Dagbok 2013: 3.august.

Klokka er snart 18.00. Ute er det lettskya og sol akkurat no, og temperaturen er + 22 grader C. Men slik har det ikkje vore heile dagen. Tidlig på dag var det relativt fint, og det var godt for dei som skulle gå på Saudehornet.  Vi skulle ikkje det, men vi ville no ned i Vik og sjå på livet, dessutan måtte vi kjøpe litt meir mat. Det var ikkje ein einaste parkeringsplass å oppdrive i heile sentrum, så vi køyrde bort på REMA 1000 og handla, og så vart det rett heim. Eg gikk ei trimrunde mens eg hadde skorne på. Eg rakk ikkje heilt heim før regnet kom, for brått var det som om heile himmelen ramla ned. Naboen som var på Sæbø ringde heim og spurde om her var krise, der borte var det så sterk vind at tre ramla over ende. Vi kunne berolige han med at her var det ikkje så gale.

Til middag i dag laga eg fisk i kvit saus, noko som særlig Nils likar godt. Så var det fotball på TV og lydbok på øyret, og begge deler er reine sovemedisinen for meg.
I dag er det Solveig og Øystein sin bryllaupsdag, og viss alt går etter planen er dei no på veg heim frå Kongsberg. I går var dei på Notodden Bluesfestival og høyrde på Van Morrison. Margrete og ungane reiser til Tyrkia i kveld, reknar med at dei alt er på veg til Vigra. Håper dei får ein fin ferie !