Dagbok 2024 : 20.november

Storebakken i dag

Klokka er no 17.13, temperaturen ute er 0 grader og det har vore opplett i dag. Det har på mange måtar vore fint i dag, vi har til og med sett sola ei lita stund.

Eg hadde ikkje lagt nokon plan for dagen så eg kom ikkje i gang med noko skikkeleg arbeid, eg hadde ikkje strikketøy ein gong. Mykje av tida gjekk med til å lage ein plan. 

Det første eg fann på i dag var å rydde opp i alle krydderboksar og posar. Eg oppdaga for litt sidan at eg hadde 6 glas med paprikakrydder, eg har berre kjøpt på nytt utan å sjå etter kva eg har. I dag rydda eg opp, og skreiv ned  kva eg hadde. Så får vi sjå om det blir orden på kryddene.

Klokka 14.15 tok eg på meg piggsko og vinterklede for å gå tur. Eg går ikkje på Vernet når det er snø, då går eg på vegane rundt på Vallabøen, Det var heilt nydeleg å vere ute i dag, ikkje kaldt heller, gradestokken stod på 0.

Då eg kom heim, hadde eg ein plan; då tok eg ned alle bilda på veggane i gangen, og det er mange, så vaska eg veggane og pussa glasa på bilda og hengde dei opp att-så er det gjort til jul. 

I morgon skal eg på trening og då må eg handle litt også; eg held på å gå på veggane fordi eg ikje har strikketøy, så eg må få kjøpt meg noko garn. Eg har ikkje sett TV i heile dag, fordi eg ikkje har strikketøy. Eg greier ikkje å sitte i ro med hendene i fanget-trur eg.Eg får no prøve å få med meg dagsnytt.

                                                                       Lyngvegen i dag

Dagbok 2024: 19.novemger

Klokka er no 18.00, temperaturen er under 0, kanskje minus 5?

I dag har eg hatt ein sløv dag. Det einaste jobben eg har gjort, er å lage ei gulrotkake -på føremiddagen. Det  vart no litt oppvask og rydding, men mest strikking. Eg begynte på eit lestepar i går og no er dei snart ferdige.

Eg har hatt på TV og sett nyheiter om att og om att .Marit har vore hos lege i dag, eg har berre fått referat på Messenger.

Ut på ettermiddagen tenkte eg meg ut å moke litt snø. Helge Lid kom og fresa tunet i dag morgon, men så kom plogen...etc, Eg tenkte at eg kunne få vekk alt frå trappa t.d- Det eg ikkje visste var at det var blitt veldig kaldt ute og det meste var frose til is. Eg fekk no tatt litt av på trappa og så slengde eg utover litt grovsalt.

Men det var fint å vere ute og eg fekk lyst å gå tur, ikkje på Vernet, men på vegane.

Men det var mørkt og kveld ute så det var vel for seint. Eg såg på klokka. 

Den var 5!!!!

Eg fekk på meg piggsko og tok på ei vinterjakke som ikkje har vore i bruk på ei stund. Eg bestemte meg for å gå ut Starevegen og inn att Olavsgata. Ingen lang tur,men lang nok når ein går med piggsko. Eg har berre ein stav og den tok eg ikkje med. Nils og eg hadde i si tid to stavar kvar, eg har lenge tenkt å kjøpe meg eit par stavar og no må eg snart somle meg til å gjere det. Veldig mange av dei som går tur på Vernet har stavar. Når ein går med piggsko på is er det veldig godt med ein stav eller to. Det hugsar eg frå i fjor, men då var eg ikkje  i stand til å bruke meir enn ein stav. 

Eg har ingen planar for morgon-dagen enno, men det blir vel ein tur på butikken

om ikkje anna.

Dagbok 2024: 18.november

Klokka er no 16.45, temperaturen ute er så vidt over 0 grader. Det var mykje snø då eg stod opp i dag og det har kome mykje meir no. Eg synest ikkje det er så populært med snø i november; det kan bli ein lang vinter.

Eg kunne sjølvsagt ikkje gjere hagearbeid i dag, så eg er glad for det eg fekk gjort siste veka. Men eg skulle ut i garasjen og hente ved, då tok eg på meg store støvlar og tok ein stav i handa.For sikkerheits skuld.

Eg fann ut at det var lurt å finne fram mokebrettet før det vart for mykje snø å vaspe i så eg gjekk ned i tilbygget og fann fram brett og spadar. Men fekk eg enda ein ide, eg ville brenne opp diverse hagegreiner etc, Ein stor sekk med greiner frå trea og eit plastnett med avfall frå demonteringa av klungerrosene(det var på ingen måte tørt, men eg ville no prøve.) Eg fyrte i omnen og vart sittande mykje å passe elden og legge inn på etter kvart. 

Eg slo sjølvsagt av  varmepumpa   så i dag har eg spart straum. Og kjempegodt og varmt har eg hatt det. Og alt er oppbrent no. Hadde litt god ved innimellom slik at eg fekk brent opp det som ikkje var så tørt også.

Middagsmat hadde eg att frå laurdag, så det var enkelt. Det vart å sette seg ned med ein kaffikopp, strikketøy og TV-etter middagen.

Problemet er no: Skal eg fare på trening i morgon? Orkar eg å få ut bilen? Eg likar ikkje å bestille bil frå pasientreiser til noko som ikkje er så alvorleg (Det er noko anna når ein skal på sjukehuset.Eg hadde nokre turar dit i fjor,  det var i desember) Eg får sjå kor mykje snø som kjem og kor mykje eg må moke for å komme ut med bilen.Det kan no hende eg greier å komme meg ut utan å moke også, viss eg tek kanten som plogen lagar. Eg synest det var litt for tidleg å komme med så mykje snø, så eg håper den fer igjen. Fort!

Eg har så smått begynt å tenkje på jula, kva eg skal lage til dømes. Men eg lagar aldri småkaker meir. Eg kjøpte ein boks med to sortar, den eine sorten var så hard at eg vart redd for tennene mine.

No skal eg inn att på stova og sjå TV og strikke. Vi gamle har det godt, berre vi får vere friske.

NB: Det er ikkje trening i morgon, det hadde eg gløymt, men Marit hugsar det. Så eg treng ikkje stå opp og moke snø i gryotta-ikkje i morgon!

Dagbok 2024: 17.november

 

Klokka er no18.22, men det har vore mørkt ute lenge. Eg har liksom ikkje vent meg til så mørke dagar enno. I dag har eg ikkje vore ute for ei dør. På føremiddagen såg eg TV og strikka litt. Det blei ingen tur på Vernet i dag heller, for det har regna.

Eg venta besøk av Margrete i dag, så det var no eit lyspunkt.

Eg hadde kaker i frysaren, så det var berre å koke kaffi. Erlend kom opp og var ei lita stund, men han hadde andre planar.

Det var ei stund sidan sist eg såg Margrete, så vi hadde mykje å snakke om, og brått hadde ho lita tid til å nå ferja, men ho kom om bord, det fekk eg melding om.

Komande veke skal eg ikkje på trening tysdag, berre torsdag.  Juleførebuingar blir det ikkje mykje av her i garden, men litt blir det vel i år også.
Jula begynner tidlegare for kvart år, det er lenge sidan eg såg det første juletreet. Men eg har ikkje høyrt julesongar på butikkane enno.

Denne veke kom eg i mål med sudokuen på fredag ettermiddag, så det vart ei god helg.

Dagbok 2024: 16.november

 

Utsikt frå trappa

Klokka er no16.11, temperaturen ute er +4 grader og i dag har det blese aldri så lite . Eg burde vel vere glad for det, for eg saknar vind her i Ørsta. Den vinden som vi får her no er veldig ujamn og kjem i kraftige rosser, så vi har reist opp att bossdunkane gong etter gong. For ein gongs skuld sov eg nokså lenge på morgonen, så klokka var ca 9+ då eg åt frokost. I går var eg oppe klokka 6 eller enda tidlegare.

Eg lurte på om jentene(Solveig og Margrete) kom på besøk i dag, men dei hadde meir enn nok å styre med der dei var, Eg køyrde på butikken tidleg på dag og handla.

Då eg kom inn att sakna eg bilnøkkelen, og når eg ikkje finn den, då er det krise, for eg har ein einaste nøkkel og det er reservenøkkelen. Eg leita alle stader i lomma,i veska etc. Men nøkkelen var borte, eg hadde låst bilen , så eg hadde no hatt nøkkelen i handa etter at eg kom heim, så den måtte vere her. Eg henta lommelykt og lyste under bilen og alle stader gjekk gjennom veske og posar, Men nei! Nøkkelen må vere her tenkte eg. I fjor var eg ute for det samme, då hang nøkkelen på ein spikar i garasjen, men ikkje akkurat DEN spikaren som han skulle henge på. Enn om det same hadde hendt i dag? Eg gjekk rett på sak, og der var nøkkelen. På feil spikar. Eg var så letta! eg har berre den nøkkelen og det er i grunnen ein reservenøkkel. Eg var bort på Toyota verkstaden ein gong og då spurde eg om det var muleg å få ein ny nøkkel. Nei, då var det mykje anna som måtte gjerast med bilen, og det ville koste over 20tusen kr. Derfor er den nøkkelen eg har veldig dyrebar.

Eg fekk melding om at ingen kom på besøk i dag, så då gjekk eg opp til Marit som er åleine heime, og vi fekk prateei god sttund. Då eg kom netd att laga eg meg middag, i dag vart det potetstappe , pølser og grønsaker. Fort og greit.

Så har eg snakka med Solveig som har vore i Bergen og sett det nye barnebarnet,det er Olaug som har fått ein gut.

No skal eg snart sette på TV-en og høyre nytt, har ikkje sett på før i dag.

                                                         Utsikt frå altanen i kveld

Dagbok 2024: 15.november

Klokka er no 19.42, det er + 10 grader ute og det regnar. Ja,ja, alt er betre enn snø.

Sidan det er fredag i dag, vaska eg fredagsvask. Det går rimeleg fort unna. Så kledde eg på meg uteklede og gjekk og klipte ned NEW Down -rosa. og noko til og hadde opp i ein sekk. Samla alle sekkane eg hadde, dei var ikkje alle like fulle, men eg ville rydde opp, så eg tok med alt i bilen og køyrde på VØR. Det var voldsom trafikk i dag, aller mest TIL Volda, men eg trur det er slik kvar fredag. 

Eg kom meg i alle fall vel heim, Me då eg køyrde inn i garasjen var det noko som ikkje stemte. Det var ikkje lys på bilen og eg forstod eigentleg ikkje kva det var(Det skulle eg ha gjort). Men eg blir litt skipla når det er noko med bilen. Heldigvis såg eg at ein av naboane var ute, så eg gjekk opp og snakka med han. Han kom ned og forstod med ein gong kva det var. Eg hadde på ein eller annan måte kome bort i den hendelen på rattet der ein stiller lyset. Det gjer eg aldri for eg er redd å gjere feil. Men når det skjer eit elle anna med bilen så får eg alltid hetta. Eg er kvar dag glad for å ha alle dess hjelpsomme naboane.

Elles har eg ikkje gjort så mykje i dag, eg har ikkje gått på Vernet t.d. Eg har no styrt litt inne, men mest av alt har eg styrt med sudokuen, og no er den i boks, så kan eg ha fred i sjela i helga.

No skal eg finne fram strikketøy og sette på TV-en og sjå korleis det går med alle krigane. Eg tenkte at Trump skulle fått orden på det heile. Eg har litt tru på han.

Eg vil ønske alle som er innom bloggen min ei god helg! Det er mange som har fått ut "julelys" på husa sine og det er litt godt å sjå på no i mørketida.

GOD HELG !!

Dagbok 2024: 14.november

Klokka er no15.43, temperaturen ute er + 8 graderC, og det er åt å mørkne aldri så lite. Då eg køyrde til treninga i dag, var det litt sol, meiner eg. I alle fall var det sol litt seinare. 

Etter treninga køyrde eg ned til ALTI og gjekk opp i gågata og bestilte frisør til den 28.november for då er det julebord på hotellet med pensjonistlaget. 

Det vart ein tur på Vernet i dag også, for sola var framme så vidt,men meir der oppe enn her. Eg sette meg ned på første benken og såg vestover. Sist vår tok dei bort mage tre der, og dei som står att er utan lauv. Dermed blir det litt meir utsikt, men ikkje nok. Hadde dei felt trea kunne vi fått sett fjorden utover, slik som dei gjer dei som bur på andre sida av bygda, dei har mykje betre utsikt enn vi, men det er vi som har SOL ! I dag trefte eg to damer som kom frå andre sida og ville gå tur i sola. Sol og sol fru Blom, der var litt disig i lufta i dag. Men sola kom seg så vidt igjennom.

                                 Sola kliv ikkje honnjet no lenger
 

Det stod ein mann på toppen då eg skulle gå opp steintrappa, han fortalde at han hadde vore inn på RAKE (LOEN) og der hadde han gått i steintrapper fleire kilometer og han vart så låk i føtene at det var ikkje måte på. Godt på få vite, så prøver eg ikkje på det.

Då eg sat på den siste benken kom der ein som eg kjenner og han hadde vore i Spania, men ikkje der det var så mykje væte. Så snakka vi litt om nedbør og oppvarming av havet etc.

Som dokke forstår så får eg vite litt av kvart på ein liten runde- i tillegg til at eg får mosjon. Det som er så spesielt med å gå der oppe , er at ein snakkar med folk uansett om ein kjenner dei eller ikkje. Og det synest eg er litt artig.

I dag er det den 14.november, det var Nils sin fødselsdag; hadde han fått leve ville han ha fylt 88 år i dag. Derfor tenkjer eg litt spesielt på han i dag. Harald, far til Lars, hadde også fødselsdag i november og så vart Erlend fødd i samme månaden som begge bestefedrene-eg hugsar vi feira alle tre på Bjørneset. No er det berre Erlend som er att, og han bur her med meg no. 

Eg har fyrt i omnen i stova, må ha det ekstra godt og varmt inne  når det er surt og kaldt ute.

I morgon er det fredag igjen og det er tre veker sidan Rasmus var her, eg har ikkje sett andre enn Erlend av familien sidan den helga. Solveig og Øystein har vore i Bergen sidan den tid -så no håper eg å få sjå nokre av slekta denne helga og få høyre kva dei har opplevd sidan sist..