han i går då vi var der inne, og gitt han diverse formaningar, i tilfelle Margrete hadde gløymt noko. Men dei velsigna mobilane gjer at ein kan ha litt kontakt, så ein treng ikkje engste seg - unødig i alle fall.
Av lett forståelege grunnar har eg ikkje vore ute i hagen enno, men frå altanen såg eg at den mørkeblå clematisen har begynt å blomstre.
Ingen kommentarer:
Legg inn en kommentar